അന്താരാഷ്ട്ര നിരീക്ഷകർ രണ്ടു തെരഞ്ഞെടുപ്പ് ഫലങ്ങളെ സൂക്ഷ്മമായി വിശകലനം ചെയ്തു കൊണ്ടിരിക്കുകയാണ്. ഫ്രാൻസിൽ ദേശീയ നിയമനിർമാണ സഭയിലേക്ക് നടന്ന തെരഞ്ഞെടുപ്പാണ് ഒന്ന്. തീവ്ര വലതു കക്ഷിയായ നാഷ്നൽ റാലി, സഭയിൽ ഭൂരിപക്ഷം നേടുമെന്ന് പ്രവചിക്കപ്പെട്ടിരുന്നെങ്കിലും അപ്രതീക്ഷിത കുതിപ്പ് നടത്തിയത് ഇടതു സഖ്യമായ ന്യൂ പോപുലർ ഫ്രണ്ടാണ്. 577 അംഗ അസംബ്ലിയിൽ ഇടതു സഖ്യം 182 സീറ്റ് നേടി. പ്രസിഡന്റ് ഇമ്മാനുവൽ മക്രോണിന്റെ നേതൃത്വത്തിലുള്ള സെന്ററിസ്റ്റ് മുന്നണി 163 സീറ്റുകൾ നേടി രണ്ടാം സ്ഥാനത്തെത്തി. തീവ്ര വലതു പക്ഷത്തിന് 143 സീറ്റുകളേ നേടാനായുള്ളൂ. വോട്ടെടുപ്പിന്റെ തൊട്ടു മുമ്പ് ആദ്യം പറഞ്ഞ രണ്ടു മുന്നണികളും ഇരുനൂറോളം സീറ്റുകളിൽ ഉണ്ടാക്കിയ രഹസ്യ സീറ്റ് ധാരണയാണ് തൽക്കാലത്തേക്കെങ്കിലും തീവ്ര വലതു പക്ഷത്തെ അധികാരത്തിലെത്തുന്നതിൽനിന്ന് തടഞ്ഞതെന്ന് വ്യക്തം. ബ്രിട്ടനിൽ നടന്ന പാർലമെന്റ് തെരഞ്ഞെടുപ്പാണ് രണ്ടാമത്തത്. പതിനാല് വർഷമായി ഭരിച്ചുകൊണ്ടിരുന്ന കൺസർവേറ്റീവ് പാർട്ടിക്ക് ഇതുപോലൊരു തിരിച്ചടി അവരുടെ ചരിത്രത്തിൽ ഉണ്ടായിട്ടില്ല. 650 അംഗ പാർലമെന്റിൽ അവർക്ക് നേടാനായത് 121 സീറ്റുകൾ മാത്രം. കഴിഞ്ഞ തവണ അവർക്കുണ്ടായിരുന്ന 250 സീറ്റുകളാണ് നഷ്ടമായത്. ലേബർ പാർട്ടി ഏതാണ്ട് മൂന്നിൽ രണ്ട് ഭൂരിപക്ഷത്തോടെ അധികാരത്തിലെത്തുകയും ചെയ്തു.

പരമ്പരാഗത പാർട്ടികളുടെ ഊഴം വെച്ചുള്ള വിജയ പരാജയങ്ങൾക്കപ്പുറം ജനാധിപത്യ സംവിധാനങ്ങൾക്കകത്ത് നടക്കുന്ന തെരഞ്ഞെടുപ്പുകളെ ആഴത്തിൽ വിശകലനം ചെയ്യേണ്ട സന്ദർഭമാണിത്. ഫ്രഞ്ച് ഇസ്ലാമിക ചിന്തകനായ റജാ ഗരോഡി കഴിഞ്ഞ നൂറ്റാണ്ടിന്റെ തൊണ്ണൂറുകളിൽ, ഭൂരിപക്ഷത്തിന്റെ പേരിൽ നടക്കുന്ന ന്യൂനപക്ഷത്തിന്റെ കളിയാണ് ഇന്നത്തെ ജനാധിപത്യം എന്ന് ചൂണ്ടിക്കാട്ടിയിരുന്നു. കേവലം 15 ശതമാനം മാത്രം അമേരിക്കക്കാരുടെ പിന്തുണയോടെയാണ് ബിൽ ക്ലിന്റൺ പ്രസിഡന്റായതെന്നും കണക്കുകൾ വെച്ച് അദ്ദേഹം സമർഥിക്കുകയുണ്ടായി. അമേരിക്കയിൽ വീണ്ടുമൊരു പ്രസിഡന്റ് തെരഞ്ഞെടുപ്പ് നടക്കാൻ പോവുകയാണ്. ആര് ജയിച്ചാലും യഥാർഥ ജനപിന്തുണ ഇതിനെക്കാൾ കുറയാനേ സാധ്യതയുള്ളൂ. അമേരിക്കയിൽ ഈയിടെ നടന്ന അഭിപ്രായ സർവെയിൽ സ്ഥാനാർഥികളായി വരാൻ പോകുന്ന ട്രംപിലോ ബൈഡനിലോ തങ്ങൾക്ക് യാതൊരു താൽപ്പര്യവുമില്ല എന്ന് പകുതിയോളം വോട്ടർമാർ തുറന്നുപറഞ്ഞിരിക്കുകയാണ്. വോട്ടിംഗ് ശതമാനം കുത്തനെ കുറയാനാണ് സാധ്യത.

തോൽക്കുന്ന പാർട്ടികളിലോ ജയിക്കുന്ന പാർട്ടികളിലോ ജനങ്ങൾക്ക് യാതൊരു പ്രതീക്ഷയുമില്ല എന്നതാണ് വാസ്തവം. വേറൊരു ഓപ്ഷനും ഇല്ലാത്തതുകൊണ്ട് ചിലരെ ജയിപ്പിച്ചും ചിലരെ തോൽപ്പിച്ചും വിടുന്നുവെന്ന് മാത്രം. വോട്ടിംഗ് പാറ്റേൺ നോക്കിയാൽ ഇത് മനസ്സിലാവും. ബ്രിട്ടനിൽ ഗംഭീര വിജയം കുറിച്ച ലേബർ പാർട്ടി 64 ശതമാനം സീറ്റുകൾ പിടിച്ചെങ്കിലും കിട്ടിയ വോട്ട് 34 ശതമാനം മാത്രമാണ്. കഴിഞ്ഞ തവണത്തെക്കാൾ രണ്ട് ശതമാനം മാത്രം വർധന. വളരെ ചെറിയ പാർട്ടിയായ ലിബറൽ ഡമോക്രാറ്റിക് പാർട്ടിക്ക് 71 സീറ്റുകൾ നൽകി നിരാശരായ ജനം മറ്റൊരു പരീക്ഷണം കൂടി നടത്തി നോക്കുകയാണ്. പാശ്ചാത്യ ലോകത്തെ ലിബറൽ ഡമോക്രസിയിൽ പ്രതീക്ഷ നഷ്ടപ്പെട്ട ജനം ഒരു പ്രതീക്ഷക്കും വകയില്ലാത്ത തീവ്ര വലതു പക്ഷത്തെ ഇറ്റലി, സ്ലോവാക്യ, ഫിൻലൻഡ്, ഹംഗറി, ക്രൊയേഷ്യ, ചെക്ക് റിപ്പബ്ലിക് എന്നീ ആറ് യൂറോപ്യൻ രാജ്യങ്ങളിൽ അധികാരത്തിൽ പ്രതിഷ്ഠിച്ചിരിക്കുന്നു. ഫ്രാൻസിലും ജർമനിയിലും ഹോളണ്ടിലും സ്വീഡനിലും വൈകാതെ തീവ്ര വലതു പക്ഷം അധികാരം പിടിക്കും. ജനാധിപത്യത്തിന്റെ മറവിൽ കോർപറേറ്റുകൾ അധികാരം കുത്തകയാക്കി വെച്ച എല്ലാ മുതലാളിത്ത ലിബറൽ സംവിധാനങ്ങളും അമ്പേ പരാജയപ്പെട്ടുവെന്നും ജനങ്ങൾക്കവയിൽ വിശ്വാസം നഷ്ടപ്പെട്ടുവെന്നുമാണ് ഈ തെരഞ്ഞെടുപ്പുകളെല്ലാം നമ്മോട് വിളിച്ചു പറയുന്നത്. l

