2024-ലെ ലോക്്സഭാ തെരഞ്ഞെടുപ്പില്‍ സംഘ് പരിവാര്‍ നേതൃത്വം കൊടുക്കുന്ന എൻ.ഡി.എയും, കോണ്‍ഗ്രസ്സും സി.പി.എമ്മും ഉള്‍ക്കൊള്ളുന്ന ‘ഇൻഡ്യ’ മുന്നണിയുമാണ്‌ ദേശീയ തലത്തില്‍ നേരിട്ട് ഏറ്റുമുട്ടിയത്. വെറുപ്പിന്റെ അങ്ങാടിയില്‍ ‘സ്നേഹത്തിന്റെ കട’ തുറക്കാന്‍ രാഹുല്‍ ഗാന്ധിയുടെ നേതൃത്വത്തില്‍ ഇന്ത്യയൊട്ടാകെ കോണ്‍ഗ്രസ്സിന്റെ പ്രചാരണ കാമ്പയിന്‍ നടന്നെങ്കിലും സംഘ് പരിവാരം ഇനിയും മുഖ്യ പ്രതിപക്ഷമായിട്ടില്ലാത്ത കേരളത്തില്‍ കോണ്‍ഗ്രസ് നയിക്കുന്ന യു.ഡി.എഫും സി.പി.എം നേതൃത്വം നല്‍കുന്ന എല്‍.ഡി.എഫും തമ്മിലാണ് മത്സരം നടന്നത്. ഇന്ത്യന്‍ ജനാധിപത്യത്തിന്റെ വീണ്ടെടുപ്പിന് വേണ്ടിയാണ് രണ്ട് മുന്നണികളും മത്സരിക്കുന്നത് എന്നതുകൊണ്ട് സാധാരണ വോട്ടര്‍മാരെ സംബന്ധിച്ചേടത്തോളം ബി.ജെ.പി സ്ഥാനാര്‍ഥികളുടെ പരാജയമായിരുന്നു കേരളത്തിലെ ഫോക്കസ്. അതിനാല്‍ തന്നെ ബി.ജെ.പിക്ക് ബദല്‍ ‘ഇൻഡ്യ’ മുന്നണിയാണ് എന്നും, കേരളത്തില്‍ അതിനു നേതൃത്വം നല്‍കുന്ന യു.ഡി.എഫ് ജയിക്കണം എന്നും മലയാളി വോട്ടര്‍മാര്‍ തീരുമാനിച്ചപ്പോഴാണ് കഴിഞ്ഞ രണ്ടു ലോക്സഭാ തെരഞ്ഞെടുപ്പിലും സി.പി.എം ‘ഒരു കനല്‍ തരി’യിൽ ഒതുങ്ങിപ്പോയത്. 2019-ല്‍ ആലപ്പുഴയിലെരിഞ്ഞ സി.പി.എം ‘തരി’ 2024-ല്‍ ആലത്തൂരിലേക്ക് പാറി ‘ഒന്നില്‍’ തന്നെ ഉറച്ചുനിന്നതല്ലാതെ ‘ടാര്‍ഗറ്റ്’ പൂര്‍ത്തീകരിക്കാന്‍ കഴിഞ്ഞില്ല. ബംഗാളിലും ത്രിപുരയിലും കുറ്റിയറ്റ ശേഷം ആകെ അവശേഷിക്കുന്ന കേരളത്തില്‍ ചില്ലറ സീറ്റെങ്കിലും കിട്ടിയില്ലെങ്കില്‍ ദേശീയ രാഷ്ട്രീയത്തില്‍നിന്ന് തുടച്ചുനീക്കപ്പെടുമെന്ന വെപ്രാളത്തില്‍ സി.പി.എം കാട്ടിക്കൂട്ടിയ വിക്രിയകളുടെ പ്രതിധ്വനികളാണ് ഇപ്പോള്‍ തെരഞ്ഞെടുപ്പിന് ശേഷവും അലയടിച്ചുകൊണ്ടിരിക്കുന്നത്.

തെരഞ്ഞെടുപ്പ് വേളകളില്‍ അരക്കഴഞ്ച് പരദൂഷണവും ഒരു നുള്ള് നുണയും ചതിയില്‍ ഇത്തിരി വഞ്ചനയുമൊക്കെ രാഷ്ട്രീയ നാട്ടുനടപ്പുകളാണ്. ഇടത് വലത് പക്ഷങ്ങളില്‍ നടക്കുന്ന ഇക്കളികള്‍ സ്പോര്‍ട്സ്മാന്‍ സ്പിരിറ്റില്‍ തന്നെ മലയാളികള്‍ ഏറ്റെടുക്കാറുമുണ്ട്. എങ്ങനെയെങ്കിലും അടുത്ത അഞ്ചു വര്‍ഷത്തേക്ക് ഒരു സീറ്റ് ഒപ്പിച്ചെടുക്കാന്‍ ഏറെ മാര്‍ക്കറ്റുള്ള ചരക്കുകളാണ് ഓരോ പാര്‍ട്ടിയും പ്രചാരണത്തില്‍ പുറത്തെടുക്കുക. രാഷ്ട്രീയ അസ്തിത്വം നിലനിര്‍ത്താനുള്ള ‘ഡൂ ഓര്‍ ഡൈ’ മത്സരത്തില്‍ ഇത്തവണ സി.പി.എം ഊതിക്കത്തിച്ചത് പക്ഷേ, കേരള രാഷ്ട്രീയത്തില്‍ ദൂരവ്യാപകമായ പ്രത്യാഘാതങ്ങള്‍ ഉണ്ടാക്കാന്‍ കഴിയുന്ന തീപൊരി ആയിരുന്നു. 2024-ലെ ലോക്സഭാ തെരഞ്ഞെടുപ്പില്‍ വടകര മണ്ഡലത്തില്‍ പ്രചരിച്ച ‘കാഫിര്‍’ സ്ക്രീന്‍ഷോട്ടാണ് ആ കനല്‍ തരി. ‘കാഫിറിനു വോട്ട് ചെയ്യരുത്’ എന്ന അതിമാരകമായ സന്ദേശം ഉൾക്കൊള്ളുന്ന സ്ക്രീന്‍ഷോട്ടാണ് ഇക്കഴിഞ്ഞ ലോക്സഭാ തെരഞ്ഞെടുപ്പിൽ വടകരയിലെ എൽ.ഡി.എഫ് സ്ഥാനാര്‍ഥി കെ.കെ ശൈലജയെ ഉന്നം വെച്ച് സൈബര്‍ ലോകത്ത് വ്യാപകമായി പ്രചരിച്ചത്. സംഘ് പരിവാര്‍ നരേറ്റീവിനെ പോലും വെല്ലുന്ന ‘കാഫിര്‍ അണുവിസ്ഫോടനം!’ കേരളത്തിന്റെ രാഷ്ട്രീയ ഭൂപടത്തില്‍ ‘വര്‍ഗീയ പരിസ്ഥിതി ലോല’ പ്രദേശമായി അടയാളപ്പെടുത്തപ്പെട്ട നാദാപുരം, പേരാമ്പ്ര, തൂണേരി പ്രദേശങ്ങള്‍ ഉള്‍ക്കൊള്ളുന്ന വടകര ലോക്്സഭാ മണ്ഡലത്തിലാണ് ഇത് സംഭവിച്ചത്.

വടകരയിലെ ലോക്സഭാ തെരഞ്ഞെടുപ്പ് പ്രചാരണത്തിനിടെ തിരുവള്ളൂരിലെ എം.എസ്.എഫ് നേതാവ് പി.കെ മുഹമ്മദ് ഖാസിമിന്റെ വാട്സാപ്പ് സന്ദേശമെന്ന പേരിലാണ് ‘കാഫിര്‍’ സ്ക്രീൻഷോട്ട് പ്രചരിച്ചത്. സംഭവവുമായി ബന്ധപ്പെട്ട് ഖാസിമിനെ പോലീസ് പ്രതിയാക്കുകയും ചെയ്തു. ഇത് വ്യാജമായി നിർമിച്ച സ്ക്രീൻഷോട്ടാണെന്ന് ചൂണ്ടിക്കാട്ടി ഖാസിമും പോലീസില്‍ പരാതി നൽകി. സി.പി.എമ്മാണ് ഇതിന് പിന്നിലെന്നായിരുന്നു ലീഗിന്റെ ആരോപണം. ഇതുമായി ബന്ധപ്പെട്ട അന്വേഷണത്തിൽ മുഹമ്മദ് ഖാസിമല്ല സ്ക്രീൻ ഷോട്ടിന് പിന്നിലെന്ന് പോലീസ് കണ്ടെത്തുകയും ചെയ്തിരുന്നു. എന്നാൽ, സി.പി.എം അനുകൂല സൈബര്‍ പേജുകളിലാണ് സ്ക്രീന്‍ഷോട്ട് ആദ്യമായി പ്രചരിച്ചതെന്നും മത സ്പർധ വളർത്തുകയാണ് ഈ സ്ക്രീൻ ഷോട്ടിലൂടെ ഇത് നിർമിച്ചവർ ലക്ഷ്യമിട്ടിരുന്നതെന്നും പോലീസ് ഇപ്പോള്‍ ഹൈക്കോടതിയെ അറിയിച്ചിരിക്കുകയാണ്. ഖാസിം നൽകിയ ഹരജിയിലാണ് ഹൈക്കോടതിയിൽ പൊലീസിന്റെ അന്വേഷണ പുരോഗതി റിപ്പോർട്ട് എത്തിയത്.

തെരഞ്ഞെടുപ്പ് കാലത്ത് യു.ഡി.എഫോ മുസ്‌ലിം ലീഗോ ഈ പോസ്റ്റര്‍ ഒരിടത്തും ഉപയോഗിച്ചിട്ടില്ല. പോലീസ് റിപ്പോര്‍ട്ടിലെ ‘കാഫിറി’ന്റെ ‘റൂട്ട് മാപ്പ്’ അനുസരിച്ച് ഡി.വൈ.എഫ്.ഐ വടകര മേഖലാ പ്രസിഡന്റ് റിബേഷ് രാമകൃഷ്ണന്‍ ആണ് ആദ്യം സ്ക്രീന്‍ഷോട്ട് ‘റെഡ് എന്‍കൗണ്ടര്‍’ എന്ന സ്വന്തം വാട്സ് ആപ്പ് ഗ്രൂപ്പില്‍ പോസ്റ്റ് ചെയ്തത്. പിന്നീട് ‘റെഡ് ബറ്റാലിയന്‍’ ഗ്രൂപ്പിലും, ‘അമ്പാടി മുക്ക് സഖാക്കള്‍’ പേജിലും ഏറ്റവുമൊടുവില്‍ ‘പോരാളി ഷാജി’ ഫേസ് ബുക്ക് പേജിലും സ്ക്രീന്‍ഷോട്ട് പ്രത്യക്ഷപ്പെട്ടു. മുന്‍ എം.എൽ.എയും സി.പി.എം കോഴിക്കോട് ജില്ലാ കമ്മിറ്റി അംഗവുമായ കെ.കെ ലതികയും സ്ക്രീന്‍ഷോട്ട് ഷെയര്‍ ചെയ്തു. തനിക്ക് ഇത് എവിടെ നിന്നാണ് കിട്ടിയതെന്ന് ഓ‌ർമയില്ലെന്നാണ് റിബേഷ് പോലീസിനോട് പറഞ്ഞത്. റിബേഷിന്റെ ഫോൺ ഫോറൻസിക് പരിശോധനയ്ക്ക് അയച്ചതായി പോലീസ് കോടതിയെ അറിയിച്ചിട്ടുണ്ട്. ഏറ്റവുമൊടുവില്‍, റിബേഷ് ആണ് സ്ക്രീന്‍ഷോട്ട് നിര്‍മിച്ചത് എന്ന് തെളിയിക്കുന്നവര്‍ക്ക് 25 ലക്ഷം ഇനാം പ്രഖ്യാപിച്ചുകൊണ്ട് ‘പ്രതി’ക്ക് രക്ഷാ കവചം തീര്‍ത്തിരിക്കുകയാണ് ഡി.വൈ.എഫ്.ഐ. പാര്‍ട്ടിയുടെ ഉത്തരവാദപ്പെട്ട സ്ഥാനത്തിരിക്കുന്ന ഒരു സഖാവ് ഒറ്റയ്ക്ക് നിർമിച്ചതല്ല സ്ക്രീന്‍ഷോട്ട് എന്നാണ് ഇത് സൂചിപ്പിക്കുന്നത്.

സ്ക്രീന്‍ഷോട്ട് പ്രചരിച്ച ഉടനെ സംശയത്തിന്റെ പേരില്‍ ഖാസിമിനെതിരെ കേസെടുത്ത പോലീസ് റിബേഷിന്റെ കാര്യത്തില്‍ അനങ്ങാപ്പാറാ നയം സ്വീകരിക്കുന്നതും ഇതുകൊണ്ട് തന്നെ. തുടക്കത്തില്‍ 'പോരാളി ഷാജിയാണോ ഇടതുപക്ഷം' എന്ന് ഇരുട്ടുകൊണ്ട് ഓട്ടയടച്ച് സി.പി.എം സൈബര്‍ പടയെ തള്ളിപ്പറഞ്ഞ പാര്‍ട്ടി സെക്രട്ടറി, കാര്യങ്ങള്‍ കരതലാമലകം പോലെ വെളിച്ചത്ത് വന്നുകൊണ്ടിരിക്കുന്ന സാഹചര്യത്തില്‍, “സ്ക്രീന്‍ഷോട്ടിന്റെ പിന്നില്‍ യു.ഡി.എഫ് ആണെന്നും അതിനു ബി.ജെ.പിയുടെ സഹായം ലഭിച്ചിട്ടുണ്ടെന്നും യു.ഡി.എഫ് മാപ്പ് പറഞ്ഞാല്‍ ബാക്കി കാര്യങ്ങള്‍ പറയാം” (കേരള കൗമുദി – 19-8-2024) എന്നുമാണ് ഇപ്പോള്‍ പറയുന്നത്. “മത്സരത്തിന്റെ ആദ്യ ദിവസങ്ങളില്‍ തന്നെ യു.ഡി.എഫ് ‘ടീച്ചറമ്മ’ എന്ന് വിളിച്ചു പരിഹസിച്ചു, കള്ള ലെറ്റർ പാഡ് ഉണ്ടാക്കി” (എം.വി ഗോവിന്ദന്‍ - കേരള കൗമുദി – 19-8-2024) എന്നൊക്കെ ‘പയറഞ്ഞാഴി’ ന്യായം പറയുമ്പോള്‍ ഇതിനൊക്കെ പ്രതികാരമായി തങ്ങള്‍ തന്നെയാണ് ഇത് ചെയ്തത് എന്നും, സൈബര്‍ സഖാക്കള്‍ ഇക്കളിയില്‍ തനിച്ചല്ല എന്നുമാണ് ഗോവിന്ദന്‍ മാഷ്‌ പറയാതെ പറയുന്നത്. “കെ.കെ ലതിക സ്ക്രീന്‍ഷോട്ട് ഷെയര്‍ ചെയ്തത് പ്രചരിപ്പിക്കാനല്ല, നാട്ടിന് ആപത്താണെന്ന് അറിയിക്കാനാണ്” (ഏഷ്യാനെറ്റ് ന്യൂസ് 16-8-24) എന്ന ഗോവിന്ദന്റെ പ്രസ്താവന ഗാന്ധിജിയെ ഗോഡ്സെ ചെറുതായി വെടിവെച്ചത് വെടി കൊണ്ടാല്‍ ജീവന്‍ പോകും എന്ന് ലോകത്തെ അറിയിക്കാനാണ് എന്ന ‘സനാതന നര്‍മ’ത്തോളം പരിഹാസ്യമാണ്.

