പഠനം

2023 - കേരളീയ ഇസ് ലാമോഫോബിയ ഒരു വിശകലനം-2

നീതി നിഷേധം സംഘ് പരിവാര്‍ നടത്തുമ്പോള്‍ എല്ലാവരും ഒരുപോലെ പ്രതികരിക്കുന്ന രീതി കേരളത്തിന്റെ മാത്രം പ്രത്യേകതയാണ്. സംഘ് പരിവാർ മോഡല്‍ ഇസ് ലാമോഫോബിയയുടെ സ്വീകാര്യത 'പൊതു ഇസ്്ലാമോഫോബിയ' പോലെ സ്വീകാര്യമല്ല. കക്ഷി രാഷ്ട്രീയത്തിന്റെ കീഴ്‌വഴക്കങ്ങള്‍ അതിനെ തടഞ്ഞുനിർത്തുന്നു.

2023 മെയ് മാസമായതോടുകൂടി കേന്ദ്ര സർക്കാര്‍ ഏക സിവില്‍ കോഡ് നടപ്പാക്കുന്നതിനെതിരെ കേരളത്തില്‍ വലിയ ചർച്ചകള്‍ ഉണ്ടായി. മുസ് ലിം വ്യക്തി നിയമം, മുസ് ലിം വ്യക്തി നിയമ പരിഷ്‌കരണം തുടങ്ങിയവയെ കുറിച്ച ചർച്ചകളിലേക്കത് വികസിച്ചു. ഏക സിവില്‍ കോഡിനെ എതിർക്കുമ്പോള്‍ മറ്റുപാധികളില്ലാതെ കേരളം സംസാരിച്ചത് തികച്ചും ആശാവഹമായ ഒരു മാറ്റവും, സംഘ് പരിവാറിന്റെ ഇസ് ലാമോഫോബിയക്കെതിരായ പോരാട്ടത്തെ ശക്തിപ്പെടുത്തുന്നതുമായിരുന്നു. എന്നാല്‍, ഈ വിഷയത്തിലും നല്ല മുസ് ലിം/ മോശം മുസ് ലിം എന്ന തരംതിരിവു നിർമിക്കാന്‍ ശ്രമിച്ച സി.പി.എമ്മിന്റെ ശ്രമം വ്യാപകമായി വിമർശിക്കപ്പെട്ടിരുന്നു.

സാകൽ ഹിന്ദു സമാജ് നവി മുംബൈയിലെ കേരള ഹൗസിനു
മുമ്പിൽ എ.എൻ ഷംസീറിെനതിരെ നടത്തിയ പ്രതിഷേധം (ആഗസ്റ്റ് 1, 2023)
  1. വ്യക്തി അവകാശം
    വ്യക്തിക്ക് സ്വന്തം അഭിപ്രായങ്ങളും അഭിരുചികളും പ്രവർത്തനങ്ങളും ആകാമെന്നുള്ളത് ഒരു ഭരണഘടനാ അവകാശമായി എല്ലാവരും കരുതുന്നു. എന്നാല്‍, ഈ തെരഞ്ഞെടുപ്പിനുള്ള അവകാശം എല്ലാ വ്യക്തികൾക്കും നല്കാന്‍ ഇസ് ലാമോഫോബിയ എന്ന വംശീയ പ്രയോഗം വിസമ്മതിക്കുകയാണ്. വ്യക്തി ആഗ്രഹിക്കാഞ്ഞിട്ടും മുസ് ലിം സൂചനകള്‍ ഒരു വ്യക്തിക്ക് ആരോപിച്ചു നല്കുന്ന രീതി ഇതിന്റെ ഭാഗമാണ്. മതരഹിത വ്യക്തികൾ മുസ്‌ലിമായി ജനിച്ചതിന്റെ പേരില്‍ മാത്രം ഈ വിഷമസന്ധിയില്‍ പെടാറുണ്ട്. ഇസ് ലാമോഫോബിയ മുസ് ലിംകളുടെ വ്യത്യസ്തമായ പ്രവർത്തനം കൊണ്ടല്ല, മറിച്ച് വംശീയ ഘടനയുടെ പ്രവർത്തനമാണെന്ന സമീപനം ആവശ്യമാകുന്നത് ഇതിനാലാണ്.

7.1. ശാസ്ത്രീയ അഭിപ്രായവും
കമ്യൂണിസ്റ്റ് വ്യക്തിയും

ജൂലൈ 21-ന് കുന്നത്തുനാട് മണ്ഡലത്തില്‍ നടപ്പാക്കുന്ന സമഗ്ര വിദ്യാഭ്യാസ പദ്ധതിയുടെ ഉദ്ഘാടന പരിപാടിയില്‍ പ്രസംഗിക്കവേ നിയമസഭാ സ്പീക്കറായ എന്‍.എം ഷംസീര്‍ 'മിത്തും ശാസ്ത്രവും' എന്ന വിഷയത്തില്‍ നടത്തിയ പ്രസ്താവന ഏറെ വിവാദമായി. 'പാഠപുസ്തകങ്ങളില്‍ ശാസ്ത്രത്തിന് പകരം മിത്തുകളെ പ്രോത്സാഹിപ്പിക്കുകയാണ്. എന്തൊക്കെയാണിപ്പോള്‍ പഠിപ്പിക്കാന്‍ ശ്രമിക്കുന്നത്. വിമാനം കണ്ടുപിടിച്ചതിന്റെ ഉത്തരം എന്റെ കാലത്ത് റൈറ്റ് ബ്രദേഴ്‌സ് ആണ്. പുരാണകാലത്തേ വിമാനമുണ്ടെന്നും ലോകത്തിലെ ആദ്യത്തെ വിമാനം പുഷ്പകവിമാനമാണെന്നും ഇപ്പോള്‍ പറയുന്നു. ശാസ്ത്ര- സാങ്കേതിക രംഗം വികസിക്കുമ്പോള്‍ സയൻസിന്റെ സ്ഥാനത്ത് മിത്തുകളെ അവതരിപ്പിക്കുന്നു. അതിന്റെ ഭാഗമാണ് വിമാനം കണ്ടുപിടിച്ചത് ആരെന്ന ചോദ്യത്തിന് റൈറ്റ് സഹോദരന്മാര്‍ എന്നെഴുതിയാല്‍ തെറ്റാകുന്നതും പുഷ്പകവിമാനം ശരിയാകുന്നതും. കല്യാണം കഴിച്ചാല്‍ കുട്ടികളുണ്ടാകാത്തവര്‍ ഐ.വി.എഫ് ട്രീറ്റ്‌മെന്റിന് പോകാറുണ്ട്. ട്രീറ്റ്‌മെന്റില്‍ ചിലർക്ക് ഒന്നിലേറെ കുട്ടികളുണ്ടാകും. ഐ.വി.എഫ് ട്രീറ്റ്‌മെന്റ് പണ്ടേയുണ്ടെന്നും അങ്ങനെയാണ് കൗരവര്‍ ഉണ്ടായതെന്നും പറയുന്നു. പ്ലാസ്റ്റിക് സർജറി മെഡിക്കല്‍ സയൻസിലെ പുതിയ കണ്ടുപിടിത്തമാണ്. പ്ലാസ്റ്റിക് സർജറിയും പുരാണ കാലത്തേ ഉള്ളതാണെന്നും മനുഷ്യന്റെ ശരീരവും ആനയുടെ മുഖവുമുള്ള ഭഗവാന്‍ ഗണപതി ഇതിന്റെ ഉദാഹരണമാണെന്നും പറയുന്നു.'

പി.എ മുഹമ്മദ് റിയാസ്

പ്രസ്താവനക്കെതിരെ പ്രതിപക്ഷ കക്ഷികളും സംഘ പരിവാരവും രംഗത്തുവന്നു. മിത്തും ശാസ്ത്രവും തമ്മിലുള്ള ബന്ധത്തെക്കുറിച്ച് നിരവധി ചർച്ചകള്‍ മുൻകാലത്തും നടന്നിട്ടുണ്ട്. ആർക്കും ഷംസീറിന്റെ അഭിപ്രായത്തോട് യോജിക്കുകയും വിയോജിക്കുകയും ചെയ്യാം. എന്നാല്‍, ഷംസീറിന്റെ മുസ്്ലിം സ്വത്വത്തെയാണ് സംഘ് പരിവാര്‍ ലക്ഷ്യമിട്ടത് എന്നതായിരുന്നു ഇത്തവണത്തെ മാറ്റം. പൊതു സ്ഥാനങ്ങളില്‍ ഇരിക്കുന്ന വ്യക്തിയുടെ നിലപാടില്‍ സാമാന്യവല്ക്കരണമുണ്ടെങ്കില്‍ അതു ചൂണ്ടിക്കാട്ടാവുന്നതാണ്. ഇവിടെയാണെങ്കില്‍ ഷംസീര്‍ അഭിപ്രായം പറയുന്നത് ഒരു മുസ് ലിം വ്യക്തിയെന്ന നിലയിലല്ല, ഉത്തരവാദപ്പെട്ട ഒരു പൊതു പദവിയുടെ ഭാഗമായാണ്. സ്പീക്കറെന്ന നിലയില്‍ വിമർശിക്കാമായിരുന്നിട്ടും അദ്ദേഹത്തിന്റെ വ്യക്തിത്വത്തിൽനിന്ന് മുസ് ലിം സൂചനകള്‍ മാത്രം കണ്ടെടുക്കുന്നത് ഇസ് ലാമോഫോബിയയുടെ വേറിട്ട പ്രവർത്തന ശൈലിയുടെ ഭാഗമാണ്. മിത്ത് വിവാദത്തില്‍ ഷംസീറിനെ എതിർത്ത എൻ.എസ്.എസിനെ 'വർഗീയതക്കെതിരായ അതിശക്തമായ നിലപാടെടുത്ത സാമുദായിക പ്രസ്ഥാനമായി' ചിത്രീകരിച്ചത് ഷംസീറിന്റെതന്നെ പാർട്ടിയുടെ പുതുപ്പള്ളി ഉപ തെരഞ്ഞെടുപ്പിലെ സ്ഥാനാർഥി ജെയക്ക് എം. തോമസായിരുന്നുവെന്ന് (13 ആഗസ്റ്റ് 2023 ഡ്യൂള്‍ ന്യൂസ്) കൂട്ടിവായിക്കാം.

7.2. മുസ് ലിം ഒരു മന്ത്രിയാവുമ്പോള്‍
ഇസ് ലാംമത പ്രചാരണത്തിനായി ടൂറിസം വകുപ്പ് ധനസഹായം നല്‍കുന്നുവെന്നാണ് ഒക്ടോബര്‍ മാസത്തില്‍ ഉയർന്നുവന്ന ഒരു ആരോപണം. ജനനം കൊണ്ട് മുസ്ലിമായ ടൂറിസം മന്ത്രി മുഹമ്മദ് റിയാസാണ് ആരോപണവിധേയനായത്. ഇസ് ലാം ഇന്‍ കേരള എന്ന മൈക്രോ സൈറ്റിനുവേണ്ടി സർക്കാര്‍ 93 ലക്ഷം അനുവദിച്ചെന്നും അത് ഇസ് ലാംമത പ്രീണനമാണെന്നും ആരോപിക്കുന്ന ഒരു വീഡിയോയാണ് ആദ്യം പുറത്തുവന്നത്. 'കേരളം ഒരു മതത്തിന്റേത് മാത്രമല്ലെന്ന് റിയാസും പിണറായി വിജയനും മനസ്സിലാക്കണം. ഒരു മതത്തിന്റെ സവിശേഷത മാത്രം പൊതു ഖജനാവിലെ പണം ഉപയോഗിച്ച് പഠിപ്പിക്കുന്നത് മതേതര സമൂഹത്തിന് ഭൂഷണമല്ലെ'ന്ന് ബി.ജെ.പി നേതാവ് കെ. സുരേന്ദ്രനും ആരോപിച്ചു (ന്യൂസ് 18, ഒക്ടോബര്‍, 26, 2023).
കേരളത്തിലെ ഇസ് ലാമിന്റെ തുടക്കം മുതലുള്ള ചരിത്രവും മുസ് ലിംകളുടെ സംസ്‌കാരവും ജീവിതരീതിയും അടയാളപ്പെടുത്തുന്ന മൈക്രോ സൈറ്റിനുവേണ്ടി പണം അനുവദിച്ചെന്നത് വസ്തുതയാണ്. എന്നാല്‍, അത് പാതി സത്യമേ ആകുന്നുള്ളൂ. ഒക്ടോബര്‍ 16-നാണ് ഇതു സംബന്ധിച്ച ഉത്തരവ് ടൂറിസം വകുപ്പ് പുറപ്പെടുവിച്ചത്. കേരളത്തിന്റെ സംസ്‌കാര പൈതൃകം ലോകത്തെ അറിയിക്കുകയും അതിലൂടെ ടൂറിസ്റ്റുകളെ ആകർഷിക്കുകയുമായിരുന്നു ലക്ഷ്യം. ഇസ് ലാംമതത്തെ മാത്രമല്ല, ശബരിമലയെയും പത്മനാഭസ്വാമി ക്ഷേത്രത്തെയും മലബാറിലെ തെയ്യങ്ങളെയും കാവുകളെയും പരിചയപ്പെടുത്തുന്ന സൈറ്റുകൾക്കും പണം അനുവദിച്ചിരുന്നു. ക്രിസ്തുമതത്തെ മാത്രമല്ല, ജൂതമതത്തെ പരിചയപ്പെടുത്തുന്ന സൈറ്റുകൾക്ക് പോലും പണം നൽകിയിട്ടുണ്ട്. ഇതൊക്കെ മറച്ചുവെച്ചുകൊണ്ടായിരുന്നു ആരോപണം ഉയർന്നത്. മന്ത്രി മുസ്‌ലിമായതാണ് പ്രചാരണത്തിന്റെ കാരണം. ഒരു കമ്യൂണിസ്റ്റ് പാർട്ടി നേതാവിന്റെ വകുപ്പിനു പോലും അദ്ദേഹത്തിന്റെ പേര് 'ഭാര'മായി മാറുന്നു.

