ജോര്‍ദാന്‍ പാര്‍ലമെന്റ് തെരഞ്ഞെടുപ്പില്‍ 138 സീറ്റുകളില്‍ 31-ലും വിജയിച്ച് മുസ്‌ലിം ബ്രദര്‍ഹുഡിന്റെ രാഷ്ട്രീയ വിഭാഗമായ ഇസ്‌ലാമിക് ആക് ഷന്‍ ഫ്രണ്ട് (ഐ.എ.എഫ്) ഏറ്റവും വലിയ ഒറ്റ കക്ഷിയായി. 1989-ല്‍ നേടിയ 22 സീറ്റുകളായിരുന്നു ഇതിനു മുമ്പ് പാര്‍ട്ടിയുടെ ഏറ്റവും വലിയ നേട്ടം. അന്ന് 80 സീറ്റുകളായിരുന്നു പാര്‍ലമെന്റിലുണ്ടായിരുന്നത്. കഴിഞ്ഞ പാര്‍ലമെന്റില്‍ ഐ.എ.എഫിന് 10 സീറ്റാണ് കിട്ടിയിരുന്നത്.

പോള്‍ ചെയ്ത വോട്ടുകളില്‍ 22 ശതമാനവും നേടിയാണ് ഇസ്‌ലാമിസ്റ്റുകള്‍ വന്‍ കുതിപ്പ് നടത്തിയത്. രണ്ടാം സ്ഥാനത്തുള്ള മീസാഖ് പാര്‍ട്ടിക്ക് 21 സീറ്റ് കിട്ടി. ഇറാദ പാര്‍ട്ടിക്ക് 19-ഉം തഖദ്ദും പാര്‍ട്ടിക്ക് എട്ടും സീറ്റുകള്‍ ലഭിച്ചു. നിരവധി ഗവര്‍ണറേറ്റുകളിലും തലസ്ഥാനമായ അമ്മാനിലെ ജില്ലകളിലും ഇസ്‌ലാമിസ്റ്റുകളുടെ മുന്നേറ്റമാണ് കണ്ടത്. ജനറല്‍ സീറ്റുകളില്‍ നാലു വനിതകളെ വിജയിപ്പിച്ചതിനു പുറമെ വനിതാ സംവരണ സീറ്റുകളില്‍ മല്‍സരിച്ച നാലിലും പാര്‍ട്ടി വിജയം കൊയ്തു. ക്രിസ്ത്യാനികള്‍ക്ക് സംവരണം ചെയ്യപ്പെട്ട അമ്മാനിലെ ഏക സീറ്റിലും ഇസ്ലാമിസ്റ്റ് പാര്‍ട്ടി സ്ഥാനാര്‍ഥിയാണ് ജയിച്ചത്. സിര്‍കാസിയന്‍, ചെചനുകള്‍ എന്നിവര്‍ക്ക് സംവരണ ചെയ്യപ്പെട്ട രണ്ടു സീറ്റുകളിലും പാര്‍ട്ടി വിജയം നേടി. പുതിയ പാര്‍ലമെന്റില്‍ 27 വനിതകളുണ്ടാകും.

ഫലസ്ത്വീന്‍ പ്രശ്‌നത്തില്‍ സര്‍ക്കാര്‍ നിസ്സംഗവും നിഷേധാത്മകവുമായ നിലപാട് സ്വീകരിച്ചപ്പോള്‍ സയണിസ്റ്റ് ഭീകരതക്കെതിരെ ഇസ്‌ലാമിസ്റ്റ് പാര്‍ട്ടി ശക്തമായി രംഗത്തുവരികയുണ്ടായി. ഇത് വോട്ടാക്കി മാറ്റുന്നതില്‍ പാര്‍ട്ടി വിജയിച്ചു. ജനങ്ങളുടെ നീറുന്ന പ്രശ്‌നങ്ങളോട് മുഖംതിരിഞ്ഞുനിന്ന് സര്‍ക്കാറിന്റെ നിലപാടും വോട്ടര്‍മാരെ മാറിച്ചിന്തിപ്പിക്കാന്‍ കാരണമായി.

അല്‍ജീരിയയിലെ പ്രസിഡന്റ് തെരഞ്ഞെടുപ്പില്‍ അബ്ദുല്‍ മജീദ് തബൂന്‍ 94.7 ശതമാനം വോട്ടുകള്‍ നേടി വന്‍ വിജയം കൊയ്തു. സ്വതന്ത്രനായി മല്‍സരിച്ച നിലവിലെ പ്രസിഡന്റ് കൂടിയായ തബൂന് (78) സൈന്യത്തിന്റെ പിന്തുണയുണ്ടായിരുന്നു. പോള്‍ ചെയ്യപ്പെട്ട 56,30,000 വോട്ടുകളില്‍ 53,20,000 വോട്ടുകള്‍ അദ്ദേഹത്തിന് ലഭിച്ചതായി ദേശീയ തെരഞ്ഞെടുപ്പ് അതോറിറ്റി തലവന്‍ മുഹമ്മദ് ശര്‍ഫി അറിയിച്ചു. എതിര്‍ സ്ഥാനാര്‍ഥികളായ അബ്ദുല്‍ അലി ഹസ്സനി ശരീഫിന് മൂന്നു ശതമാനവും സോഷ്യലിസ്റ്റ് പാര്‍ട്ടി സ്ഥാനാര്‍ഥി യൂസുഫ് ഔശിശെക്ക് 2.1 ശതമാനം വോട്ടുകളുമാണ് ലഭിച്ചത്. തുടര്‍ച്ചയായി രണ്ടാം തവണയാണ് തബൂന്‍ പ്രസിഡന്റാകുന്നത്.