ഫോറന്‍സിക് റിപ്പോര്‍ട്ട് പുറത്തുവരുമ്പോള്‍ ഒരു പക്ഷേ, സ്ക്രീന്‍ഷോട്ടിന്റെ ആശയ സ്രഷ്ടാവിനു പകരം ആര്‍ട്ട് വര്‍ക്ക് ചെയ്ത തൊഴിലാളി പ്രതിയാക്കപ്പെടാനുള്ള സാധ്യതയും തള്ളിക്കളയാനാവില്ല. ഫേസ്ബുക്കിന്റെയും വാട്സ്ആപ്പിന്റെയും മാതൃകമ്പനിയായ ‘മെറ്റ’ അന്വേഷണത്തോട് സഹകരിക്കുന്നില്ല എന്നു കൂടി പിണറായിയുടെ പോലീസ് പറഞ്ഞുവെക്കുന്ന സാഹചര്യത്തില്‍ ‘കാഫിറിന്റെ’ ‘ശില്പി’യെ കണ്ടെത്തുക എളുപ്പമുള്ള കാര്യമല്ല എന്ന ധൈര്യമാവാം ‘ഡിഫി’യുടെ ‘ഇനാം’ പ്രഖ്യാപനത്തിന്റെയും പാര്‍ട്ടി സെക്രട്ടറിയുടെ ‘യഖീനുറപ്പി’ന്റെയും പിന്നിലുള്ളത്.

ഗോവിന്ദന്‍ മാഷ്‌ പറയുന്നതു പോലെ അത്ര പെട്ടെന്ന് വിസ്മൃതിയിലാണ്ട് പോകുന്ന ഒരു പതിവ് യു.ഡി.എഫ്- എൽ.ഡി.എഫ് തര്‍ക്കമല്ല ഇത്; എത്ര പാലിലിട്ടാലും കാലാന്തരേണ കയ്പ് ശമിക്കാത്ത കാരസ്കരമാണ്. ഇവിടെ കൃത്യമായും ടാര്‍ഗറ്റ് ചെയ്യപ്പെട്ടത് യു.ഡി.എഫ് അല്ല, മുസ്‌ലിം സമുദായമാണ്. ‘ഡിഫി’യുടെ ‘പന്നിയിറച്ചി ചാലഞ്ചി’ലൂടെ വഴിതിരിച്ചു വിടാന്‍ കഴിയുന്നത്ര ലാഘവത്വമുള്ള വിഷയവുമല്ല ഇത്. നിസ്കരിക്കുന്ന മുസ്‌ലിംകള്‍ ‘കാഫിറുകള്‍’ക്ക് വോട്ടു ചെയ്യാത്ത കുലംകുത്തി വര്‍ഗമാണെന്നും അതിനാല്‍ തന്നെ ഒരു ജനാധിപത്യ സമൂഹത്തില്‍നിന്ന് മാറ്റിനിര്‍ത്തപ്പെടേണ്ടവരാണെന്നുമുള്ള സംഘ് പരിവാര്‍ ഭാഷ്യത്തിന്റെ സര്‍ഗാത്മകമായ ആവിഷ്കാരമാണ് ഈ സ്ക്രീൻ ‍ഷോട്ട് നിര്‍മിച്ചവര്‍ നടത്തിയിരിക്കുന്നത്. ഇവിടെ സി.പി.എം മനസ്സിലാക്കാതെ പോയ ഒരു സത്യം, അറുപതുകളിലെ ‘ഇജ്ജ് നല്ലൊരു മന്സനാകാന്‍ നോക്ക്’ കാലത്തു നിന്ന് കേരളീയ മുസ്‌ലിം സമൂഹം ഒരുപാട് ദൂരം സഞ്ചരിച്ചിരിക്കുന്നു എന്നതാണ്. ത്യാജഗ്രാഹ്യ വിവേചന ബുദ്ധിയോടെ കാര്യങ്ങളെ കാണാന്‍ കെല്‍പ്പുള്ള ഒരു തലമുറ അവരില്‍നിന്ന് ഉയിര്‍ത്തെഴുന്നേറ്റിരിക്കുന്നു. താത്കാലികമായ തെരഞ്ഞെടുപ്പ് രാഷ്ട്രീയ ലാഭത്തിനു വേണ്ടി ഒരു സമുദായത്തെ മൊത്തം പൈശാചികവത്കരിക്കുകയും ഹിന്ദുത്വ അജണ്ട നടപ്പാക്കാന്‍ ആർ.എസ്.എസ്സിനോട് മത്സരിക്കുകയും ചെയ്തുകൊണ്ട് ഇസ്ലാമോഫോബിയയുടെ വിപണന സാധ്യത ഉപയോഗപ്പെടുത്താന്‍ തന്നെയാണ് തീരുമാനമെങ്കില്‍ കേരള സി.പി.എമ്മിന്റെ ത്രിപുരവത്കരണം ത്വരിതപ്പെടുമെന്ന് മനസ്സിലാക്കാന്‍ വലിയ ബുദ്ധിയൊന്നും വേണ്ട. l

വിയറ്റ്നാം കമ്യൂണിസ്റ്റ് പാര്‍ട്ടി നേതാവായിരുന്ന ഹോചിമിനുമായി നടത്തിയ ഒരു അഭിമുഖത്തിനിടെ ഇന്ത്യന്‍ കമ്യൂണിസ്റ്റ് പാര്‍ട്ടിയുടെ സ്ഥാപക നേതാക്കളില്‍ ഒരാളും മാര്‍ക്സിസ്റ്റ്‌ സൈദ്ധാന്തികനുമായ കെ. ദാമോദരന്‍ ഹോചിമിനോട്‌ ചോദിക്കുന്ന ഒരു ചോദ്യമുണ്ട്. അംഗബലത്തിലും ശക്തിയിലും ഇന്ത്യന്‍ കമ്യൂണിസ്റ്റ് പാര്‍ട്ടിക്ക് സമാനമായിട്ടും വിയറ്റ്‌നാമില്‍ കമ്യൂണിസം വിജയിക്കുകയും ഇന്ത്യയില്‍ പരാജയപ്പെടുകയും ചെയ്തത് എന്തുകൊണ്ടാണ് എന്നായിരുന്നു ചോദ്യം. അതിനു ഹോചിമിന്‍ നല്‍കിയ മറുപടി, “ഇന്ത്യയില്‍ നിങ്ങള്‍ക്ക് ഗാന്ധി ഉണ്ടായിരുന്നു. ഇവിടെ ഞാനാണ് ഗാന്ധി” (Lenin and His Discontents: An interview with Tariq Ali’ – The Wire 8-5-2020) എന്നായിരുന്നുവത്രേ. ഇന്ത്യനവസ്ഥയെ മനസ്സിലാക്കി പ്രവര്‍ത്തിക്കുന്നതില്‍ ഇന്ത്യന്‍ കമ്യൂണിസ്റ്റുകാർ പരാജയപ്പെട്ടതാണ് പാര്‍ട്ടിയുടെ അപചയത്തിന് കാരണം എന്നാണ് ഹോചിമിന്റെ ക്ലാസിക്കല്‍ മറുപടിയുടെ വ്യംഗ്യാര്‍ഥം. ഈ അവസ്ഥ നൂറു വര്‍ഷം പിന്നിട്ടപ്പോഴും പാര്‍ട്ടി പിന്തുടരുന്നു എന്നാണ് അടുത്ത കാലത്ത് പാർട്ടിയുടെ ഇരുത്തം വന്ന സൈദ്ധാന്തിക വാഗ്ഭടന്മാരില്‍നിന്ന് വരുന്ന വാക്കുകള്‍ സൂചിപ്പിക്കുന്നത്.

കമ്യൂണിസ്റ്റ് വിപ്ലവത്തിന് പാകപ്പെട്ട ‘ക്ലാസ്’എന്ന അടിസ്ഥാന വര്‍ഗം എക്കാലത്തും ഇന്ത്യയില്‍ ഉണ്ടായിരുന്നു. മാര്‍ക്സിന്റെ ‘വര്‍ഗസംഘട്ടന’ സിദ്ധാന്ത പ്രകാരമുള്ള ‘ഉള്ളവനും ഇല്ലാത്തവനും’ എന്ന വര്‍ഗീകരണമല്ല, ‘ഉച്ചനും നീചനു’മെന്ന ക്ലാസ്സിഫിക്കേഷനാണ് പക്ഷേ, ഇന്ത്യന്‍ സാമൂഹിക യാഥാർഥ്യം. ഇതിനെ നിരാകരിച്ചതാണ് ഇന്ത്യന്‍ കമ്യൂണിസ്റ്റ് പ്രസ്ഥാനത്തിന് തുടക്കത്തിലേ സംഭവിച്ച ആശയപരമായ അബദ്ധം. അടിത്തറ സാമ്പത്തികമാവുമ്പോഴും ഇന്ത്യയിലെ ‘വര്‍ഗം’ എന്നത് വെറും സാമ്പത്തിക ഗണം അല്ല എന്നും അത് ജാതീയമാണ് എന്നും ഡോ. ബി.ആര്‍ അംബേദ്‌കര്‍ തിരിച്ചറിയുന്നുണ്ട്. അംബേദ്കറിന്റെ അഭിപ്രായത്തില്‍ ജാതി എന്നാല്‍ ഒരു അടച്ചുകെട്ടപ്പെട്ട വര്‍ഗമാണ് (A Cast is an Enclosed Class). മറ്റുള്ളവര്‍ക്ക് പ്രവേശനം ഇല്ലാത്ത ഒരു സംവിധാനമായി ഓരോ ‘ജാതി’യും നിലനില്‍ക്കുന്നു. ജാതീയമായ ഈ വര്‍ഗീകരണത്തെ കുറിച്ചു പഠിക്കുകയും ഇന്ത്യയിലെ അടിസ്ഥാന വര്‍ഗത്തെ അന്നിലക്ക് അഡ്രസ്സ് ചെയ്ത്, യൂറോപ്പിന്റെ പ്രത്യേക സാഹചര്യത്തില്‍ പിറന്ന മാര്‍ക്സിസത്തെ ഇന്ത്യന്‍ സാഹചര്യത്തിലേക്ക് വിവര്‍ത്തനം ചെയ്യുന്ന കാര്യത്തില്‍ പരാജയപ്പെട്ടതുകൊണ്ടാണ് ഒരു നൂറ്റാണ്ടിലേറക്കാലമായി പ്രവര്‍ത്തിക്കുന്ന ഇന്ത്യന്‍ കമ്യൂണിസ്റ്റ് പ്രസ്ഥാനം 'ഉപ്പു വെച്ച കലാ'വസ്ഥയില്‍ എത്തിപ്പെട്ടത്. മൂന്നു സംസ്ഥാനങ്ങള്‍ ഭരിക്കാനും ലോക് സഭയിലെ മൂന്നാമത്തെ വലിയ കക്ഷിയാവാനും അവസരം ലഭിച്ച പാര്‍ട്ടി ‘കനല്‍ ഒരു തരി മതി’ എന്ന ആത്മസായൂജ്യത്തിലാണ് ഇപ്പോഴും. ഉരുത്തിരിഞ്ഞു വരുന്ന മുതലാളി വര്‍ഗത്തിന് ഉത്തോലകങ്ങളായി വര്‍ത്തിക്കുന്ന വിപ്ലവങ്ങളെ കുറിച്ച് ആര്‍ക്കും മനസ്സിലാകാത്ത ഭാഷയില്‍ പാര്‍ട്ടി ക്ലാസുകള്‍ നടത്തുകയും അന്റോണിയോ ഗ്രാംഷി, ഗ്യോര്‍ഗി ദിമിത്രോവ് തുടങ്ങിയവരെ ഉദ്ധരിക്കുകയും ‘എന്തുകൊണ്ട് നമ്മള്‍ തോറ്റു’ എന്ന ഒരു സാദാ പാര്‍ട്ടി സഖാവിന്റെ ലളിതമായ ചോദ്യത്തിന്, വിഘടന വാദികള്‍ക്കും പ്രതിക്രിയാ വാദികള്‍ക്കുമിടയിലുള്ള അന്തര്‍ധാരയെ കുറിച്ചു വാചാലമാവുകയും എന്നിട്ടും മനസ്സിലാവാത്ത സഖാക്കളോട് ‘എടോ ഉത്തമാ, ഉള്‍പാര്‍ട്ടി ജനാധിപത്യം അനുവദിച്ചിട്ടുണ്ട്. അത് ശരിയാ. നമ്മെളെല്ലാം ഒരുമിച്ചിരുന്നു ദിനേശ് ബീഡി വലിക്കുന്നതും അതുകൊണ്ടാ. എന്നു വെച്ച് പാര്‍ട്ടിയിലെ ബുദ്ധിജീവികളെ ചോദ്യം ചെയ്യരുത്’ എന്ന് അടക്കിയിരുത്തുകയും ചെയ്യുന്ന കുമാരന്‍ പിള്ളമാര്‍ പാര്‍ട്ടി ശോഷീകരണത്തെ ത്വരിതപ്പെടുത്തുക മാത്രമാണ് ചെയ്തുകൊണ്ടിരിക്കുന്നത്. ഒരു ദശകമായി ഹിന്ദുത്വവത്കരിക്കപ്പെട്ടു കഴിഞ്ഞ ഇന്ത്യയില്‍ ‘പൊളിറ്റിക്കല്‍ ഇസ്‌ലാമാ’ണ് പുതിയ ‘ബൂര്‍ഷ്വാസി’ എന്ന നിഗമനത്തിലാണ് പാര്‍ട്ടി എത്തിപ്പെട്ടിരിക്കുന്നത്. ഇന്ത്യനവസ്ഥകളെ വസ്തുനിഷ്ഠമായി വിശകലനം ചെയ്യാതെയുള്ള പഴയ രീതിയുടെ തനിയാവര്‍ത്തനം.