  1. അന്താരാഷ്ട്ര പ്രശ്‌നങ്ങള്‍
    സാർവദേശീയ പ്രശ്‌നങ്ങള്‍ കേരളത്തില്‍ എമ്പാടും ചർച്ച ചെയ്യാറുണ്ട്. പക്ഷേ, ശീതയുദ്ധാനന്തരം മുസ് ലിം ഉള്ളടക്കമുള്ള സാർവദേശീയ പ്രശ്‌നങ്ങള്‍ ആഗോള ഇസ് ലാമോഫോബിയയുടെ വളർച്ചയുടെ കൂടി ഭാഗമായി മാറി. മുസ് ലിം എന്ന ആഗോള ശത്രുവിനെ നിർമിക്കാന്‍ സാമ്രാജ്യത്വ ശക്തികള്‍ രൂപപ്പെടുത്തിയ പ്രചാരണ യുദ്ധം കേരളത്തെ സ്വാധീനിക്കാന്‍ തുടങ്ങിയതിന്റെ നിരവധി ഉദാഹരണങ്ങളുണ്ട്.

8.1. ഫലസ്ത്വീനും ഇസ് ലാമോ
ഫോബിയയും

ഫലസ്ത്വീന്‍ ഒരു കാലത്തും ഇന്ത്യയില്‍ ഒരു തർക്ക വിഷയമായിരുന്നില്ല. ഇസ്രായേല്‍ രൂപവത്കരണത്തിനു മുമ്പു പോലും ഫലസ്ത്വീനെ ഞെരുക്കുന്ന ബ്രിട്ടീഷ് നിലപാടിനെതിരെ കോൺഗ്രസ് ആഞ്ഞടിച്ചിട്ടുണ്ട്. ഇടതുപക്ഷത്തെ സംബന്ധിച്ചേടത്തോളം ഇസ്രായേല്‍ രൂപവത്കരണം വ്യക്തമായ അനീതിയായിരുന്നു. എന്നാല്‍, കഴിഞ്ഞ കുറച്ചു കാലമായി ഈ സമീപനത്തില്‍ വലിയ മാറ്റമുണ്ടായിട്ടുണ്ട്. കേന്ദ്രം ഭരിച്ചിരുന്ന വിവിധ കോൺഗ്രസ് സർക്കാരുകള്‍ ഇസ്രായേല്‍ പ്രശ്നത്തില്‍ നേരത്തെത്തന്നെ വെള്ളം ചേർക്കാന്‍ തുടങ്ങിയിരുന്നു. മുഖ്യധാരാ കമ്യൂണിസ്റ്റുകളുടെ നിലപാടുകളിലുണ്ടായ മാറ്റമാണ് ഏറ്റവും ശ്രദ്ധേയം. ഇന്ത്യയിലെ ഏക കമ്യൂണിസ്റ്റ് സർക്കാരായ പിണറായിയുടെ സർക്കാര്‍ ഭരണപരമായിത്തന്നെ ഇസ്രായേലുമായി സഹകരണം പ്രഖ്യാപിക്കുകയുണ്ടായി. കൃഷി വികസനം പഠിക്കാൻ കേരള സർക്കാര്‍ ഇസ്രായേലുമായി സഹകരിച്ചിരുന്നു (14 ഡിസംബർ 2022, ഔട്ട്‌ലുക് വാരിക). ഇസ്രായേലിന് ലഭിച്ച ഈ സ്വീകാര്യത അത്ര യാദൃഛികമല്ല. ഇസ് ലാമോഫോബിയയുടെ ഭാഗമായി ഇതിനെ മനസ്സിലാക്കണം.

എ.എൻ ഷംസീർ


എം.എ ബേബി ഉൾപ്പെട്ട സി.പി.എമ്മിന്റെ അഖിലേന്ത്യാ നേതൃത്വം വ്യക്തമായ നിലപാടാണ് ഇത്തവണയും ഫലസ്ത്വീന്‍-ഹമാസ് വിഷയത്തില്‍ എടുത്തതെങ്കിലും താഴെ തലത്തില്‍ സ്ഥിതി വ്യത്യസ്തമായിരുന്നു. ഗസ്സയില്‍ സ്വാതന്ത്ര്യത്തിനുവേണ്ടി പോരാടുന്ന ഹമാസിനെ ഭീകരതയായി വിശേഷിപ്പിച്ച ശൈലജ ടീച്ചറുടെ പ്രസ്താവന ഇതിന്റെ സൂചനയാണ്. എന്നാല്‍, ഹമാസ് നടത്തുന്ന ഫലസ്ത്വീന്‍ പ്രതിരോധത്തെ പിന്തുണച്ച സി.പി.എം നേതാവ് സ്വരാജിന്റെ എഫ്.ബി പോസ്റ്റ് വന്നതോടെയാണ് പൊതുവെ ഒരു മാറ്റം ദൃശ്യമായത്. കോൺഗ്രസ് നേതാവായ വി.ടി ബൽറാമാകട്ടെ അപ്പോഴും ഹമാസിനെ നിരായുധീകരിക്കണമെന്ന നിലപാടെടുത്തു.
ഫലസ്ത്വീന്‍ വിഷയം ചർച്ച ചെയ്യുന്ന ചിലരെങ്കിലും ഇസ് ലാമോഫോബിയയുടെ വീക്ഷണകോണുകളാണ് ഉപയോഗിക്കുന്നത്. ഹമാസിനെ വിലയിരുത്തുമ്പോള്‍ മതപരമായ സൂചകങ്ങള്‍ ഉപയോഗിക്കുന്നവര്‍ ഇസ്രായേലിന്റേത് രാഷ്ട്രീയ പ്രശ്നമായി അവതരിപ്പിക്കുന്നു. ഇത് മതത്തെ മനസ്സിലാക്കാനുള്ള ശ്രമമല്ല, മറിച്ച് മതം വിശിഷ്യാ ഇസ് ലാം തിന്മകളുടെ കേന്ദ്രമാണെന്ന എസ്സൻഷ്യലിസ്റ്റ് കാഴ്ചപ്പാടിനെ ഉപയോഗിക്കുന്നതിന്റെ ഭാഗമാണ്. ഇസ് ലാമിന് ജൂതരോടുള്ള കാലുഷ്യമായും ഇതിനെ ചരിത്രരഹിതമായി അവതരിപ്പിക്കുന്നവരുണ്ട്.
ചെറുത്തുനില്പ് എങ്ങനെയായിരിക്കണമെന്ന് തീരുമാനിക്കാനുള്ള അവകാശം ഏത് ജനതയ്ക്കുമുണ്ട്; ഫലസ്ത്വീനിലെ അറബ് മുസ് ലിംകൾക്കുമുണ്ട്. പ്രതിരോധത്തിന് പല രീതിശാസ്ത്രങ്ങള്‍ അവര്‍ ഉപയോഗപ്പെടുത്തിയിട്ടുണ്ട്. മാവോവാദികളും ലിബറലുകളും ഇസ് ലാമിസ്റ്റുകളും ഒക്കെ അതതിടങ്ങളിലെ പ്രതിരോധ ചരിത്രത്തിന്റെ ഭാഗമാണ്. ചെറുത്തുനിൽപില്‍ മുന്നില്‍നില്ക്കുന്ന ജനകീയ സംഘടന ഇപ്പോള്‍ ഹമാസാണ്. ജനങ്ങള്‍ വോട്ട് നല്കി‍ വിജയിപ്പിച്ചവരുമാണ് അവര്‍. അവരുടെ പ്രതിരോധത്തെയാണ് ഭീകരതയായി ചിത്രീകരിക്കുന്നത്. സ്വയം നിർവചിക്കാനും സ്വയം നിർണയിക്കാനുമുള്ള അവകാശം മുസ് ലിം സമൂഹത്തിൽനിന്ന് എടുത്തു മാറ്റുന്നത് ഇസ് ലാമോഫോബിയയുടെ ഭാഗമാണ്.

e
കേരളത്തിൽ നിന്നുള്ള കർഷക സംഘം ഇസ്രയേലീ ഉദ്യോഗസ്ഥരോടൊപ്പം (ഫെബ്രുവരി 2023)
  1. കുറ്റത്തിന്റെ രാഷ്ട്രീയം
    കുറ്റകൃത്യങ്ങള്‍ നടത്തുന്ന വ്യക്തികള്‍ അതു മുസ് ലിംകള്‍ നടത്തിയതാണെന്ന രീതിയില്‍ പ്രചരിപ്പിക്കുന്ന സവിശേഷമായ ഒരു സാമൂഹിക കാലാവസ്ഥ രൂപപ്പെട്ടിരിക്കുന്നു. യഥാർഥ പ്രതികള്‍ സ്വയം രക്ഷപ്പെടാനുള്ള വഴിയായി ഇസ് ലാമോഫോബിയ എന്ന സാമൂഹിക ബോധത്തെ ഒരു പഴുതായി ഉപയോഗിക്കുന്നു. ഒരു കുറ്റകൃത്യം നടന്നാല്‍ അതിനു പിന്നില്‍ മുസ് ലിംകളായിരിക്കും എന്ന പൊതുബോധത്തെ ഉപകരണമാക്കുന്ന മാതൃകയാണിത്. കുറ്റവാളികള്‍ വരെ ഇസ് ലാമോഫോബിയയുടെ മാതൃകകള്‍ സ്വീകരിക്കുന്നു. മറ്റൊരു മാതൃക മാധ്യമങ്ങളുടേതാണ്. ഒരു കുറ്റം നടന്നാല്‍ അതിനു പിന്നിൽ ഒരു മുസ് ലിം പ്രതിയെ തേടുന്ന മാധ്യമ രീതിയുമുണ്ട്. ഈ രണ്ടു മാതൃകകളും കഴിഞ്ഞ വർഷത്തെ കേരളത്തില്‍ കാണാം.

9.1. പി.എഫ്‌.ഐ ചാപ്പ
2023 സെപ്റ്റംബറില്‍ കൊല്ലം കടക്കലില്‍ സൈനികന്റെ മുതുകില്‍ പി.എഫ്.ഐ എന്ന് ചാപ്പകുത്തിയെന്ന വ്യാജ പരാതി നല്കിയത് പ്രശസ്തനാകാന്‍ വേണ്ടിയെന്ന് പൊലീസ് കണ്ടെത്തിയിരുന്നു. സൈനികന്റെ സുഹൃത്തായ ജോഷിയാണ് ഇക്കാര്യം പോലീസിനോട് വെളിപ്പെടുത്തിയത്. സൈനികനായ ഷൈന്‍ കുമാറായിരുന്നു ചാപ്പ കുത്തി എന്ന പരാതി നല്കിയത്. പരാതിയിലും മൊഴിയിലും പൊരുത്തക്കേടുകള്‍ തോന്നിയ പോലീസ് വിശദമായ അന്വേഷണം നടത്തിയപ്പോഴാണ് സത്യം പുറത്തുവന്നത്. പക്ഷേ, ഒരു വിഭാഗം മാധ്യമങ്ങള്‍ വ്യാജ പ്രചാരണവുമായി കാതങ്ങള്‍ താണ്ടിയിരുന്നു.
'പ്രശസ്തനാകാന്‍ വേണ്ടിയാണ് ഇത് ചെയ്തത്. എനിക്ക് ഒരുപകാരം ചെയ്യണം, എനിക്ക് ഫേമസാകണം എന്നാണ് അവന്‍ പറഞ്ഞത്. ടി ഷർട്ട് ബ്ലേഡ് കൊണ്ട് കീറാനും പറഞ്ഞു. ഡി.എഫ്.ഐ എന്നാണ് താന്‍ ആദ്യം എഴുതിയത്. എന്നാല്‍ അങ്ങനെയല്ല, പി.എഫ്.ഐ എന്നെഴുതണമെന്നും ഷൈന്‍ കുമാര്‍ പറഞ്ഞു. പിന്നെ രണ്ടാമതാണ് പി.എഫ്.ഐ എന്ന് എഴുതിയത്. തന്നെ ഇടിക്കണമെന്നും ഷൈന്‍ കുമാര്‍ പറഞ്ഞു. പക്ഷേ, താന്‍ മദ്യപിച്ച അവസ്ഥയിലായിരുന്നതിനാല്‍ അതിന് മുതിർന്നില്ല' - സുഹൃത്ത് ജോഷി പോലീസിന് നല്കിയ മൊഴിയില്‍ പറയുന്നു (26 സെപ്റ്റംബര്‍ 2023 മീഡിയാ വണ്‍).