തെരഞ്ഞെടുപ്പില്‍ ചില കൃത്രിമങ്ങള്‍ നടന്നതായി എതിര്‍ സ്ഥാനാര്‍ഥികള്‍ പരാതിപ്പെട്ടു. തെരഞ്ഞെടുപ്പുകള്‍ നടക്കാറുണ്ടെങ്കിലും സൈന്യത്തിന് മേല്‍ക്കോയ്മയുള്ള രാജ്യമാണ് അല്‍ജീരിയ. തൊണ്ണൂറുകളുടെ തുടക്കത്തില്‍ പ്രാദേശിക, ദേശീയ തെരഞ്ഞെടുപ്പുകളില്‍ ഇസ്‌ലാമിക് സാല്‍വേഷന്‍ ഫ്രണ്ട് വിജയിച്ചെങ്കിലും അവര്‍ അധികാരത്തിലേറാനിരിക്കെ സൈന്യം ഇടപെട്ട ചരിത്രമാണ് അല്‍ജീരിയയുടേത്. ഇലക് ഷന്‍ റദ്ദാക്കുകയും സാല്‍വേഷന്‍ ഫ്രണ്ടിനെ നിരോധിക്കുകയും ചെയ്തു. തുടര്‍ന്നുണ്ടായ ആഭ്യന്തര കലാപത്തില്‍ ലക്ഷത്തിലേറെ പേര്‍ക്ക് ജീവന്‍ നഷ്ടപ്പെട്ടു. അന്നു മുതല്‍ സൈന്യത്തിന്റെ പിന്തുണയിലാണ് 'ജനാധിപത്യ സര്‍ക്കാറുകള്‍' രാജ്യം ഭരിച്ചുപോന്നത്.

ആഫ്രിക്കയിലെ ഏറ്റവും വലിയ രാജ്യമായ അല്‍ജീരിയയില്‍ നാലരക്കോടിയാണ് ജനസംഖ്യ. രണ്ടു കോടി 40 ലക്ഷം വോട്ടര്‍മാര്‍ റജിസ്റ്റര്‍ ചെയ്‌തെങ്കിലും 48 ശതമാനത്തില്‍ താഴെയാണ് പോളിംഗ് രേഖപ്പെടുത്തിയത്. ഭരണത്തില്‍ സൈന്യത്തിന്റെ ഇടപെടലുകള്‍ വോട്ടര്‍മാരില്‍ വലിയ മടുപ്പുണ്ടാക്കിയിരിക്കുന്നു. ഇത്തവണയും യുവാജനങ്ങള്‍ ഉള്‍പ്പെടെ വലിയൊരു വിഭാഗം വോട്ടെടുപ്പില്‍നിന്ന് വിട്ടുനിന്നു. വോട്ടു ചെയ്തിട്ടെന്തു കാര്യമെന്നാണ് അവര്‍ ചോദിക്കുന്നത്. ഇലക്ഷന്‍ പ്രക്രിയയുടെ ഭാഗമാകണമെങ്കില്‍ തങ്ങളുടെ പ്രശ്‌നങ്ങള്‍ സര്‍ക്കാര്‍ മനസ്സിലാക്കണമെന്നാണ് യുവജനങ്ങളുടെ ആവശ്യമെന്ന് അല്‍ ജസീറ ലേഖകന്‍ റിപ്പോര്‍ട്ട് ചെയ്യുന്നു.

അഞ്ചു വര്‍ഷം മുമ്പ് ശക്തമായ ജനാധിപത്യ പ്രക്ഷോഭങ്ങള്‍ക്ക് സാക്ഷ്യം വഹിക്കുകയുണ്ടായി അല്‍ജീരിയ. പ്രസിഡന്റായി അഞ്ചാം തവണയും മല്‍സരിക്കാനുള്ള അബ്ദുല്‍ അസീസ് ബൂതലിഫ്കയുടെ നീക്കത്തിനെതിരെയാണ് 2019 ഫെബ്രുവരിയില്‍ ജനകീയ പ്രക്ഷോഭം ആരംഭിച്ചത്. ബൂതലിഫ്കയെ മല്‍സരിക്കാന്‍ അനുവദിക്കില്ലെന്നും പ്രധാനമന്ത്രി അഹ്‌മദ് ഔയാഹ്യ രാജിവെച്ചൊഴിയണമെന്നും പ്രക്ഷോഭകര്‍ ആവശ്യപ്പെട്ടു. ഹിറാക് പ്രക്ഷോഭം എന്ന പേരിലറിയപ്പെട്ട ജനകീയ മുന്നേറ്റ സമാധാനപരമായിരുന്നെങ്കിലും സൈന്യത്തെ വിട്ട് അടിച്ചമര്‍ത്താന്‍ ശ്രമിച്ചത് വലിയ പ്രശ്‌നമായി. പ്രക്ഷോഭത്തെ തുടര്‍ന്ന് 2019 ഏപ്രില്‍ 2-ന് ബൂതലിഫ്കക്ക് രാജിവെക്കേണ്ടി വന്നു. ഇരുപതു വര്‍ഷത്തോളമാണ് അദ്ദേഹം അധികാരത്തിലിരുന്നത്.