ഇന്ത്യൻ മുസ്ലിംകളുടെ പൊതുവേദികളായി അറിയപ്പെടുന്നവയാണ് മജ്ലിസെ മുശാവറയും മുസ്ലിം പേഴ്സണൽ ലോ ബോർഡും. രണ്ടാമത് പറഞ്ഞ പൊതു കൂട്ടായ്മ അതിന്റെ പേര് സൂചിപ്പിക്കുന്നതു പോലെ മുസ്ലിം വ്യക്തിനിയമ സംരക്ഷണത്തിനാണ് മുഖ്യ ഊന്നൽ കൊടുക്കുന്നത്. മുസ്ലിം സമൂഹം അഭിമുഖീകരിക്കുന്ന എല്ലാ പ്രശ്നങ്ങൾക്കും സാധ്യമാവുന്ന അളവിൽ കൂട്ടായി പരിഹാരം കാണുക എന്നതാണ് കുറേക്കൂടി പൊതുസ്വഭാവമുള്ള മജ്ലിസെ മുശാവറയുടെ ലക്ഷ്യം. അതിനു വേണ്ടി രാഷ്ട്രീയ പാർട്ടികളിലും ഭരണകൂടങ്ങളിലും സമ്മർദം ചെലുത്തുക എന്നതും 1964-ൽ രൂപവത്കരിക്കപ്പെട്ട സംഘടനയുടെ ലക്ഷ്യമാണ്. പക്ഷേ, ഏതാനും വർഷങ്ങളായി ഈ പൊതുവേദിയെ നാമെവിടെയും കാണുന്നില്ല. തെരഞ്ഞെടുപ്പുകളിൽ സമുദായത്തിന് വേണ്ടി പൊതു സ്ട്രാറ്റജികൾ രൂപവത്കരിക്കേണ്ടത് മുശാവറയാണെങ്കിലും കഴിഞ്ഞ തെരഞ്ഞെടുപ്പിൽ പോലും അതിന്റെ പേര് എവിടെയും പരാമർശിക്കപ്പെടുകയുണ്ടായില്ല. കഴിഞ്ഞയാഴ്ച പ്രതിപക്ഷ നേതാവ് രാഹുൽ ഗാന്ധി പത്തു വർഷത്തെ മോദി സ്വേഛാധിപത്യത്തെ നിശിതമായി വിചാരണ ചെയ്ത് സംസാരിക്കുകയുണ്ടായി. ജനാധിപത്യത്തെയും പൗരസ്വാതന്ത്ര്യത്തെയും തിരിച്ചുപിടിക്കാനുള്ള ഉജ്ജ്വല കാൽവെപ്പായി ആ പ്രസംഗം വിശേഷിപ്പിക്കപ്പെട്ടു. ആ പ്രസംഗത്തിൽ പോലും മുസ്ലിം സമൂഹത്തെ നേരിൽ ബാധിക്കുന്ന വിഷയങ്ങൾ പേരെടുത്ത് പറയാതെ അദ്ദേഹം വിട്ടു കളഞ്ഞു. ഇതുപോലുള്ള കാര്യങ്ങൾ ബന്ധപ്പെട്ടവരുടെ ശ്രദ്ധയിൽ പെടുത്തേണ്ടിയിരുന്നത് ഏതെങ്കിലും സംഘടനയല്ല, മുശാവറ പോലുള്ള പൊതുവേദിയായിരുന്നു. എങ്കിലേ മുസ്ലിം സമൂഹത്തിന്റെ ശബ്ദം വേണ്ട രീതിയിൽ വിലമതിക്കപ്പെടുകയുള്ളൂ.
നിർഭാഗ്യവശാൽ, മേൽപറഞ്ഞ തരത്തിലുള്ള എന്തെങ്കിലും ദൗത്യം കുറഞ്ഞ അളവിൽ പോലും നിർവഹിക്കാൻ കഴിയാത്തവിധം ദുർബലമാണ് ഇന്ന് ആ പൊതുവേദി. അത്രയൊന്നും അറിയപ്പെടാത്ത നവൈദ് ഹാമിദ് എന്നൊരാളാണ് ഇപ്പോൾ അതിന്റെ പ്രസിഡന്റ്. അദ്ദേഹത്തിന്റെ കാലാവധി കഴിഞ്ഞിട്ട് ഏതാനും വർഷങ്ങളായെങ്കിലും പുതിയ തെരഞ്ഞെടുപ്പ് നടത്താൻ അദ്ദേഹം സന്നദ്ധനാകുന്നില്ലെന്നും ഈ പൊതുവേദി മൊത്തത്തിൽ മരവിച്ചിരിക്കുകയാണെന്നും മൂന്നു തവണ അതിന്റെ പ്രസിഡന്റും സയ്യിദ് ശഹാബുദ്ദീന്റെ കാലത്ത് രണ്ടു തവണ അതിന്റെ വർക്കിംഗ് പ്രസിഡന്റുമായിരുന്ന ഡോ. സഫറുൽ ഇസ്ലാം ഖാൻ ആരോപിക്കുന്നു. പേരിൽ ചെറിയ മാറ്റം വരുത്തി അദ്ദേഹത്തിന്റെ നേതൃത്വത്തിൽ പുതിയൊരു മജ്ലിസെ മുശാവറ കഴിഞ്ഞ ജൂൺ ഒമ്പതിന് നിലവിൽ വരികയും ചെയ്തിരിക്കുകയാണ്. പിളർപ്പും വിട്ടുപോകലും മുശാവറക്ക് പുത്തരിയല്ല. വ്യത്യസ്ത രാഷ്ട്രീയ നിലപാടുകളുള്ള സംഘടനകൾക്ക് ഒരേ രാഷ്ട്രീയ നയം സ്വീകരിക്കാനാവില്ലെന്നത് സ്വാഭാവികം മാത്രമാണ്. 1967-ലെ പൊതു തെരഞ്ഞെടുപ്പിൽ സ്വന്തമായി സ്ഥാനാർഥികളെ നിർത്തി മത്സരിപ്പിക്കാനുള്ള മുശാവറയുടെ തീരുമാനത്തിൽ പ്രതിഷേധിച്ച് അതിന്റെ ഒന്നാമത്തെ പ്രസിഡന്റും കോൺഗ്രസ് നേതാവുമായ സയ്യിദ് മഹ്മൂദ് അതിൽനിന്ന് രാജിവെക്കുകയുണ്ടായി. ജംഹൂരി കൺവെൻഷൻ എന്ന വേദി രൂപവത്കരിച്ച് ജംഇയ്യത്തുൽ ഉലമ നേരത്തെ വേർപിരിഞ്ഞിരുന്നു. മില്ലി കൗൺസിൽ ഇതിൽനിന്ന് വഴിപിരിഞ്ഞുണ്ടായ മറ്റൊരു വേദിയാണ്. അതേസമയം ദയൂബന്ദി, ബറേൽവി, അഹ് ലെ ഹദീസ്, ശീഈ, ബോറ പോലുള്ള വ്യത്യസ്ത മതചിന്താധാരകളെ ഒരേ വേദിയിൽ കൊണ്ടുവരാൻ സൃഷ്ടിക്കപ്പെട്ട ആദ്യ അവസരം എന്ന നിലക്ക് ആ വേദിക്ക് ചരിത്ര പ്രാധാന്യവുമുണ്ട്.

ഇങ്ങനെ രാജിയും വേർപിരിയലുമൊക്കെ ഇടക്കിടെ ഉണ്ടായെങ്കിലും തലപ്പത്ത് വരുന്നവരുടെ ചടുലതക്കനുസരിച്ച് ചില നീക്കങ്ങളെല്ലാം നടത്താൻ വേദിക്ക് കഴിഞ്ഞിരുന്നു. ഇപ്പോഴത് ശരിക്കും നിശ്ചലമായി എന്നതാണ് വാസ്തവം. അതിനെ പുനരുജ്ജീവിപ്പിക്കാനാണ് താൻ പുതിയ ഭാരവാഹികളെ പ്രഖ്യാപിച്ചത് എന്ന് സഫറുൽ ഇസ്ലാം ഖാൻ പറയുന്നുണ്ടെങ്കിലും, ഫലത്തിൽ അത് പിളർപ്പ് തന്നെയാണല്ലോ. ജമാഅത്തെ ഇസ്ലാമി അഖിലേന്ത്യാ ഉപാധ്യക്ഷൻ മലിക് മുഅ്തസിം ഖാൻ പറഞ്ഞതു പോലെ, ചേരിതിരിഞ്ഞ് പോർവിളികൾ നടത്തേണ്ട സമയമല്ല ഇത്. ഈ പൊതുവേദിയെ ശക്തിപ്പെടുത്താനുള്ള വഴികളാണ് ആരായേണ്ടത്. പുതിയൊരു വേദിയുണ്ടാക്കലാണ് അഭികാമ്യം എന്ന് മുസ്‌ലിം കൂട്ടായ്മകൾക്ക് തോന്നുന്നുണ്ടെങ്കിൽ അതും ആലോചിക്കാവുന്നതാണ്. l

2024-ലെ പൊതു തെരഞ്ഞെടുപ്പ് പ്രചാരണങ്ങളിൽ ഏറ്റവും കൂടുതൽ പരാമർശിക്കപ്പെട്ട സമുദായം മുസ്ലിംകൾ ആയിരിക്കുമെന്ന കാര്യത്തിൽ സംശയമില്ല. മുസ്ലിംകൾക്കെതിരെയുള്ള വിദ്വേഷ പ്രസംഗങ്ങളും വീഡിയോ ക്ലിപ്പുകളുമാണ് സംഘ് പരിവാറിന്റെ ഏറ്റവും വലിയ പ്രചാരണായുധമെന്ന് ഈ തെരഞ്ഞെടുപ്പ് ഒരിക്കൽ കൂടി അടിവരയിട്ടു. മത സൗഹാർദത്തിന്റെ വക്താവായി നിലകൊള്ളേണ്ട ഒരു രാജ്യത്തിന്റെ പ്രധാനമന്ത്രി തന്നെയാണ് ഹേറ്റ് സ്പീച്ചിൽ ഒന്നാമൻ. ഹിന്ദു വോട്ട് സമാഹരിക്കാമെന്ന പ്രതീക്ഷയിൽ അദ്ദേഹം ചിലപ്പോൾ മുസ്ലിംകളെ നുഴഞ്ഞു കയറ്റക്കാരെന്ന് വിളിച്ചു. മുസ്ലിംകൾ സ്വന്തം ജനസംഖ്യ വർധിപ്പിച്ചുകൊണ്ടിരിക്കുകയാണെന്ന് പറഞ്ഞു, ഇതര സമുദായങ്ങളെ പേടിപ്പിച്ചു. നിങ്ങളുടെ കെട്ടുതാലി വരെ അവർ കൊണ്ടുപൊയ്ക്കളയും എന്ന് മുന്നറിയിപ്പ് നൽകി. ഇത് കേവലം വോട്ട് തട്ടാനുള്ള വാചകക്കസർത്തല്ല എന്ന് വ്യക്തം. കഴിഞ്ഞ പത്തു വർഷമായി മോദി ഗവൺമെന്റ് തുടർന്നു വരുന്ന മുസ്ലിം വിരുദ്ധതയുടെ തുടർച്ച മാത്രമാണ് ബി.ജെ.പി തെരഞ്ഞെടുപ്പ് റാലികളിൽ മുഴങ്ങിക്കേട്ടത്. മുസ്ലിംകളെ രാഷ്ട്രീയമായും സാമ്പത്തികമായും സാംസ്കാരികമായും ദുർബലപ്പെടുത്താനുളള ഒട്ടേറെ നീക്കങ്ങൾ മോദി ഭരണകൂടത്തിന്റെ ഭാഗത്ത് നിന്നുണ്ടായി. ഏറ്റവുമൊടുവിൽ, മുസ്ലിം മതപഠന കേന്ദ്രങ്ങളായ മദ്റസകൾ പൂട്ടിക്കാനുള്ള ശ്രമങ്ങൾക്കും തുടക്കം കുറിച്ചു. ദരിദ്രരായ മുസ്ലിം വിദ്യാർഥികൾക്ക് നൽകിവന്നിരുന്ന സ്കോളർഷിപ്പുകളിൽ ഒട്ടുമിക്കവാറും ഇതിനകം നിർത്തിക്കഴിഞ്ഞു. മുസ്ലിം സമുദായത്തിന്റെ വിദ്യാഭ്യാസ പുരോഗതിയെ കാര്യമായി ബാധിക്കുന്ന നീക്കമാണിത്. മൂന്നാമതും അധികാരത്തിലെത്തിയാൽ ഇത്തരം നീക്കങ്ങൾ കൂടുതൽ ശക്തിപ്പെടുത്തും എന്നതിന്റെ സൂചനകളാണിതെല്ലാം. ഒരു ഭാഗത്ത് സർവ മേഖലകളിൽനിന്നും മുസ്ലിംകളെ അകറ്റിനിർത്താൻ ആസൂത്രിത ശ്രമങ്ങൾ തുടരുമ്പോൾ തന്നെ, മുസ്ലിംകളെ പ്രീണിപ്പിക്കാൻ മതേതര കക്ഷികൾ ഇതര സമുദായങ്ങളുടെ അവകാശങ്ങൾ വരെ അവർക്ക് പതിച്ചു നൽകുന്നു എന്ന പച്ചക്കള്ളമാണ് സംഘ് പരിവാർ ആവർത്തിച്ചുകൊണ്ടിരിക്കുന്നത്.