ഏറ്റവുമൊടുവില്‍ സി.പി.എമ്മിന്റെ കേന്ദ്ര കമ്മിറ്റി അംഗവും കഴിഞ്ഞ ലോക് സഭാ തെരഞ്ഞെടുപ്പില്‍ വടകരയില്‍ ഷാഫി പറമ്പിലിനോട് മത്സരിച്ചു പരാജയപ്പെടുകയും ചെയ്ത കെ.കെ ശൈലജ, ഹിന്ദു രാഷ്ട്രവാദത്തെ എതിര്‍ക്കുമ്പോള്‍ ഇസ്‌ലാം രാഷ്ട്രവാദത്തെയും എതിര്‍ക്കേണ്ടി വരും എന്ന് പറഞ്ഞു വാര്‍ത്തകളില്‍ നിറഞ്ഞുനില്‍ക്കുകയാണ്. “ഹിന്ദു രാഷ്ട്രവാദത്തെ എതിര്‍ക്കുമ്പോള്‍ മുസ്‌ലിം മത രാഷ്ട്രവാദത്തെയും എതിര്‍ക്കേണ്ടി വരും. വടകരയില്‍ ജമാഅത്തെ ഇസ്ലാമിക്കും എസ്.ഡി.പി.ഐ ക്കും സ്ഥാനാര്‍ഥികളുണ്ടായിരുന്നില്ല” (നിയമസഭാ പ്രസംഗം 9-7-2024) എന്നാണ് ശൈലജ ടീച്ചര്‍ പറഞ്ഞത്. അതേ പ്രസംഗത്തില്‍ രാഷ്ട്രീയ ധാര്‍മികത കാത്തുസൂക്ഷിക്കുന്നതിനെ പറ്റിയും ടീച്ചര്‍ വാചാലയാകുന്നുണ്ട്. ‘കാഫിര്‍’ കാര്‍ഡ് ഇറക്കിയിട്ട് പോലും വടകര ലോക്സഭാ മണ്ഡലത്തില്‍ ഷാഫി പറമ്പിലിനോട് ദയനീയമായി തോറ്റതിനു പിന്നാലെയാണ് വടകരയില്‍ ‘ഷാഫിയുടെ ഖിലാഫത്തി’ന് കീഴില്‍ ജമാഅത്തെ ഇസ്‌ലാമി അധികാരം പിടിക്കാനുള്ള ശ്രമത്തിനെതിരെ ടീച്ചര്‍ മുന്നറിയിപ്പ് നല്‍കുന്നത്. ഭൂരിപക്ഷ വര്‍ഗീയത സമം ന്യൂനപക്ഷ വര്‍ഗീയത എന്നത് ശൈലജ പുതുതായി ഉണ്ടാക്കിയ തിയറിയോ കേവലമൊരു നാക്ക് പിഴയോ അല്ല. ഏറക്കാലമായി സി.പി.എമ്മില്‍ രൂപപ്പെട്ടുവരുന്ന മൃദു ഹിന്ദുത്വ നിലപാടിന്റെ ഭാഗമായി ഉരുത്തിരിഞ്ഞ ഒരു മനോഭാവമാണ്. ഇസ്ലാമിനെ ആക്രമിക്കാന്‍ ഇസ്‌ലാമിക പ്രസ്ഥാനങ്ങളെ കരുവാക്കുന്ന സൃഗാല തന്ത്രം. പോളിറ്റ് ബ്യൂറോ അംഗമായിരുന്ന വി.എസ് അച്യുതാനന്ദന്‍ മുതല്‍ എക്സ് നക്സലും ഇപ്പോള്‍ സി.പി.എം സൈദ്ധാന്തികനുമായ കെ.ടി കുഞ്ഞിക്കണ്ണന്‍ വരെ ഈ ഗണത്തിലുണ്ട്.

ഇസ്‌ലാം വിഭാവനം ചെയ്യുന്ന രാഷ്ട്രീയ സാമൂഹിക വ്യവസ്ഥയെ നേര്‍ക്കു നേര്‍ എതിരിടാനുള്ള ആത്മവിശ്വാസക്കുറവുകൊണ്ടാണ് പോളിറ്റ് ബ്യൂറോ മുതലിങ്ങോട്ട് എല്‍.സി വരെയുള്ളവര്‍ ജമാഅത്തെ ഇസ്ലാമിയെ മുന്നില്‍ നിര്‍ത്തി ‘മുസ്‌ലിം മതരാഷ്ട്രവാദ ഉഡായിപ്പ്’ വിളമ്പുന്നത്. മതത്തിന്റെ അടിസ്ഥാനത്തിലുള്ള ഇന്ത്യാ വിഭജനത്തെ ശക്തമായി എതിര്‍ത്തിരുന്ന പ്രസ്ഥാനമാണ് ജമാഅത്തെ ഇസ്‌ലാമി എന്നതാണ് ചരിത്ര യാഥാർഥ്യം. കേവലമൊരു സാമുദായിക സംഘടനയല്ല, മറിച്ച് ഒരാദര്‍ശ പ്രസ്ഥാനമാണ് ജമാഅത്തെ ഇസ്‌ലാമി. “സ്വന്തം സമുദായത്തിനു വേണ്ടി മാത്രം പ്രവര്‍ത്തിക്കുക എന്ന ചുരുങ്ങിയ ലക്ഷ്യത്തില്‍നിന്ന് പുറത്തുകടന്ന് പൊതു സമൂഹത്തിന്റെ നീറുന്ന പ്രശ്നങ്ങളിലും സക്രിയമായി ഇടപെടുന്നു എന്നതാണ് ജമാഅത്തെ ഇസ്ലാമിയെ മറ്റുള്ളവയില്‍നിന്ന് വ്യത്യസ്തമാക്കുന്നത്” (ജമാഅത്തെ ഇസ്‌ലാമിയും വിമര്‍ശകരും – കെ.പി സുകുമാരന്‍ - പ്രബോധനം 2010 ഒക്ടോബര്‍ 9).

ജമാഅത്തെ ഇസ്‌ലാമി എന്നല്ല, ഇന്ത്യയിലെ ഒരു മുസ്‌ലിം സംഘടനയും ഒരു കാലത്തും ഇന്ത്യയില്‍ ഒരു മതരാഷ്ട്രം സ്ഥാപിക്കുന്നതിനെ കുറിച്ചു പറഞ്ഞിട്ടില്ല. ജനസംഖ്യാനുപാതികമായിട്ടുള്ള അധികാര പങ്കാളിത്തം, വിദ്യാഭ്യാസപരവും തൊഴില്‍പരവുമായ അവകാശങ്ങള്‍, മുസ്‌ലിം മത-സാംസ്കാരിക സ്വത്വത്തിന് ന്യായമായി ലഭിക്കേണ്ട ജനാധിപത്യപരമായ അംഗീകാരം എന്നിവക്ക് വേണ്ടിയുള്ള സമരങ്ങളും സംവാദങ്ങളും അല്ലാതെ ആര്‍.എസ്.എസിനെ പോലെ ഇന്ത്യയില്‍ ഒരു മത രാഷ്ട്രം സ്ഥാപിക്കാന്‍ ഒരു മുസ്‌ലിം സംഘടനയും ഇതുവരെ ആവശ്യപ്പെട്ടിട്ടില്ല. സംഘ് പരിവാറിന്റെ ഇസ്ലാമോഫോബിക് ആയ വംശീയ ആക്രമണത്തിനും, വിദ്വേഷ രാഷ്ട്രീയത്തിനും എതിരെയുള്ള പ്രതിരോധങ്ങളാണ് മുസ്ലിം സാമുദായിക, സാംസ്കാരിക, രാഷ്ട്രീയ സംഘടനകള്‍ നാളിതുവരെ നടത്തിയിട്ടുള്ളത്. യഥാർഥത്തില്‍, മുസ്ലിംകളോടൊപ്പം ആര്‍.എസ്.എസിന്റെ മുഖ്യ ശത്രു പട്ടികയില്‍ ഇടം പിടിച്ചിട്ടുള്ള കമ്യൂണിസ്റ്റുകാര്‍ അപരവത്കരിക്കപ്പെട്ട ഇരകളോടൊപ്പം ചേര്‍ന്നു ഹിന്ദുത്വ ഫാഷിസത്തിനെതിരെ സമര മുന്നണി തീര്‍ക്കുകയാണ് ചെയ്യേണ്ടത്. അതിനു പകരം ഹിന്ദുത്വ ഫാഷിസം എന്ന അതിഭീകരമായ ഒരു യാഥാർഥ്യത്തെ കേവലം ഹിന്ദുരാഷ്ട്ര വാദമായി ചുരുക്കിക്കെട്ടുകയും അത്ര തന്നെ ഭീകരമായ മുസ്‌ലിം മതരാഷ്ട്ര വാദം ഇന്നാട്ടില്‍ നിലനില്‍ക്കുന്നുണ്ട് എന്ന് വരുത്തിത്തീര്‍ക്കുകയും ചെയ്യുന്നത് ഫലത്തില്‍ ഗുണം ചെയ്യുക കമ്യൂണിസ്റ്റ് പാര്‍ട്ടിക്കല്ല, സംഘ് പരിവാറിനാണ് എന്ന് എത്രയും പെട്ടെന്ന് തിരിച്ചറിഞ്ഞാല്‍ അത്രയും നല്ലത്. ത്രിപുരക്കും ബംഗാളിനും ശേഷം കേരളം എന്ന ആര്‍.എസ്.എസ് മോഹം പൂവണിയാതിരിക്കാന്‍ സഖാക്കളാണ് ജാഗരൂകരാവേണ്ടത്. l

കേരളത്തിലെ കമ്യൂണിസ്റ്റ് പോരാട്ടങ്ങളുടെ പോര്‍നിലമായിരുന്നു എക്കാലത്തും കണ്ണൂര്‍. ആദ്യ കമ്യൂണിസ്റ്റ് രക്തസാക്ഷികളുടെ പിറഭൂമി. 1940 സെപ്റ്റംബര്‍ 15-ന് തലശ്ശേരി ജവഹര്‍ഘട്ട് കടപ്പുറത്ത് ബ്രിട്ടീഷ് സാമ്രാജ്യത്വത്തിന്റെ വെടിയേറ്റു മരിച്ച രക്തസാക്ഷികള്‍ സഖാക്കളായ കോമത്ത് അബ്ദുല്ല എന്ന അബു മാഷും ബീഡിത്തൊഴിലാളി മുളിയില്‍ ചാത്തുക്കുട്ടിയുമായിരുന്നു. പിണറായിയിലെ പാറപ്പുറത്ത് കമ്യൂണിസ്റ്റ് പാര്‍ട്ടി പിറന്നിട്ട് ഒരു വര്‍ഷം തികയുന്നതിനു മുമ്പായിരുന്നു ഈ രക്തസാക്ഷ്യം. കേരളത്തിന്റെ ഒക്ടോബര്‍ വിപ്ലവം എന്നറിയപ്പെടുന്ന പുന്നപ്ര – വയലാര്‍ സമരത്തിനും ആറു വര്‍ഷം മുമ്പായിരുന്നു തലശ്ശേരി സംഭവം. അബുവും ചാത്തുക്കുട്ടിയും വെടിയേറ്റു വീണത് സ്വാതന്ത്ര്യ സമരവുമായി ബന്ധപ്പെട്ട പോരാട്ടത്തിനിടയിലായിരുന്നുവെങ്കില്‍ എട്ട് പതിറ്റാണ്ടുകള്‍ക്കിപ്പുറം ബോംബ് നിര്‍മാണത്തിനിടെ പൊട്ടിത്തെറിച്ചു മരിക്കുന്നവര്‍ രക്തസാക്ഷിപ്പട്ടികയില്‍ ഇടം നേടുകയും അവരുടെ പേരില്‍ സ്മൃതി മണ്ഡപങ്ങള്‍ ഉയരുകയും ചെയ്യുന്ന അവസ്ഥയിലേക്ക് കണ്ണൂരിലെ പാര്‍ട്ടി ‘വളര്‍ന്നു’ കഴിഞ്ഞിരിക്കുന്നു. നാല്പതുകളില്‍ ‘വെടിയുണ്ടകളെ പൂവായ് മാറ്റിയ രക്തസാക്ഷികളുടെ പ്രസ്ഥാനം’ സ്വയം വെടിമരുന്നായി മാറുന്ന ദാരുണാവസ്ഥയില്‍ എത്തിനില്ക്കുകയാണിപ്പോള്‍.
‘സാമ്രാജ്യത്വ ശക്തികളായ ലോക്കല്‍’ രാഷ്ട്രീയ എതിരാളികളെ നിഗ്രഹിക്കാന്‍ വേണ്ടിയാണിപ്പോള്‍ ബോംബുകള്‍ നിര്‍മിക്കപ്പെടുന്നത്. ബോംബ്‌ നിര്‍മാണത്തിനിടെയുണ്ടായ സ്ഫോടനത്തില്‍ 2015 ജൂണ്‍ 6-ന് മരിച്ചുപോയ പാനൂരിലെ സഖാക്കള്‍ കിളമ്പില്‍ ഷൈജു, വടക്കേകരാല്‍ സുബീഷ് എന്നിവര്‍ക്ക് രക്തസാക്ഷി മണ്ഡപങ്ങള്‍ ഉയരുമ്പോള്‍ 1957-ല്‍ ഐക്യ കേരളത്തിന്റെ ആകാശത്ത് പതിഞ്ഞ സിന്ദൂരപ്പൊട്ടിനാണ് കരിമരുന്നു പുരളുന്നത്. നിര്‍മാണത്തിനിടെ ‘ദിവംഗതരാവുന്ന’ അവിദഗ്ധ ബോംബ്‌ നിര്‍മാണത്തൊഴിലാളികളെ ആദരിക്കുന്ന കാര്യത്തിലും സി.പി.എമ്മും ആര്‍.എസ്.എസും കടുത്ത മത്സരത്തിലാണ്. കണ്ണൂര്‍ ജില്ലയിലെ കൂത്തുപറമ്പിനടുത്തുള്ള പൊയിലൂരില്‍ 2002-ല്‍ ബോംബുണ്ടാക്കുന്നതിനിടെ പൊട്ടിത്തെറിച്ച അശ്വിനി, സുരേന്ദ്രന്‍, ചെറുവാഞ്ചേരി അത്യാറക്കാവിലെ പ്രദീപന്‍, ദിലീഷ് തുടങ്ങിയ ‘സ്വര്‍ഗീയ’ സംഘ മിത്രങ്ങള്‍ക്ക് ആര്‍.എസ്.എസും സ്മൃതി മണ്ഡപങ്ങള്‍ നിര്‍മിച്ചിട്ടുണ്ട്.