ഇസ്‌ലാമിന്റെ ഏക ദൈവ സങ്കല്‍പത്തോട് സാമ്യത പുലര്‍ത്തുന്ന വിശ്വാസ രീതികളാണ് ലിംഗായത്ത് സമൂഹം പിന്തുടരുന്നതെന്ന് കര്‍ണാടകയിലെ ചിത്രദുര്‍ഗ ശ്രീ തരലബാലു മഠാധിപതി പണ്ഡിറ്റ് ആരാധ്യ ശിവചര്യ സ്വാമി. ഇസ്‌ലാമും ലിംഗായത്തും തീര്‍ത്തും വ്യത്യസ്ത ധാരകളാണ്. എന്നാല്‍, ലിംഗായത്ത് മതത്തില്‍ ബഹുദൈവാരാധനയും വിഗ്രഹ പൂജയുമില്ല. ഈ വിഷയത്തില്‍ മുഹമ്മദ് നബി പ്രബോധനം ചെയ്ത ഏകദൈവ വിശ്വാസ സങ്കല്‍പമാണ് ലിംഗായത്തുകള്‍ പിന്തുടരുന്നതെന്ന് അദ്ദേഹം പറഞ്ഞു. ഖുര്‍ആനുമായി ബന്ധപ്പെട്ട് താരാ സു രാഗമന്ദിറില്‍ ജമാഅത്തെ ഇസ്‌ലാമി സംഘടിപ്പിച്ച പരിപാടിയില്‍ പ്രഭാഷണം നടത്തുകയായിരുന്നു സ്വാമിജി.

ശൈവരാണ്  ലിംഗായതുകള്‍. ദൈവം സര്‍വ്വശക്തനും സര്‍വവ്യാപിയും എല്ലാം കേള്‍ക്കുകയും കാണുകയും ചെയ്യുന്നവനുമാണെന്ന് അവര്‍ വിശ്വസിക്കുന്നു. ദൈവത്തിലെത്താന്‍ വിഗ്രഹങ്ങളുടെയോ മധ്യവര്‍ത്തികളുടെയോ ആവശ്യമില്ല. നേരിട്ടുള്ള ആരാധന മാത്രം മതി. ദൈവത്തിലുള്ള സമ്പൂര്‍ണ സമര്‍പ്പണവും ലിംഗായത്ത് വിശ്വാസത്തിന്റെ ഭാഗമാണ്. 'ലിംഗായത് ശരണ' എന്നാണ് കന്നഡയില്‍ ഇതിനു പറയുക. പുനര്‍ജന്മത്തിലും ലിംഗായത്തുകള്‍ വിശ്വസിക്കുന്നില്ല. ഇസ്‌ലാമിലെ സക്കാത്ത് പോലെ സമ്പാദ്യത്തിന്റെ ഒരു ഭാഗം സമൂഹത്തിനു വേണ്ടി മാറ്റിവെക്കുന്നു. ദസോഹ എന്നാണ് ഇതിനു പറയുന്നത്. മദ്യവും മയക്കുമരുന്നും നിരോധിക്കപ്പെട്ടിരിക്കുന്നു. മനുഷ്യരെല്ലാം തുല്യരാണെന്ന ഇസ്‌ലാമിക സങ്കല്‍പവും ലിംഗായത്തുകള്‍ പിന്തുടരുന്നതിനാല്‍ അവര്‍ക്കിടയില്‍ ജാതിചിന്തകളില്ല.

ഹിന്ദു മത സങ്കല്‍പങ്ങളില്‍ നിന്ന് തീര്‍ത്തും വ്യത്യസ്തമാണ് ലിംഗായത്തിസം. ഹിന്ദു വേദങ്ങളെയും പുരാണങ്ങളെയും അവര്‍ നിരാകരിക്കുന്നു. ബ്രഹ്‌മ, വിഷ്ണു, മഹേഷ എന്ന ഹൈന്ദവ ത്രിമൂര്‍ത്തി സങ്കല്‍പങ്ങളും അവര്‍ അംഗീകരിക്കുന്നില്ല. ശിവനാണ് സ്രഷ്ടാവെന്ന് അവര്‍ വിശ്വസിക്കുന്നു. ശിവന് മനുഷ്യരൂപമില്ല. ലിംഗായത്തുകളുടെ ശിവന്‍ ഹിന്ദു ദൈവമായ ശിവനല്ല.

ഇന്ത്യയില്‍ മൂന്നു കോടി ലിംഗായത്തുകളും മൂവായിരത്തോളം മഠങ്ങളും ഉണ്ടെന്നാണ് കണക്കാക്കപ്പെടുന്നത്. കര്‍ണാടകയിലാണ് ഇവര്‍ ഏറ്റവുമധികമുള്ളത്. മഹാരാഷ്ട്ര, തെലങ്കാന, ആന്ധ്ര പ്രദേശ്, തമിഴ്‌നാട്, കേരളം, ഗുജറാത്ത് എന്നിവിടങ്ങളിലും ലിംഗായത്ത് ധര്‍മത്തില്‍ വിശ്വസിക്കുന്നവരുണ്ട്.

വാരാണസിയിലെ ഗ്യാന്‍വാപി, മഥുരയിലെ ശാഹി ഈദ്ഗാഹ് പള്ളികള്‍ പിടിച്ചടക്കാനുള്ള നീക്കങ്ങളുമായി വിശ്വ ഹിന്ദു പരിഷത്ത് (വി.എച്ച്.പി) വീണ്ടും രംഗത്ത്. ഇതിന്റെ ഭാഗമായി സെപ്റ്റംബര്‍ എട്ടിന് സംഘടനയുടെ നിയമ വിഭാഗം (വിധി പ്രഘോഷ്ത്) വിളിച്ചു ചേര്‍ത്ത വിപുലമായ യോഗത്തില്‍ കേന്ദ്ര നിയമ മന്ത്രി അര്‍ജുന്‍ രാം മേഘ്‌വാല്‍ പങ്കെടുക്കുകയുണ്ടായി.