എന്നാൽ സെക്യുലർ പാർട്ടികളോ? അവരും മുസ്ലിംകളെ അവഗണിക്കുകയാണ്. ജനസംഖ്യാനുപാതികമായി പാർലമെന്റിലും അസംബ്ലിയിലും മുസ്ലിം പ്രാതിനിധ്യം ഉറപ്പാക്കുന്നതിൽ അവർക്കും താൽപ്പര്യമില്ല. മുസ്ലിംകളെ കേവലം വോട്ടുബാങ്കുകളായേ സെക്യുലർ പാർട്ടികളും കാണുന്നുള്ളൂ. മുസ്ലിംകളുടെ ന്യായമായ അവകാശങ്ങൾക്കു നേരെ പോലും അവർ കണ്ണു ചിമ്മുന്നു. മുസ്ലിം പ്രശ്നങ്ങളിലൊന്നും കൃത്യമായ ഒരു നിലപാടും സ്വീകരിക്കുന്നില്ല. സംഘ് പരിവാർ അപ്പുറത്തുള്ളതുകൊണ്ട് മുസ്ലിം സമുദായം തങ്ങൾക്ക് വോട്ട് ചെയ്യാൻ നിർബന്ധിതരാണ് എന്ന കണക്കുകൂട്ടലിലാണ് അവർ. മുസ്ലിം പ്രശ്നങ്ങളിലൊന്നും ഒരു സ്റ്റാൻഡും എടുക്കാതെ അവരുടെ വോട്ട് കിട്ടുമെങ്കിൽ ഭൂരിപക്ഷത്തിന്റെ വോട്ടുകൾ നഷ്ടപ്പെടുത്തിയേക്കാവുന്ന പണിക്ക് എന്തിന് പോകണം എന്നാണവരുടെ ചിന്ത. സി.എ.എ, എൻ.ആർ.സി വിരുദ്ധ പ്രക്ഷോഭങ്ങളുടെ നേതൃതലത്തിലേക്ക് മതേതര കക്ഷികൾ വരാത്തതിന്റെ കാരണവും അതാണ്.

തെരഞ്ഞെടുപ്പുകളിൽ വളരെ വീറോടെയും വാശിയോടെയും മതേതര കക്ഷികൾക്കു വേണ്ടി രംഗത്തിറങ്ങാറുണ്ട് മുസ്ലിം സമുദായം. പക്ഷേ, അവരുടെ ന്യായമായ അവകാശങ്ങൾക്കു വേണ്ടി പോലും ശബ്ദമുയർത്താൻ സെക്യുലർ പാർട്ടികൾ തയാറാവാത്ത സ്ഥിതിവിശേഷമാണ്. മൃദു ഹിന്ദുത്വ നിലപാട് തന്നെയാണിത്. സംഘ് പരിവാർ അധികാരത്തിൽനിന്ന് പോയാലും മുസ്ലിം പ്രശ്നങ്ങളിൽ മറിച്ചൊരു നിലപാട് ഉണ്ടാവുന്നില്ലെങ്കിൽ മുസ്ലിം നേതാക്കളും പണ്ഡിതൻമാരും കൂട്ടായ്മകളും ഈ വിഷയം കാര്യഗൗരവത്തിൽ ചർച്ച ചെയ്യണം. ഇതിനെ മറികടക്കാൻ കൂട്ടായി സ്ട്രാറ്റജികൾക്ക് രൂപം നൽകണം. അല്ലാത്ത പക്ഷം വലിയ തിരിച്ചടികളെയാവും സമുദായം അഭിമുഖീകരിക്കേണ്ടി വരിക. l

കഴിഞ്ഞ പത്തു വര്‍ഷം പാശ്ചാത്യ നാഗരികതയെ സംബന്ധിച്ചേടത്തോളം വളരെ നിര്‍ണായകമായിരിക്കുമെന്ന് സാമൂഹിക ശാസ്ത്രജ്ഞര്‍ മുന്നറിയിപ്പ് നല്‍കുന്നു. ആ നാഗരികതയുടെ അടിക്കല്ലിളക്കുന്ന പ്രവണതകളാണ് കണ്ടുവരുന്നത്. തെരഞ്ഞെടുപ്പുകള്‍ സമയം തെറ്റാതെ നടക്കുന്നതുകൊണ്ട് പാശ്ചാത്യ രാജ്യങ്ങള്‍ ഇപ്പോഴും ജനാധിപത്യ രാജ്യങ്ങള്‍ തന്നെ. പക്ഷേ, ജനം തെരഞ്ഞെടുത്തയക്കുന്ന ഭരണാധികാരികള്‍ ജനഹിതം തീരെ മാനിക്കുന്നില്ല. അധികാരത്തിലെത്തിയാല്‍ പിന്നെ അവരെ നയിക്കുക വന്‍ കോര്‍പറേറ്റുകളും സയണിസ്റ്റ് ലോബികളുമൊക്കെയായിരിക്കും. അമേരിക്കന്‍ ഭരണകൂടത്തിലെയും അവിടത്തെ ഇരു ജനപ്രതിനിധി സഭകളിലെയും എണ്‍പത് ശതമാനത്തിലധികം പേരും സയണിസ്റ്റ് ലോബിയുടെ പിടിയിലാണെന്ന് പ്രമുഖ അറബ് കോളമിസ്റ്റ് മഹ്മൂദ് അബ്ദുല്‍ ഹാദി എഴുതുന്നു. ഇസ്രയേല്‍-അമേരിക്ക ബന്ധം തകര്‍ക്കാന്‍ ആര്‍ക്കും കഴിയില്ലെന്ന് അമേരിക്കന്‍ പ്രസിഡന്റ് ബൈഡന്‍ പറയുന്നതിന്റെ അര്‍ഥമതാണ്. ഇസ്രയേലിലേക്ക് ഇനിയുമിനിയും ആയുധ കപ്പലുകള്‍ അയക്കൂ എന്ന് മത്സരബുദ്ധിയോടെ ആവശ്യപ്പെട്ടുകൊണ്ടിരിക്കുകയാണ് അവിടത്തെ റിപ്പബ്ലിക്കന്‍മാരും ഡമോക്രാറ്റുകളും. പ്രസിഡന്റ് തെരഞ്ഞെടുപ്പ് നടക്കുന്ന ഈ വര്‍ഷം ഇരു കക്ഷികള്‍ക്കും ജൂത ലോബികളെ പ്രീതിപ്പെടുത്തിയേ മതിയാവൂ.
ജനങ്ങളുടെ നികുതിപ്പണവും രാജ്യത്തിന്റെ സാങ്കേതിക വിദ്യകളും ആയുധങ്ങളും കോര്‍പറേറ്റുകള്‍ക്കും സയണിസ്റ്റ് ലോബികള്‍ക്കും യാതൊരു മാനദണ്ഡങ്ങളും പാലിക്കാതെ നല്‍കിക്കൊണ്ടിരിക്കുന്നതിലുള്ള ജനരോഷമാണ് യഥാര്‍ഥത്തില്‍ അമേരിക്കന്‍-യൂറോപ്യന്‍ യൂനിവേഴ്‌സിറ്റികളില്‍ കണ്ടത്. അതിനെ േകവലം വിദ്യാര്‍ഥി പ്രക്ഷോഭമായി കണ്ടാല്‍ മതിയാവുകയില്ല. അമേരിക്കൻ ഭരണകൂടം അറസ്റ്റ് ചെയ്തവരില്‍ 2900 വിദ്യാര്‍ഥികളും അമ്പത് അധ്യാപകരും മറ്റനവധി അക്കാദമിഷ്യന്മാരുമുണ്ട്. വിദ്യാര്‍ഥികളെ പിന്തുണച്ചുകൊണ്ട് അവരുടെ രക്ഷിതാക്കളും രംഗത്തെത്തിയിട്ടുണ്ട്. ഭരണ സംവിധാനത്തോട്, അത് ഡമോക്രാറ്റുകളുടെതായാലും റിപ്പബ്ലിക്കന്‍മാരുടെതായാലും, ജനങ്ങള്‍ക്കുള്ള കടുത്ത അസംതൃപ്തിയാണ് ഇത്തരം പ്രക്ഷോഭങ്ങളിലൂടെ വെളിപ്പെടുന്നത്. ഗസ്സയിലെ വംശഹത്യ ഒരു നിമിത്തം മാത്രം. ഇത്തരം വിഷയങ്ങളില്‍ അറബ് വംശജരോ മുസ്്‌ലിംകളോ മാത്രമായിരിക്കും പ്രതിഷേധിക്കാനിറങ്ങുക എന്ന ഭരണകൂട കണക്കുകൂട്ടലുകളെ അട്ടിമറിച്ചുകൊണ്ട് മുസ്ലിംകളും ക്രിസ്ത്യാനികളും സയണിസ്റ്റ് വിരുദ്ധരായ ജൂതന്മാരും കറുത്തവരും ഇടതുപക്ഷക്കാരും ലാറ്റിന്‍ വംശജരും ഒറ്റക്കെട്ടായി രംഗത്തിറങ്ങിയത്, തങ്ങളുടെ ചെലവില്‍ ഭരണകൂടം മറ്റാര്‍ക്കോ വേണ്ടി ദാസ്യപ്പണി ചെയ്യുന്നതുകൊണ്ടാണ്. ആയുധ വില്‍പനയും വംശഹത്യയും ഞങ്ങളുടെ ചെലവില്‍ വേണ്ട എന്നാണ് അവരുയര്‍ത്തുന്ന മുദ്രാവാക്യം. മുഴുവന്‍ യൂനിവേഴ്‌സിറ്റി കാമ്പസുകളിലെയും പ്രക്ഷോഭങ്ങളുടെ അന്തര്‍ധാര ഇതുതന്നെയാണ്.
പാശ്ചാത്യ നാടുകളുടെ കഴിഞ്ഞ പത്തു വര്‍ഷത്തെ ചരിത്രം പരിശോധിച്ചാല്‍ ഭരണ സംവിധാനത്തോടുള്ള ജനങ്ങളുടെ ഈ വിയോജിപ്പ് പല രീതിയില്‍ പ്രകടിപ്പിക്കപ്പെടുന്നതായി കാണാം. ചിലപ്പോള്‍ വളരെ നിഷേധാത്മകമായിട്ടായിരിക്കും ആ വിയോജിപ്പും അസംതൃപ്തിയും മൂര്‍ത്ത രൂപം കൊള്ളുക. കഴിഞ്ഞ ഏതാനും വര്‍ഷങ്ങളായി യൂറോപ്യന്‍ നാടുകളിലും അമേരിക്കയിലും തീവ്ര വലതു ഗ്രൂപ്പുകള്‍ നേടുന്ന സ്വാധീനവും തെരഞ്ഞെടുപ്പ് വിജയങ്ങളും അതിന് തെളിവാണ്. വിദേശികളോടുള്ള വെറുപ്പും അറബ് വിരുദ്ധതയും ഇസ്ലാമോഫോബിയയുമൊക്കെയാണ് ഇതിന് പ്രത്യക്ഷ കാരണമെങ്കിലും, നിലവിലെ പാര്‍ട്ടികളിലും ഭരണ സംവിധാനങ്ങളിലുമുള്ള ജനങ്ങളുടെ അവിശ്വാസമാണ് അതിലൂടെ പ്രകടിപ്പിക്കപ്പെടുന്നത്. കൃത്യമായ ജനക്ഷേമ അജണ്ടകളൊന്നുമില്ലാതെ തെരഞ്ഞെടുപ്പിനെ നേരിടുന്ന തീവ്ര വലതുപക്ഷ കക്ഷികള്‍ അധികാരത്തിലെത്തിയാല്‍ തങ്ങളുടെ പ്രശ്‌നങ്ങള്‍ പരിഹരിക്കപ്പെടുമെന്ന് അവര്‍ക്ക് വോട്ട് ചെയ്യുന്നവരാരും കരുതുന്നുണ്ടാവില്ല. അതൊരു പ്രതിഷേധ വോട്ടാണ്. അത്തരം നിഷേധാത്മക പ്രതിഷേധങ്ങള്‍ ധനാത്മക പ്രതിഷേധങ്ങള്‍ക്ക് വഴിമാറുന്നതിന്റെ സൂചനയായി ഈ കാമ്പസ് പ്രക്ഷോഭങ്ങളെ കാണാം. l