കണ്ണൂരില്‍ ബോംബ് നിര്‍മാണവും പ്രയോഗവും കുടില്‍ വ്യവസായം പോലെ സമൃദ്ധമാവുമ്പോഴും കേരളത്തിലെ ‘കരിമരുന്നു’ രാഷ്ട്രീയത്തിലെ ഒരേയൊരു കക്ഷി സി.പി.എമ്മാണ് എന്നും അത് കണ്ണൂരില്‍ മാത്രം പരിമിതമാണ് എന്നും വിലയിരുത്തുന്നതും പക്ഷപാതപരമാവും. കണ്ണൂരിലെ ബോംബേറിന്റെ ചരിത്രം തുടങ്ങുന്നത് സി.പി.എമ്മില്‍ നിന്നല്ല. 1976 ജൂണ്‍ 5-ന് കോൺഗ്രസ്സുകാരാല്‍ ബോംബേറില്‍ കൊല്ലപ്പെടുന്ന കൊളങ്ങേരത്ത് രാഘവന്‍ എന്ന സി.പി.എം പ്രവര്‍ത്തകനാണ് കണ്ണൂരിലെ ആദ്യത്തെ രാഷ്ട്രീയ രക്തസാക്ഷി. അഥവാ കണ്ണൂരിന്റെ രാഷ്ട്രീയ നഭോ മണ്ഡലത്തില്‍ ആദ്യം പൊട്ടിയ ബോംബിനു ഖദറിന്റെ ആവരണമായിരുന്നു. കണ്ണൂര്‍ ജില്ലാ പോലീസിന്റെ ‘ക്രൈം ചാര്‍ട്ടില്‍’ ബോംബ്‌ ഉപയോഗിച്ച് രാഷ്ട്രീയ എതിരാളികളെ കൊലപ്പെടുത്തിയ ആദ്യത്തെ സംഭവം കൊളങ്ങേരത്ത് രാഘവനാണെന്നും അത് ചെയ്തത് കോണ്‍ഗ്രസ്സുകാരാണെന്നും രേഖപ്പെടുത്തിയിട്ടുണ്ട് (പി. ജയരാജന്‍ ഫേസ് ബുക്ക് പോസ്റ്റ്‌).
ഈ കുളിമുറിയില്‍ ആരും തുണിയുടുത്തവരായിട്ടില്ല എന്നർഥം. ഓരോ പാര്‍ട്ടിയും തങ്ങളുടെ രാഷ്ട്രീയാധീശത്വം ഉറപ്പിക്കാന്‍ ആക്രമണങ്ങളെ പ്രതിരോധങ്ങളായും പ്രതികളെ രക്തസാക്ഷികളായും ചിത്രീകരിക്കുകയാണ് ചെയ്യുന്നത്. 'ഏകമായ ഒന്നിനെ പണ്ഡിതന്മാര്‍ പലതായി വ്യാഖ്യാനിക്കുന്നു’ (ഏകം സത് വിപ്രാ ബഹുധാ വദന്തി) എന്ന ഉപനിഷദ് വാക്യം പോലെ ഇത്തരം മരണങ്ങള്‍ ഇടതിന് രക്തസാക്ഷ്യമാണെങ്കില്‍ തീവ്ര വലതിനു ‘ബലിദാന’മാണ്. ഓരോ രക്ത സാക്ഷിയും ബലിദാനിയും പാര്‍ട്ടി വളര്‍ച്ചക്കൊപ്പം വമ്പന്‍ വ്യവസായ സാധ്യതയുമാണ്‌ തുറന്നിടുന്നത്. ‘ദിവംഗത’രുടെ പേരിലുള്ള സ്മാരകങ്ങളും വായനശാലകളും പണപ്പിരിവും വാര്‍ഷികാചരണങ്ങളും ‘മുന്നോട്ടുള്ള പ്രയാണത്തില്‍’ വന്‍ ‘മുതൽക്കൂട്ട്’ ആയി മാറുന്നു.

1993 സെപ്റ്റംബര്‍ 6-ന് മലപ്പുറം ജില്ലയിലെ താനൂരില്‍ ശ്രീകൃഷ്ണ ജയന്തി ഘോഷയാത്രക്ക് നേരെ ബോംബെറിഞ്ഞു കലാപം സൃഷ്ടിക്കാന്‍ വേണ്ടി ബോംബ്‌ നിര്‍മിക്കവെ സ്ഫോടനത്തില്‍ ആര്‍.എസ്.എസുകാരന്‍ മരിച്ചതിനെ കുറിച്ചു അന്നത്തെ മലപ്പുറം എസ്.പി ആയിരുന്ന ഉമ്മന്‍ കോശി പറഞ്ഞത് ‘മലപ്പുറം ജില്ലയെ ദൈവം കാത്തു’ എന്നായിരുന്നു. ഇത്തരം ദൈവികമായ ഇടപെടലുകള്‍ ഒഴിച്ചുനിര്‍ത്തിയാല്‍ സംഘ് പരിവാറും സി.പി.എമ്മും പ്രതികളാവുന്ന ബോംബ്‌ സ്ഫോടന കേസുകളില്‍ എക്സ്പ്ലോസീവ് ആക്ട് മൂന്ന്, നാല് പ്രകാരം ‘അശ്രദ്ധമായി സ്ഫോടകവസ്തുക്കള്‍ കൈകാര്യം ചെയ്തതിനു’ കേസെടുക്കുക എന്ന മാമൂലിനപ്പുറം പോലീസ് കാര്യമായ ഇടപെടലുകൾ നടത്തുകയോ പ്രതികളെ പിടികൂടാന്‍ ശ്രമിക്കുകയോ ചെയ്യാറില്ല എന്നതാണ് വസ്തുത. നാട്ടുകാര്‍ പിടിച്ചുകൊടുത്താല്‍ പോലും ബോംബ്‌ നിര്‍മാണത്തില്‍ വേണ്ടത്ര ശ്രദ്ധ കാണിക്കാത്തതിനു പ്രതികളെ കണ്ണുരുട്ടി ചെവി തിരുമ്പി പെറ്റി കേസ് അടിച്ചു വിടുകയാണ് പതിവ്. അതോടെ പ്രതികള്‍ നിയമത്തിന്റെ താക്കോല്‍ദ്വാര പഴുതിലൂടെ രക്ഷപ്പെടുകയും ‘ശ്രദ്ധയോടെ’ സ്ഫോടകവസ്തുക്കള്‍ നിര്‍മിക്കുന്നതില്‍ വീണ്ടും വ്യാപൃതരാവുകയും ചെയ്യുന്നു!

സ്ഫോടനം നടന്ന ആദ്യദിവസങ്ങളില്‍ ബോംബ്‌ സ്ക്വാഡും പോലീസും പരിശോധനകള്‍ കര്‍ശനമാക്കുകയും കണ്ണില്‍ പെടുന്ന ബോംബുകള്‍ നിര്‍വീര്യമാക്കുകയും ചെയ്യുമെങ്കിലും രാഷ്ട്രീയ സമ്മർദങ്ങളില്‍ കേസുകളും പയ്യെ പയ്യെ നിര്‍വീര്യപ്പെട്ടു പോകും. ഒരാളുടെ വീട്ടില്‍ തന്നെ ഒന്നിലേറെ വട്ടം നിര്‍മാണത്തിനിടെ ബോംബ്‌ പൊട്ടിയിട്ടും അയാള്‍ നിയമനടപടികളുടെ പരിധിക്ക് പുറത്ത് സ്വൈരമായി ജീവിക്കുന്നുണ്ടെങ്കില്‍ അതിനർഥം, ബോംബ്‌ നിര്‍മാണവും പ്രയോഗവും ‘ഇരുത്തം വന്ന’ പാർട്ടികളുടെ മൗലികാവകാശമാണെന്നും ഈ രംഗത്ത് പുതുതായി കടന്നുവരുന്നവരുടെ ‘കൈവെട്ടു’ കേസ് പോലും ഭീകരാക്രമണമാണെന്നുമുള്ള ഒരു പൊതുബോധം രൂപപ്പെട്ടു കഴിഞ്ഞിരിക്കുന്നു എന്നാണ്. പയ്യന്നൂരിനടുത്ത് ആലക്കോട് ബിജു എന്ന ആര്‍.എസ്.എസുകാരന്റെ വീട്ടില്‍ ബോംബ് നിര്‍മാണത്തിനിടെ സ്ഫോടനം നടന്നത് മൂന്നു തവണയാണ്. അയാളിപ്പോഴും കര്‍മഭൂമിയില്‍ ‘കരുതലോടെ’ കര്‍മനിരതനായിരിക്കുകയും ചെയ്യുന്നു.

ജവഹര്‍ഘട്ട് മോഡല്‍ ആശയാധിഷ്ഠിത രക്തസാക്ഷികളെ കിട്ടാതെ വരുമ്പോള്‍ ഏത് വിധേനയും അമ്മാതിരികളെ ഉണ്ടാക്കാന്‍ അഹമഹമികയാ മത്സരിക്കുന്ന കേരളത്തിലെ മുഖ്യധാരാ രാഷ്ട്രീയപ്പാര്‍ട്ടികള്‍ ക്രമാനുക്രത (back-to-back) ബോംബേറുകള്‍ കൊണ്ട് ‘രാഷ്ട്രീയ സജീവത’ നിലനിര്‍ത്തുകയും സാധാരണക്കാരുടെ ജീവിതം ഭീതിദമാക്കുകയുമാണ് ചെയ്യുന്നത്. രക്തസാക്ഷിക്കൃഷി വളരെ ശാസ്ത്രീയമായി നടക്കുന്നതിനാല്‍ എത്ര നിര്‍വീര്യമാക്കിയാലും നിര്‍ത്താതെ നിന്ന് പൊട്ടിത്തെറിക്കുകയാണ് കണ്ണൂരിലെ ബോംബുകള്‍. നൂല്‍ ബോംബ്‌, പെട്രോള്‍ ബോംബ്‌, സ്റ്റീല്‍ ബോംബ്‌ തുടങ്ങിയവയാണ് ഇതുവരെയുള്ള ‘വറൈറ്റി’ ബോംബുകള്‍. കൂട്ടത്തില്‍ കൊണ്ടുനടക്കാന്‍ എളുപ്പമുള്ള സ്റ്റീല്‍ ബോംബാണ് ഇപ്പോള്‍ കളത്തില്‍ നിറഞ്ഞുനില്‍ക്കുന്നത്. കുപ്പിച്ചില്ലും സ്റ്റീലും കരിങ്കല്‍ ചീളും ആണിയും നിറച്ച ബോംബുകള്‍ ആള്‍ താമസമില്ലാത്ത വീടുകളിലും തൊടികളിലും ഉപേക്ഷിക്കുകയും, യുദ്ധഭൂമിയിലെ കുഴിബോംബ് പൊട്ടി വഴിയാത്രികര്‍ മരിക്കുന്നതു പോലെ നിരപരാധികള്‍ മരിക്കുകയോ അംഗഭംഗപ്പെടുകയോ ചെയ്യുന്നത് പതിവ് കാഴ്ചയായി മാറിയിരിക്കുന്നു.

അക്കൂട്ടത്തില്‍ ഇത് എഴുതുന്നത് വരെയുള്ള വിവരപ്രകാരം ഏറ്റവും അവസാനത്തേതാണ് 2024 ജൂണ്‍ 18-ന് തലശ്ശേരിയിലെ എരഞ്ഞോളിയില്‍ പറമ്പില്‍ തേങ്ങ എടുക്കാന്‍ പോയപ്പോള്‍ സ്റ്റീല്‍ ബോംബ്‌ പൊട്ടിത്തെറിച്ചു മരിച്ച ആയിനാട്ട് വേലായുധന്‍ എന്ന 86 വയസ്സുള്ള വയോധികന്‍. വാളെടുത്തവന്‍ മാത്രമല്ല, വഴിയെ പോകുന്നവനും വാളാല്‍ എന്ന മട്ടിലാണ് കണ്ണൂരിലെ ബോംബ്‌ രാഷ്ട്രീയം വഴിമാറിപ്പോകുന്നത് എന്നാണ് വേലായുധന്റെ മരണം സൂചിപ്പിക്കുന്നത്. ജില്ലയില്‍നിന്ന് കഴിഞ്ഞ അഞ്ച് വര്‍ഷത്തിനുള്ളില്‍ ഇമ്മാതിരിയുള്ള 250-ലധികം ബോംബുകളാണ് കണ്ടെടുത്തത്. ബോംബ്‌ നിര്‍മാണത്തിനിടെ ഈ കാലയളവില്‍ കൊല്ലപ്പെട്ടത് 10 പേരാണ്. ഇവരില്‍ ആറു പേര്‍ സി.പി.എമ്മുകാരും നാല് പേര്‍ ആര്‍.എസ്.എസുകാരുമാണ്. ആളൊഴിഞ്ഞയിടങ്ങളില്‍ ഉപേക്ഷിക്കപ്പെടുന്ന ബോംബ്‌ പൊട്ടി അംഗഭംഗം വന്നവര്‍ അതിലേറെയാണ്. പാനൂരിനടുത്ത് 1998-ല്‍ നടന്ന രണ്ടു വ്യത്യസ്ത സ്റ്റീല്‍ ബോംബ്‌ സ്ഫോടനങ്ങളില്‍ നാടോടികളായ സൂര്യകാന്തിയുടെയും അമാവാസിയുടെയും ഒരു കണ്ണും കൈപ്പത്തിയുമാണ് നഷ്ടപ്പെട്ടത്. ആക്രി പെറുക്കുന്നതിനിടയില്‍ ഇതുപോലെ നിരവധി സംഭവങ്ങള്‍ ഉണ്ടായിട്ടുണ്ട്. പാട്യത്തെ സൈദാലി, മക്കള്‍ നൂറുദ്ദീന്‍, മുത്തലിബ്, അസം സ്വദേശികളായ ഫസല്‍ ഹഖ്, ശഹീദുല്‍ ഇസ്‌ലാം എന്നിങ്ങനെ പട്ടിക നീണ്ടതാണ്.