നിയമ മന്ത്രി പങ്കെടുത്തതിനേക്കാള്‍ ഗൗരവമായി കാണേണ്ടതാണ്, സുപ്രീം കോടതിയില്‍ നിന്നും ഹൈക്കോടതിയില്‍ നിന്നും വിരമിച്ച മുപ്പതോളം ജഡ്ജിമാര്‍ പരിപാടിയില്‍ സംബന്ധിച്ചുവെന്നത്. ഇരു പള്ളികളുടെയും വഖ്ഫ് ഭൂമി കൈവശപ്പെടുത്താനുള്ള മാര്‍ഗങ്ങള്‍ ആരായുന്നതിന്റെ ഭാഗമായാണ് വിരമിച്ച ന്യായാധിപന്മാരെയും സമ്മേളനത്തില്‍ വിളിച്ചു കൂട്ടിയത്. കേന്ദ്രത്തിലെ എന്‍.ഡി.എ സര്‍ക്കാര്‍ കൊണ്ടുവന്ന വഖ്ഫ് ഭേദഗതി ബില്‍, സര്‍ക്കാര്‍ നിയന്ത്രണത്തിലുള്ള ക്ഷേത്രങ്ങള്‍ കമ്മിറ്റികള്‍ക്ക് കൈമാറല്‍, മതംമാറ്റ നീക്കങ്ങള്‍ തുടങ്ങിയവയും ചര്‍ച്ച ചെയ്തുവെന്നാണ് വി.എച്ച്.പി പ്രസിഡന്റ് അലോക് കുമാര്‍ പ്രസ്താവിച്ചത്.

വിരമിക്കുന്ന ജഡ്ജിമാരും പോലിസ് ഉദ്യോഗസ്ഥരും ഉയര്‍ന്ന ഐ.എ.എസ് റാങ്കിലുള്ളവരും സംഘ്പരിവാറിനു വേണ്ടി രംഗത്തുവരുന്നത് പുതുമയുള്ളതല്ല. ബി.ജെ.പി ഭരിക്കുന്ന സംസ്ഥാനങ്ങളിലെ പോലിസ് മേധാവികളും ചില ന്യായാധിപന്മാരും ഈ രീതിയിലാണ് പ്രവര്‍ത്തിക്കുന്നത് എന്നതും വാര്‍ത്തയല്ലാതായി മാറിയിരിക്കുന്നു. എന്നാല്‍, സി.പി.എം ഭരിക്കുന്ന കേരളത്തില്‍ പോലും ക്രമസമാധാന പാലനത്തിന്റെ ചുമതലയുള്ള ഉന്നത പോലിസ് ഉദ്യോഗസ്ഥര്‍ സംഘ്പരിവാറിന്റെ നയങ്ങള്‍ നടപ്പിലാക്കിക്കൊണ്ടിരിക്കുന്നു എന്ന ഞെട്ടിപ്പിക്കുന്ന വിവരങ്ങളാണ് പുറത്തുവന്നു കൊണ്ടിരിക്കുന്നത്. സംഘ്പരിവാറിന്റെ വംശഹത്യ പദ്ധതികള്‍ സമര്‍ഥമായി നടപ്പിലാക്കിക്കൊണ്ടിരിക്കുന്ന ഇത്തരക്കാരെ പിടിച്ച് പുറത്തിടുന്നത് പോയിട്ട് അവരെ ന്യായീകരിക്കുന്ന പ്രസ്താവനകളാണ് സി.പി.എം നേതാക്കള്‍ പോലും എത്തിപ്പെട്ടിരിക്കുന്നു എന്നത് ഗൗരവത്തോടെ കാണേണ്ടതാണ്.

ഇസ്രായേലിന്റെ അധീശത്വം തടയാന്‍ മുസ്‌ലിം രാജ്യങ്ങളുടെ കൂട്ടായ്മ രൂപപ്പെടേണ്ടതുണ്ടെന്ന് തുര്‍ക്കിയ പ്രസിഡന്റ് റജബ് ത്വയ്യിബ് ഉര്‍ദുഗാന്‍.  സയണിസ്റ്റ് രാജ്യത്തിന്റെ ധിക്കാരവും ഭീകര ചെയ്തികളും തടയാനുള്ള ഏക മാര്‍ഗം ഇസ്‌ലാമിക രാജ്യങ്ങളുടെ സഖ്യമുണ്ടാവുക എന്നതാണ് - ഇസ്താംബൂളിനു സമീപം ഇസ്‌ലാമിക സ്‌കൂള്‍ അസോസിയേഷന്റെ ചടങ്ങില്‍ സംസാരിക്കവെ ഉര്‍ദുഗാന്‍ പറഞ്ഞു. തുര്‍ക്കിയ-അമേരിക്കന്‍ പൗരത്വമുള്ള ഇരുപത്തിയാറുകാരിയായ ആക്റ്റിവിസ്റ്റ് അയ്‌സനൂര്‍ എസ്ജി എയ്ജിയെ അധിനിവേശ വിരുദ്ധ പ്രതിഷേധത്തിനിടെ വെസ്റ്റ്ബാങ്കില്‍ ഇസ്രായേല്‍ സൈന്യം വെടിവെച്ചുകൊന്ന സംഭവത്തിന്റെ പശ്ചാത്തലത്തിലായിരുന്നു ഉര്‍ദുഗാന്റെ പ്രസ്താവന.