നമ്മുടെ രാജ്യത്ത് നടന്നുകൊണ്ടിരിക്കുന്ന പൊതു തെരഞ്ഞെടുപ്പിന്റെ ഒന്നാം ഘട്ട പോളിംഗ് വിശദാംശങ്ങള്‍ പുറത്തു വന്നപ്പോള്‍, 2019-നെ അപേക്ഷിച്ച് പോള്‍ ചെയ്ത വോട്ടുകള്‍ നാല് ശതമാനം കുറവാണ്. ഇത് ഏതൊക്കെ പാര്‍ട്ടികളെ എങ്ങനെയൊക്കെ ബാധിക്കുമെന്ന് കൃത്യമായി പറയാന്‍ കഴിയില്ല. ജനങ്ങളെ മതത്തിന്റെ പേരില്‍ ഭിന്നിപ്പിക്കാന്‍ ഭരണകക്ഷി പുറത്തെടുക്കുന്ന വിഭാഗീയ രാഷ്ട്രീയത്തോടുള്ള മടുപ്പാണ് പോളിംഗ് ശതമാനം കുറയാന്‍ കാരണമായതെന്ന വിലയിരുത്തലുണ്ട്. ഒന്നാം ഘട്ട വോട്ടെടുപ്പ് കഴിഞ്ഞപ്പോള്‍ തന്നെ ഭരണകക്ഷിയായ ബി.ജെ.പി ഒരു സത്യം മനസ്സിലാക്കി. തങ്ങള്‍ വീമ്പിളക്കിയതു പോലെ, എന്‍.ഡി.എ സഖ്യത്തിന് നാനൂറും അതിലധികവും സീറ്റുകള്‍ കിട്ടാന്‍ യാതൊരു സാധ്യതയുമില്ല. ഭരണവിരുദ്ധ വികാരം ശക്തമായി നിലനില്‍ക്കുന്നു. ദുസ്സഹമായ ജീവിത സാഹചര്യങ്ങളും വര്‍ധിച്ചുവരുന്ന തൊഴിലില്ലായ്മയും ഭരണകക്ഷിക്ക് തിരിച്ചടിയാവും. പ്രതിപക്ഷം ഐക്യത്തോടെ നിന്നില്ലെങ്കില്‍ പോലും ജനം അവരെ പിന്തുണക്കുന്ന സാഹചര്യമുണ്ട്. ഇത് മറികടക്കാന്‍ സംഘ് പരിവാറിന്റെ കൈയില്‍ ഒരൊറ്റ ആയുധമേയുള്ളൂ- മുസ്്‌ലിംകള്‍ക്കെതിരെയുള്ള വിദ്വേഷ പ്രചാരണം. ഏത് നട്ടാല്‍ മുളക്കാത്ത നുണകളും അതിനു വേണ്ടി പുറത്തെടുക്കാം. തെരഞ്ഞെടുപ്പ് രണ്ടാം ഘട്ടത്തിലേക്ക് കടക്കവെ പ്രധാനമന്ത്രി നരേന്ദ്ര മോദി രാജസ്ഥാനിലെ ജലോറിലും ബൻസ് വാഡയിലും നടത്തിയ വിദ്വേഷ പ്രസംഗങ്ങള്‍ അതിന്റെ ലക്ഷണമൊത്ത ഉദാഹരണങ്ങളാണ്. പറഞ്ഞതിലൊന്നും അശേഷം ഖേദമോ തിരുത്തോ ഇല്ലാതെ റാലികളില്‍ ആ നുണകള്‍ തന്നെ ആവര്‍ത്തിച്ചുകൊണ്ടിരിക്കുന്നു. രാജ്യത്തെ ഇരുപത് കോടിയിലധികം വരുന്ന ഒരു ജനവിഭാഗത്തെയാണ് പ്രധാനമന്ത്രി സ്ഥാനത്തിരിക്കുന്ന വ്യക്തി 'നുഴഞ്ഞു കയറ്റക്കാര്‍' എന്ന് വിശേഷിപ്പിച്ചത്. അവര്‍ പൗരന്മാരേ അല്ല എന്നര്‍ഥം. കോണ്‍ഗ്രസ്സിന്റെ പ്രകടന പത്രികയില്‍നിന്നും യു.പി.എ സഖ്യത്തിന്റെ പ്രധാനമന്ത്രിയായിരുന്ന മന്‍മോഹന്‍ സിംഗിന്റെ പ്രസംഗത്തില്‍നിന്നും ചില വാക്യങ്ങള്‍ വാലും തലയും മുറിച്ചുമാറ്റി, 'കുട്ടികളെ കൂടുതല്‍ ഉല്‍പാദിപ്പിക്കുന്ന നുഴഞ്ഞുകയറ്റക്കാര്‍ക്ക് രാജ്യ സമ്പത്തിന്റെ ആദ്യ അവകാശം പതിച്ചുനല്‍കാനാണ് കോണ്‍ഗ്രസ് ശ്രമിക്കുന്നതെന്ന് ആരോപിക്കുന്നു. 2006 ഡിസംബര്‍ ഒമ്പതിന് 'സാമൂഹിക മുന്‍ഗണനകളെ'പ്പറ്റി മന്‍മോഹന്‍ സിംഗ് ചെയ്ത പ്രസംഗത്തില്‍, എസ്.സി, എസ്.ടി, ബി.സി, ന്യൂനപക്ഷങ്ങള്‍, സ്ത്രീകള്‍, കുട്ടികള്‍ തുടങ്ങിയ വിഭാഗങ്ങളെ ഉയര്‍ത്തിക്കൊണ്ടു വരുന്നതിന് പ്രത്യേക പദ്ധതികള്‍ ഉണ്ടാവണമെന്ന് ഉണര്‍ത്തിയിരുന്നു. ഇത് മുസ്്‌ലിംകള്‍ക്ക് മാത്രമുള്ള പദ്ധതിയായി ദുര്‍വ്യാഖ്യാനിക്കുകയാണ് സംഘ് പരിവാര്‍.

തെരഞ്ഞെടുപ്പ് ജയിക്കാന്‍ ഭരണകക്ഷി എന്തടവും പുറത്തെടുക്കുമെന്ന് തന്നെയാണ് കരുതേണ്ടത്. ജമാഅത്തെ ഇസ്്‌ലാമി അഖിലേന്ത്യാ കൂടിയാലോചനാ സമിതി ചൂണ്ടിക്കാട്ടിയതു പോലെ, രാജ്യത്തെ രാഷ്ട്രീയ, സാമൂഹിക, സാമ്പത്തിക സാഹചര്യം അതീവ ഗുരുതരമായ സ്ഥിതിവിശേഷങ്ങളിലൂടെ കടന്നുപോകുന്നതിന്റെ സൂചനകളാണിതെല്ലാം. സമൂഹത്തില്‍ വെറുപ്പും വിദ്വേഷവും വര്‍ധിച്ചുകൊണ്ടിരിക്കുന്നു. മത സ്വാതന്ത്ര്യം വളരെയേറെ ഇടുങ്ങിക്കൊണ്ടിരിക്കുന്നു. ഇതിന്റെയൊക്കെ സ്വാഭാവിക ഫലമാണ് ന്യൂനപക്ഷങ്ങള്‍ക്കെതിരെ, പ്രത്യേകിച്ച് മുസ്്‌ലിംകള്‍ക്കെതിരെ നടന്നുവരുന്ന വെറുപ്പുല്‍പാദനവും അതിക്രമങ്ങളും. ഇതെല്ലാം ന്യൂനപക്ഷങ്ങളെ കടുത്ത അരക്ഷിതാവസ്ഥയിലേക്ക് തള്ളിവിടുന്നു. മോദി സര്‍ക്കാറിന്റെ പത്തു വര്‍ഷത്തെ ഭരണ പരാജയം മറച്ചുവെക്കാനാണ് വര്‍ഗീയതയെയും വിഭാഗീയതയെയും പ്രചാരണ വേദികളില്‍ മുഖ്യ വിഷയമാക്കുന്നത്. ഭരണഘടന പ്രകാരവും രാജ്യനിയമങ്ങള്‍ പ്രകാരവും പറയാന്‍ പാടില്ലാത്ത കാര്യങ്ങളാണ് പറഞ്ഞുകൊണ്ടിരിക്കുന്നത്. തെരഞ്ഞെടുപ്പ് കമീഷനിലേക്ക് പരാതികളുടെ പ്രവാഹമുണ്ടായിട്ടും ഒരു നടപടിയും എടുക്കുന്നില്ല. തെരഞ്ഞെടുപ്പിന്റെ സുതാര്യതയെക്കുറിച്ചു തന്നെ സംശയങ്ങളുയര്‍ത്തുന്നുണ്ട് കമീഷന്റെ അനക്കമില്ലായ്മ. l