9.2. കളമശ്ശേരി സ്‌ഫോടനവും
മാധ്യമങ്ങള്‍ സൃഷ്ടിച്ച
ഭീകരതയും

ഒക്ടോബര്‍ 29-ാം തീയതി കളമശ്ശേരിയിൽ യഹോവയുടെ സാക്ഷികളുടെ പ്രാർഥനാ സമ്മേളനത്തിനിടയിലുണ്ടായ സ്‌ഫോടനത്തിനുശേഷം കേരളത്തില്‍ അരങ്ങേറിയത് മാധ്യമവത്കൃത ഇസ് ലാമോഫോബിയയുടെ ടെക്സ്റ്റ് ബുക്ക് ശൈലിയായിരുന്നു. മുസ് ലിംകളെ ആദ്യം കുറ്റവാളികളാക്കി സൂചനകള്‍ നിർമിക്കുക, പിന്നീട് തെളിവുകള്‍ സമാഹരിക്കുക എന്നതാണ് മാധ്യമവത്കൃത ഇസ് ലാമോഫോബിയയുടെ ആഖ്യാന മാതൃക. ആദ്യം തെളിവ്, പിന്നീട് കുറ്റവാളിയെ പ്രഖ്യാപിക്കുക എന്ന സാമാന്യ നീതിയുടെ ലംഘനം മുസ് ലിംകളെ വംശീയമായി തരംതിരിക്കുന്നതിന്റെ ഭാഗമായിരുന്നു.

വാർത്തകൾ വന്നു ഏറെ താമസിയാതെ ഡൊമനിക് മാർട്ടിന്‍ എന്നയാള്‍ കൊടകര സ്റ്റേഷനില്‍ നേരിട്ട് ഹാജരായി. 16 വർഷം യഹോവ സാക്ഷികളുടെ പ്രവർത്തകനായിരുന്നു ഇയാള്‍. പ്രതിയെ പിടികൂടുന്നതിനു മുമ്പ് മൂന്നു മണിക്കൂര്‍ ഇടവേളയില്‍ റിപ്പോർട്ടര്‍ ടി.വി, മാതൃഭൂമി ന്യൂസ്, ന്യൂസ് 18 തുടങ്ങിയ മാധ്യമങ്ങള്‍ പോലീസ് സ്ഥിരീകരണമില്ലാതിരുന്നിട്ടും ഒരു മുസ് ലിം പ്രതിയെ തെരഞ്ഞുപിടിക്കുന്ന തിരക്കിലായിരുന്നു. സ്ഫോടനത്തെ ആദ്യം ഭീകരത എന്ന് അടയാളപ്പെടുത്തിയ മാധ്യമങ്ങള്‍ പിന്നീടതിനെ വെറും സ്‌ഫോടനമാക്കി ചിത്രീകരിച്ചത് ഞങ്ങള്‍ തന്നെ വിശദമായി വിശകലനം ചെയ്തു പ്രസിദ്ധീകരിച്ചിരുന്നു (കളമശ്ശേരിയും മാധ്യമങ്ങളും, സുപ്രഭാതം ദിനപത്രം 23 നവംബര്‍ 2023). ആ സ്ഫോടനത്തില്‍ ഇതുവരെ എട്ടു പേരാണ് കൊല്ലപ്പെട്ടത്.
സ്ഫോടനം നടന്ന ഉടന്‍ രണ്ട് മുസ് ലിംകളെ അറസ്റ്റ് ചെയ്തതും, അത് റിപ്പോർട്ട് ചെയ്ത മക്തൂബ് മീഡിയയിലെ മാധ്യമപ്രവർത്തകർക്കെതിരെ കേസെടുത്തതും, നമ്മുടെ ഭരണസംവിധാനങ്ങള്‍ എത്രമാത്രം ഇസ് ലാമോഫോബിക്കായി മാറിയെന്നതിന്റെ സൂചനകളാണ്.

  1. മൂലധന ഭീതി
    കുത്തക മൂലധനം സമൂഹശരീരത്തെ തകർക്കുന്നുവെന്ന ധാരണ കേരളത്തില്‍ ശക്തമാണ്. കുത്തക മൂലധന സംരംഭങ്ങൾക്കെതിരെ നിശിതമായ സാമൂഹിക /രാഷ്ട്രീയ വിമർശനവും രൂപപ്പെടാറുണ്ട്. എന്നാല്‍, മൂലധനവിരുദ്ധതയുടെ മറവില്‍ ന്യൂനപക്ഷ വിരുദ്ധതയാണ് പലപ്പോഴും കാണുന്നത്. ന്യൂനപക്ഷ ഉടമസ്ഥതയില്‍ രൂപപ്പെടുന്ന സംരംഭങ്ങൾക്ക് പിറകില്‍ അമൂർത്തമായ (അബ്‌സ്ട്രാക്ട്) മൂലധനം ഉണ്ടെന്ന് ആരോപിക്കുക എന്നത് മൂലധന ഭീതിയുടെ രൂപമുള്ള ഇസ് ലാമോഫോബിയയാണ്.

10.1. മീഡിയാ വണിന്റെ അനുഭവം
മുസ് ലിം ഉടമസ്ഥതയിലുള്ള ഇന്ത്യയിലെ ഏക പൊതു വാർത്താ ചാനലെന്ന് വിശേഷിപ്പിക്കാവുന്ന മാധ്യമ സ്ഥാപനമാണ് മീഡിയാ വണ്‍. പിഴവുകള്‍ വരാന്‍ ധാരാളം സാധ്യതയുള്ള മാധ്യമ മേഖലയാണ് ദൃശ്യമാധ്യമ പ്രവർത്തനം. അത്തരം സംഭവങ്ങളും ഉണ്ട്. വിമർശനങ്ങളും സ്വാഭാവികമാണ്. എന്നാല്‍, മീഡിയാ വണ്‍ പിഴവ് വരുത്തിയാല്‍ വാർത്തയുടെ ഉള്ളടക്കമല്ല, മറിച്ച് അതിന്റെ ഉടമസ്ഥത വിമർശനവിധേയമാവുകയാണ് പതിവ്.
കഴിഞ്ഞ സെപ്റ്റംബറിൽ പുതുപ്പള്ളി ഉപ തെരഞ്ഞെടുപ്പ് കലാശക്കൊട്ട് വാർത്ത റിപ്പോർട്ട് ചെയ്യുന്നതിനിടെ സി.പി.എം പ്രവർത്തകര്‍ പാട്ടുപാടുന്ന ദൃശ്യം മീഡിയാ വണ്‍ ചിത്രീകരിച്ചിരുന്നു. അത് പിന്നീട് ചാനലിലൂടെയും ഫേസ് ബുക്കിലൂടെയും പ്രസിദ്ധീകരിച്ചു. എന്നാല്‍, ഫേസ് ബുക്കില്‍ അതിന്റെ തലക്കെട്ട് ആർ.എസ്.എസ് ഗണഗീതത്തിന്റെ താളത്തില്‍ പാട്ടുപാടി എന്നായിരുന്നു. ഇങ്ങനെ ഒരു പാട്ടുപാടിയിട്ടില്ലെന്ന് പിന്നീട് തെളിഞ്ഞു. സംഭവത്തില്‍ മീഡിയാ വണ്‍ എഡിറ്റര്‍ പ്രമോദ് രാമന്‍ ഖേദം പ്രകടിപ്പിക്കുകയും തെറ്റ് തിരുത്തുകയും ചെയ്തു (6 സെപ്റ്റംബർ 2023).

എന്നാല്‍, മീഡിയാ വണ്‍ വരുത്തിയ തെറ്റുകളോടുള്ള ഇടത് സാമൂഹ്യ മാധ്യമ ആക്ടിവിസ്റ്റുകളുടെ പ്രതികരണം ഒട്ടും സ്വാഭാവികമായിരുന്നില്ല. മാത്രമല്ല, പലതും ഹിന്ദുത്വ-വംശീയ സ്വഭാവത്തിലുള്ളതുമായിരുന്നു. മീഡിയാ വണിനെ ഫാഷിസ്റ്റുകള്‍ ലക്ഷ്യമിട്ട സമയത്ത് രക്തസാക്ഷിത്വ പരിവേഷമാണ് പൊതുവെ ഇടത് പ്രവർത്തകര്‍ മീഡിയാ വണ്‍ എഡിറ്റര്‍ പ്രമോദ് രാമന് നല്കിയത്. എന്നാല്‍, വീഴ്ചയുടെ സമയത്ത് എല്ലാ ഉത്തരവാദിത്വത്തില്‍നിന്നും അവര്‍ അദ്ദേഹത്തെ 'ഔദാര്യപൂർവം' ഒഴിവാക്കുക മാത്രമല്ല, ഇത് അവസരമാക്കി 'രക്ഷപ്പെടാനുള്ള ഉപദേശവും' നല്കി. മുസ് ലിംകളോടൊപ്പം നിൽക്കുന്ന ശക്തരായ ഇതര വ്യക്തികളെ മുസ് ലിംകളിൽനിന്ന് അടർത്തിമാറ്റുന്ന ഈ തന്ത്രം മുമ്പും പ്രയോഗിച്ചിട്ടുണ്ട്. ശക്തരല്ലെങ്കില്‍ ഈ ഔദാര്യം ലഭിക്കണമെന്നുമില്ല. എന്നാല്‍, ഈ കുരുക്കില്‍ പ്രമോദ് രാമന്‍ വീണില്ല. ഇത് ചൂണ്ടിക്കാട്ടുന്നത് പ്രമോദ് രാമനെതിരെ ആരോപണമെന്ന നിലയിലല്ല, മറിച്ച് ഏത് സന്ദർഭത്തെയും തങ്ങൾക്കനുകൂലമാക്കി മാറ്റുന്ന ഇസ് ലാമോഫോബിയാ വീക്ഷണത്തെ എടുത്തുകാട്ടുന്നതിനുവേണ്ടി മാത്രമാണ്.

  1. ലിംഗ രാഷ്ട്രീയം
    മുസ് ലിം ന്യൂനപക്ഷാവകാശങ്ങളെ നിഷേധിക്കാന്‍ ലിംഗനീതിയുടെ രാഷ്ട്രീയത്തെ ഉപയോഗിക്കുന്ന രീതിയെ ഫെമിനിസ്റ്റുകള്‍ തന്നെ വിമർശിച്ചിട്ടുണ്ട്. ഭൂരിപക്ഷ ദേശീയതയുടെ താല്പര്യത്തിനുവേണ്ടി ലിംഗരാഷ്ട്രീയത്തെ ഉപയോഗിക്കുന്നതിലൂടെ എങ്ങനെ ന്യൂനപക്ഷാവകാശങ്ങള്‍ നിഷേധിക്കപ്പെടുന്നുവെന്നും തിരിച്ചറിഞ്ഞിട്ടുണ്ട്. മുത്ത്വലാഖ് നിരോധനം അടക്കമുള്ള പ്രശ്‌നങ്ങളെ ഇന്ത്യന്‍ ഫെമിനിസ്റ്റുകള്‍ മനസ്സിലാക്കുന്നതും അങ്ങനെയാണ്. 'ലിംഗവത്കരിക്കപ്പെട്ട ഇസ് ലാമോഫോബിയ' എന്ന സംജ്ഞ വികസിച്ചുവന്നതിന്റെ പശ്ചാത്തലം ഇതാണ്.
  2. 1. അനന്തരാവകാശ
    ചർച്ചകളിലെ
    രാഷ്ട്രീയ നിഷേധം