ഈജിപ്ത്, സിറിയ എന്നീ രാജ്യങ്ങളുമായുള്ള ബന്ധം മെച്ചപ്പെടുത്താന്‍ തുര്‍ക്കിയ ഈയ്യിടെയായി നടത്തിവരുന്ന നീക്കങ്ങള്‍ ഇസ്രായേലിന്റെ അധിനിവേശ ഭീഷണിക്കെതിരെ ഐക്യദാര്‍ഢ്യനിര കെട്ടിപ്പടുക്കുന്നതിന്റെ ഭാഗമാണെന്ന് പ്രസിഡ്ന്റ് വ്യക്തമാക്കി. ഇക്കഴിഞ്ഞയാഴ്ച ഈജിപ്ത് പ്രസിഡന്റ് അബ്ദുല്‍ ഫത്താഹ് അല്‍ സീസിക്ക് ഉര്‍ദുഗാന്‍ ആതിഥ്യമരുളിയിരുന്നു. പന്ത്രണ്ടു വര്‍ഷത്തിനുശേഷമാണ് ഈജിപ്ഷ്യന്‍ പ്രസിഡന്റ് തുര്‍ക്കിയ സന്ദര്‍ശിക്കുന്നത്.

വിവിധ പ്രശ്‌നങ്ങളെ തുടര്‍ന്ന് മേഖലയിലെ അറബ് രാജ്യങ്ങളുമായി നിലനിന്നിരുന്ന അകല്‍ച്ച മാറ്റുന്നതിന് 2020 മുതല്‍ ഉര്‍ദുഗാന്‍ ശ്രമങ്ങള്‍ തുടങ്ങിയിരുന്നു. സുഊദി അറേബ്യ, യു.എ.ഇ എന്നീ രാജ്യങ്ങളുമായുള്ള ബന്ധങ്ങള്‍ മെച്ചപ്പെടുത്തിയതിനു പിന്നാലെയാണ് ഈജിപ്തുമായും അടുക്കാന്‍ തുടങ്ങിയത്. സിറിയന്‍ പ്രസിഡന്റ് ബശ്ശാറുല്‍ അസദുമായും ചര്‍ച്ചകള്‍ക്ക് ഒരുക്കമാണെന്ന് ജൂലൈയില്‍ ഉര്‍ദുഗാന്‍ വ്യക്തമാക്കിയിരുന്നു. സിറിയയിലെ ജനകീയ വിപ്ലവം ചോരയില്‍ മുക്കിക്കൊല്ലാനുള്ള ബശ്ശാറിന്റെ നീക്കങ്ങളെ തുടര്‍ന്ന് 2011-ലാണ് ആ രാജ്യവുമായുള്ള നയതന്ത്ര ബന്ധം തുര്‍ക്കിയ വിഛേദിച്ചത്.

ഇസ്രായേലിനെതിരെ മുസ്‌ലിം രാജ്യ കൂട്ടായ്മ എന്ന ഉര്‍ദുഗാന്റെ പ്രസ്താവന ശ്രദ്ധേയമാണ്. ഓര്‍ഗനൈസേഷന്‍ ഓഫ് ഇസ്‌ലാമിക് കോഓ്പ്പറേഷന്‍ (ഒ.ഐ.സി) എന്ന അമ്പത്തേഴു രാജ്യങ്ങളുടെ കൂട്ടായ്മ നിലവിലുണ്ടെങ്കിലും ഇസ്രായേലിന്റെ അധിനിവേശ ഭീകരതക്കും ഗസ്സയിലെ വംശഹത്യക്കുമെതിരെ ശബ്ദിക്കാന്‍ പോലും കഴിയാത്ത വിധം നിര്‍ജീവമാണത്. അംഗരാജ്യങ്ങളില്‍ പലതും ഒളിഞ്ഞും തെളിഞ്ഞും ഇസ്രായേലുമായി ചങ്ങാത്തത്തിലുമാണ്. 1969-ല്‍ ജറൂസലമിലെ അല്‍ അഖ്‌സ പള്ളി തീവെച്ച് നശിപ്പിക്കാന്‍ സയണിസ്റ്റ് ഭീകരര്‍ നടത്തിയ നീക്കങ്ങളുടെ പശ്ചാത്തലത്തിലാണ് അന്നത്തെ സുഊദി അറേബ്യന്‍ ഭരണാധികാരി ഫൈസല്‍ രാജാവ് മുന്‍കയ്യെടുത്ത് ഒ.ഐ.സി പിറക്കുന്നത്. എന്നാല്‍, രൂപീകരിക്കാന്‍ കാരണമായ ലക്ഷ്യങ്ങളൊന്നും ഒ.ഐ.സിക്ക് ഇപ്പോള്‍ വിഷയമല്ലാതായിരിക്കുന്നു. ഇത്തരമൊരു സാഹചര്യത്തില്‍ ഉര്‍ദുഗാന്റെ പ്രസ്താവന ഗൗരവത്തിലെടുക്കാമെങ്കിലും ബന്ധപ്പെടേണ്ട രാജ്യങ്ങളില്‍ ചിലതെങ്കിലും പ്രസ്തുത ഉദ്ദേശ്യ ലക്ഷ്യങ്ങള്‍ക്ക് വിഘാതം നില്‍ക്കുന്നവയാണ് എന്നതാണ് യാഥാര്‍ഥ്യം.