സാധാരണഗതിയില്‍ ഇസ്രയേലിനെതിരെ യു.എന്‍ രക്ഷാ സമിതിയില്‍ വരുന്ന ഏത് പ്രമേയവും അമേരിക്ക വീറ്റോ ചെയ്യാറുണ്ട്. കഴിഞ്ഞ മാര്‍ച്ച് 25-ന്, ഗസ്സയില്‍ ഉടനടി വെടിനിര്‍ത്തണമെന്ന പ്രമേയം രക്ഷാ സമിതിയില്‍ വന്നപ്പോള്‍ അമേരിക്ക വീറ്റോ പ്രയോഗിച്ചില്ല. അമേരിക്കന്‍ പ്രതിനിധി യോഗത്തില്‍നിന്ന് വിട്ടുനില്‍ക്കുകയായിരുന്നു. പ്രമേയം പാസ്സാവുകയും ചെയ്തു. സയണിസ്റ്റ് ഭീകരത തുടര്‍ന്നുകൊണ്ടിരിക്കുന്ന കൂട്ടക്കുരുതി ആ പ്രമേയം കാരണം കൂടുകയല്ലാതെ ഒട്ടും കുറഞ്ഞിട്ടില്ല. രക്ഷാ സമിതി പ്രമേയം പാലിക്കാന്‍ ഇസ്രയേലിന് ബാധ്യതയുണ്ട് എന്ന മട്ടിലുള്ള പ്രസ്താവനകളൊന്നും അമേരിക്കയുടെ ഭാഗത്ത് നിന്നുണ്ടായില്ല. തൊട്ടുടനെ ബില്യന്‍ കണക്കിന് ഡോളറിന്റെ ആയുധങ്ങള്‍ ഇസ്രയേലിലെത്തിക്കാന്‍ അമേരിക്ക ഏര്‍പ്പാടാക്കുകയും ചെയ്തു. പക്ഷേ, അമേരിക്ക വീറ്റോ ചെയ്യാതിരുന്നത് വലിയതെന്തോ സംഭവിച്ച പോലെയാണ് മീഡിയ റിപ്പോര്‍ട്ട് ചെയ്തത്. യഥാര്‍ഥത്തിലിത് ഒരു ഒളിച്ചുകളിയാണ്. അമേരിക്ക എന്തോ ചെയ്യാന്‍ ഭാവിക്കുന്നു എന്ന പ്രതീതിയുണ്ടാക്കാനാണ് ഇത്തരം ഗിമ്മിക്കുകള്‍. അമേരിക്കന്‍ സ്റ്റേറ്റ് സെക്രട്ടറി ആന്റണി ബ്ലിങ്കന്‍ ഇടക്കിടെ പശ്ചിമേഷ്യയിലെത്തി തെക്ക് വടക്ക് ഓടുന്നതും ഒരു ആത്മാര്‍ഥതയുമില്ലാത്ത കാപട്യ പ്രകടനങ്ങള്‍ മാത്രമാണ്. വെടിനിര്‍ത്തുന്നതില്‍ നെതന്യാഹുവിന്റെ താല്‍പര്യക്കുറവ് അതേ അളവില്‍ അമേരിക്കന്‍ പ്രസിഡന്റ് ബൈഡനുമുണ്ട്. കഴിഞ്ഞ ആറു മാസമായി ഗസ്സയില്‍ അതിക്രമങ്ങള്‍ അവസാനിപ്പിക്കാനുള്ള എല്ലാ അന്താരാഷ്ട്ര നീക്കങ്ങള്‍ക്കും പാര വെച്ചത് അമേരിക്കയാണ്. പൂര്‍ണ തോതിലുള്ള നയതന്ത്ര സംരക്ഷണമാണ് അമേരിക്ക ഇസ്രയേലിന് വേണ്ടി ഒരുക്കിയത്. സ്ത്രീകളെയും കുട്ടികളെയും കൂട്ടക്കൊല നടത്താനുള്ള സകല ആയുധങ്ങളും എത്തിച്ചുകൊണ്ടിരിക്കുന്നതും അമേരിക്കയാണ്. ഗസ്സയിലെ വംശഹത്യയോടുള്ള അമേരിക്കന്‍ നയത്തില്‍ വ്യക്തമാകുന്ന രണ്ട് പ്രധാന വശങ്ങളുണ്ട്. രാഷ്ട്രീയമായി ഇസ്രയേലിനെ സഹായിക്കുന്ന കേവലം സഖ്യ കക്ഷിയല്ല അമേരിക്ക. ഈ വംശഹത്യയില്‍ ഇസ്രയേലിനെപ്പോലെ പങ്കാളിയാണ് അമേരിക്കയും. കഴിഞ്ഞ ഡിസംബര്‍ അവസാനത്തില്‍ 230-ലധികം യുദ്ധ വിമാനങ്ങളാണ് അമേരിക്ക ഇസ്രയേലിലെത്തിച്ചത്; ആയുധങ്ങള്‍ നിറച്ച ഇരുപത് കപ്പലുകളും. നെതന്യാഹു-ബൈഡന്‍ സംഘര്‍ഷം മുറുകുന്നു എന്ന മട്ടില്‍ വാര്‍ത്ത വരുമ്പോഴും ആയുധമെത്തിക്കുന്നത് കൂടുകയല്ലാതെ കുറയുന്നില്ല. അമേരിക്ക ആയുധമെത്തിച്ചില്ലെങ്കില്‍ യുദ്ധം തുടര്‍ന്നുകൊണ്ടു പോകാനും ഇസ്രയേലിന് കഴിയില്ല. ഇതാണ് അമേരിക്കന്‍ നയത്തിന്റെ കാതലായ ഒന്നാമത്തെ വശം.

ഊതിവീര്‍പ്പിക്കപ്പെടുന്ന അമേരിക്കന്‍-ഇസ്രയേല്‍ ഭിന്നത, അരങ്ങേറിക്കൊണ്ടിരിക്കുന്ന ഗസ്സ വംശഹത്യയെക്കുറിച്ചല്ല എന്നതാണ് രണ്ടാമത്തെ വശം. ഗസ്സയില്‍ യുദ്ധം തുടങ്ങുന്നതിന് മുമ്പ് തന്നെ നെതന്യാഹുവും ബൈഡനും തമ്മില്‍ ചില അസ്വാരസ്യങ്ങളുണ്ട്. യുദ്ധാനന്തരമുള്ള ഗസ്സയെ കുറിച്ചും ഇരു കക്ഷികള്‍ക്കും ചില അഭിപ്രായ വ്യത്യാസങ്ങളുണ്ടെന്നാണ് പറയപ്പെടുന്നത്. ഇവ പെരുപ്പിച്ചു കാണിക്കുകയാണ്. അമേരിക്കന്‍ പ്രസിഡന്റ് പദവിയില്‍ രണ്ടാമൂഴം തേടി ബൈഡന്‍ തെരഞ്ഞെടുപ്പിനെ നേരിടുന്ന വര്‍ഷം കൂടിയാണിത്. അമേരിക്കയിലെ പുരോഗമന ഡമോക്രാറ്റുകളും അറബ് വംശജരുമൊക്കെ ബൈഡന്റെ ഗസ്സ നയത്തില്‍ ഒട്ടും തൃപ്തരല്ല. ബൈഡന്റെ വിജയ സാധ്യതയെ അത് പ്രതികൂലമായി ബാധിച്ചേക്കും. അവരെയൊന്ന് മയപ്പെടുത്തിയെടുക്കാന്‍ ചിലതെല്ലാം താന്‍ ചെയ്യുന്നുണ്ടെന്ന് വരുത്തണം. അതിനു വേണ്ടിയുള്ള കളികളാണ്. ഇതൊക്കെ യുദ്ധം നിര്‍ത്തിക്കിട്ടാന്‍ അമേരിക്ക നടത്തുന്ന ശ്രമങ്ങളാണ് എന്ന് തെറ്റിദ്ധരിക്കുന്നവരാണ് വിഡ്ഢികള്‍. വേണമെന്നുണ്ടെങ്കില്‍ അമേരിക്കക്ക് ഈ വംശഹത്യ എന്നേ തടയാമായിരുന്നു. l

വിശുദ്ധ ഖുര്‍ആനില്‍ ഒരുപക്ഷേ ഏറ്റവുമധികം പരാമര്‍ശിക്കപ്പെട്ടിരിക്കുക 'അന്ത്യദിന'വും 'പരലോക'വുമായിരിക്കും. ഖുര്‍ആനിലുടനീളം പല പല സന്ദര്‍ഭങ്ങളില്‍, വിവിധ പേരുകളിലും വിശേഷണങ്ങളിലും ഈ വിഷയം കടന്നുവരും. ആമുഖ അധ്യായമായ അല്‍ ഫാത്തിഹയില്‍ തന്നെ 'വിചാരണാ ദിന' (യൗമുദ്ദീന്‍)ത്തെക്കുറിച്ച് പറയുന്നുണ്ട്. മുഴുവന്‍ മനുഷ്യരും പ്രപഞ്ചനാഥന്റെ മുന്നില്‍ അണിനിരന്നു നില്‍ക്കുന്ന ദിനമാണത് (83:6). അന്ന് ഒന്നിന്റെയും ഉടമസ്ഥത മനുഷ്യര്‍ക്കുണ്ടാവില്ല. കൈവരിച്ചതൊക്കെയും കൈവിട്ടു പോയിട്ടുണ്ടാവും. മുഴുവന്‍ കാര്യങ്ങളിലും തീരുമാനമെടുക്കുന്നത് അല്ലാഹു മാത്രം (82:19). നിയമവിധികള്‍ വിശദീകരിക്കുമ്പോള്‍, ചരിത്ര സംഭവങ്ങള്‍ വിവരിക്കുമ്പോള്‍, പ്രപഞ്ചത്തിലെ എണ്ണമറ്റ ദൈവിക ദൃഷ്ടാന്തങ്ങളിലേക്ക് ശ്രദ്ധ ക്ഷണിക്കുമ്പോള്‍ - ഇങ്ങനെ ഏത് വിഷയം കൈകാര്യം ചെയ്യുമ്പോഴും അത്തരം ആയത്തുകളുടെ തുടക്കത്തിലോ മധ്യത്തിലോ അവസാനത്തിലോ വിചാരണാ നാളും പരലോകവും സൂചിപ്പിക്കപ്പെടാതിരിക്കില്ല. ഖുര്‍ആന്‍ റസൂലിനെ ഉണര്‍ത്തിയിട്ടുള്ളതു പോലെ, 'ഈ ലോകത്തെക്കാള്‍ നിനക്ക് അത്യുത്തമം പരലോകമാണ്്' (93:4) എന്നതാണ് അതിന് കാരണം. പരലോക വിഭവങ്ങളെ അപേക്ഷിച്ച് ഇഹലോകത്തേത് വളരെ ശുഷ്‌കമാണെന്നും (9:38) പഠിപ്പിക്കുന്നു. അല്ലാഹുവിങ്കലുള്ളതത്രെ ഉത്കൃഷ്ടവും ശാശ്വതവുമായിട്ടുള്ളത് (28:60).
വിചാരണാ ദിനത്തിന് ഖുര്‍ആനില്‍ ധാരാളമായി വന്നിട്ടുള്ള മറ്റൊരു പ്രയോഗം 'ഉയിര്‍ത്തെഴുന്നേൽപ്പ് നാള്‍' (യൗമുല്‍ ഖിയാമ) എന്നാണ്. ഖുര്‍ആനിൽ ഇത് എഴുപതോളം തവണ വന്നിട്ടുണ്ട്. ശിക്ഷയുടെ ദിനം (യൗമുല്‍ അദാബ്), പേടിച്ചോടുന്ന ദിനം (യൗമുല്‍ ഫിറാര്‍), സകലരും ഒരുമിച്ചുകൂട്ടപ്പെടുന്ന ദിനം (യൗമുൻ മജ്മൂഅ്) എന്നിങ്ങനെ എത്രയോ വിശേഷണങ്ങള്‍ വേറെയും വന്നിട്ടുണ്ട്. ഖുര്‍ആനില്‍ പലപ്പോഴും 'ദിനം' (യൗ ം) എന്ന് പറയുന്നത് തന്നെ ഉയിര്‍ത്തെഴുന്നേൽപ്പ് നാളിനെ കുറിക്കാനായിരിക്കും. ധനവും മക്കളും പ്രയോജനപ്പെടാത്ത ദിനം, സത്യവാന്മാര്‍ക്ക് അവരുടെ സത്യസന്ധത പ്രയോജനപ്പെടുന്ന ദിനം, അവര്‍ പുനര്‍ജീവിപ്പിക്കപ്പെടുന്ന ദിനം, കച്ചവടമോ സൗഹൃദമോ ഇടതേട്ടമോ ഒന്നും ഇല്ലാത്ത ദിനം, മനുഷ്യന്‍ തന്റെ സഹോദരനില്‍നിന്നും മാതാപിതാക്കളില്‍നിന്നും സഹധര്‍മിണിയില്‍നിന്നും മക്കളില്‍നിന്നും ഓടിപ്പോകുന്ന ദിനം…. ഇതേ ആശയത്തെ കുറിക്കാന്‍ ഖുര്‍ആന്‍ പതിമൂന്ന് ഇടങ്ങളില്‍ 'അസ്സാഅത്' (ഉയിര്‍ത്തെഴുന്നേൽപ്പ് വേള) എന്നും പ്രയോഗിച്ചതായി കാണാം. സ്വര്‍ഗ-നരകങ്ങളെക്കുറിച്ച വിവരണങ്ങളും ധാരാളമായി വന്നിട്ടുണ്ട്.