    അഡ്വ. ശുക്കൂറും ഡോ. സീനയും 1994-ല്‍ നിക്കാഹിന്റെ ചടങ്ങുകളോടെ വിവാഹം കഴിച്ചവരായിരുന്നു. സ്പെഷ്യല്‍ മാരേജ് ആക്ട് പ്രകാരം തങ്ങള്‍ വീണ്ടും വിവാഹം കഴിക്കുകയാണെന്ന് അവര്‍ പ്രഖ്യാപിച്ചു. അഡ്വ. ശുക്കൂറിന് മൂന്ന് പെൺകുട്ടികളാണ് ഉള്ളത്. 1937-ലെ മുസ് ലിം പേഴ്സനൽ ലോ ആപ്ലിക്കേഷന്‍ ആക്ട് അനുസരിച്ച് ഇദ്ദേഹത്തിന്റെ സ്വത്തുക്കളുടെ മൂന്നില്‍ രണ്ടുഭാഗം മാത്രമേ, ഈ പെൺകുട്ടികൾക്ക് കിട്ടുകയുള്ളു. ശുക്കൂറിനും ഷീനക്കും ആണ്മക്കള്‍ ഇല്ലാത്തതിനാല്‍ ബാക്കി സ്വത്തുക്കൾ പോവുക ശുക്കൂറിന്റെ സഹോദരങ്ങൾക്കാണ്. വിൽപത്രം എഴുതിവെച്ചാലും അത് നിയമവിധേയമാവുകയില്ല. എന്നാല്‍, സ്പെഷ്യല്‍ മാരേജ് ആക്ട് പ്രകാരം രജിസ്റ്റര്‍ ചെയ്യുന്നവർക്ക് ഈ വിവേചനത്തിൽനിന്ന് രക്ഷപ്പെടാം. അതുകൊണ്ട് വനിതാദിനത്തില്‍, അതായത് 2023 മാർച്ച് 8-ന് കാഞ്ഞങ്ങാട് ഹോസ്ദുർഗ് സബ്ബ് രജിസ്ട്രാര്‍ മുമ്പാകെ രാവിലെ 10 മണിക്ക് സ്‌പെഷ്യല്‍ മാര്യേജ് നിയമം വകുപ്പ് 15 പ്രകാരം താനും ഭാര്യയും വിവാഹിതരാവുകയാണെന്ന് ശുക്കൂര്‍ വക്കീല്‍ ഫേസ് ബുക്കിലൂടെ അറിയിച്ചു.
  3. ഈ വിഷയത്തില്‍ ഇസ് ലാമിക നിയമത്തിന്റെ സങ്കീർണതകള്‍ മനസ്സിലാക്കി പരിഹാരം കാണുന്നതിനെക്കാള്‍ മുസ് ലിംകളെ അച്ചടക്കം പഠിപ്പിക്കാനാണ് വിമർശകര്‍ ശ്രമിച്ചത്. ശരീഅഃ എന്ന വാക്കിന്റെ പേരില്‍ തന്നെ മുൻവിധികള്‍ ഉൽപാദിപ്പിക്കപ്പെട്ടു. സ്ത്രീകൾക്ക് വ്യത്യസ്തമായ രീതിയില്‍ സ്വത്തുടമസ്ഥത, സാമ്പത്തിക ഉത്തരവാദിത്വം ഒക്കെ നല്കിയ ശരീഅഃയുടെ തത്ത്വങ്ങൾക്ക് ആധുനിക നിയമവ്യവസ്ഥയില്‍ സംഭവിച്ച പരിണാമങ്ങള്‍ ഏറെ പഠിക്കേണ്ട മേഖലയാണ്. ഇത്തരമൊരു ചർച്ചയ്ക്കു പകരം മുസ് ലിം സമുദായത്തിന്റെ ചരിത്രപരമായ അനുഭവങ്ങളും അറിവുകളും നിഷേധിക്കുന്ന രീതിയില്‍ ലിംഗരാഷ്ട്രീയത്തെ ഉപയോഗിച്ചതിനാൽ ത്തന്നെ ആ ഇടപെടല്‍ ഇസ് ലാമോഫോബിയയുടെ ആവനാഴിയിലേക്ക് വരവുവെക്കപ്പെട്ടു. സ്വയം നിർണയാവകാശമുള്ള ഒരു സാമൂഹിക വിഭാഗം എന്ന നിലയില്‍ മുസ് ലിംകളെ പരിഗണിക്കാതെയുള്ള ലിംഗ അവകാശ ചർച്ചകള്‍ ഇസ് ലാമോഫോബിയയുടെ യുക്തിയെ ശക്തിപ്പെടുത്തുകയേയുള്ളൂ.
  4. 2. കണ്ണൂരിലെ മുസ് ലിം കല്യാണവും
    സ്ത്രീ വിരുദ്ധതയുടെ നിർമിതിയും
    'കണ്ണൂരിലൊക്കെ മുസ് ലിം കല്യാണത്തിന് സ്ത്രീകൾക്ക് ഭക്ഷണം നല്കുന്നത് അടുക്കള ഭാഗത്ത്, ഇന്നും അങ്ങനെ തന്നെ': നിഖില വിമല്‍ '(മലയാളം ന്യൂസ് ). ഏപ്രില്‍ 18-നു പുറത്തിറങ്ങിയ അയൽവാശി എന്ന സിനിമയുടെ പ്രമോഷനിടെയാണ് നടി നിഖിലാ വിമല്‍ ഇത്തരമൊരു പ്രസ്താവന നടത്തിയത്. ദീർഘമായ ഒരു ചർച്ചക്കിടയില്‍ നടന്ന ഒരു പരാമർശമായിരുന്നെങ്കിലും എല്ലാ മാധ്യമങ്ങളിലും അതു മുഖ്യ തലക്കെട്ടായി മാറി. നിരവധി പേര്‍ ഇതിനെതിരെ രംഗത്തുവന്നു. പോത്തും എരുമയും കഴിക്കും എന്ന് നിഖിലാ വിമല്‍ പറഞ്ഞപ്പോള്‍ സ്വാഗതം ചെയ്തവര്‍ ഇപ്പോള്‍ അവരുടെ അഭിപ്രായത്തെ തള്ളിക്കളയുന്നു എന്ന എതിർ പ്രപചാരണവും നടന്നു. സ്വന്തം ഭക്ഷണം തെരഞ്ഞെടുക്കുന്നതിനെപ്പറ്റി ഒരു വ്യക്തി നടത്തിയ പ്രസ്താവന പോലെയല്ല സ്വന്തം വ്യക്തി അനുഭവങ്ങളെ മുൻനിർത്തി ഒരു പ്രദേശത്തെയോ സാമൂഹിക വിഭാഗത്തെയോ ഒരു വിഭാഗം സ്ത്രീകളുടെ സാമൂഹിക അനുഭവത്തെയോ സാമാന്യവല്ക്കരിച്ച് സംസാരിക്കുന്നത്. ഇത് കേവല അഭിപ്രായ സ്വാതന്ത്ര്യത്തിന്റെ പ്രശ്നമല്ല. അഭിപ്രായങ്ങളുടെ ഉള്ളടക്ക പ്രശ്‌നമാണ്. രാഷ്ട്രീയ ജാഗ്രതയുള്ള ഒരു കലാകാരിക്കു പോലും മുസ് ലിം/ സ്ത്രീ അനുഭവങ്ങളെപ്പറ്റി സംസാരിക്കുമ്പോള്‍ കേവല അനുഭവങ്ങളുപയോഗിച്ചുള്ള സാമാന്യവത്കരണമെന്ന ചട്ടക്കൂടിനപ്പുറത്തേക്ക് വികസിക്കാനാവാത്തത് ഭാഷയിലെയും വ്യവഹാരങ്ങളിലെയും ഇസ് ലാമോഫോബിയ കൊണ്ടാണ്. ലിംഗരാഷ്ട്രീയം, പ്രാദേശിക അനുഭവം തുടങ്ങിയ അനേകം മാതൃകകളിലൂടെ ഇസ് ലാമോഫോബിയ പ്രവർത്തനക്ഷമമാവുന്നതിന്റെ ഉദാഹരണമാണിത്.
  5. പുതിയ പ്രതിരോധം
    ഇസ് ലാമോഫോബിയ പ്രതിരോധം പുതിയ വഴികള്‍ സ്വീകരിക്കുന്ന കാഴ്ചയും ലോകത്തുണ്ട്. ഇസ് ലാമോഫോബിയയുടെ വിവിധ രീതികള്‍ പഠിക്കാനും പഠിപ്പിക്കാനും ഇന്ന് നിരവധി ഗവേഷണ, പഠന വേദികള്‍ നിലവില്‍വന്നിരിക്കുന്നു. 2023 മാർച്ച് 15 ഐക്യരാഷ്ട്ര സഭയുടെ അന്താരാഷ്ട്ര ഇസ് ലാമോഫോബിയാ വിരുദ്ധ ദിനമായിരുന്നു. ഇത് കേരളത്തില്‍ വലിയ ചർച്ചകൾക്ക് വഴിയൊരുക്കി. കേരളത്തിലെ ചുരുക്കം ചില മാധ്യമങ്ങളെങ്കിലും അന്താരാഷ്ട്ര ഇസ് ലാമോഫോബിയാ ദിനത്തെ ഗൗരവത്തിലെടുത്തു. ഇസ് ലാമോഫോബിയ ഒരു സാമൂഹിക യാഥാർഥ്യമാണെന്നും അതിനെ അഭിമുഖീകരിക്കേണ്ടത് അത്യാവശ്യമാണെന്നുമുള്ള ചർച്ചയിലേക്കത് വികസിച്ചു. ഇസ് ലാമോഫോബിയക്കെതിരായ പോരാട്ടം ഏതെങ്കിലും പ്രത്യേക വിവേചനത്തോടുള്ള പ്രതികരണം എന്നതില്‍നിന്നു മാറി, ഒരു സാമൂഹിക പ്രശ്നം എന്ന നിലയില്‍ ചർച്ചചെയ്യാന്‍ ഈ ദിനാചരണത്തിലൂടെ സാധിക്കുകയുണ്ടായി. കാരണം, മുസ് ലികളോടുള്ള വിവേചനവും പ്രത്യക്ഷമായ വിദ്വേഷവും 'പകർച്ചവ്യാധി പോലെ' പടരുന്നതായി മതസ്വാതന്ത്ര്യത്തെക്കുറിച്ച യു.എന്നിന്റെ പ്രത്യേക റിപ്പോർട്ട് കണ്ടെത്തിയിരുന്നു. തങ്ങള്‍ ന്യൂനപക്ഷമായിരിക്കുന്ന പ്രദേശങ്ങളില്‍ വിഭവങ്ങളുടെ ലഭ്യതയിലും തൊഴില്‍ കണ്ടെത്തുന്നതിലും വിദ്യാഭ്യാസത്തിലും മുസ് ലിംകള്‍ വിവേചനം അനുഭവിക്കേണ്ടി വരുന്നുണ്ടെന്ന് ഐക്യരാഷ്ട്ര സഭ തന്നെ ചൂണ്ടിക്കാട്ടിയിട്ടുണ്ട്. കേരളീയ സാഹചര്യത്തില്‍ ഇസ് ലാമോഫോബിയയുടെ വിവിധ രീതികള്‍ അന്വേഷിക്കാനും വിശകലനം ചെയ്യാനും തയാറാകുന്ന ഒരു സാമൂഹിക- രാഷ്ട്രീയ സമീപനം തന്നെ വികസിച്ചു വരേണ്ടതുണ്ട്. l
    (അവസാനിച്ചു)

ഭക്ഷണം, വസ്ത്രം, തൊഴില്‍, അന്താരാഷ്ട്ര പ്രശ്‌നം, മാധ്യമം, വിദ്യാഭ്യാസം, പ്രദേശം, രാഷ്ട്രീയ പ്രവർത്തനം, സാമുദായിക ചിഹ്നങ്ങള്‍, ലിംഗരാഷ്ട്രീയം, സാമൂഹിക മനോഭാവം തുടങ്ങിയ വിവിധ വ്യവഹാരങ്ങളുടെ സന്ദർഭത്തില്‍ മുസ് ലിംകളെ പ്രത്യേകം അടയാളപ്പെടുത്തുകയും തുടർന്ന് മറ്റു സാമൂഹിക വിഭാഗങ്ങളില്‍നിന്നു വ്യത്യസ്തമായി നിർവചിച്ച് വിവേചനവും ബഹിഷ്‌കരണവും ഉച്ചനീചത്വവും കല്പിക്കുകയും ചെയ്യുന്ന വംശീയതയാണ് ഇസ് ലാമോഫോബിയ. ഒരു ജനവിഭാഗം എന്ന നിലയില്‍ തങ്ങള്‍ 'വ്യത്യസ്തരാണ്' എന്ന സ്വയം നിർണയം മുസ് ലിംകളുടേതെന്നല്ല, ആരുടെയും രാഷ്ട്രീയ അവകാശമാണ്. ഈ സ്വയം നിർണയാവകാശത്തിന്റെ നിഷേധത്തിലൂടെ ബാഹ്യശക്തികള്‍ എങ്ങനെ മുസ് ലിംകളെ 'വ്യത്യസ്തരാക്കുന്നു' എന്നതാണ് ഇസ് ലാമോഫോബിയയുടെ അടിസ്ഥാന പ്രശ്‌നം. 2023 വർഷത്തിൽ കേരളീയ പൊതുമണ്ഡലത്തില്‍ നടന്ന സംഭവവികാസങ്ങളും ചർച്ചകളും പരിശോധിച്ചാല്‍ ഈ വംശീയത നിരന്തരം ആവർത്തിക്കുന്ന ഒരു സാമൂഹിക പ്രശ്നമായി മാറിയിരിക്കുന്നുവെന്ന് കാണാം. തെരഞ്ഞെടുത്ത 19 സംഭവങ്ങളാണ് ഇവിടെ ചർച്ചക്കെടുക്കുന്നത്. അതിലേറെ വിപുലമാണ് ഈ പ്രശ്‌നമെന്ന് മറക്കുന്നുമില്ല.
മുസ് ലിം സ്വയംനിർണയാവകാശത്തിന്റെ നിഷേധമാണ് ഇസ് ലാമോഫോബിയ ലക്ഷ്യമിടുന്നത്. മുസ് ലിം സാമുദായിക/ രാഷ്ട്രീയ സംഘാടനത്തിന്റെ നിഷേധമാണ് അതിന്റെ മൂർത്ത ഇന്ത്യന്‍ സാഹചര്യം. എന്നാല്‍, ഈ ഘട്ടങ്ങളും കഴിഞ്ഞു മുസ് ലിം വ്യക്തികള്‍ മതേതരരോ ഇടതുപക്ഷ പ്രവർത്തകരോ മതനിഷേധികളോ ആയാല്‍ പോലും അവരുടെ ജീവിതത്തില്‍നിന്നു കണ്ടെടുക്കാവുന്ന ദുർബലമായ മുസ് ലിം സൂചകങ്ങള്‍ പോലും വംശീയമായി ലക്ഷ്യമിടുന്ന തരത്തില്‍ ഇസ് ലാമോഫോബിയ വികസിച്ചു കഴിഞ്ഞു.