കേരളത്തിന് ഇസ്‌ലാമിനെ നേരത്തെ അറിയാം. എന്നാല്‍, ഇരുപതാം നൂറ്റാണ്ടിന്റെ തുടക്കത്തില്‍ കേരളം പരിചയിച്ചത് ആചാരാനുഷ്ഠാനങ്ങളില്‍ പരിമിതപ്പെട്ട ഇസ്‌ലാമിനെയായിരുന്നു. മുസ്‌ലിംകള്‍ മാത്രം പരിചയിച്ച അറബിമലയാളത്തില്‍ ഇസ്‌ലാംവായനയും. അതങ്ങനെ ആവരുതല്ലോ. മുഴുവന്‍ മനുഷ്യര്‍ക്കുമായി അല്ലാഹു നല്‍കിയ ദീനിനെ അതിന്റെ എല്ലാ സവിശേഷതകളോടും കൂടി മലയാളത്തിന് പരിചയപ്പെടുത്താനുള്ള ആഗ്രഹത്തിന്റെയും ശ്രമത്തിന്റെയും പേരാണ് പ്രബോധനം വാരിക

രാജ്യത്തിന്റെ പരാമ്പര്യത്തിനും ഇസ്‌ലാമിക മൂല്യങ്ങള്‍ക്കും വിരുദ്ധമായ രീതിയില്‍ എല്‍ജിബിടിക്യു ദിനം ആഘോഷിച്ച ആസ്‌ത്രേലിയന്‍ എംബസിയുടെ നടപടിയില്‍ പ്രതിഷേധം രേഖപ്പെടുത്തി ഇറാന്‍. തെഹ്‌റാനിലെ ആസ്‌ത്രേലിയന്‍ എംബസിയാണ് ചൊവ്വാഴ്ച ആഘോഷം സംഘടിപ്പിക്കുകയും അതിന്റെ ചിത്രങ്ങളും വീഡിയോകളും സമൂഹ മാധ്യമങ്ങളിലൂടെ പ്രചരിപ്പിക്കുകയും ചെയ്തത്.

അംബാസഡര്‍ ഇയാന്‍ മെക് കോണ്‍വില്ലെയെ വിളിച്ചുവരുത്തിയ വിദേശകാര്യ മന്ത്രാലയം സംഭവത്തെ ശക്തമായി അപലപിക്കുകയും ഇറാനെ നിന്ദിക്കുന്ന നടപടിയാണിതെന്ന് വ്യക്തമാക്കുകയും ചെയ്തു. എന്നാല്‍, ഇന്‍സ്റ്റഗ്രാം പോസ്റ്റില്‍ ഇറാനെ പരാമര്‍ശിക്കുന്നില്ലെന്നും ഇറാനെയോ രാജ്യത്തിന്റെ പാരമ്പര്യത്തെയോ ഇകഴ്ത്തിക്കാണിച്ചിട്ടില്ലെന്നും അംബാസഡര്‍ പ്രതികരിച്ചു. സെപ്റ്റംബര്‍ ഒന്നിന് ദേശീയ എല്‍ജിബിടിക്യു ദിനമാണ് ആസ്‌ത്രേലിയയില്‍.

തലസ്ഥാനമായ ഇസ്‌ലാമാബാദ് നഗരത്തില്‍ പൊതുസമ്മേളനങ്ങളും റാലികളും നിരോധിക്കാനുള്ള പാക്കിസ്ഥാന്‍ സര്‍ക്കാറിന്റെ നീക്കങ്ങള്‍ രാജ്യത്തെ വീണ്ടും പ്രക്ഷോഭങ്ങളിലേക്ക് തള്ളിവിടുമെന്ന ആശങ്ക ഉയര്‍ത്തിയിരിക്കുന്നു. ജയിലിലുള്ള മുന്‍ പ്രധാനമന്ത്രി ഇമ്രാന്‍ ഖാന്റെ പാക്കിസ്ഥാന്‍ തഹ്‌രീകെ ഇന്‍സാഫ് പാര്‍ട്ടി (പി.ടി.ഐ) അടുത്തയാഴ്ച തലസ്ഥാനത്ത് കൂറ്റന്‍ റാലി നടത്താന്‍ തീരുമാനിച്ചതോടെയാണ് അത് തടയാനായി പാര്‍ലമെന്റില്‍ ബില്ലുമായി ഭരണകക്ഷി രംഗത്തു വന്നത്.

ഭരണകക്ഷിയായ മുസ്‌ലിം ലീഗ് നവാസ് (പി.എം.എല്‍-എന്‍) അംഗം ഇര്‍ഫാനുല്‍ ഹഖ് സിദ്ദീഖി അവതരിപ്പിച്ച ബില്ല്, ഇസ്‌ലാമാബാദ് സിറ്റി അധികൃതര്‍ക്ക് വിപുലമായ അധികാരം നല്‍കുന്നതാണ്. ക്രമസമാധാന പ്രശ്‌നം ചൂണ്ടിക്കാട്ടി പൊതുയോഗങ്ങള്‍ക്കും റാലികള്‍ക്കും അനുവാദം നല്‍കുന്നത് തടയാനും നഗരത്തെ വിവിധ സുരക്ഷാ മേഖലകളാക്കി തിരിച്ച് പ്രസ്തുത ഇടങ്ങളില്‍ ഒരുവിധ കൂടിച്ചേരലുകളും അനുവദിക്കാതിരിക്കാനും ബില്ല് വ്യവസ്ഥ ചെയ്യുന്നു.