ഇങ്ങനെ നോക്കിയാല്‍ ഇത്രയധികം വിശദീകരണമുള്ള മറ്റൊരു വിഷയവും ഖുര്‍ആനില്‍ ഇല്ലെന്ന് കണ്ടെത്താനാവും. മനുഷ്യന്റെ പഞ്ചേന്ദ്രിയങ്ങള്‍ക്കും അനുഭവ സീമകള്‍ക്കും അപ്പുറമുള്ള (ഗൈബി) വിഷയമായതു കൊണ്ടാകാം ഇത്രയധികം ഈ വിഷയത്തിന് ഊന്നല്‍ നല്‍കുന്നത്. മനുഷ്യന്റെ ബുദ്ധിശക്തികൊണ്ട് മനസ്സിലാക്കിയെടുക്കാവുന്നതല്ല ഇതൊന്നും. അതിനാല്‍ എല്ലാം വിശദമായി ഖുര്‍ആനിൽ തന്നെ വിവരിക്കേണ്ടതുണ്ട്. ഏതൊരു മനുഷ്യനെയും ആന്തരികമായി നല്ല മനുഷ്യനാക്കുന്നത് പരലോക വിശ്വാസമാണ്. മനുഷ്യരെ നല്ല നടപ്പ് ശീലിപ്പിക്കാന്‍ ഭരണകൂടങ്ങള്‍ പലതരം നിയമങ്ങള്‍ കൊണ്ടുവരാറുണ്ട്. പണവും സ്വാധീനവുമുള്ളവര്‍ ആ നിയമങ്ങളെ തന്ത്രപരമായി മറികടക്കും. അവര്‍ ദുര്‍ബലരെ കടന്നാക്രമിക്കും; അവരുടെ അവകാശങ്ങള്‍ കവര്‍ന്നെടുക്കും. നിയമങ്ങള്‍ നിര്‍മിക്കുന്ന ഭരണകൂടങ്ങള്‍ വരെ ഇവര്‍ക്കൊപ്പമായിരിക്കും. കാരണം, ഇവര്‍ക്കൊന്നും തങ്ങളുടെ പ്രവൃത്തികള്‍ പരലോകത്ത് വിചാരണ ചെയ്യപ്പെടുമെന്ന വിശ്വാസമില്ല. അവര്‍ വിശ്വാസികളാണെങ്കില്‍ തന്നെ, തങ്ങളുടെ കര്‍മങ്ങള്‍ സസൂക്ഷ്മം വീക്ഷിക്കുന്ന, അതിന് വിചാരണാ നാളില്‍ രക്ഷാ ശിക്ഷകള്‍ നല്‍കുന്ന ഒരു ദൈവത്തില്‍ അവര്‍ വിശ്വസിക്കുന്നില്ല. ലോകത്ത് അരങ്ങേറുന്ന മുഴുവന്‍ അതിക്രമങ്ങളുടെയും അനീതികളുടെയും മൂല കാരണം ഈ പരലോക വിശ്വാസമില്ലായ്മയാണ്. അതുകൊണ്ടുതന്നെ ഒരു വിശ്വാസിയെ വ്യത്യസ്തനാക്കുന്നത് അവന്റെ അടിയുറച്ച പരലോക വിശ്വാസമാണ്. നിയമങ്ങള്‍ തന്നെ പിടികൂടില്ലെന്ന് ഉറപ്പുള്ളപ്പോഴും, അവന്‍ സദ്്വൃത്തനായി നിലകൊള്ളും. ആരും കാണുന്നില്ലെങ്കിലും പടച്ച തമ്പുരാന്‍ കാണുന്നുണ്ടെന്ന അടിയുറച്ച ബോധ്യം തന്നെയാണ് തിന്മകളില്‍നിന്നകന്ന് നന്മകളില്‍ മുന്നേറാന്‍ അവന് പ്രേരണയാവുക. l

അറിയിപ്പ്
ഈദുൽ ഫിത്വ്്ർ പ്രമാണിച്ച് ഓഫീസിന് അവധിയായതിനാൽ
12-04-2024-ന് പ്രബോധനം പ്രസിദ്ധീകരിക്കുന്നതല്ല.
ഏവർക്കും പെരുന്നാൾ സന്തോഷങ്ങൾ…

പരിശുദ്ധ റമദാൻ നമ്മിലേക്ക് എത്തിച്ചേരുകയായി. മനസ്സും ശരീരവും ഒരു പോലെ സംശുദ്ധമാക്കലാണ് നോമ്പിന്റെ ലക്ഷ്യം, അഥവാ ജീവിതത്തെ നന്മയിലേക്ക് മാറ്റിപ്പണിയുക. ഭൗതികതയുമായി കെട്ടുപിണഞ്ഞ്, മൂല്യങ്ങളെ ചവിട്ടിമെതിച്ച് സമൂഹം മുന്നോട്ടു നീങ്ങുമ്പോൾ അതിനെ നിയന്ത്രിക്കുന്ന മാന്ത്രിക വടിയാണ് നോമ്പ്.
ശരീരത്തെ പട്ടിണിക്കിടുകയും ആത്മാവിനെ ദേഹേച്ഛകളില്‍ അലയാന്‍ വിടുകയുമല്ല വ്രതാനുഷ്ഠാനം. മനസ്സിന്റെ വിമലീകരണമാണ് നോമ്പിലൂടെ സാധിക്കേണ്ടത്. ശരീരത്തെയും മനസ്സിനെയും വിശുദ്ധമാക്കുക, വൃത്തിയും വെടിപ്പുമുള്ള ജീവിതം നയിക്കുക, അശരണരെയും അഗതികളെയും പ്രയാസപ്പെടുന്നവരെയും പരിഗണിക്കുക, അധര്‍മത്തിനെതിരെ പൊരുതുക, ഇതിലൂടെയെല്ലാം പുണ്യം നേടി അല്ലാഹുവിന്റെ ഇഷ്ടദാസനാവുക- ഇതാണ് റമദാൻ ആഹ്വാനം ചെയ്യുന്നത്.
ഖുർആനെ അവഗണിച്ച്​ റമദാൻ ആചരണമില്ല. അവ രണ്ടും പരസ്പരം ബന്ധപ്പെട്ടുകിടക്കുന്നു. റമദാനിലെ ഖുർആൻ പാരായണം കേവല ചടങ്ങല്ല. ബോധപൂർവമായ പഠനവും മനനവുമാണ്. ആ രീതിയിൽ സമീപിക്കുമ്പോഴാണ് ഖുർആന്റെ ആത്മാവ് കണ്ടെത്താനാവുക. വ്യക്തി സംസ്കരണം, കുടുംബ സംവിധാനം, രാഷ്ട്ര നിർമാണം തുടങ്ങി ജീവിതത്തിന്റെ സമഗ്ര മേഖലകളെയും ചൂഴ്ന്നുനിൽക്കുന്ന കർമ പദ്ധതിയാണല്ലോ ഖുർആൻ അവതരിപ്പിക്കുന്നത്. അധർമങ്ങൾക്കെതിരായ പോരാട്ടങ്ങൾ അതിന്റെ ഭാഗമാണ്. അതിനുള്ള പരിശീലനം കൂടിയാണ് നോമ്പിന്റെ രാപ്പകലുകളും അവയിലെ പ്രാർഥനകളും സേവന പ്രവർത്തനങ്ങളും.