തലശ്ശേരിയില്‍ വയോധികന്‍ കൊല്ലപ്പെട്ട സംഭവത്തിന്റെ പശ്ചാത്തലത്തില്‍ അയല്‍വാസിയായ ഒരു സ്ത്രീ ‘പാര്‍ട്ടി’യുടെ ബോംബ്‌ നിര്‍മാണത്തിനെതിരെ രൂക്ഷമായി പ്രതികരിച്ചത് സമൂഹ മാധ്യമങ്ങളില്‍ വൈറലായി. വയോധികന്‍ മരിച്ച പറമ്പിലെ വീട്ടില്‍ വര്‍ഷങ്ങളായി ബോംബ്‌ നിര്‍മാണം നടക്കുന്നുവെന്നും, പ്രദേശത്തെ ആളൊഴിഞ്ഞ വീടുകളെല്ലാം ബോംബ് നിര്‍മാണ കേന്ദ്രങ്ങളാണെന്നും ഇതിനെക്കുറിച്ച് പറയുന്നവരുടെ വീടുകളും ബോംബെറിഞ്ഞു തകര്‍ക്കപ്പെടും എന്നുമൊക്കെയുള്ള സ്ത്രീയുടെ പരിദേവനങ്ങളില്‍ സമാധാന ജീവിതം ആഗ്രഹിക്കുന്ന സാധാരണക്കാരുടെ ആകുലതകളാണ് തുടിക്കുന്നത്. ആശയ ദാരിദ്ര്യത്താല്‍ വലയുന്ന പ്രത്യയശാസ്ത്രങ്ങള്‍ ബോംബ്‌ രാഷ്ട്രീയത്തെ പരസ്യമായി തള്ളിപ്പറയുമ്പോഴും ഗൂഢമായി അതിനെ പിന്തുണയ്ക്കുന്ന കാലത്തോളം രക്തസാക്ഷികളും ബലിദാനികളും കേരളത്തില്‍ പിറന്നുകൊണ്ടേയിരിക്കും. l

“കലാകാരന് മാത്രമായി സാമൂഹിക പ്രതിബദ്ധത വേണമെന്ന് നിര്‍ബന്ധം പിടിക്കാനാവില്ല. എന്നാല്‍, ഫാഷിസ്റ്റ് ഭരണത്തിന് കീഴില്‍ ജീവിക്കുന്ന ഏതൊരു പൗരനും അതിനെതിരെ പ്രതികരിക്കാതിരിക്കാനുമാവില്ല”- അയോധ്യയില്‍ നടന്ന രാമപ്രതിഷ്ഠ ചടങ്ങിന് ആശംസ അര്‍പ്പിക്കുകയും തൽദിവസം എല്ലാ വീടുകളിലും വിളക്ക് കത്തിച്ച് രാമനാമം ജപിക്കണമെന്ന് ഉപദേശിക്കുകയും ചെയ്ത കെ.എസ് ചിത്രയുടെ ഹിന്ദുത്വ വിധേയത്വത്തെ വിമര്‍ശിക്കുന്നതിനിടയില്‍ യുവ ഗായകന്‍ സൂരജ് സന്തോഷ്‌ പറഞ്ഞ വാക്കുകളാണിത്. ‘ചിത്ര വധ’ ത്തിന്റെ പേരില്‍ നേരിടേണ്ടി വന്ന ആര്‍.എസ്.എസ് സൈബര്‍ ആക്രമണത്തില്‍ സംഗീത ലോകത്തു നിന്ന് പിന്തുണ ലഭിക്കാത്തതിനെ തുടര്‍ന്ന് ‘സമ’(സിംഗേഴ്സ് അസോസിയേഷന്‍ ഓഫ് മലയാളം മൂവീസ്)യില്‍നിന്ന് രാജിവെച്ചിറങ്ങിയ ധീരനായ കലാകാരന്‍. സിനിമാ-സാംസ്കാരിക അങ്ങാടിപ്പുറത്ത് പൊതുവേ മൂന്നു തരം താരങ്ങളാണ് ഉള്ളത്. സൂരജ് സന്തോഷ്‌, പാര്‍വതി തെരുവോത്ത്, തമിഴ് നടന്‍ പ്രകാശ് രാജ്, സിദ്ധാര്‍ഥ് തുടങ്ങിയവരെ പോലെ നട്ടെല്ലിന്റെ സ്ഥാനത്ത് നട്ടെല്ല് തന്നെയുള്ള കലാകാരന്മാരാണ് ഒന്ന്. മൗനം കൊണ്ട് ഫാഷിസത്തിന് കൈയൊപ്പ് ചാര്‍ത്താത്തവര്‍. മറ്റൊരു കൂട്ടര്‍ സവര്‍ണ ജാത്യാഭിമാനം ഞരമ്പുകളില്‍ പടരുകയും അവസരം വരുമ്പോള്‍ അപര വിദ്വേഷത്തിന്റെ വെറുപ്പ് ഛർദിക്കുകയും ചെയ്യുന്ന കട്ട സംഘികള്‍. സുരേഷ് ഗോപിയും കൃഷ്ണകുമാറും ഈയിനത്തില്‍ പെടും. കൃത്യമായ നിലപാടുകളാണ് ഈ രണ്ടു കൂട്ടര്‍ക്കുമുള്ളത്. നിഷ്പക്ഷ നിഷ്കുകളാണ് മൂന്നാമത്തെ ഐറ്റം. ‘കല കലയ്ക്ക് വേണ്ടി’ എന്ന ‘മഹത്തായ ആദര്‍ശ’ത്തില്‍ വിശ്വസിക്കുകയും രാഷ്ട്രീയ സാമൂഹിക വിഷയങ്ങളില്‍ ചുണ്ടനക്കാതെ ജീവിക്കുകയും ചെയ്യുന്നവര്‍. പ്രത്യക്ഷത്തില്‍ ‘അരാഷ്ട്രീയ സാധുക്കളാ’യ ഇവര്‍ ഭീരുത്വത്തെ പക്ഷരാഹിത്യമായി കൊണ്ടുനടക്കുന്നവരാണ് എന്ന് പറയാം.

അഭിനയം തന്നെ ജീവിതമാക്കിയ ഒരടിമുടി കലാകാരനാണ് മമ്മൂട്ടി. മൂന്നു പതിറ്റാണ്ടിലേറെയായി അഭ്രപാളിയില്‍ തിളങ്ങി നിന്ന മെഗാ സ്റ്റാര്‍. പത്മശ്രീ പുരസ്കൃതന്‍. എഴുപത് ജന്മദിനങ്ങളും അമ്പത് അഭിനയ വര്‍ഷങ്ങളും പൂര്‍ത്തിയാക്കിയ മലയാള സിനിമയുടെ നിത്യയൗവനം. മമ്മൂട്ടി കെട്ടിയാടാത്ത വേഷങ്ങളില്ല. മലയാള സിനിമയില്‍ സവര്‍ണ ജാതീയ ആണ്‍ നിര്‍മിതികളെ ഏറ്റവുമധികം അവതരിപ്പിച്ച് സവർണ പ്രേക്ഷകരെ ‘ത്രസിപ്പിച്ച’ നടനാണ്. നരസിംഹ മന്നാടിയാര്‍, അറക്കല്‍ മാധവനുണ്ണി, മേജര്‍ പട്ടാഭിരാമന്‍, സേതുരാമയ്യര്‍, ഭാസ്കര പട്ടേലര്‍, മേലേടത്ത് രാഘവന്‍ നായര്‍ എന്നിങ്ങനെ സവര്‍ണപ്പെട്ട ഒരുവിധം എല്ലാ കഥാപാത്രങ്ങളെയും അവതരിപ്പിക്കുകയും മുസ്‌ലിം പേരുള്ള ദുഷ്ട കഥാപാത്രങ്ങളെ പഞ്ഞിക്കിടുകയും ചെയ്ത് സാംസ്കാരിക മലയാളത്തെ പലവട്ടം രോമാഞ്ചമണിയിച്ചിട്ടുണ്ട്. "മറന്നും പൊറുത്തുമൊക്കെ ജീവിക്കാൻ ‍ഞാൻ ബ്രാഹ്മണനോ, വൈശ്യനോ, ക്ഷൂദ്രനോ ഒന്നുമല്ല, മന്നാടിയാർ ക്ഷത്രിയനാണ്, ക്ഷത്രിയന്‍” (ധ്രുവം) എന്ന് മുഴക്കമുള്ള മമ്മൂട്ടിയന്‍ ശബ്ദത്തില്‍ ‘സവര്‍ണ സാത്വികത’ 90-കളില്‍ അഭ്രപാളികളെ വിജൃംഭിപ്പിച്ചിരുന്നു. ഹൈദര്‍ മരയ്ക്കാര്‍ എന്ന മുസ്‌ലിം പേരുള്ള ഗുണ്ടയെ മമ്മൂട്ടിയുടെ മന്നാടിയാര്‍ എന്ന കഥാപാത്രം അടിച്ചു തൂഫാനാക്കിയിട്ടുണ്ട്. ക്രൂരനും ബലാല്‍സംഗിയുമായ മുരിക്കിന്‍ ചോട്ടില്‍ അഹമദ് ഹാജി(‘പാതിരാ കൊലപാതക’ത്തിന്റെ കഥ)യെ മമ്മൂട്ടി തന്നെയാണ് അവതരിപ്പിച്ചത്. അതിനു ശേഷം എത്രയോ വെള്ളം കൂന്താലി പുഴയിലൂടെ കുത്തിയൊഴുകി. എന്നിട്ടും മമ്മൂട്ടി ‘കാഫിറാ’യില്ല; ആരും കൈ വെട്ടിയില്ല. സംഘ് പരിവാര്‍ പള്ളി പൊളിച്ചപ്പോഴോ അവിടെ ക്ഷേത്രം പണിതപ്പോഴോ പൗരത്വ നിയമം കൊണ്ടുവന്നപ്പോഴോ ഒന്നും മമ്മൂട്ടിയുടെ കണ്ഠനാളത്തില്‍നിന്ന് അബദ്ധത്തില്‍ പോലും ഒരക്ഷരം ബഹിര്‍ഗമിച്ചിരുന്നില്ല. അതേസമയം സവര്‍ണ പൊതുബോധത്തെ തൃപ്തിപ്പെടുത്താനും ‘മതേതരത്വം’ വെളിപ്പെടുത്താനും അത്യാവശ്യം കമന്റുകള്‍ കാച്ചിയിട്ടുമുണ്ട്. പണ്ടൊരിക്കല്‍ അന്നത്തെ വിദ്യാഭ്യാസ മന്ത്രി അബ്ദുറബ്ബ് ഒരു പൊതുവേദിയില്‍ നിലവിളക്ക് കൊളുത്താന്‍ വിസമ്മതിച്ചപ്പോള്‍ മതേതര ബര്‍മുഡ വെളിപ്പെടുത്തി കേരളത്തെ രോമാഞ്ചമണിയിച്ച ചരിത്രമുണ്ട് മമ്മൂട്ടിക്ക്. ‘താനും ഒരു മുസ്ലിമാണ്. ആചാരപ്രകാരമാണ് ജീവിക്കുന്നത്. നിസ്കാരവും നോമ്പുമുണ്ട്. നിലവിളക്ക് നിഷിദ്ധം എന്ന നിലപാട് മുസ്‌ലിം ലീഗ് തിരുത്തണം’ എന്നായിരുന്നു മമ്മൂട്ടിയുടെ നിലപാട്. എന്നിട്ടും അമ്മമ്മൂട്ടിയെയും തേടി ഒടുവില്‍ അവരെത്തി. മമ്മൂട്ടി സുടാപ്പിയും മൗദൂദിയുമായി! അഥവാ അപരവിദ്വേഷം മാത്രം മൂലധനമായിട്ടുള്ള ആശയത്തിന് നിങ്ങളുടെ മുസ്‌ലിം പേര് മാത്രം മതി, എത്ര തന്നെ നിഷ്പക്ഷത നടിച്ചാലും.

2022-ല്‍ മമ്മൂട്ടി അഭിനയിച്ച ‘പുഴു’ എന്ന സിനിമയുമായി ബന്ധപ്പെട്ട വിവാദമാണ് ഇപ്പോള്‍ സമൂഹ മാധ്യമത്തില്‍ പുകയുന്നത്. ജാതി രാഷ്ട്രീയത്തിനെതിരെ ശക്തമായി സംസാരിച്ച സിനിമയായിരുന്നു ‘പുഴു’. അസഹനീയമായ സവര്‍ണ മനോഭാവവും ജാതിചിന്തയും വെച്ചുപുലര്‍ത്തുന്ന കഥാപാത്രത്തെയാണ് മമ്മൂട്ടി ഇതില്‍ അവതരിപ്പിക്കുന്നത്. സ്കൂള്‍ വിദ്യാര്‍ഥിയായ സ്വന്തം മകന്‍ എങ്ങനെ നടക്കണം, എന്ത് കഴിക്കണം, എങ്ങനെ പല്ല് തേക്കണം എന്നു പോലും തീരുമാനിക്കുന്നത് ഇയാളാണ്. സമൂഹത്തില്‍ ഒളിഞ്ഞിരിക്കുന്ന പുരോഗമന- വിദ്യാസമ്പന്ന സവര്‍ണതയുടെ കരണത്തടിക്കുന്ന സിനിമ. ഈ സിനിമ ചെയ്യാന്‍ മമ്മൂട്ടി മുന്‍കൈയെടുത്തു എന്നാണ് ‘പുഴു’വിന്റെ സംവിധായിക രത്തീനയുടെ മുന്‍ ഭര്‍ത്താവ് ഷര്‍ഷാദ് ‘മറുനാടന്‍ മലയാളി’ എന്ന ഓണ്‍ലൈൻ ചാനലിനു നല്‍കിയ അഭിമുഖത്തില്‍ പറഞ്ഞത്. ഹിന്ദുക്കളെ അവഹേളിക്കാന്‍ മമ്മൂട്ടി ബോധപൂര്‍വം ചെയ്ത സിനിമയാണ് ‘പുഴു’ എന്ന തരത്തില്‍ സോഷ്യല്‍ മീഡിയയിലെ സംഘ് പരിവാര്‍ പ്രൊഫൈലുകള്‍ പിന്നീട് അത് ഏറ്റെടുത്തു. മമ്മൂട്ടി വെറും മുഹമ്മദ്‌ കുട്ടി മാത്രമാണെന്നും മമ്മൂട്ടിയുടെയും മകന്‍ ദുല്‍ഖര്‍ സല്‍മാന്റെയും സിനിമകള്‍ ബഹിഷ്കരിക്കണമെന്നുമാണ് സംഘ് പരിവാര്‍ ആഹ്വാനം ചെയ്തിരിക്കുന്നത്.