ബില്ല് തങ്ങളെ ലക്ഷ്യം വെച്ചുള്ളതാണെന്ന് പി.ടി.ഐ ആരോപിക്കുന്നു. ആഗസ്റ്റ് 22-ന് നടത്താനിരുന്ന റാലി സുരക്ഷാ കാരണങ്ങളാല്‍ പാര്‍ട്ടി നീട്ടിവെക്കുകയായിരുന്നു. കഴിഞ്ഞ തെരഞ്ഞെടുപ്പില്‍ 93 സീറ്റുമായി ഏറ്റവും വലിയ ഒറ്റക്കക്ഷിയായി മാറിയ പി.ടി.ഐക്ക്, റിസര്‍വ്ഡ് സീറ്റുകളില്‍ അവകാശപ്പെട്ട ഓഹരി നല്‍കാന്‍ വിസമ്മതിച്ചതിനെതിരെ പാര്‍ട്ടി സുപ്രീം കോടതിയെ സമീപിക്കുകയുണ്ടായി. ഇമ്രാന്‍ ഖാന്റെ പാര്‍ട്ടിക്ക് ദേശീയ, പ്രവിശ്യാ അസംബ്ലികളില്‍ റിസര്‍വ്ഡ് സീറ്റുകള്‍ക്ക് അവകാശമുണ്ടെന്ന് പരമോന്നത കോടതി കണ്ടെത്തിയെങ്കിലും കേസില്‍ വിശദമായ വിധിന്യായം ഇതുവരെ പുറപ്പെടുവിച്ചിട്ടില്ല. കോടതിയുടെ കാലതാമസത്തിനെതിരെയാണ് പാര്‍ട്ടി മുഖ്യമായും സമര രംഗത്തിറങ്ങുന്നത്. പി.ടി.ഐ അധികാരത്തില്‍ വരാതിനിരിക്കാന്‍ മുസ്‌ലിം ലീഗ് നവാസും (പി.എം.എല്‍-എന്‍), പീപ്പ്ള്‍സ് പാര്‍ട്ടിയും സഖ്യമുണ്ടാക്കി സര്‍ക്കാര്‍ രൂപീകരിക്കുകയായിരുന്നു.