വലിയ പരീക്ഷണങ്ങൾക്ക് നടുവിലാണ് ഇത്തവണ മുസ്‌ലിം സമൂഹം റമദാനെ വരവേൽക്കുന്നത്. ഗസ്സയിൽ ഇസ്രയേൽ വംശഹത്യ എല്ലാ അതിരുകളും ലംഘിച്ചിരിക്കുന്നു. റമദാനിൽ വെടിനിർത്തൽ ഉണ്ടാകുമെന്ന വാർത്ത മാത്രമാണ് ഏക ആശ്വാസം. എന്നാൽ, അൽ അഖ്സ്വാ പള്ളിയിൽ പ്രാർഥനക്ക് എത്തുന്നവർക്ക് കടുത്ത നിയന്ത്രണം ഏർപ്പെടുത്തുമെന്ന് ഇസ്രയേൽ പ്രഖ്യാപിച്ചിട്ടുണ്ട്. കഴിഞ്ഞ മൂന്ന് വർഷങ്ങളിലായി റമദാനിൽ സയണിസ്റ്റ് ഭരണകൂടത്തിന്റെ ഇത്തരം നടപടികൾ സംഘർഷത്തിലേക്ക് നയിക്കുകയുണ്ടായി. ഇന്ത്യയിലും മുസ്‌ലിം സമൂഹം നിരവധി ഭീഷണികളെ നേരിട്ടുകൊണ്ടിരിക്കുന്നു. വാരണാസിയിലെ ഗ്യാൻവാപി മസ്ജിദിൽ ഹിന്ദുക്കൾക്ക് പൂജക്ക്‌ അനുമതി നൽകിയ അലഹബാദ് കോടതിയുടെ വിധിയും പുതിയ പൗരത്വ നിയമം മാർച്ചിൽ നടപ്പാക്കിയേക്കുമെന്ന വാർത്തയും അവയിൽ ചിലത് മാത്രം. മെയിൽ നടക്കുന്ന പൊതു തെരഞ്ഞെടുപ്പ് ഹിന്ദുത്വ രാഷ്ട്രത്തിലേക്കുള്ള അന്തിമ ചുവടുവെപ്പായാണ് സംഘ് പരിവാർ കാണുന്നത്.
ഇത്തരം പ്രതികൂല സാഹചര്യങ്ങളിലും മുസ്ലിം സമൂഹം പ്രത്യാശ കൈവിടരുത്. അല്ലാഹുവിലുള്ള അചഞ്ചലമായ വിശ്വാസമാണ് നമ്മുടെ ഒന്നാമത്തെ കൈമുതൽ. ആൾബലത്തിലും ആയുധ ശക്തിയിലും പിന്നിലായിട്ടും ബദ്റിൽ ശത്രുവിനെതിരായ ധർമസമരം ജയിച്ചത് പരിശുദ്ധ റമദാൻ മാസത്തിലാണ്. തീവ്ര സാധനയിലൂടെ നേടിയെടുക്കുന്ന ശക്തിയാണ് ഇതിൽ വിശ്വാസിയുടെ കൈമുതൽ.
മൂന്നു പേരുടെ പ്രാർഥന അല്ലാഹു തള്ളിക്കളയില്ലെന്ന് പ്രവാചകൻ വ്യക്തമാക്കിയിട്ടുണ്ട്. നോമ്പുകാരൻ നോമ്പ് അവസാനിപ്പിക്കുന്നത് വരെയുള്ള പ്രാർഥന, നീതിമാനായ ഭരണാധികാരിയുടെയും ആക്രമിക്കപ്പെട്ടയാളുടെയും പ്രാർഥനകൾ. വാന ലോകത്തേക്ക് ഉയർത്തപ്പെടുന്ന ഈ പ്രാർഥനകൾക്ക് വൈകിയാലും ഉത്തരം ലഭിക്കുമെന്നാണ് പ്രവാചകൻ നൽകിയ ഉറപ്പ്. സഹനത്തിലൂടെയും പ്രാർഥനയിലൂടെയും വെല്ലുവിളികളും പ്രതിസന്ധികളും നേരിടാനുള്ള കരുത്ത് ആർജിക്കാൻ ഈ റമദാനിൽ നമുക്ക് സാധിക്കട്ടെ.

റമദാനിന് ശേഷം നാം ആരായിരിക്കും? ഈ ചോദ്യത്തിന്റെ ഉത്തരം ആലോചിക്കേണ്ടത് റമദാനിന് ശേഷമല്ല, റമദാനിലേക്ക് പ്രവേശിക്കും മുമ്പാണ്. വ്യക്തിഗതവും കുടുംബപരവും സാമ്പത്തികവും സാമൂഹികവുമായ ഒട്ടേറെ പ്രതിസന്ധികൾ നമ്മുടെ മുന്നിലുണ്ട്. ഇവയ്ക്കെല്ലാമുള്ള പരിഹാരങ്ങളിലേക്ക് വാതിലുകൾ തുറക്കാൻ, നമ്മെ പരിശീലിപ്പിക്കാൻ റമദാനിന് കഴിയും. ഈ റമദാനിൽ നാം എന്തൊക്കെ നേടിയെടുക്കും എന്ന ചോദ്യത്തെ കൃത്യമായി അഭിമുഖീകരിച്ച് ഒരു വ്രതമാസ പദ്ധതി തയാറാക്കിയാൽ, എല്ലാ പ്രതിസന്ധികളെയും മറികടക്കാൻ കരുത്തുള്ള, ഇഹലോകത്തും പരലോകത്തും വിജയിക്കാൻ യോഗ്യതയുള്ള സത്യവിശ്വാസിയായി, സൽക്കർമചാരിയായി, സമാധാനം കൈവരിച്ച മാതൃകാ വ്യക്തിത്വവും സമൂഹവുമായി മാറാൻ നമുക്ക് സാധിക്കും. l

നവാസ് ശരീഫ് വിഭാഗം മുസ്്‌ലിം ലീഗും പീപ്പ്ള്‍സ് പാര്‍ട്ടിയും മുത്തഹിദ ഖൗമീ മൂവ്‌മെന്റും (എം.ക്യു.എം) ചേര്‍ന്ന് പുതിയ ഗവണ്‍മെന്റ് രൂപവത്കരിക്കുമെന്നാണ് പാകിസ്താനില്‍നിന്ന് ഇതെഴുതുമ്പോള്‍ പുറത്തുവരുന്ന വാര്‍ത്ത. മറ്റൊരു വാക്കില്‍, അവര്‍ക്കേ അതിനു കഴിയൂ എന്നും പറയാം. കാരണം, ഈ തെരഞ്ഞെടുപ്പില്‍ (അതിനെ തെരഞ്ഞെടുപ്പ് എന്നു പറയാമെങ്കില്‍) ഈ മൂന്ന് കക്ഷികള്‍ക്കുമായിരുന്നു സൈന്യത്തിന്റെ പിന്തുണ. തങ്ങള്‍ക്ക് അനഭിമതനായിത്തീര്‍ന്ന ഇംറാന്‍ ഖാനെ പ്രധാനമന്ത്രി സ്ഥാനത്തുനിന്ന് തെറിപ്പിക്കാന്‍ സൈനിക നേതൃത്വത്തിന് തുണയായത് ഈ മൂന്ന് കക്ഷികളുമാണല്ലോ. ഈ മൂന്ന് കക്ഷികളില്‍ മുസ്്‌ലിം ലീഗിലെ നവാസ് ശരീഫ് പ്രധാനമന്ത്രിയാകണം എന്ന് സൈന്യം നേരത്തെ തീരുമാനിച്ചതാണ്. അതിനാദ്യം ഇംറാന്‍ ഖാനെയും അദ്ദേഹത്തിന്റെ പാകിസ്താന്‍ തഹ് രീകെ ഇന്‍സാഫ് പാര്‍ട്ടിയെയും ഒതുക്കണം. പരമാവധി ഒതുക്കി. ഇംറാനെതിരെ നൂറ് കണക്കിന് കേസുകള്‍ ചാര്‍ജ് ചെയ്ത് അദ്ദേഹത്തെ ജയിലിലിട്ടു. പത്തും പതിനഞ്ചും കൊല്ലം ശിക്ഷയനുഭവിക്കേണ്ട കേസുകള്‍. ഇംറാന്‍ അകത്തായതോടെ ഇന്‍സാഫ് പാര്‍ട്ടിയുടെ നേതാക്കള്‍ക്ക് മുന്നില്‍ പ്രലോഭനങ്ങള്‍ വെച്ചുനീട്ടി. അതിന് വഴങ്ങാത്തവരെ ഭീഷണിപ്പെടുത്തി. ഇങ്ങനെ ഇന്‍സാഫിൽനിന്ന് അടര്‍ത്തിയവരെ ചേര്‍ത്ത് ഒരു പാര്‍ട്ടിതന്നെ തട്ടിക്കൂട്ടി. ഇംറാന്‍ ഖാനെ മാത്രമല്ല, ഇന്‍സാഫിന്റെ സമുന്നത നേതാക്കളില്‍ ഒരാളെപ്പോലും മത്സരിക്കാന്‍ സൈന്യം അനുവദിച്ചില്ല. പാര്‍ട്ടി ചിഹ്നമായി ക്രിക്കറ്റ് ബാറ്റും നല്‍കിയില്ല. പാര്‍ട്ടിയും പാര്‍ട്ടി ചിഹ്നവും പുറത്തായതോടെ സ്വതന്ത്രരായി മത്സരിക്കുകയേ ഇന്‍സാഫ് പാര്‍ട്ടിക്ക് നിവൃത്തിയുണ്ടായിരുന്നുള്ളൂ. തെരഞ്ഞെടുപ്പ് ദിവസം മൊബൈല്‍, ഇന്റര്‍നെറ്റ് ബന്ധങ്ങള്‍ അധികൃതര്‍ വിഛേദിച്ചതോടെ ഏത് ചിഹ്നങ്ങളിലാണ് ഇന്‍സാഫ് സ്വതന്ത്രര്‍ മത്സരിക്കുന്നത് എന്നു പോലും സാധാരണക്കാര്‍ക്ക് അറിയാന്‍ മാര്‍ഗമില്ലാതായി.