വിവിധ വ്യവഹാരങ്ങൾക്കുള്ളില്‍ ഇസ് ലാമോഫോബിയ പ്രവർത്തിക്കുന്നത് പലതരം മാതൃകകളിലൂടെയാണ്. തീവ്രവാദ/ഭീകരതാ ആരോപണം, ഹലാൽ ഭീതി, വ്യാജപ്രചാരണം, രാഷ്ട്രീയ അവകാശനിഷേധം, ഇരട്ട നീതി, സാമാന്യവത്കരണം, പ്രദേശഭീതി, അപരവിദ്വേഷം, ന്യൂനപക്ഷ അവകാശനിഷേധം, മുസ് ലിം സ്ത്രീ അവകാശ നിഷേധം, തൊഴില്‍ വിവേചനം, ജനനംകൊണ്ട് മുസ്്ലിമായ ഒരാള്‍ പൊതുവ്യക്തിയാവുമ്പോഴുള്ള ഭീതി, പൊതുബോധത്തെ കുറ്റം ചെയ്യാനുള്ള പഴുതായി ഉപയോഗിക്കല്‍, മുസ് ലിം മൂലധനത്തോടുള്ള ഭീതി, അദൃശ്യ മുസ് ലിം ഭീഷണി, മാധ്യമപ്രചാരണം തുടങ്ങി അസംഖ്യം മാതൃകകളിലൂടെയാണ് ഇസ് ലാമോഫോബിയ ഈ വർഷം പ്രവർത്തിച്ചത്.

സംഘ് പരിവാര്‍ രാഷ്ട്രീയത്തിനു പുറത്തെന്ന് അഭിമാനിക്കുന്ന കേരളം പോലും ഇസ് ലാമോഫോബിയയുടെ പ്രവർത്തന രീതികളാല്‍ സമ്പന്നമാണ്. അതേസമയം സംഘ് പരിവാറും സംഘ് പരിവാര്‍ വിരുദ്ധരും നടത്തുന്ന ഇസ് ലാമോഫോബിയയെ വേർതിരിച്ചു കാണേണ്ടതുണ്ട്. ഉന്മൂലന സ്വഭാവമുള്ള 'സംഘ് പരിവാര്‍ ഇസ് ലാമോഫോബിയ' പ്രചാരവേലയുടെ (പ്രൊപഗണ്ട) മാതൃക സ്വീകരിക്കുമ്പോള്‍ വിവേചന (ഡിസ്‌ക്രിമിനേഷന്‍) സ്വഭാവമുള്ള 'പൊതു ഇസ് ലാമോഫോബിയ' ലക്ഷ്യത്തില്‍ വ്യത്യസ്തമെങ്കിലും മാർഗത്തില്‍ ഒത്തുചേരുന്നു. ഫാഷിസ്റ്റ് പ്രചാരവേലയുടെ പല ഘടകങ്ങളും പൊതു ഇസ് ലാമോഫോബിയയുടെ ഭാഗമാണ്.
വിവിധ വ്യവഹാരങ്ങളിലൂടെ പ്രവർത്തിക്കുന്ന ഇസ് ലാമോഫോബിയ വ്യത്യസ്ത മാതൃകകളെ യോജിപ്പിച്ചും പിളർത്തിയും വികസിക്കുന്ന ഒന്നാണെന്ന് ഇവിടെ കൊടുത്തിരിക്കുന്ന പട്ടിക വ്യക്തമാക്കുന്നു. ഈ വ്യവഹാര മാതൃകകളെ ഒന്നിച്ചു ചേർത്തു വിശകലനം ചെയ്യാന്‍ ഇസ് ലാമോഫോബിയ എന്ന പദം ആവശ്യമായി വരും. വംശീയ വിരുദ്ധ രാഷ്ട്രീയ പ്രതിരോധ സൂചകമെന്ന നിലയിലുള്ള അതിന്റെ പ്രസക്തിയും അതാണ്.

  1. വസ്ത്രം, ഭക്ഷണം
    വസ്ത്രം, ഭക്ഷണം തുടങ്ങിയവ മനുഷ്യന്റെ അടിസ്ഥാന തെരഞ്ഞെടുപ്പുകളാണ്. എന്നാല്‍ ഹിജാബ് നിരോധനം, ബീഫ് വിരുദ്ധത തുടങ്ങിയ വംശീയ പ്രയോഗങ്ങളിലൂടെ ഭരണകൂടം തന്നെ ഇവയെ ഇസ് ലാമോഫോബിയയുടെ ഉപകരണങ്ങളാക്കി മാറ്റിയെടുത്തിരിക്കുന്നു. കേരളത്തിന്റെ പൊതു സാമൂഹിക-രാഷ്ട്രീയ പ്രയോഗങ്ങളില്‍ ഈ മാറ്റത്തിന്റെ പ്രതിഫലനങ്ങള്‍ നിരവധിയാണ്.

1.1. വസ്ത്രം എന്ന വ്യവഹാരവും തീവ്രവാദ ആരോപണവും
2023 ജനുവരിയില്‍ കോഴിക്കോട് നടന്ന സ്‌കൂള്‍ കലോത്സവത്തില്‍ പി.കെ ഗോപി രചിച്ച സ്വാഗതഗാനത്തിന്റെ ദൃശ്യാവിഷ്‌കാരം വലിയ വിവാദമായി. മുഖ്യമന്ത്രി പിണറായി വിജയന്‍ അടക്കമുള്ള പ്രമുഖരുടെ മുന്നിലാണ് ഇത് അരങ്ങേറിയത്. കൂഫിയ എന്ന അറബ് പുരുഷ ശിരോവസ്ത്രം രാജ്യത്തിനു ഭീഷണിയായ ഒരു തീവ്രവാദിയെ സൂചിപ്പിക്കാന്‍ ഉപയോഗിച്ചുവെന്നതായിരുന്നു പ്രശ്നം. വസ്ത്രമെന്ന സാമൂഹിക വ്യവഹാരത്തെ ഭീകരത, തീവ്രവാദം തുടങ്ങിയ ഇസ് ലാമോഫോബിയയുടെ മാതൃകയാക്കി മാറ്റുകയായിരുന്നു. സംഭവം സംഘ് പരിവാര്‍ 'അസംബന്ധ'മാണെന്ന് മന്ത്രി മുഹമ്മദ് റിയാസ് പ്രതികരിച്ചു (ജനുവരി 10, മലയാള മനോരമ ഓൺലൈന്‍). നടക്കാവ് പോലീസ് കേസുമെടുത്തു. 1980-കളോടെ തുടങ്ങിയതും ശീതയുദ്ധാനന്തരം ലോകത്ത് ശക്തിപ്പെട്ടതുമായ മുസ് ലിം എന്ന സാമൂഹിക/ രാഷ്ട്രീയ സ്ഥാനത്തെ ഭീകരത, തീവ്രവാദം തുടങ്ങിയ പദാവലികളിലേക്ക് കണ്ണിചേർക്കുന്ന മാതൃകക്ക് നാൽപതു വർഷത്തെ പഴക്കമുണ്ട്.

1.2. ഹലാല്‍ ഭക്ഷണവും
ഫാഷിസ്റ്റ് പ്രചാരവേലയും

ദീർഘകാലമായി കേരള സ്‌കൂള്‍ കലോത്സവത്തില്‍ വെച്ചുവിളമ്പുന്നത് പഴയിടം നമ്പൂതിരിയാണ്. സസ്യഭക്ഷണമാണ് പതിവ്. നോൺ വെജ് ഭക്ഷണം കൂടി വിളമ്പണമെന്ന ആവശ്യം പലപ്പോഴും ഉയർന്നുവന്നിട്ടുണ്ട്. എന്നാല്‍, ഇത്തവണ അതൊരു വിവാദമായി പൊട്ടിപ്പുറപ്പെട്ടു. പച്ചക്കറി മാത്രം വിളമ്പുന്നതിനെതിരെ മാധ്യമപ്രവർത്തകരടക്കമുള്ളവര്‍ രംഗത്തുവന്നു. പച്ചക്കറിയല്ലാത്തത് വിളമ്പാത്തത് ജാതീയതയുടെ ഭാഗമാണെന്നായിരുന്നു ആരോപണം. അതിനിടയില്‍, യുവജനോത്സവത്തില്‍ ബിരിയാണി കൊടുക്കാന്‍ ആഗ്രഹമുണ്ടായിരുന്നുവെന്നും അടുത്ത തവണ നോൺ വെജ് ഭക്ഷണം കൊടുക്കാന്‍ ശ്രമിക്കുമെന്നും വിദ്യാഭ്യാസ മന്ത്രി വി. ശിവൻകുട്ടി ഫേസ് ബുക്കിലൂടെ അറിയിച്ചു (5 ജനുവരി 2023, ടൈംസ് ഓഫ് ഇന്ത്യ മലയാളം). ഇത്രയുമായതോടെ അടുത്ത തവണ താന്‍ പാചകത്തിനില്ലെന്ന് പഴയിടം പ്രഖ്യാപിച്ചു.

എലത്തൂരിൽ ആക്രമണത്തിനിരയായ
ട്രെയിനിന്റെ ഉൾവശം

നോൺ വെജ് വേണമെന്നത് മുസ് ലിംകളുടെ മാത്രം ആവശ്യമായിരുന്നില്ല. ദലിത് പിന്നാക്ക/ക്രൈസ്തവ വിഭാഗങ്ങളും നോണ്‍ വെജ് ഭക്ഷണം കഴിക്കുന്നവരാണ്. എന്നാല്‍, വിവാദം കൊഴുത്തതോടെ പ്രശ്നത്തെ സംഘ് പരിവാര്‍ സംഘങ്ങള്‍ മുസ് ലിംഭക്ഷണവുമായി കൂട്ടിക്കെട്ടി. കലോത്സവത്തില്‍ ഹലാല്‍ ഭക്ഷണം നൽകാന്‍ മുസ് ലിംകള്‍ ആവശ്യപ്പെട്ടെന്നും അങ്ങനെ സംഭവിച്ചാല്‍ തടയുമെന്നും ഹിന്ദു ഐക്യവേദി നേതാവ് ആര്‍.വി ബാബു ഭീഷണി മുഴക്കി (8 ജനുവരി, ന്യൂസ് 18 മലയാളം). ഭക്ഷണത്തെക്കുറിച്ചുള്ള ഒരു വ്യവഹാരം ഇസ് ലാമോഫോബിയയുടെ മാതൃകയിലേക്ക് മാറുന്നതാണ് പിന്നെ കണ്ടത്. ഒരു പൊതു രാഷ്ട്രീയ പ്രശ്‌നം മുസ് ലിം പ്രശ്‌നമാക്കി മാറ്റിയാല്‍ സാമൂഹിക സ്വീകാര്യത കൂടുമെന്ന കണക്കുകൂട്ടല്‍ സംഘ് പരിവാറിനുണ്ട്. വ്യവഹാരങ്ങളിലൂടെ ഇസ് ലാമോഫോബിയയുടെ പല മാതൃകകള്‍ ഒന്നിച്ചു ചേരുകയാണ് ഇവിടെ. സംഘ് പരിവാര്‍ 'പൊതു ഇസ് ലാമോഫോബിയ'യെ ഉപയോഗിക്കാന്‍ ശ്രമിക്കുന്നതിന്റെ മാതൃകയുമാണിത്.