പ്രമുഖ ഇസ്ലാമിക ദാർശനികനും പ്രബോധകനും ഇഖ്‌വാനുൽ മുസ്ലിമൂൻ്റെ സമുന്നത നേതാക്കളിലൊരാളുമായ മുഹമ്മദ് അഹ്മദ് റാശിദ് (86) വിടവാങ്ങി. ഇറാഖിലാണ് ജനനമെങ്കിലും സദ്ദാം ഹുസൈൻ്റെ ഏകാധിപത്യ ഭരണകാലത്ത് നാട്ടിൽ തങ്ങാൻ നിവൃത്തിയില്ലാതെ കുവൈത്ത്, യു. എ. ഇ തുടങ്ങിയ രാജ്യങ്ങളിൽ കുറെ കാലം പ്രവാസിയായി കഴിഞ്ഞു. ഒടുവിൽ മലേഷ്യൻ തലസ്ഥാനമായ ക്വാലലംമ്പൂരിൽ പ്രവാസിയായി കഴിയുമ്പോൾ കഴിഞ്ഞ ആഗസ്റ്റ് 27-നാണ് മരണം.
അബ്ദുൽ മുൻഇം സ്വാലിഹ് അൽ അലി അൽ ഇസ്സി എന്നാണ് യഥാർഥ പേര്. അബൂ അമ്മാർ എന്ന് വിളിപ്പേര്. പക്ഷെ ഇസ്ലാമിക പ്രസ്ഥാനവൃത്തങ്ങളിൽ അദ്ദേഹം അറിയപ്പെടുന്നത് മുഹമ്മദ് അഹ് മദ് റാശിദ് എന്ന പേരിലും. 1938 ജൂലൈ എട്ടിന് ബഗ്ദാദിലെ അഅ്സമി സ്ട്രീറ്റിലാണ് ജനനം. ചെറുപ്പം മുതലേ വായന കൂട്ടിനുണ്ടായിരുന്നു. പന്ത്രണ്ടാം വയസ്സിൽ തന്നെ ഫലസ്തീൻ അദ്ദേഹത്തിൻ്റെ മുഖ്യവിഷയങ്ങളിലൊന്നായിക്കഴിഞ്ഞിരുന്നു. ബഗ്ദാദിലെ ഏറ്റവും പ്രശസ്തമായ സ്കൂളിൽ നിന്ന് പകരം കഴിഞ്ഞ ശേഷം ബഗ്ദാദ് യൂനിവേഴ്സിറ്റിയിൽ നിന്ന് 1962-ൽ ബിരുദം. അബ്ദുൽ കരീം ശൈഖി, തഖിയുദ്ദീൻ ഹിലാലി പോലുള്ള പ്രമുഖരാണ് അദ്ദേഹത്തിൻ്റെ ഗുരുക്കൻമാർ. ഇറാഖിലായിരിക്കുമ്പോൾ അഹ് ലുസ്സുന്നയിൽ പെട്ട വിവിധ സംഘടനകൾ തമ്മിൽ ഐക്യവും രഞ്ജിപ്പുമുണ്ടാക്കാനാണ് അദ്ദേഹം ശ്രമിച്ചത്.
അബ്ബാസി ഭരണകാലത്തെ കവികളെയും മറ്റു സാഹിത്യകാരൻമാരെയും ആഴത്തിൽ പഠിച്ചവരിലൊരാളായിരുന്നു ശൈഖ് റാശിദ്. ഇത് അദ്ദേഹത്തിൻ്റെ എഴുത്തിനും പ്രഭാഷണത്തിനും കാവ്യ ഭംഗി നൽകി. അറബി ഭാഷയിൽ പതിനാല് അക്ഷരങ്ങൾക്ക് പുള്ളികളുണ്ട്. ബാക്കി പതിനാല് അക്ഷരങ്ങൾക്ക് പുള്ളിയില്ല. ഇങ്ങനെ പുള്ളിയില്ലാ അക്ഷരങ്ങൾ മാത്രമുള്ള വാക്കുകൾ തെരഞ്ഞെടുത്ത് അദ്ദേഹം ഒരു പ്രസംഗ മത്സരത്തിൽ പങ്കെടുക്കുകയും അതിൽ വിജയിയാവുകയും ചെയ്തിട്ടുണ്ട്. നല്ല പദസമ്പത്തുള്ള ഒരാൾക്ക് മാത്രമേ ഇത് സാധ്യമാവൂ.
ഇറാഖിലെ പ്രമുഖ ഇഖ് വാൻ നേതാക്കളായ ശൈഖ് മഹ്മൂദ് സ്വ്വാഫ്, വലീദുൽ അഅ്സമി തുടങ്ങിയവരുടെ പ്രസംഗങ്ങൾ കേട്ടാണ് 1953-ൽ ഇഖ് വാനിലേക്ക് ആകൃഷ്ടനായത്. രാഷ്ട്രീയ പ്രവർത്തനത്തിൻ്റെ പേരിൽ ഇറാഖി ഭരണകൂടം റാശിദിന് വധശിക്ഷ വരെ വിധിച്ചപ്പോഴാണ് അദ്ദേഹം കുവൈത്തിലേക്ക് രക്ഷപ്പെട്ട് അവിടത്തെ പ്രശസ്ത മാഗസിനായ 'അൽ മുജ്തമഇ' ൻ്റെ പത്രാധിപരാവുന്നത്. അതിൽ അദ്ദേഹം എഴുതിയ കോളങ്ങൾ ശ്രദ്ധിക്കപ്പെട്ടു. ഇറാഖി സ്വേഛാധിപതിയുടെ ചാരക്കണ്ണുകൾ തന്നെ തേടിയെത്തിയപ്പോൾ അദ്ദേഹം യു.എ.ഇലേക്ക് പോയി. മലേഷ്യ, ഇന്തോനേഷ്യ, സുഡാൻ, സ്വിറ്റ്സർലൻഡ് തുടങ്ങിയ നാടുകളിൽ പിന്നീട് അദ്ദേഹം മാറി മാറി താമസിച്ചു.
ഇസ്ലാമിക പ്രസാധനത്തിൻ്റെ രീതി ശാസ്ത്രത്തെക്കുറിച്ചാണ് അദ്ദേഹത്തിൻ്റെ രചനകളധികവും. അൽ മുൻത്വലഖ്, അർറഖാഇഖ്, അൽമസാർ, റസാഇലുൽ ഐൻ, സ്വിനാഅതുൽ ഹയാത്ത് തുടങ്ങിയവയാണ് പ്രധാനകൃതികൾ.

ജമാഅത്തെ ഇസ്‌ലാമി കേരള ഹല്‍ഖയുടെ മുഖപത്രമാണ് പ്രബോധനം വാരിക. ജമാഅത്തിന്റെ ഔദ്യോഗിക നയങ്ങളും കാഴ്ചപ്പാടുകളും വിജ്ഞാപനങ്ങളുമെല്ലാം പ്രബോധന ത്തിലൂടെയാണ് പ്രത്യക്ഷപ്പെടാറുള്ളത്. അതേസമയം, പ്രബോധനത്തില്‍ വരുന്നതെല്ലാം ജമാഅത്തിന്റെ ഔദ്യോഗിക കാഴ്ചപ്പാടുകളല്ല. ഭിന്ന വീക്ഷണക്കാര്‍ക്കും പ്രബോധനം അതിന്റെ പേജുകള്‍ അനുവദിക്കാറുണ്ട്.

1949 ആഗസ്റ്റിലാണ് പ്രബോധനത്തിന്റെ ആദ്യ ലക്കം പുറത്തിറങ്ങിയത്. പ്രതിപക്ഷപത്രം (ദൈ്വവാരിക) ആയിരുന്നു അന്ന്. ജ.ഇ കേരള ഘടകത്തിന്റെ സ്ഥാപകന്‍ കൂടിയായ ഹാജി വി.പി. മുഹമ്മദലി സാഹിബും കെ.സി അബ്ദുല്ല മൗലവിയുമായിരുന്നു അണിയറ ശില്‍പികള്‍. എടയൂരില്‍ ഹാജി സാഹിബിനടുത്തുള്ള പുല്ലംപറമ്പില്‍ നമസ്‌കാരപള്ളി(ഇന്നത്തെ മസ്ജിദുല്‍ ഇലാഹ്)യില്‍ വെച്ചാണ് ഇരുവരും പത്രത്തിന്റെ മാറ്ററുകള്‍ തയാറാക്കിയിരുന്നത്. അച്ചടിച്ചത് തിരൂരിലെ ജമാലിയ്യ പ്രസ്സിലും.