90-കളിലും 2000-ലും സവര്‍ണ ഫ്യൂഡല്‍ കഥാപാത്രങ്ങളെ അവതരിപ്പിച്ച മമ്മൂട്ടി എന്ന താരരാജാവ് നവ സിനിമയുടെ വരവോടെ സാമ്പ്രദായിക രീതികളില്‍നിന്ന് മാറി നടക്കുകയും താന്‍ തന്നെ അവതരിപ്പിച്ച വീരനായക പരിവേഷം മാറ്റിവെച്ചു പ്രതിനായക കഥാപാത്രങ്ങളെ അവതരിപ്പിക്കാന്‍ തന്റേടപ്പെടുകയും ചെയ്തപ്പോള്‍ പിറന്നതാണ് ‘പുഴു’വിലെ കുട്ടനും ‘ഉണ്ട’യിലെ എസ്.ഐ മണികണ്ഠനുമൊക്കെ. അഭിനയത്തിന്റെ വേറിട്ട വഴികള്‍ താണ്ടാനുള്ള അദമ്യമായ ആര്‍ത്തിയിലാണ് ‘പുഴു’വിലും ‘ഉണ്ട’യിലുമൊക്കെ വ്യത്യസ്ത കഥാപാത്രങ്ങളെ അവതരിപ്പിച്ചത്. അതിനപ്പുറം ഏതെങ്കിലും ഒരു വിഭാഗത്തിനെതിരെ പോരാടാനുറച്ചു രംഗത്ത് വന്ന ‘ജിഹാദി’യല്ല മമ്മൂട്ടി. താന്‍ കെട്ടിയാടിയ സവര്‍ണ ജാതീയ നായക സങ്കല്പത്തെ പൊളിച്ചെഴുതാന്‍ മമ്മൂട്ടി തീരുമാനിച്ചതു കൊണ്ടാണ് ഇത്തരം കഥാപാത്രങ്ങളെ അദ്ദേഹം അവതരിപ്പിക്കുന്നത് എന്നത് ഒരു അതിവായന മാത്രമാണ്. പൗരത്വ സമര കാലത്ത് ഇറങ്ങിയ ‘ഉണ്ട’ യില്‍ മമ്മൂട്ടിയുടെ കഥാപാത്രം എസ്.ഐ മണികണ്ഠന്‍ ‘ഇത് നിന്റെ മണ്ണാണ് ഇവിടെ വിട്ടു പോകരുത്’ എന്ന് ആദിവാസി ബാലനോട് പറയുന്നതും മമ്മൂട്ടി എന്ന മനുഷ്യന്റെ ആത്മഭാഷണമല്ല. ‘പുഴു’ വിനും ‘ഉണ്ട’യ്ക്കും നേരെ ഉതിര്‍ക്കപ്പെടുന്ന ഉണ്ടയില്ലാ വെടികളുടെ കാഴ്ചപ്പുറത്തെ നാട്ടക്കുറി മമ്മൂട്ടിയാണെങ്കിലും പതിറ്റാണ്ടുകളായി രഞ്ജിത് – രഞ്ജി പണിക്കര്‍- പ്രിയദര്‍ശന്മാര്‍ ഉണ്ടാക്കിയെടുത്ത വാര്‍പ്പ് മാതൃകകളെ പൊളിച്ചടുക്കുന്ന നവ സിനിമകളുമായി മുന്നിട്ടിറങ്ങിയ ഹര്‍ഷദ്‌, സകരിയ, മുഹ് സിന്‍ പരാരി, ഖാലിദ് റഹ്മാന്‍ തുടങ്ങിയ യുവ മുസ്‌ലിം സിനിമാപ്രവര്‍ത്തകരാണ് ഇവിടെ യഥാർഥ ടാര്‍ഗറ്റ്. ‘പുഴു’ വിനെ കുറിച്ച് ‘സിമി’ എന്ന നിരോധിത സംഘടനയുടെ മുന്‍ പ്രവര്‍ത്തകനായ ഹര്‍ഷദ്‌ തിരക്കഥ എഴുതിയ, ഇസ്‌ലാമിക തീവ്രവാദത്തെ കട്ടുകടത്തുന്ന സിനിമ (ഷെക്കെയ്ന ടി.വി) എന്നിങ്ങനെയുള്ള നരേറ്റീവ് ഇതിനു തെളിവാകുന്നു. മലയാള സിനിമയില്‍ മൗദൂദിസം ഒളിച്ചുകടത്തപ്പെടുന്നു എന്ന പരിദേവനമുയരുന്നതും മറ്റൊന്നുകൊണ്ടല്ല. സിനിമയിലും സാഹിത്യത്തിലും പണ്ടേക്കു പണ്ടേ വില്ലനും തെമ്മാടിയുമായി പ്രത്യക്ഷപ്പെടുന്ന ഒരു വിഭാഗം പൊടുന്നനെ മാന്യരും ധീരരുമായി അവതരിക്കുന്നത് സവര്‍ണ മലയാളത്തിന് സഹിക്കാവുന്നതിലുമപ്പുറമാണ്. മലയാള സാഹിത്യത്തില്‍ സവർണാധിപത്യം കൊടികുത്തി വാണ കാലത്ത് ‘ബാല്യകാല സഖി’യുമായി വന്ന വൈക്കം മുഹമ്മദ്‌ ബഷീറിനും ഇതു പോലെ സുടാപ്പിപ്പട്ടം കിട്ടിയിരുന്നുവല്ലോ. നായര്‍ സ്ത്രീകളുടെ ആര്‍ത്തവവും തിരണ്ടുകല്യാണവും സാഹിത്യമായി ആഘോഷിക്കപ്പെട്ട കാലത്ത് ബഷീര്‍ എഴുതിയ മാര്‍ക്കകല്യാണം ‘അശ്ലീല’ മാണെന്ന് ആയിരുന്നു അന്നൊരു സവർണ നിരൂപകൻ കുറിച്ചിട്ടത്. അന്ന് “ബാല്യകാല സഖി ജീവിതത്തില്‍നിന്ന് വലിച്ചു ചീന്തിയ ഒരു ഏടാണ്. വക്കില്‍ രക്തം പൊടിഞ്ഞിരിക്കുന്നു. ചിലര്‍ക്ക് ചുടുചോര കാണുമ്പോള്‍ എന്തെന്നില്ലാത്ത പേടിയും അറപ്പും തോന്നും. ബോധക്ഷയം തന്നെ സംഭവിച്ചേക്കാം” എന്ന് പ്രതിരോധം തീര്‍ക്കാന്‍ നമുക്ക് ഒരു എം.പി പോള്‍ ഉണ്ടായിരുന്നു. സത്യാനന്തര രാഷ്ട്രീയം (post-truth politics) ചെങ്കോല്‍ ഏന്തുകയും ദീപസ്തംഭം മഹാശ്ചര്യമാവുകയും ചെയ്യുന്ന കാലത്ത് നിര്‍ഭാഗ്യവശാല്‍ നമുക്കൊരു ജോയ് മാത്യു പോലുമില്ല എന്നതാണ് ഒരു ദുഃഖ സത്യം. l

“നാട്ടിലെ കല്യാണം മുടക്കികളുടെ ശ്രദ്ധയ്ക്ക്: ആളെ തിരിച്ചറിഞ്ഞാല്‍ നിങ്ങളുടെ പ്രായം, ജാതി, മതം, രാഷ്ട്രീയം തുടങ്ങിയതൊന്നും നോക്കാതെ വീട്ടില്‍ കയറി തല്ലുന്നതായിരിക്കും”. ജാതി, ജാതകം, ജോലി തുടങ്ങിയ ഹര്‍ഡിലുകള്‍ ചാടിക്കടന്ന് വിവാഹത്തിന്റെ ഫിനിഷിംഗ് പോയന്റില്‍ എത്തിനിൽക്കുമ്പോള്‍ അതിനെ പാര വെച്ചു തകര്‍ക്കുന്ന കിട്ടുണ്ണിമാര്‍ക്കെതിരെ നിവൃത്തികേടിന്റെ സ്വയം പ്രതിരോധം എന്ന നിലക്കാണ് കുട്ടനാട്ടിലെ ഒരു ഗ്രാമത്തില്‍ ഏതാനും മാസങ്ങള്‍ക്ക് മുമ്പ് ഇങ്ങനെയൊരു ഫ്ലക്സ് പ്രത്യക്ഷപ്പെട്ടത്. വിവാഹവുമായി ബന്ധപ്പെട്ട അശ്ലീലാചാരങ്ങളില്‍ ഏറ്റവും ക്രൂരമായ ഒരിനമാണ്‌ ഇമ്മാതിരി ‘കല്യാണം മുടക്കല്‍ ചടങ്ങെ’ങ്കില്‍ അതിനുമപ്പുറമാണ് വിവാഹ ദിനത്തിലും തലേന്നും ‘കല്യാണം കലക്കികള്‍’ നടത്തുന്ന വൃത്തികെട്ട ‘കേളികള്‍’. അവയാകട്ടെ ക്രൂരതയില്‍ ആനന്ദം കണ്ടെത്തുന്നവരുടെ വാസനാ വൈകൃതത്തിന്റെ അതിര് വിട്ട പ്രകടനങ്ങളാവുകയും സാമൂഹിക ഇടപെടല്‍ ആവശ്യപ്പെടുന്ന ഗുരുതര പ്രശ്നമായി മാറുകയും ചെയ്തിരിക്കുന്നു. ഈ ക്രൂര തമാശകള്‍ മൂലം വിവാഹം മുടങ്ങുകയും ആത്മഹത്യയില്‍ അഭയം തേടുകയും ചെയ്തവരുടെ എണ്ണം എത്രയെങ്കിലുമുണ്ട് നമ്മുടെ ‘സാംസ്കാരിക തിരുമുറ്റ’ത്ത്.