1.3. തട്ടവും സ്വതന്ത്ര ചിന്തയുടെ അഭാവവും
2023 ഒക്ടോബറില്‍ സി.പി.എം നേതാവ് അഡ്വ. അനില്‍ കുമാര്‍ യുക്തിവാദികളുടെ സമ്മേളനത്തില്‍ പങ്കെടുക്കുകയും, മുസ് ലിം സ്ത്രീകള്‍ തട്ടത്തില്‍നിന്ന് പുരോഗമിച്ചതിനു പിന്നില്‍ ഇടതുപക്ഷ പ്രസ്ഥാനങ്ങളാണെന്ന് പ്രസംഗിക്കുകയും ചെയ്തത് ഏറെ ചർച്ച ചെയ്യപ്പെട്ടു. 2023 ഒക്ടോബര്‍ 2-ന് തിരുവനന്തപുരം നിശാഗന്ധി ഓഡിറ്റോറിയത്തില്‍ സി. രവിചന്ദ്രന്റെ നേതൃത്വത്തിലുള്ള എസ്സൻസ് ഗ്ലോബല്‍ സംഘടിപ്പിച്ച ലിറ്റ്മസ്'23- നാസ്തിക സമ്മേളനത്തിലാണ് അനിൽ കുമാറിന്റെ പരാമർശം. 'മലപ്പുറത്തു നിന്ന് വരുന്ന പുതിയ പെൺകുട്ടികളെ കാണൂ നിങ്ങള്‍. തട്ടം തലയിലിടാന്‍ വന്നാല്‍ അത് വേണ്ടായെന്ന് പറയുന്ന പെൺകുട്ടികള്‍ മലപ്പുറത്തുണ്ടായത് ഈ കമ്യൂണിസ്റ്റ് പാർട്ടി കേരളത്തില്‍ വന്നതിന്റെ ഭാഗമായിട്ടു തന്നെയാണ്. വിദ്യാഭ്യാസമുണ്ടായതിന്റെ ഭാഗമായിത്തന്നെയാണെന്ന് ഞങ്ങള്‍ വിശ്വസിക്കുന്നു. അതുകൊണ്ട് സ്വതന്ത്ര ചിന്ത വന്നതില്‍ ഈ പ്രസ്ഥാനത്തിന്റെ പങ്ക് ചെറുതല്ല.'

വലിയൊരു പ്രസംഗത്തിലെ ചെറിയൊരു ഭാഗമാണെങ്കിലും മുസ് ലിം സ്ത്രീകളുടെ ജീവിതത്തെക്കുറിച്ച 'പുരോഗമന നാഗരിക ദൗത്യ'ത്തിന്റെ ഭാഷ ശ്രദ്ധ പിടിച്ചുപറ്റി. മലപ്പുറത്തെ മുസ് ലിം സ്ത്രീകളെ വിമോചിപ്പിക്കുകയെന്ന പരികൽപന സ്ത്രീവിരുദ്ധവും പ്രദേശഭീതിയിലധിഷ്ഠിതവുമാണെന്നതില്‍ സംശയമില്ല. ഒപ്പം സ്ത്രീ എന്ന സാമൂഹിക സ്ഥാനത്ത് മുസ് ലിംസ്ത്രീ വരുമ്പോള്‍ സ്വയംനിർണയാവകാശം സ്വാഭാവികമെന്നോണം നിഷേധിക്കപ്പെടുന്നത് ഇസ് ലാമോഫോബിയയുടെ ലക്ഷണമാണ്.

വിശ്വാസികളെയടക്കം എല്ലാവരെയും ഉൾക്കൊള്ളുന്ന പാർട്ടിയാണ് സി.പി.എം എന്നു പാർട്ടി സംസ്ഥാന സെക്രട്ടറി എം. ഗോവിന്ദന്‍ വിശദീകരിച്ചത് അനില്‍ കുമാറിന്റെ പ്രസ്താവനയിലെ ലളിതബോധ്യങ്ങളുടെ തിരുത്തായിരുന്നു. കെ. ദിൽറുബ എഡിറ്ററായി ഈ വർഷം അവസാനം പുറത്തിറങ്ങിയ 'തട്ടവും തിട്ടൂരങ്ങളും: ഇസ് ലാമോഫോബിയ കാലത്തെ ഹിജാബനുഭവങ്ങള്‍' (പ്രൊഫൗണ്ട് ബുക്സ്) എന്ന പുസ്തകം ഇരുപതോളം മുസ് ലിം സ്ത്രീ എഴുത്തുകാര്‍ അണിനിരക്കുന്ന 'ലിംഗവത്കരിക്കപ്പെട്ട ഇസ് ലാമോഫോബിയ'ക്കെതിരായ മുസ് ലിം സ്ത്രീ രാഷ്ട്രീയ ഇടപെടലിന്റെ രേഖയാണ്.

  1. പ്രദേശം
    ചില പ്രദേശങ്ങള്‍ മറ്റു പ്രദേശങ്ങളെക്കാള്‍ കുഴപ്പം പിടിച്ചതാണെന്ന ധാരണ സാമൂഹിക മുൻവിധിയുടെ ഭാഗമാണ്. തൊഴിലാളികള്‍, ദലിതര്‍, ആദിവാസികള്‍ തുടങ്ങിയ വിഭാഗങ്ങള്‍ താമസിക്കുന്ന പ്രദേശങ്ങളെക്കുറിച്ചും ഈ മുൻവിധിയുണ്ട്. മലപ്പുറം, ഈരാറ്റുപേട്ട, ബീമാപള്ളി, കളമശ്ശേരി, ആലുവ, കാസർകോട്, മട്ടാഞ്ചേരി തുടങ്ങിയ സ്ഥലനാമങ്ങള്‍ നമ്മുടെ സിനിമകളിലും മാധ്യമങ്ങളിലും ആഖ്യാനം ചെയ്യപ്പെട്ടതെങ്ങനെ എന്ന് പരിശോധിക്കുന്ന എഴുത്തുകള്‍ ധാരാളമുണ്ട്. ഈ വർഷവും ഇതേ പ്രാദേശിക ഭീതിയുടെ ആവർത്തനമുണ്ടായി. ഇസ് ലാമോഫോബിയ മറ്റു പല മാതൃകകളും ഒത്തുചേരുന്ന ഇടമാണ് പ്രദേശം എന്ന സംവർഗം.

2.1. എലത്തൂര്‍ ട്രെയിന്‍ ആക്രമണവും
ശാഹീന്‍ ബാഗും

ഏപ്രില്‍ 2-ന് കോഴിക്കോട്ടെ എലത്തൂരില്‍ ട്രെയിൻ യാത്രക്കിടയില്‍ മൂന്ന് യാത്രക്കാരെ തീ കൊളുത്തി കൊന്ന സംഭവം മാധ്യമങ്ങള്‍ ഏറെ മുൻവിധികളോടെയാണ് റിപ്പോർട്ട് ചെയ്തത്. എലത്തൂര്‍ ട്രെയിന്‍ തീവയ്പ് കേസ് അന്വേഷണവുമായി ബന്ധപ്പെട്ട് എ.ഡി.ജി.പി എം.ആര്‍ അജിത് കുമാര്‍ നടത്തിയ പരാമർശങ്ങളും മുൻവിധി കലർന്നതായിരുന്നു (ഏപ്രിൽ 17, ന്യൂസ് 18 മലയാളം). പ്രതിയായ ഷാരൂഖ് സെയ്ഫി, സാക്കിര്‍ നായിക്കിനെപ്പോലുള്ളവരുടെ മതപ്രസംഗങ്ങള്‍ കേട്ട് പ്രചോദിതനായതാണെന്ന് പറഞ്ഞതും അയാള്‍ ജനിച്ചുവളർന്ന ശാഹീന്‍ ബാഗിനെ സംശയത്തിന്റെ നിഴലില്‍ നിറുത്തി സംസാരിച്ചതും വിമർശിക്കപ്പെട്ടു.

പൗരത്വ സംരക്ഷണ പ്രക്ഷോഭത്തിലൂടെയാണ് ശാഹീന്‍ ബാഗ് ലോകശ്രദ്ധ നേടിയത്. ഒരു വ്യക്തി കുറ്റകൃത്യത്തില്‍ ഏർപ്പെട്ടാല്‍ ആ വ്യക്തിയിലെ മുസ് ലിം സൂചനകള്‍ എടുത്തുപയോഗിക്കുന്ന രീതി ഇസ് ലാമോഫോബിയ ശക്തിപ്പെടാനേ ഉപകരിക്കൂ. പ്രാദേശിക ഭീതി, പ്രാദേശിക മുൻവിധി, തീവ്രവാദ ആരോപണം തുടങ്ങിയ നിരവധി മാതൃകകളിലൂടെ ഇസ് ലാമോഫോബിയ പ്രവർത്തിക്കുന്നു.

  1. അദൃശ്യ ഭീഷണി
    വസ്ത്രവും ഭക്ഷണവും ഇസ് ലാമോഫോബിയയുടെ നിർമിതിയില്‍ വഹിക്കുന്ന പങ്ക് പല തെറ്റിദ്ധാരണകൾക്കും കാരണമായിട്ടുണ്ട്. പലരും കരുതുന്നത് മുസ് ലിംകളുടെ പ്രവൃത്തിയും ഇസ് ലാമോഫോബിയയ്ക്ക് കാരണമാണെന്നാണ്. ഒരു പ്രദേശത്തെ മുസ് ലിംകളുടെ ചിന്ത, ഭക്ഷണം, വസ്ത്രം തുടങ്ങിയവ ഇസ് ലാമോഫോബിയയ്ക്ക് കാരണമാണെന്ന് വാദിക്കുന്നവര്‍ പക്ഷേ, മറ്റു സാമൂഹിക രാഷ്ട്രീയ പ്രശ്‌നങ്ങളില്‍ ഇതേ നിലപാടുള്ളവരല്ല. ഉദാഹരണമായി, സ്ത്രീവിരുദ്ധതയുടെ കാരണം സ്ത്രീകളാണെന്നോ, തൊഴിലാളിവിരുദ്ധതയുടെ കാരണം തൊഴിലാളികളാണെന്നോ ആരും കരുതാറില്ല. കാരണം, തൊഴിലാളിവിരുദ്ധതയും സ്ത്രീവിരുദ്ധതയും മുതലാളിത്തം, ആൺകോയ്മ തുടങ്ങിയ ഘടനകളുടെ പ്രവർത്തനമായി വിലയിരുത്തുന്നു. അതുപോലെ ഇസ് ലാമോഫോബിയയ്ക്ക് കാരണം ഇസ് ലാമോ മുസ് ലിംകളുടെ പ്രവർത്തനങ്ങളോ അല്ല, മറിച്ച് മുസ് ലിംവിരുദ്ധ വംശീയതയിലൂന്നിയ ഇസ് ലാമോഫോബിയയാണ്. വംശീയത അതിന്റെ ഇരകളുടെ പ്രവർത്തനംകൊണ്ടല്ല സജീവമാകുന്നത്; വംശീയവാദത്തിന് പൊതു സ്വീകാര്യത ലഭിക്കുന്നതു മൂലമാണ്. അത്തരം പല സംഭവങ്ങളും കേരളത്തിലുണ്ടായി.

3.1. ശബരിമലയിലെ കുട്ടിയുടെ കരച്ചിലും അദൃശ്യ മുസ്്ലിമും
ശബരിമല കുറേ കാലമായി മുസ് ലിംവിരുദ്ധ പ്രചാരണങ്ങളുടെ കേന്ദ്രമാണ്. എല്ലാ വർഷവും ഒന്നല്ലെങ്കില്‍ മറ്റൊരു തരത്തില്‍ ഇത് ആവർത്തിക്കാറുണ്ട്. ശബരിമലയില്‍ സ്വാഭാവികമായുണ്ടായ തിരക്ക് നിയന്ത്രിക്കുന്നതിലുള്ള സർക്കാരിന്റെ വീഴ്ചയെ പല മാധ്യമങ്ങളും വിമർശിച്ചിരുന്നു. എന്നാല്‍, സാമൂഹിക മാധ്യമങ്ങളും സംഘ് പരിവാര്‍ അനുകൂല സൈറ്റുകളും അതിനെ ഹിന്ദുക്കളോടുള്ള അവഗണനയായി ചിത്രീകരിച്ചു. അയ്യപ്പന്മാരെ നിറച്ചുകൊണ്ടുപോകുന്ന ഒരു കെ.എസ്.ആർ.ടി.സി ബസ്സിനെയും ഹജ്ജ് തീർഥാടകര്‍ സഞ്ചരിക്കുന്ന ഒരു വിമാനത്തിന്റെ ഉൾവശവും ഒരുമിച്ച് ചിത്രീകരിച്ചുകൊണ്ടായിരുന്നു കുപ്രചാരണം അരങ്ങേറിയത്. മുസ് ലിംകള്‍ അനർഹമായ ആനുകൂല്യങ്ങള്‍ നേടുന്നുവെന്ന ആരോപണത്തിലായിരുന്നു ഊന്നല്‍.
ഡിസംബര്‍ രണ്ടാം വാരം നിലയ്ക്കലിൽ നിന്ന് പമ്പയിലേക്കുള്ള ബസ് യാത്രക്കിടയില്‍ ശബരിമലയിലേക്ക് പോകുന്ന സംഘത്തിലെ ഒരു കുട്ടി പിതാവിനെ കാണാതെ ആശങ്കയിലായി. ഒരു മലയാളി പോലീസുകാരനോട് ഈ വിവരം കുട്ടി കരഞ്ഞുപറഞ്ഞു. ഏറെ താമസിയാതെ പിതാവ് തിരിച്ചെത്തി. കുഞ്ഞിന് സമാധാനമായി. അവന്‍ പോലീസുകാരനോട് കൈവീശി യാത്ര ചോദിച്ചു. ഈ സംഭവത്തിന്റെ ഒരു വീഡിയോ പുറത്തുവന്നു. 'ശബരിമലയില്‍ കുട്ടി ഒറ്റപ്പെട്ടു, പോലീസ് സഹായിച്ചില്ല' തുടങ്ങിയ വ്യാജ പ്രചാരണങ്ങളും കൂടെയുണ്ടായിരുന്നു. ഏതാനും മിനിറ്റ് നീളമുള്ള വീഡിയോയിൽനിന്ന് ചില ഭാഗങ്ങള്‍ മുറിച്ചെടുത്താണ് പ്രചാരണത്തിന് ഉപയോഗിച്ചത്. യഥാർഥ വീഡിയോ പുറത്തുവന്നതോടെ പ്രചാരണങ്ങള്‍ അടങ്ങി. കേരളത്തിനെതിരായ പ്രചാരണമെന്ന നിലയില്‍ മാത്രമല്ല ഈ സംഭവത്തെ ദേശീയ മാധ്യമങ്ങള്‍ ഉപയോഗപ്പെടുത്തിയത്. മറിച്ച്, ഈ വിഷയത്തിന് ഒരു ഇസ് ലാമോഫോബിക് സ്പിന്‍ നല്കാന്‍ അവർ ശ്രമിച്ചതായും കാണാം. ഇസ് ലാമോഫോബിയാ പ്രചാരണങ്ങള്‍ രൂപപ്പെടാന്‍ മുസ് ലിംകള്‍ പ്രത്യേകിച്ചൊന്നും ചെയ്യേണ്ടതില്ലെന്നാണ് ഇത്തരം സംഭവങ്ങള്‍ തെളിയിക്കുന്നത്. മുസ് ലിംകളുടെ നല്ലതോ മോശമോ ആയ പ്രവർത്തനം കൊണ്ടല്ല ഇസ് ലാമോഫോബിയ സംഭവിക്കുന്നതെന്നും മനസ്സിലാക്കേണ്ടതുണ്ട്.