എതിരാളിയെ പിടയാന്‍ പോലും അനുവദിക്കാതെ ഈവിധം ഒതുക്കിയ ഈ 'തെരഞ്ഞെടുപ്പി'ല്‍ സൈന്യത്തിന്റെ മുഴുവന്‍ കണക്കുകൂട്ടലുകളും കാറ്റില്‍ പറത്തി ഇന്‍സാഫ് സ്വതന്ത്രര്‍ 101 സീറ്റ് കരസ്ഥമാക്കുന്നതാണ് കണ്ടത്. 'ബാറ്റ് വീശാതെ തന്നെ സെഞ്ച്വറി കടന്ന' ഈ പ്രകടനത്തിലൂടെ ജനം ഇന്‍സാഫിനോടൊപ്പമാണെന്ന് അസന്ദിഗ്ധമായി തെളിഞ്ഞു. ബൂത്ത് പിടിത്തവും കള്ളവോട്ടും ഇല്ലായിരുന്നെങ്കില്‍ ഇന്‍സാഫ് 170 സീറ്റ് നേടുമായിരുന്നു എന്ന് അതിന്റെ വക്താക്കള്‍ പറയുന്നതില്‍ ഒരു തെറ്റുമില്ല. ഉദാഹരണത്തിന്, വ്യവസായ - വ്യാപാര നഗരമായ കറാച്ചിയില്‍ ഇന്‍സാഫ് പാര്‍ട്ടിയും ജമാഅത്തെ ഇസ്്‌ലാമിയും ലബ്ബൈക് പാര്‍ട്ടിയും മാത്രമാണ് വോട്ടെണ്ണി പകുതി ആകുമ്പോള്‍ വരെ ചിത്രത്തിലുണ്ടായിരുന്നത്. എം.ക്യു.എം ആവട്ടെ അഞ്ച് ശതമാനത്തില്‍ താഴെ വോട്ടോടെ വളരെ പിറകില്‍. രാത്രി അസാധാരണമാംവിധം വൈകി റിസള്‍ട്ട് പ്രഖ്യാപിച്ചപ്പോഴോ, കറാച്ചി മേഖലയിലെ 18 സീറ്റില്‍ 17-ഉം എം.ക്യു.എമ്മിന്!! 'ദ ഡോണ്‍' പത്രത്തിന്റെ കോളമിസ്റ്റ് എഴുതിയ പോലെ, ജനവിധിയെ സൈന്യം എന്ന 'എസ്റ്റാബ്ലിഷ്‌മെന്റ് ' കൊള്ളയടിക്കുകയായിരുന്നു. വ്യാപകമായ പരാതികളാണ് നാനാ ഭാഗത്തുനിന്നും ഉയരുന്നത്. ജനവിധി കൊള്ളയടിച്ചവര്‍ക്ക് എങ്ങനെയാണ് സ്ഥിരതയുള്ള ഗവണ്‍മെന്റ് ഉണ്ടാക്കാന്‍ കഴിയുക എന്നാണ് രോഷാകുലരായി ജനം ചോദിക്കുന്നത്. പാകിസ്താനില്‍ ജനകീയ പ്രക്ഷോഭത്തിന്റെ നാളുകളാണ് വരാനിരിക്കുന്നത്. ഏറ്റവും കൂടുതല്‍ അനീതിക്കിരകളായ ലബ്ബൈക്, ജമാഅത്തെ ഇസ്്‌ലാമി (ജമാഅത്തിന് ദേശീയ അസംബ്ലിയില്‍ ഇത്തവണ സീറ്റൊന്നും ലഭിച്ചില്ല. നാല് പ്രവിശ്യാ അസംബ്ലികളിലായി 11 സീറ്റുണ്ട്) തുടങ്ങിയ സംഘടനകളുമായി ചേര്‍ന്ന് വന്‍ പ്രക്ഷോഭങ്ങള്‍ സംഘടിപ്പിക്കുമെന്ന് ഇംറാന്‍ ഖാന്‍ പ്രഖ്യാപിച്ചിട്ടുണ്ട്. ഖൈബര്‍ പക്്തൂണ്‍ഖ്വാ പ്രവിശ്യയില്‍ ജമാഅത്തുമായി ചേര്‍ന്നാണ് ഇന്‍സാഫ് മന്ത്രിസഭയുണ്ടാക്കാന്‍ പോകുന്നത്. സൈന്യവും അതിനൊപ്പമുള്ള ശിങ്കിടി പാര്‍ട്ടികളും വരാന്‍ പോകുന്ന ജനകീയ പ്രക്ഷോഭത്തെ എങ്ങനെ നേരിടുമെന്ന് കാത്തിരുന്നു കാണാം. l

''കഴിഞ്ഞ മൂന്ന് നൂറ്റാണ്ടുകളായി ലോകം കണ്ടുകൊണ്ടിരിക്കുന്ന സംഭവങ്ങള്‍, പാശ്ചാത്യ ആധുനികത അടി മുതല്‍ മുടി വരെ കപടവും വംശീയവുമാണെന്നതിന്റെ സമ്പൂര്‍ണ തെളിവാണ്.'' അമേരിക്കയിലെ കൊളംബിയന്‍ യൂനിവേഴ്‌സിറ്റി സാമൂഹിക ശാസ്ത്ര വിഭാഗം പ്രഫസര്‍ വാഇല്‍ ഹല്ലാഖ് അല്‍ ജസീറ ഡോട്ട് നെറ്റിന് അനുവദിച്ച അഭിമുഖത്തില്‍ പറഞ്ഞതാണിത്. ഫലസ്ത്വീന്റെ മണ്ണില്‍ ഇപ്പോള്‍ നടന്നുകൊണ്ടിരിക്കുന്ന ഏറ്റുമുട്ടലില്‍ ഒരു ഭാഗത്ത് ഇസ്രയേലും അമേരിക്കയും മറ്റു പാശ്ചാത്യ രാജ്യങ്ങളും, മറുവശത്ത് ഫലസ്ത്വീനികളും ഹമാസും മറ്റു പോരാളി സംഘങ്ങളും. ഇരുപക്ഷവും ചെയ്തുകൊണ്ടിരിക്കുന്നത് എന്താണെന്ന് മനസ്സിലാക്കാന്‍ വലിയ പ്രയാസമൊന്നുമില്ല. ഭൗതിക മാനദണ്ഡങ്ങള്‍ വെച്ചുള്ള ജയപരാജയങ്ങള്‍ക്ക് ഉപരിയായി, അവിടെ നടക്കുന്നത് ജ്ഞാനശാസ്ത്രപരമായ സംഘര്‍ഷം (Epistomological Conflict) ആണെന്ന തിരിച്ചറിയലാണ് ഏറെ പ്രധാനം. അതാണ് ഏറെ പ്രയാസകരമായതും. തനി പാശ്ചാത്യ പക്ഷപാതികള്‍ വരെ സമ്മതിക്കുന്ന ഒരു സത്യമുണ്ട്. യുദ്ധം കൊടുമ്പിരിക്കൊള്ളുമ്പോഴും മാനവിക മൂല്യങ്ങള്‍ കൈവിടാതെ, സിവിലൈസ്ഡ് എന്ന വാക്കിന്റെ മുഴുവന്‍ പൊരുളും ആവാഹിച്ച് പോരാടുകയാണ് ഹമാസ്. ഇസ്രയേലിന്റെ ഓരോ ചെയ്തിയെയും പൈശാചികം എന്നല്ലാതെ വിശേഷിപ്പിക്കാന്‍ കഴിയില്ല.

ഇത് ഹമാസിന്റെയും ഇസ്രയേലിന്റെയും പ്രകൃതത്തെയും ജീവിത കാഴ്ചപ്പാടുകളെയുമാണ് പ്രതിഫലിപ്പിക്കുന്നത്. വംശഹത്യക്ക് ഇരകളാകുമ്പോഴും തങ്ങള്‍ക്കൊരു ധാര്‍മിക ഉത്തരവാദിത്വമുണ്ടെന്ന് ഉറച്ചുവിശ്വസിക്കുന്നവരാണ് ഫലസ്ത്വീനികളും ഹമാസും. ലോകത്തെയും അതിന്റെ മുഴു സംവിധാനങ്ങളെയും ദൈവത്തിന്റെ ഉടമസ്ഥതയിലുള്ള ഒന്നായേ അവര്‍ക്ക് കാണാന്‍ കഴിയൂ. മനുഷ്യര്‍ക്കല്ല ഉടമസ്ഥതയുള്ളത്. അതിനാല്‍ പൂര്‍ണ ഉത്തരവാദിത്വത്തോടെ മാത്രമേ അവര്‍ക്കതിനെ കൈകാര്യം ചെയ്യാനാവൂ. ഇനി ശത്രുക്കള്‍ അതിഭീകരമായ അതിക്രമങ്ങള്‍ അഴിച്ചുവിടുകയാണെങ്കില്‍ പോലും, അവരെക്കുറിച്ച് തങ്ങള്‍ക്കൊരു ഉത്തരവാദിത്വമുണ്ടെന്ന കാര്യം ഈ സംഘം വിസ്മരിക്കുകയില്ല. അവരുടെ മനസ്സിനെ സംസ്‌കരിക്കാനുള്ള ഉത്തരവാദിത്വം കൂടി ആ സംഘം ഏല്‍ക്കും. ഇസ്രയേലിനോ പാശ്ചാത്യര്‍ക്കോ ഇങ്ങനെയൊരു പ്രപഞ്ച വീക്ഷണമില്ല. പ്രപഞ്ച നിയന്താവായ ദൈവത്തിലും അവര്‍ക്ക് വിശ്വാസമില്ല. മനുഷ്യനാണ് എല്ലാം. ഈ യുക്തിയനുസരിച്ച് കൈയൂക്കുള്ളവന്‍ കാര്യക്കാരന്‍. ദുര്‍ബലര്‍ എന്ത് ചെയ്യണമെന്ന് ശക്തര്‍ തീരുമാനിക്കും. ഏറ്റവും ശക്തിയുള്ളവരാണ് തീരുമാനങ്ങളെടുക്കുക.
വാഇല്‍ ഹല്ലാഖിന്റെ ഈ നിരീക്ഷണങ്ങളെ മുന്‍നിര്‍ത്തിയുള്ള ആലോചനകള്‍ ഇസ്്‌ലാമിക ചിന്താ മണ്ഡലങ്ങളില്‍ ഇപ്പോള്‍ സജീവമാണ്. ഇരുപതോളം പ്രഗത്ഭ ചിന്തകരും അക്കാദമീഷ്യരും പങ്കെടുത്ത ഒരു ചര്‍ച്ച ഈയിടെ ബൈറൂത്തില്‍ നടന്നിരുന്നു. ചില വിഷയങ്ങള്‍ ആഴത്തില്‍ പഠിക്കണമെന്ന തീരുമാനത്തിലാണ് അവരെത്തിയത്. പാശ്ചാത്യ നാഗരികത ഇന്ന് അഭിമുഖീകരിക്കുന്ന പ്രതിസന്ധികള്‍ ആ നാഗരികതയെതന്നെ തകര്‍ക്കുന്നതാണോ? അതോ, മറികടക്കാവുന്ന താല്‍ക്കാലിക പ്രതിസന്ധികള്‍ മാത്രമാണോ അവ? പുതിയ സംഭവ വികാസങ്ങളെ മുന്‍നിര്‍ത്തി ഒരു ഇസ്്‌ലാമിക നാഗരിക പ്രോജക്ടിന് രൂപം നല്‍കണമെന്നതായിരുന്നു രണ്ടാമത്തെ നിര്‍ദേശം. കാലഘട്ടം ഉയര്‍ത്തുന്ന വെല്ലുവിളികളെ അഭിമുഖീകരിക്കാനുള്ള കരുത്ത് അതിനുണ്ടാവണം. മുസ്്‌ലിം ലോകത്തെ മതപരവും മറ്റുമായ അനാവശ്യ തര്‍ക്കങ്ങള്‍ക്ക് എങ്ങനെ പരിഹാരം കാണും എന്നതായിരുന്നു മറ്റൊരു ചിന്താവിഷയം. തുര്‍ക്കിയയിലും മലേഷ്യയിലുമൊക്കെ നടന്നുവരുന്ന പരീക്ഷണങ്ങളെ എങ്ങനെ വികസിപ്പിക്കാമെന്ന ചര്‍ച്ചയും സജീവമായിരുന്നു. നാഗരികതകളുടെ സംഘട്ടനത്തിന് പകരം നാഗരികതകളുടെ സംവാദം എന്ന പരികല്‍പന ഉയര്‍ത്തിക്കൊണ്ടുവരണം. ഇതിനൊക്കെയുള്ള ബൗദ്ധിക ശേഷി ഇസ്്‌ലാമിസ്റ്റ് ധാരക്കുണ്ടെന്നാണ് ത്വൂഫാനുല്‍ അഖ്‌സ്വാ തെളിയിച്ചത്. l