മനുഷ്യ ജീവിതത്തിലെ ഏറ്റവും നിര്‍ണായകമായ ഒരു വഴിത്തിരിവാണ് ദാമ്പത്യം. വെറുമൊരു മംഗളകര്‍മം എന്നതിനപ്പുറം ഒരാണും പെണ്ണും തമ്മിലുള്ള ‘സുദൃഢമായ ഉടമ്പടി’(വിശുദ്ധ ഖുര്‍ആന്‍ 4:21)യും ‘ദൈവം കൂട്ടിച്ചേര്‍ത്ത വേർപ്പെടുത്താനാവാത്ത ബന്ധ' (മത്തായി 19:6) വും ‘പരസ്പര സ്നേഹത്തിന്റെ ഐക്യപ്പെടലു'(ഋഗ്വേദം)മാണ് വിവാഹം. രണ്ട് മനുഷ്യര്‍ ചേര്‍ന്നുണ്ടാകുന്ന ആ കൊച്ചു വൃത്തം മനുഷ്യ സംസ്കാരത്തിന്റെ തന്നെ ആദ്യത്തെ കണ്ണിയാകുന്നു. ശരിയായ പങ്കാളിയെ തെരഞ്ഞെടുക്കുന്നത് മുതൽ വിവാഹ ചടങ്ങുകൾ വരെ നിരവധി ഘട്ടങ്ങള്‍ താണ്ടിയാണ് വധൂവരന്മാര്‍ വിവാഹ ജീവിതത്തിലേക്ക് കാലെടുത്തുവെക്കുന്നത്. മാലാഖമാരുടെ കാവലില്‍ നടക്കുന്ന പവിത്രമായ ഒരു ചടങ്ങിനെ ആഭാസങ്ങളുടെ ആഘോഷമാക്കുകയും നവമിഥുനങ്ങളെ പൈശാചികമായ ഒരു തരം ‘റാഗിംഗി’ന് വിധേയരാക്കുകയും ചെയ്യുന്ന ഏർപ്പാടിന് പ്രാദേശികമോ മതപരമോ ആയ ‘വിവേചനങ്ങള്‍’ ഇല്ലെങ്കിലും മലബാര്‍ ഭാഗങ്ങളിലെ മുസ്‌ലിം കുടുംബങ്ങളിലാണ് ഏറിയ തോതില്‍ ഇത് നടക്കുന്നത് എന്നത് ഒരു തിക്ത സത്യമാണ്.
ജൂനിയര്‍ വിദ്യാര്‍ഥികളുടെ സങ്കോചമകറ്റുന്നതിനുള്ള രസികന്‍ നമ്പറുകളായി രംഗപ്രവേശം ചെയ്ത കലാലയങ്ങളിലെ റാഗിംഗ് പിന്നീട് മാന്യതയുടെയും മര്യാദയുടെയും വേലി തകര്‍ത്തു തിമര്‍ത്താടുന്ന ആഭാസങ്ങളായി മാറിയതു പോലെ, വിവാഹവുമായി ബന്ധപ്പെട്ടു തുടങ്ങിയ നിരുപദ്രവകരമായ തമാശകളാണ് ബീഭത്സമായ അഴിഞ്ഞാട്ടങ്ങളായി മാറിയത്. കലാലയങ്ങളിലെ റാഗിംഗ് ഇന്ത്യയില്‍ നിയമവിരുദ്ധവും തടവുശിക്ഷ ലഭിക്കുന്ന ശിക്ഷാര്‍ഹമായ കുറ്റവുമാണെങ്കില്‍ കല്യാണപ്പന്തലിലെ റാഗിംഗിന് നിയമപരമായ വിലക്കുകളില്ല!
മലബാറിലെ കല്യാണങ്ങള്‍ അത്യാര്‍ഭാടങ്ങളുടെ പേരിലായിരുന്നു ഒരു കാലത്ത് കുപ്രസിദ്ധി നേടിയിരുന്നത്. അത്തരത്തില്‍ അതിരുവിടുന്ന വിവാഹ ധൂര്‍ത്തിന്റെ ഒരു ആഖ്യാനമാണ് സന്തോഷ്‌ ഏച്ചിക്കാനത്തിന്റെ ‘ബിരിയാണി’ എന്ന ചെറുകഥ. കാസർകോട്ടെ തളങ്കരയിലെ കലന്തന്‍ ഹാജിയുടെ പേരമകന്‍ രിസ്്വാന്റെ വിവാഹദിവസം, ആയിരങ്ങള്‍ തിന്നിട്ടും തീരാത്ത ബിരിയാണി കുഴിയിലിട്ടു മൂടുന്നതാണ് കഥയുടെ ഇതിവൃത്തം. കല്യാണത്തിന് വേണ്ടി കലന്തന്‍ ഹാജി പഞ്ചാബില്‍നിന്ന് ഇറക്കുമതി ചെയ്ത ക്വിന്റല്‍ കണക്കിന് ബസുമതി അരികൊണ്ട് തയാറാക്കിയ ബിരിയാണി ബാക്കിയാവുകയും ഒടുവില്‍ ഗോപാല്‍ യാദവ് എന്ന അതിഥി തൊഴിലാളിയോട് അത് കുഴിയിലിട്ടു മൂടാന്‍ ആവശ്യപ്പെടുകയുമാണ് ചെയ്യുന്നത്. ബിരിയാണി ‘നിക്ഷേപിക്കാന്‍’ വലിയ കുഴിയെടുത്തുകൊണ്ടിരിക്കെ ഗോപാല്‍ യാദവിന്റെ മനസ്സ് ഭൂതകാലത്തിന്റെ ഫ്ലാഷ് ബാക്കിലൂടെ തിരിഞ്ഞുനടക്കുന്നു. ഉത്തരേന്ത്യയിലുള്ള തന്റെ ഗ്രാമത്തിലെ ശുകൂര്‍ മിയാന്റെ കടയില്‍ വെച്ചാണ് ഗോപാല്‍ യാദവ് ഇതിനു മുമ്പ് ബസുമതി അരി കണ്ടത്. ആറു മാസം ഗര്‍ഭിണിയായ ഭാര്യ മാതംഗിയുടെ ‘ഗര്‍ഭപ്പൂതി’ തീര്‍ക്കാന്‍ ഇച്ചിരി അരിക്ക് വേണ്ടിയാണ് ഗോപാല്‍ കടയില്‍ പോകുന്നത്. കഞ്ഞിക്ക് ആവശ്യമുള്ള അരി വാങ്ങാന്‍ കാശ് തികയാതെ വന്നപ്പോള്‍ അമ്പത് ഗ്രാം ‘ബസുമതിയരി’ തൂക്കിത്തരാന്‍ ശുകൂര്‍ മിയാനോട് ഗോപാല്‍ ആവശ്യപ്പെടുന്നു. വേവിക്കാന്‍ മാത്രമില്ലാത്തതു കൊണ്ട് ചവച്ചരച്ചാണ് മാതംഗി അരി തിന്നുന്നത്. ‘‘അരിമാവ് പശുവിന്‍ പാല് പോലെ കടവായിലൂടെ ഒഴുകി വന്നപ്പോള്‍ അത് തുടക്കാന്‍ സമ്മതിക്കാതെ ഗോപാല്‍ ആ കണ്ണുകളിലേക്ക് നോക്കിനിന്നു” (ബിരിയാണി). മാതംഗി പ്രസവിച്ച കുഞ്ഞിനു ഗോപാല്‍ ഇട്ട പേര് ‘ബസുമതി’ എന്നായിരുന്നു. കഥാന്ത്യത്തില്‍, കുഞ്ഞു ബസുമതി മരിക്കുന്നത് വിശപ്പ്‌ സഹിക്കാന്‍ കഴിയാതെയായിരുന്നു. ബസുമതിയരി കൊണ്ടുള്ള ബിരിയാണി ‘ദം’ പൊട്ടിക്കുക പോലും ചെയ്യാതെ കുഴിയിലിട്ടു മൂടുമ്പോള്‍ വിശന്നു മരിച്ച മകള്‍ ബസുമതിയുടെ ഓര്‍മകള്‍ അയാളുടെ ഉള്ളില്‍ തേങ്ങലായി വിങ്ങുന്നുണ്ടായിരുന്നു. “ഗോപാല്‍ യാദവ് ഒരു കൈക്കോട്ട് മണ്ണ് കൂടി ബസുമതിക്ക് മേല്‍ കൊത്തിയിട്ടു. പിന്നെ കുറെ ശ്വാസം ഉള്ളിലേക്ക് വലിച്ചെടുത്തു” എന്ന വാചകത്തോടെയാണ് ‘ബിരിയാണി’ അവസാനിക്കുന്നത്. ‘കാണം വിറ്റും കല്യാണം കേമമാക്കണം’ എന്ന പുതുചൊല്ലിന്റെ ബലത്തില്‍ കുബേര-കുചേല വ്യത്യാസമില്ലാതെ മത്സരിച്ചുനടക്കുന്ന ആഡംബര വിവാഹങ്ങള്‍ ഇന്ന് ഒരു വാര്‍ത്ത പോലുമല്ലാത്ത വിധം സാര്‍വത്രികമായിരിക്കുന്നു. അതിനാല്‍ തന്നെ ‘ബിരിയാണി’ നമ്മുടെയാരുടെയും ഉറക്കം കെടുത്തുന്നില്ല. അതേസമയം വിവാഹാഘോഷവുമായി ബന്ധപ്പെട്ടു പുതുതായി പൊട്ടിപ്പുറപ്പെട്ട അഴിഞ്ഞാട്ടങ്ങളാണ് ഇന്നിപ്പോള്‍ വാര്‍ത്തകളില്‍ നിറയുന്ന ഒരു സാമൂഹിക ദുരന്തമായി മാറിയിരിക്കുന്നത്.

വിവാഹാഘോഷത്തിന്റെ മറവില്‍ ‘പുതിയാപ്ല’യുടെ കൂട്ടുകാര്‍ നടത്തിയ വിക്രിയകള്‍ മൂലം പൊതു നിരത്തിലെ ഗതാഗതം പോലും സ്തംഭിച്ച അവസ്ഥ സമൂഹ മാധ്യമങ്ങളില്‍ വൈറലായത് കഴിഞ്ഞ മാസമാണ്. കണ്ണൂര്‍ വാരത്താണ് സംഭവം. യദൃഛയാ ‘ബിരിയാണി’യിലെ പുതിയാപ്ലയുടെ പേര് തന്നെയാണ് ഇക്കഥയിലെ നായകന്റെ പേരും. അലങ്കരിച്ച ഒട്ടകപ്പുറത്ത് പുഷ്പ കിരീടം ചൂടി നടുറോട്ടിലൂടെ കല്യാണ മണ്ഡപത്തിലേക്ക് സഞ്ചരിച്ച രിസ് വാന്റെ പിന്നില്‍ കാതടപ്പിക്കുന്ന ശബ്ദത്തോടെ വാദ്യമേളങ്ങളുടെ അകമ്പടിയോടെ വന്‍ ചങ്ങാതിക്കൂട്ടമാണ് താളത്തില്‍ നീങ്ങിയത്. ആഘോഷങ്ങള്‍ക്ക് വേണ്ടി ഉപയോഗിക്കുന്ന തോക്കില്‍നിന്ന് പടര്‍ന്ന പുകയും തീപ്പൊരിയും യാത്രക്കാരുടെ മേല്‍ പതിക്കുകയും ആംബുലന്‍സ് വാഹനത്തിനു പോലും കടന്നുപോകാന്‍ കഴിയാത്ത വിധം തടസ്സമുണ്ടാവുകയും ചെയ്ത സാഹചര്യത്തില്‍ സഹികെട്ട നാട്ടുകാര്‍ ഇടപെടുകയും തുടര്‍ന്ന് വരന്റെയും കൂട്ടുകാരുടെയും പേരില്‍ പോലീസ് കേസെടുക്കുകയും ചെയ്യുകയായിരുന്നു.
കഴിഞ്ഞ വര്‍ഷം ഇതിനെക്കാള്‍ ഭീകരമായ മറ്റൊരു വിവാഹാഘോഷ വിക്രിയ നടന്നതും കണ്ണൂര്‍ ജില്ലയില്‍ തന്നെയായിരുന്നു. തോട്ടടയില്‍ വിവാഹാഘോഷങ്ങള്‍ക്കിടെയുള്ള ഗാനമേളയുമായി ബന്ധപ്പെട്ടു വരന്റെ കൂട്ടുകാര്‍ അക്രമാസക്തരാവുകയും കല്യാണപ്പന്തല്‍ യുദ്ധക്കളമായി മാറുകയും, തുടര്‍ന്നുണ്ടായ ബോംബേറില്‍ ഒരാള്‍ കൊല്ലപ്പെടുകയും ചെയ്തു. ‘കല്യാണ സൊറ’ എന്ന ഓമനപ്പേരിൽ വരന്റെ സുഹൃത്തുക്കൾ നടത്തുന്ന റാഗിംഗ് വധുവിന് സഹിക്കാവുന്നതിലും അപ്പുറമാകുന്നതും പതിവാണ്. ഏതെങ്കിലുമൊരു കല്യാണത്തിന് ചങ്ങാതിമാര്‍ കൊടുക്കുന്ന ‘പണി’ക്ക് പകരം വീട്ടിയും അതിനെക്കാള്‍ മാരകമായ പണി തിരിച്ചുകൊടുത്തുമാണ് ഒരു തമാശക്ക് തുടങ്ങിയ ഈ ഏർപ്പാട് തുടര്‍ക്കഥകളായത്; മലബാറിലെ രാഷ്ട്രീയ കൊലപാതകം പോലെ.

വിവാഹം ഒരു വിരസമായ ചടങ്ങാവണമെന്ന് ഒരു മതവും തത്ത്വസംഹിതയും പറയുന്നില്ല. ബന്ധു മിത്രാദികളും കൂട്ടുകാരും നാട്ടുകാരും ആഹ്ലാദത്തിന്റെ ഈ അനര്‍ഘ വേളയെ ആഘോഷമാക്കുക സ്വാഭാവികമാണ്. അതേസമയം ഏത് ആഘോഷവും അതിര് കവിയുമ്പോള്‍ അത് ആഭാസമായി മാറും. വിവാഹത്തെ കുറിച്ചു മാത്രമല്ല, ജീവിത മൂല്യങ്ങളെ സംബന്ധിച്ചു പോലും നിലവിലുള്ള സാമൂഹിക സങ്കല്പങ്ങളില്‍ വന്ന മാറ്റമാണ് യാഥാർഥത്തില്‍ ഇത്തരം അത്യാചാരങ്ങള്‍ക്ക് ഒരു പ്രധാന കാരണമായി കാണാന്‍ കഴിയുന്നത്. മൂല്യങ്ങളില്ലെങ്കിലും ജീവിതം ‘കളര്‍ഫുള്‍’ ആവണമെന്നതാണ് പുതിയ തലമുറയിലെ ചിലരുടെയെങ്കിലും കാഴ്ചപ്പാട്. അതുകൊണ്ടുതന്നെ പഴയ ബ്ലാക്ക് ആന്റ് വൈറ്റ് കാലത്തെ പാട്ടും മൈലാഞ്ചിയും ആണ്‍ - പെണ്‍ ഇടകലര്‍പ്പില്ലാത്ത ഇരുത്തവും അവര്‍ക്ക് അരസികമായ ഏർപ്പാടുകളാണ്. ആഹ്ലാദക്കൂട്ടായ്മകളില്‍ പഴയ കാലത്തെ പോലെ കുടുംബക്കാരുടെയും കൂട്ടുകാരുടെയും സര്‍ഗാത്മകവും ജൈവികവുമായ ഇടപെടല്‍ പോലും ഇപ്പോഴില്ല. എല്ലാ ആഘോഷങ്ങളും ഇപ്പോള്‍ ഇവന്റ് മാനേജ്മെന്റിന്റെ ഇന്ദ്രജാല പ്രകടനങ്ങളായി മാറിയിരിക്കുന്നു. കുഞ്ഞിന്റെ പേരിടല്‍ മുതല്‍ മുത്തച്ഛന്റെ മൃതസംസ്കാരം വരെയുള്ള സകല കര്‍മങ്ങളും ‘കളര്‍ഫുള്‍’ ആക്കാന്‍ ഇവന്റ് മാനേജ്മെന്റിനെ ഏല്പിക്കുന്ന ‘ന്യൂ ജെന്‍ യുവത’യ്ക്ക് വിവാഹാഘോഷം ‘ട്രെന്‍ഡി’ ആവണമെന്നേയുള്ളൂ. ഇവന്റ് മാനേജര്‍മാര്‍ക്കാകട്ടെ വധൂവരന്മാര്‍ മജ്ജയും മാംസവുമുള്ള മനുഷ്യരല്ല, തങ്ങള്‍ക്ക് വിനിമയം നടത്താനുള്ള വെറും ‘മാര്‍ക്കറ്റിംഗ് മെറ്റീരിയല്‍സ്’ മാത്രമാണ്. അതുകൊണ്ടാണ് സഭ്യതയുടെ വരമ്പുകള്‍ ലംഘിച്ചുകൊണ്ട് വിവാഹിതരാവുന്നതിനു മുമ്പ് തന്നെ കല്യാണത്തലേന്നുള്ള ഫോട്ടോഷൂട്ട്‌ അടക്കം ഇവന്റ് മാനേജര്‍മാര്‍ ചെയ്തുകൊടുക്കുന്നത്.