  1. രാഷ്ട്രീയ പ്രവർത്തനം
    ഇസ് ലാമോഫോബിയ വ്യക്തിയുടെ മനോഭാവമാണെന്ന മട്ടില്‍ ലളിതമായി കാണാവുന്ന ഒന്നല്ല. മറിച്ച്, അത് ഭരണകൂട അധികാരത്തിന്റെ ഘടനയെത്തന്നെ സ്വാധീനിക്കുകയും മുസ് ലിംകൾക്കെതിരായ വിവേചനത്തിന് കാരണമാവുകയും ചെയ്യും. അത്തരം സംഭവങ്ങളും ഈ വർഷമുണ്ടായി. ഒരു ജനവിഭാഗമെന്ന നിലയില്‍ മുസ് ലിം ന്യൂനപക്ഷത്തിന്റെ രാഷ്ട്രീയ പ്രവർത്തനത്തെയും സംഘടിത മുന്നേറ്റങ്ങളെയും നിഷേധിക്കുന്നതിന്റെ ഭാഗമായാണ് ഇസ് ലാമോഫോബിയ പ്രവർത്തിക്കുന്നത്. ഇത് വിവിധ മാതൃകകളുടെ സമന്വയത്തിലൂടെ എങ്ങനെ പ്രവർത്തിക്കുന്നുവെന്ന് പരിശോധിക്കാം.

4.1. ഹർത്താലും ഇരട്ട നീതിയും
പോപുലര്‍ ഫ്രണ്ട് പ്രഖ്യാപിച്ച ഹർത്താലുമായി ബന്ധപ്പെട്ട് 2023 ജനുവരി അവസാന വാരത്തില്‍ നടന്ന ജപ്തി കേരളത്തില്‍ വലിയ ചർച്ചയായി. 2022 സെപ്റ്റംബര്‍ 23-നായിരുന്നു ഹർത്താല്‍ നടന്നത്. ഹർത്താലിലെ നാശനഷ്ടത്തിന്റെ പേരില്‍ നടപടിയെടുത്തപ്പോള്‍ പോപുലര്‍ ഫ്രണ്ടുമായി ബന്ധമില്ലാത്തവരുടെ സ്വത്തു പോലും ജപ്തി ചെയ്ത് പിടിച്ചെടുത്തതായിരുന്നു നിയമനടപടികളെ കൂടുതല്‍ ദൃശ്യതയിലേക്കു കൊണ്ടുവന്നത്.

സംസ്ഥാനത്തെ 178 കേന്ദ്രങ്ങളില്‍ ജപ്തി നടന്നു. മലപ്പുറം ജില്ലയിലായിരുന്നു ഏറ്റവും കൂടുതല്‍- 89 എണ്ണം. കോഴിക്കോട് 23, കണ്ണൂർ 9, കാസർകോട് 3, വയനാട് 14, തൃശൂര്‍ 16, കോട്ടയം 5, ഇടുക്കി 6, പത്തനംതിട്ട 2, തിരുവനന്തപുരം 5, കൊല്ലം 1 എന്നിങ്ങനെയും ജപ്തി നടന്നിരുന്നു. മലപ്പുറം ജില്ലയില്‍ 13, കോട്ടയത്ത് 4, കണ്ണൂര്‍- വയനാട് ജില്ലകളില്‍ 2 വീതം, തൃശൂര്‍, പാലക്കാട്, കാസർകോട്, ആലപ്പുഴ 1 വീതം എന്നിങ്ങനെ സംഘടനയുമായി ബന്ധമില്ലാത്ത 25 മുസ് ലിംകളുടെ സ്വത്തുക്കളും കൂട്ടത്തില്‍ തെറ്റായി ജപ്തി ചെയ്തിരുന്നു.

ജപ്തി വിവാദമായതോടെ പിടിച്ചെടുത്ത സ്വത്ത് തിരികെ നല്കിയതായി സർക്കാര്‍ ഫെബ്രുവരി അവസാന വാരം ഹൈക്കോടതിയെ അറിയിച്ചു. ഹർത്താലിലെ അക്രമങ്ങളില്‍ 5.20 കോടി രൂപയുടെ നഷ്ടമുണ്ടായെന്നായിരുന്നു റിപ്പോർട്ട് . കേരള ചരിത്രത്തില്‍ ഒരു ഹർത്താലിനെതിരെ നടന്ന ഏറ്റവും വ്യത്യസ്തമായ ഒരു നിയമപ്രതികരണമായിരുന്നു ഇത്. മറ്റ് ഏത് ഹർത്താലുകൾക്കെതിരെയും നടക്കാത്ത തരത്തിലുള്ള ഭരണകൂട നടപടിയാണ് ആ ജപ്തിയുടെ പേരില്‍ കേരളത്തില്‍ അരങ്ങേറിയത്. നിയമ വാഴ്ചയുടെ പേരില്‍ നടക്കുന്ന ഇരട്ട നീതി ഇസ് ലാമോഫോബിയയുടെ പ്രചാരണ ഉപാധിയായി മാറുന്നു.

4.2. ആർ.എസ്.എസ്സുമായുള്ള ജമാഅത്ത് ചർച്ച
കേരളത്തില്‍ സംഘ് പരിവാറിന്റെ എതിര്‍ കക്ഷികളാണ് എല്ലാ രാഷ്ട്രീയ കക്ഷികളും. ഇന്ത്യന്‍ ഫാഷിസത്തിന്റെ പ്രാഥമിക ഇരകളായ മുസ് ലിംകളുടെ രാഷ്ട്രീയ സംഘാടനത്തെ നിഷേധിക്കാനും ഇതേ സംഘ് പരിവാര്‍ വിരുദ്ധതയുടെ പേരില്‍ ശ്രമങ്ങള്‍ നടന്നുവരുന്നു. ഇതും ഇസ് ലാമോഫോബിയയുടെ മറ്റൊരു പ്രവർത്തന മാതൃകയാണ്. രാഷ്ട്രീയം ചെയ്യാനുള്ള മുസ് ലിം ന്യൂനപക്ഷ അവകാശത്തിന്റെ നിഷേധമാണ് ഇന്ത്യന്‍ ഇസ് ലാമോഫോബിയയുടെ അടിസ്ഥാന സ്വഭാവം.

2023 ജനുവരി 14-ന് ദൽഹി മുന്‍ ലഫ്. ഗവർണര്‍ നജീബ് ജങ്ങിന്റെ വസതിയില്‍ മുസ് ലിം സംഘടനാ നേതാക്കളും ആർ.എസ്.എസ് നേതാക്കളും തമ്മില്‍ ചർച്ച നടന്നു. ആർ.എസ്.എസ് നേതാക്കളായ ഇന്ദ്രേഷ് കുമാര്‍, റാം ലാല്‍, കൃഷ്ണ ഗോപാല്‍ എന്നിവരാണ് ഒരു ഭാഗത്തുണ്ടായിരുന്നത്. മുസ് ലിം സംഘടനകളായ ജംഇയ്യത്തുല്‍ ഉലമായെ ഹിന്ദ്, ജമാഅത്തെ ഇസ് ലാമി, അഹ്്ലെ ഹദീസ്, ദാറുല്‍ ഉലൂം ദയൂബന്ദ്, ശീഈ സംഘടനകളുടെ പ്രതിനിധികള്‍ എന്നിവരായിരുന്നു മറുഭാഗത്ത്. ഹിന്ദുത്വവക്താക്കളുടെ വിദ്വേഷപ്രസംഗം, മഥുര-കാശി മസ്ജിദുകളുടെ മേലുള്ള അവകാശവാദങ്ങള്‍, ഗോഹത്യയുടെ പേരിലുള്ള അതിക്രമങ്ങള്‍ ഇതൊക്കെയായിരുന്നു ചർച്ചാ വിഷയം.

ചർച്ച നടന്നു ആഴ്ചകള്‍ കഴിഞ്ഞശേഷം, ജമാഅത്ത് നേതാക്കള്‍ ആർ.എസ്.എസ്സുമായി ഗൂഢാലോചന നടത്തുന്നുവെന്ന വിമർശനമുയർന്നു. ഇത്തരമൊരു ചർച്ച വിലയിരുത്താനും അതിന്റെ ഫലപ്രാപ്തി പരിശോധിക്കാനും വിയോജിക്കാനും വിമർശിക്കാനുമുള്ള സ്വാതന്ത്ര്യം എല്ലാ സംഘ് പരിവാര്‍ വിരുദ്ധർക്കുമുണ്ട്. എന്നാല്‍ നടന്നത് അതായിരുന്നില്ല. ദേശീയ സ്വാതന്ത്ര്യസമരത്തോളം പാരമ്പര്യമുള്ള ജംഇയ്യത്തുല്‍ ഉലമായെ ഹിന്ദ് പോലുള്ള സംഘടനകള്‍ ചേർന്നാണ് ചർച്ച നടത്തിയതെങ്കിലും ആരോപണവും വിമർശനവും നേരിട്ടത് ഈ ചർച്ചയില്‍ നേരിട്ടു പങ്കെടുക്കാത്ത കേരളത്തിലെ ജമാഅത്തെ ഇസ് ലാമി ഘടകമായിരുന്നു. ഭരണകൂട അധികാരത്തിന്റെ ഭാഗമായ സംഘടനയും അതിന്റെ ഇരകളും തമ്മിലാണ് ചർച്ചയെന്നും അല്ലാതെ കേരളത്തിലെ രണ്ട് സംഘടനകള്‍ തമ്മിലല്ലെന്ന കാര്യവും പരിഗണിക്കപ്പെട്ടില്ല.

സമാനമായ സന്ദർഭത്തില്‍ ശ്രീ എം എന്ന ആധ്യാത്മ ഗുരുവിന്റെ സാന്നിധ്യത്തില്‍ സി.പി.എമ്മും സംഘ് പരിവാര്‍ സംഘടനകളും തമ്മില്‍ രണ്ടു തവണ തിരുവനന്തപുരത്തും കണ്ണൂരും ചർച്ച നടന്നിട്ടുണ്ടെന്നും ഇപ്പോഴുള്ളതുപോലുള്ള വിമർശനമായിരുന്നില്ല അന്ന് ഉയർന്നതെന്നും പലരും ഓർമിപ്പിച്ചു (കെ.എ ജോണിയുമായി ശ്രീ എം നടത്തിയ അഭിമുഖം, മാതൃഭൂമി ഓൺലൈന്‍, 1 മാർച്ച് 2021). സി.പി.എമ്മിന്റെ മധ്യസ്ഥതയില്‍ പിണറായി വിജയന്‍ ആർ.എസ്.എസ്സുമായി ചർച്ച നടത്തിയെന്ന് ഇകണോമിക് ടൈംസിന്റെ ന്യൂദൽഹി ലേഖകന്‍ ദിനേഷ് നാരായണന്‍ തന്റെ 'ദ ആർ.എസ്.എസ് ആന്റ് ദ മെയ്ക്കിങ് ഓഫ് ദ ഡീപ് നാഷന്‍' (2020 ഇൻഡ്യൻ വൈകിംഗ്) എന്ന പുസ്തകത്തില്‍ പറയുന്നു. ഉല്ലേഖ് എന്‍.പി രചിച്ച 'കണ്ണൂര്‍: ഇൻസൈഡ് ഇന്ത്യാസ് ബ്ലഡിയെസ്റ്റ് റിവഞ്ച് പൊളിറ്റിക്‌സ്' ( 2018 പെൻഗ്വിന്‍ റാൻഡം ഹൗസ്) എന്ന പുസ്തകവും ഇത്തരം ചർച്ചകളെക്കുറിച്ച് സൂചനകള്‍ നല്കുന്നുണ്ട്. കാര്യങ്ങള്‍ ഇപ്രകാരമായിരിക്കെ വസ്തുതകളെ അദൃശ്യമാക്കി നടത്തുന്ന വ്യാജ പ്രചാരണങ്ങളിലൂടെ സ്വതന്ത്ര തീരുമാനമെടുക്കാനുള്ള മുസ് ലിംകളുടെയും മുസ് ലിം സംഘടനകളുടെയും അവകാശം നിഷേധിക്കുന്നതിന്റെ പേരാണ് ഇസ് ലാമോഫോബിയ.

  1. തൊഴില്‍ - വിദ്യാഭ്യാസ അവകാശത്തിന്റെ നിഷേധം
    മുസ് ലിംകളുടെ തൊഴില്‍, വിദ്യാഭ്യാസ അവകാശ നിഷേധത്തിന്റെ രൂപവും ഇസ് ലാമോഫോബിയക്കുണ്ട്. 1970-കളില്‍ ആരംഭിച്ച ഗൾഫ് കൂടിയേറ്റത്തോടെ മുസ് ലിംകളുടെ തൊഴില്‍രാഷ്ട്രീയം കേരളം ഭീതിയോടെയാണ് ചർച്ച ചെയ്തത്. പ്രവാസത്തിലൂടെ മുസ് ലിംകൾക്കു കൈവന്ന സാമൂഹിക ചലനം മതപരതയെക്കുറിച്ചുള്ള ഭീതിയായി മാറിയതോടെയാണ് അത്. തൊഴിലിടത്തിലും വിദ്യാഭ്യാസ മേഖലകളിലും മുസ് ലിംകള്‍ അനുഭവിക്കുന്ന അവകാശ നിഷേധങ്ങള്‍ തൊഴിലിടത്തിന്റെ പ്രത്യേകതയില്‍നിന്നു മാറ്റി ഇസ് ലാമോഫോബിയയുടെ മാതൃകയാക്കി പരിവർത്തിപ്പിക്കുന്ന പ്രക്രിയ വിപുലമാണ്.

5.1. ഹിജാബും സർജിക്കല്‍ മാസ്‌കും
2023 ജൂണ്‍ അവസാന വാരം ഓപറേഷന്‍ തിയേറ്ററില്‍ തലമറയും വിധമുള്ള ശസ്ത്രക്രിയാ വസ്ത്രം (സർജിക്കല്‍ ഹുഡ്) ധരിക്കാന്‍ അനുവദിക്കണമെന്നാവശ്യപ്പെട്ട് തിരുവനന്തപുരം മെഡിക്കല്‍ കോളേജിലെ ഏഴു വിദ്യാർഥിനികള്‍ പ്രിൻസിപ്പലിന് കത്തു നല്കി. വിവിധ ബാച്ചുകളില്‍ പഠിക്കുന്ന ഏഴ് എം.ബി.ബി.എസ് വിദ്യാർഥികളാണ് സർജിക്കല്‍ ഹുഡും കൈ നീളമുള്ള ജാക്കറ്റും അനുവദിക്കണമെന്നാവശ്യപ്പെട്ട് കത്ത് നല്കി യത്. നിലവിലെ പ്രോട്ടോകോള്‍ വിശദീകരിച്ചശേഷം, കമ്മിറ്റിയെ നിയോഗിച്ച് വിഷയം പരിശോധിച്ച് തീരുമാനിക്കാമെന്ന് പ്രിൻസിപ്പല്‍ അറിയിച്ചു. സർജന്മാരുടെയും ഇൻഫെക് ഷന്‍ കണ്ട്രോള്‍ വിഭാഗത്തിന്റെയും യോഗം വിളിച്ചിട്ടുണ്ടെന്നും ഈ യോഗത്തില്‍ അപേക്ഷ ചർച്ച ചെയ്യുമെന്നും പ്രിൻസിപ്പല്‍ പറഞ്ഞു. തികച്ചും വ്യക്തിപരവും തൊഴില്‍ സൗകര്യാർഥവും നല്കിയ ഈ കത്ത് സംഘ് പരിവാര്‍ അനുകൂലികള്‍ ദുരുദ്ദേശ്യത്തോടെ പത്രങ്ങൾക്ക് ചോർത്തി നല്കി. ദേശീയ മാധ്യമങ്ങളും വാർത്ത ഏറ്റുപിടിച്ചു.

മെഡിക്കൽ കോളേജില്‍ വിദ്യാർഥികള്‍ പ്രിൻസിപ്പലിന് നല്കിയ കത്ത് ചോർത്തിയത് ഇസ് ലാമോഫോബിയ വ്യാപിപ്പിക്കാനുള്ള ആസൂത്രിത നീക്കമായി കാണണമെന്ന് എസ്.എഫ്.ഐ പ്രസ്താവനയിറക്കി. എന്നാല്‍, ആ സമയത്തും പല മുന്‍ എസ്.എഫ്.ഐക്കാരായ സോഷ്യല്‍ മീഡിയാ പ്രവർത്തകരും ഇസ് ലാമോഫോബിയ പ്രചരിപ്പിക്കുന്ന തിരക്കിലായിരുന്നുവെന്നു ശമീര്‍ കെ. മുണ്ടോത്ത് ഫേസ്ബുക്കില്‍ എഴുതിയ കുറിപ്പില്‍ ചൂണ്ടിക്കാണിച്ചിരുന്നു. തൊഴിലിടത്തിലെ അവകാശ നിഷേധം മാത്രമല്ല, ലിംഗ രാഷ്ട്രീയം, ഹിജാബ് വിരുദ്ധത അടക്കമുള്ള മാതൃകകളും സമന്വയിപ്പിച്ചാണ് ഇസ് ലാമോഫോബിയ വികസിച്ചിരിക്കുന്നത്.

  1. ഫാഷിസ്റ്റ് പ്രചാരവേല
    യാതൊരു മറയും കൂടാതെ വളരെ തുറന്ന രീതിയില്‍ പ്രവർത്തിക്കുന്ന ഇസ് ലാമോഫോബിയയാണ് സംഘ് പരിവാറിന്റേത്. തുടക്കത്തില്‍ പൊതു ഇസ് ലാമോഫോബിയയുടെ മാതൃകകള്‍ ഉപയോഗിച്ചു പ്രവർത്തിച്ച സംഘ് പരിവാര്‍, ഇപ്പോള്‍ നേരിട്ടുള്ള ആക്രമണത്തിലാണ് ഊന്നുന്നത്. പ്രചാരവേലയിലൂടെ ആൾക്കൂട്ടത്തെ സ്വാധീനിക്കാനാണ് ശ്രമം.

6 .1. കേരള സ്റ്റോറി എന്ന പ്രചാരവേല

2023 മെയ് മാസമായതോടു കൂടി സംഘ് പരിവാറിന്റെ മുൻകൈയില്‍ നിർമിച്ച 'ദ കേരള സ്റ്റോറി ' കേരളത്തില്‍ നടക്കുന്ന സംഭവങ്ങളെ അന്താരാഷ്ട്ര തലത്തിലുള്ള ഇസ് ലാമോഫോബിയ ആഖ്യാനവുമായി കണ്ണിചേർക്കുന്ന ഒരു പ്രധാന സംഭവമായി. വിപുല്‍ അമൃത്‌ലാല്‍ ഷാ നിർമിച്ച് സുദീപ്തോ സെന്‍ രചനയും സംവിധാനവും നിർവഹിച്ച ഒരു ഇന്ത്യന്‍ ഹിന്ദി ഭാഷാ ചിത്രമാണ് 'ദ കേരള സ്റ്റോറി.'

'കേരളത്തിലെ 32,000 സ്ത്രീകളുടെ ഹൃദയഭേദകമായ കഥ' എന്നായിരുന്നു സൺഷൈന്‍ പിക്ചേഴ്സിന്റെ യൂട്യൂബ് ചാനലിലൂടെ പുറത്തുവിട്ട ട്രെയിലറിനു നല്കിയിരുന്ന അടിക്കുറിപ്പ്. വ്യാജപ്രചാരണമുള്ള സിനിമക്കെതിരായ പ്രതിഷേധം ശക്തമായതോടെ അടിക്കുറിപ്പ് 'കേരളത്തിന്റെ വിവിധ ഭാഗങ്ങളില്‍നിന്നുള്ള മൂന്ന് പെൺകുട്ടികളുടെ യഥാർഥ കഥകള്‍' എന്ന് തിരുത്തി. എങ്കിലും മെയ് ആദ്യവാരം പ്രദർശനത്തിനെത്തിയ സിനിമ ലൗ ജിഹാദെന്ന സംഘ് പരിവാര്‍ പ്രചാരണത്തെ തന്നെയാണ് ഇതിവൃത്തമായി വികസിപ്പിച്ചത്. മുസ് ലിംകളല്ലാത്ത മലയാളി പെൺകുട്ടികളെ തട്ടിയെടുത്തു തീവ്രവാദ പ്രവർത്തനത്തിലേക്കു നയിക്കുന്നുവെന്ന ആരോപണമാണ് സിനിമ ഉയർത്തുന്നത്. ലിംഗ രാഷ്ട്രീയം, മുസ് ലിം ന്യൂനപക്ഷം നിർണായക ശക്തിയായ കേരളം, തീവ്രവാദ ആരോപണം തുടങ്ങി ഇസ് ലാമോഫോബിയയുടെ വിവിധ മാതൃകകള്‍ ഒന്നു ചേർന്നു ശക്തിപ്പെട്ട ഫാഷിസ്റ്റ് പ്രചാരവേലയാണിത്. പൊതുവെ, സംഘ് പരിവാര്‍ നിർമിക്കുന്ന ഇസ് ലാമോഫോബിയയെ കുറിച്ച് വളരെയധികം ജാഗ്രതയുള്ളതിനാല്‍ 'കേരള സ്റ്റോറി' കേരളത്തിലെ എല്ലാ വിഭാഗം രാഷ്ട്രീയപാർട്ടികളും സാമൂഹിക പ്രസ്ഥാനങ്ങളും തള്ളിക്കളഞ്ഞു.

6.2. വീണ്ടും ലൗ ജിഹാദ്

ലൗ ജിഹാദ് ആരോപണത്തിന് വർഷങ്ങളുടെ പഴക്കമുണ്ടെങ്കിലും അത് പൂർണതയിലെത്തിയത് ഹാദിയ സംഭവത്തോടെയാണ്. സ്വന്തം ഇഷ്ടപ്രകാരം ഇസ് ലാമിലേക്ക് മതംമാറിയശേഷം ഒരു മുസ് ലിം ചെറുപ്പക്കാരനെ വിവാഹം കഴിച്ചതോടെയാണ് ഹാദിയ എന്ന ഹോമിയോ വിദ്യാർഥിനി (ഇപ്പോള്‍ ഡോക്ടര്‍) വിവാദത്തിലേക്ക് തള്ളിയിടപ്പെടുന്നത്. ഹാദിയയുടെ വരന്‍ ഷെഫിന്‍ ജഹാന്‍ ഇസ് ലാമിലേക്ക് മതംമാറ്റണമെന്ന ഉദ്ദേശ്യത്തോടെ ഹാദിയയെ കുടുക്കിയതാണെന്നായിരുന്നു അന്ന് ഉയർന്ന ആരോപണം. പിന്നീട് സുപ്രീം കോടതി തന്നെ വിവാദത്തിന് തിരശ്ശീലയിട്ടു.

പക്ഷേ, ഡിസംബര്‍ ആദ്യവാരത്തോടെ വിവാദം വീണ്ടും സജീവമായി. 'കാസ'യുടെ നേതാവാണ് ഇത്തവണ തുടക്കമിട്ടത്. ഹാദിയ വിവാഹമോചിതയായി മറ്റൊരു മുസ്്ലിമിനെ വിവാഹം കഴിച്ചുവെന്ന് കാസ നേതാവ് കെവിന്‍ പീറ്റര്‍ പറഞ്ഞു. അതിനു പിന്നാലെ, തന്റെ മകള്‍ ഐ.എസിനുവേണ്ടി പൊട്ടിത്തെറിക്കുമോയെന്ന് ആശങ്കയുണ്ടെന്ന് പറഞ്ഞ് ഹാദിയയുടെ പിതാവ് അശോകന്‍ കോടതിയെ സമീപിച്ചു. കോടതി പക്ഷേ, കേസ് കാര്യമായെടുത്തില്ല. മുസ് ലിംകളുടെ ഇടപെടലുകളില്‍ ദുരൂഹത ആരോപിക്കുക ഇസ് ലാമോഫോബിയയുടെ ലക്ഷണമാണ്. ഹാദിയ മുൻകാലങ്ങളില്‍ ഹിന്ദുവായിരുന്നുവെന്നതൊന്നും രക്ഷയായില്ല. l
(തുടരും)