ചുരുക്കത്തില്‍, ഒത്തുചേരലുകളുടെ ആഹ്ലാദങ്ങളെ തല്ലിക്കെടുത്തുന്ന ‘ഐറ്റ’ങ്ങളാണ് ഇത്തരം വിവാഹാഘോഷങ്ങളില്‍ അധികവും അരങ്ങേറുന്നത്. വരനെയും വധുവിനെയും അസാധാരണവും അസാധ്യവുമായ കാര്യങ്ങൾ ചെയ്യാൻ പ്രേരിപ്പിക്കുക, വാഹനം തടഞ്ഞുനിറുത്തി റോഡിലൂടെ നടത്തിക്കുക, മണിയറയുടെ ജനല്‍ അഴിച്ചുമാറ്റുക, വരന്റെ വ്യാജവിശേഷണങ്ങളും സ്വഭാവങ്ങളും വര്‍ണിച്ചു നോട്ടീസടിക്കുക തുടങ്ങി, വധൂവരന്മാരെ കാന്താരി ജ്യൂസ് കുടിപ്പിക്കുന്നത് വരെ കാര്യങ്ങള്‍ എത്തിനിൽക്കുന്നു. വിവാഹാഘോഷങ്ങളുടെ അവിഭാജ്യ ഘടകമെന്നോണം ഈ ആഭാസങ്ങള്‍ക്ക് ഒരു സാംസ്കാരിക സ്വീകാര്യത തന്നെ കൈവന്നിരിക്കുന്ന മട്ടാണ്. വധൂവരന്മാരുടെ ‘ചങ്ങായിമാര്‍’ മാന്യതയുടെയും സഭ്യതയുടെയും അതിരുകള്‍ ലംഘിച്ചുകൊണ്ട് വിവാഹ വേദികളെ ഇമ്മട്ടില്‍ അലങ്കോലപ്പെടുത്തുന്നത് സാധാരണക്കാരുടെ ജീവിതത്തെ പോലും ബാധിക്കുന്ന ക്രമസമാധാന പ്രശ്നമായി മാറിയിരിക്കുന്നു. ഇത്തരമൊരു സാഹചര്യത്തില്‍ നമ്മുടെ മത - രാഷ്ട്രീയ നേതൃത്വം ഗുരുതരമായ ഇടപെടല്‍ നടത്തിയില്ലെങ്കില്‍ കാര്യങ്ങള്‍ കൈവിട്ടുപോകുന്ന അവസ്ഥയുണ്ടായേക്കും. l

വരാനിരിക്കുന്ന ലോക്‌സഭാ തെരഞ്ഞെടുപ്പിലെങ്കിലും ഇനിയും ബാലികേറാമലയായി നില്‍ക്കുന്ന കേരളമടക്കമുള്ള ദക്ഷിണേന്ത്യന്‍ സംസ്ഥാനങ്ങളില്‍ ചില്ലറ സീറ്റുകളും തുടര്‍ന്നു സംസ്ഥാന ഭരണം എന്ന ചിരകാല സ്വപ്നവും സാക്ഷാത്കരിക്കാന്‍ ഓതിരം മുതല്‍ ഗദായഘട്ടം വരെയുള്ള അടവുകളെല്ലാം പയറ്റിയിട്ടും ഫലം നാസ്തി എന്ന് വന്നപ്പോള്‍ ബി.ജെ.പി പുറത്തെടുത്തിരിക്കുന്ന അവസാനത്തെ അടവാണ് ‘ഡേര്‍ട്ടി ഗവര്‍ണന്‍സ്’ കളി. ഭീഷണി, പ്രകോപനം, പ്രലോഭനം തുടങ്ങിയ ‘സംഘാഭാസ’ കലകള്‍ ക്ലച്ച് പിടിക്കാതെ വന്നപ്പോള്‍ സംസ്ഥാനങ്ങളുടെ ‘വീക്ക്നെസ്സില്‍ കയറിപ്പിടിച്ചു’ കീഴടക്കാന്‍ വിരുതുള്ള ഗവര്‍ണര്‍മാരിലൂടെ ദൗത്യം പൂര്‍ത്തീകരിക്കാനാണ് അർധരാത്രിക്ക് അഞ്ചു മിനിറ്റ് മാത്രം ബാക്കിയുള്ളപ്പോള്‍ സംഘ് പരിവാര്‍ കഠിനമായി പരിശ്രമിച്ചുകൊണ്ടിരിക്കുന്നത്. കേരളത്തില്‍ മാത്രമല്ല, പ്രതിപക്ഷം ഭരിക്കുന്ന മറ്റു ദക്ഷിണേന്ത്യന്‍ സംസ്ഥാനങ്ങളിലും ആസുര ബാണങ്ങള്‍ തൊടുത്തുവിട്ടു ഫലം കാത്തിരിപ്പാണ് ബി.ജെ.പി. മുന്‍ ദേശീയ സുരക്ഷാ ഉപാധ്യക്ഷനായ കേരള കേഡര്‍ ഐ.പി.എസ് ഓഫീസര്‍ ആര്‍.എന്‍ രവി തമിഴ്്നാട്ടിലും തമിഴിസൈ സൗന്ദരരാജന്‍ എന്ന തമിഴ്‌നാട് മുന്‍ ബി.ജെ.പി അധ്യക്ഷ തെലുങ്കാനയിലും 'സാമാന്യം ഭേദപ്പെട്ട’ നിലയില്‍ ‘പെര്‍ഫോം’ ചെയ്തുകൊണ്ടിരിക്കുന്നു. കേരളത്തില്‍ ആരിഫ് മുഹമ്മദ്‌ ഖാന്‍ എന്ന ഉത്തരേന്ത്യക്കാരനെയാണ് ഈ ‘ടാസ്ക്’ ഏല്പിച്ചിരിക്കുന്നത്.

ജനാധിപത്യ സംവിധാനത്തില്‍ ജനങ്ങള്‍ തെരഞ്ഞെടുക്കുന്ന മുഖ്യമന്ത്രിയാണ് സംസ്ഥാനത്തിന്റെ യഥാർഥ ഭരണത്തലവന്‍ (Head of the State). രാഷ്ട്രത്തിന് രാഷ്ട്രപതി എന്ന പോലെ സംസ്ഥാനങ്ങളുടെ നാമമാത്ര ഭരണത്തലവനാണ് ഗവര്‍ണര്‍. കേന്ദ്ര- സംസ്ഥാന സര്‍ക്കാറുകളെ പരസ്പരം ബന്ധിപ്പിക്കുന്ന ഒരു കണ്ണി. ഔപചാരിക ഭരണത്തലവന്‍ ആണെങ്കിലും ഭരണ നിര്‍വഹണാധികാരം ഗവര്‍ണര്‍ക്കില്ല. സര്‍ക്കാര്‍ എടുക്കുന്ന തീരുമാനങ്ങള്‍ അംഗീകരിക്കാനുള്ള ഭരണഘടനാപരമായ ബാധ്യത ഗവര്‍ണര്‍ക്കുണ്ട് താനും. മന്ത്രിസഭാ തീരുമാനങ്ങളോട് ഗവര്‍ണര്‍ക്ക് വിയോജിക്കാനുള്ള അവകാശമുണ്ട്. എന്നാല്‍, തീരുമാനങ്ങളില്‍ സര്‍ക്കാര്‍ ഉറച്ചുനിന്നാല്‍ ഗവര്‍ണര്‍ അതംഗീകരിക്കണം. ഇങ്ങനെയൊക്കെയാണ് ജനാധിപത്യം വെന്റിലേഷനില്‍ ആവുന്നതിനു മുമ്പുള്ള ഇന്ത്യന്‍ രീതി. ബ്രിട്ടീഷധീന ഇന്ത്യയിലെ യഥാർഥ ഭരണത്തലവന്‍ ഗവര്‍ണര്‍ ജനറല്‍ ആയിരുന്നു. കോളനിവത്കരണ കാലത്ത് ബ്രിട്ടീഷ് ഈസ്റ്റ്‌ ഇന്ത്യ കമ്പനിയുടെ ചുമതല വഹിച്ചിരുന്നവരെയും ഗവര്‍ണര്‍ എന്ന് വിളിച്ചിരുന്നു. രാജഭരണക്കാലത്തെ ഗവര്‍ണര്‍ ‘ക്ഷത്രപതി’ എന്നാണ് അറിയപ്പെട്ടിരുന്നത്. രാജാവിന്റെ അഭാവത്തില്‍ ഭരണം നടത്തിയത് ക്ഷത്രപതികള്‍ ആയിരുന്നു. 1947-ൽ ഇന്ത്യ സ്വതന്ത്രമായതിനു ശേഷം ഇന്ത്യയിലെ രാജാവിന്റെ പ്രതിനിധി എന്ന പേരിലും രാജ്യത്തിന്റെ തലവന്‍ എന്ന നിലയിലും 1950 വരെ ഈ സ്ഥാനം നിലനിന്നിരുന്നു. കോരന്മാര്‍ തറയില്‍ കുഴി കുത്തി കഞ്ഞി കുടിക്കുന്ന ജാത്യാവശിഷ്ടങ്ങളുടെ സവര്‍ണ കാലം തിരിച്ചു വരാനുള്ള സുവര്‍ണ മോഹം പേറുന്ന ‘സനാതന’ ഭാരതീയര്‍ മൂന്നാമൂഴത്തിനു മുന്നൊരുക്കങ്ങള്‍ നടത്തുന്നതിന്റെ ഭാഗമായിട്ടാണ്, ‘സര്‍ക്കാര്‍ തീരുമാനങ്ങളോട് വിയോജിക്കാനുള്ള’ ഗവര്‍ണര്‍മാരുടെ അധികാരം ഉപയോഗിച്ചു ഗവര്‍ണര്‍മാര്‍ക്ക് പഴയ ക്ഷത്രപതിയുടെ പട്ടും വളയും നല്‍കി കുളം കലക്കാന്‍ അവസരം നല്‍കിയിരിക്കുന്നത്.

നിയമസഭ പാസ്സാക്കുന്ന ബില്ലുകളില്‍ ഒപ്പിടാതെയും ഭരണ നടപടികളില്‍ അനാവശ്യമായി ഇടപെട്ടും രാജ്ഭവനില്‍ കാലു കുത്തിയ ഒന്നാം ദിവസം തൊട്ടു തന്നെ ഒരു പ്രതിപക്ഷ നേതാവിന്റെ റോളില്‍ ആരിഫ് ഖാന്‍ ‘തിളങ്ങി’നിന്നു. കേരളത്തോട് തന്നെ യുദ്ധം പ്രഖ്യാപിച്ച മട്ടിലായിരുന്നു അദ്ദേഹത്തിന്റെ ഓരോ ‘ആക് ഷനും’. ഏറ്റവുമൊടുവില്‍, അറുപത് വര്‍ഷങ്ങളായി മലയോര മേഖലയിലെ ജനങ്ങളുടെ ഭൂമി പ്രശ്‌നങ്ങള്‍ക്ക് ശാശ്വത പരിഹാരം കണ്ടെത്തുക എന്ന ലക്ഷ്യത്തോടെ 1960-ലെ ഭൂപതിവ് നിയമത്തില്‍ ഭേദഗതി വരുത്തിക്കൊണ്ട് നിയമ സഭ ഏകകണ്ഠമായി പാസ്സാക്കിയ ബില്ലില്‍ ഒപ്പിടാത്തതില്‍ ഇടുക്കിയില്‍ ഗവര്‍ണര്‍ക്കെതിരെ ഹര്‍ത്താല്‍ പ്രഖ്യാപിച്ചിരിക്കുകയാണ്. മാറി മാറി നടത്തിയ കാവിവത്കരണ പരീക്ഷണങ്ങള്‍ക്കൊടുവില്‍ കേരളത്തിന്റെ ‘സാക്ഷരത’ എന്ന വീക്ക്നെസ്സിലാണ് ഗവര്‍ണര്‍ ആരിഫ് മുഹമ്മദ്‌ ഖാന്‍ തന്റെ ‘ചാന്‍സലര്‍’ പദവി ഉപയോഗിച്ചു കൈവെച്ചത്. ‘സാക്ഷരത’യാണ് കേരളത്തിന്റെ ‘വീക്ക്നെസ്സ്’ എന്ന ‘നിഗൂഢ സത്യം’ ആദ്യം ‘കണ്ടെത്തിയ’ സംഘ് തലവന്‍ സാക്ഷാല്‍ ഒ. രാജഗോപാലാണ്‌. “സാക്ഷരതയിലും വിദ്യാഭ്യാസത്തിലും കേരളം മുന്നില്‍ നില്‍ക്കുന്നതു കൊണ്ടാണ് ബി.ജെ.പി ഇവിടെ വളരാത്തത്. കേരളത്തില്‍ 90 ശതമാനമാണ് സാക്ഷരത. അവര്‍ ചിന്തിക്കുന്നു. സംവാദത്തില്‍ ഏര്‍പ്പെടുന്നു” (കേരളത്തില്‍ ബി.ജെ.പി വളരാത്തത് സാക്ഷരത കൊണ്ട്- ഒ. രാജഗോപാല്‍ - കേരള കൗമുദി 24-3-2021). ഈ ‘വീക്ക്നെസ്സിനെ’ എങ്ങനെ ‘ശക്തി’യാക്കി മാറ്റാം എന്നതിനെ കുറിച്ചു കാലങ്ങളായി ‘ശാഖ’കളില്‍ നടക്കുന്ന ‘കൂലങ്കഷായ’ ചര്‍ച്ചകളില്‍നിന്ന് ഊറിവന്ന ചിന്തകളാണ് യൂനിവേഴ്സിറ്റികളുടെ ചാന്‍സലര്‍ കൂടിയായ ഗവര്‍ണര്‍ നടപ്പാക്കാന്‍ ശ്രമിച്ചത്. കേരളത്തിന്റെ ഉന്നത വിദ്യാഭ്യാസ മേഖലയെ ‘മോദി’ ഫൈ ചെയ്ത് ‘ദി എന്റയര്‍ പൊളിറ്റിക്സ്’ മോഡല്‍ ആക്കാനാണ് പരിപാടി. ബി.ജെ.പിയുടെ ‘നല്ല മുസ് ലിം’ ആഖ്യാനത്തെ പ്രതിനിധാനം ചെയ്യുന്ന ‘ദേശീയ മുസ്‌ലിമിനെ’ തന്നെ കേരളത്തിലേക്ക് നിയോഗിച്ചത് ഫൗള്‍ കളിയിലുള്ള അദ്ദേഹത്തിന്റെ സര്‍വകലാവല്ലഭത്വം കൊണ്ട് തന്നെ.

ഏറ്റവുമൊടുവില്‍, ‘പൗരത്വ ബില്ലി’ല്‍ ആര്‍.എസ്.എസിന്റെ അറുപിന്തിരിപ്പന്‍ വര്‍ഗീയ ചിന്തയുടെ വക്താവായി സര്‍വകലാശാലാ വേദികളില്‍ അവതരിച്ച ശേഷമാണ് ‘ഭരണം പിടിക്കാന്‍’ കേരളത്തിലെ കലാശാലകളെ കാവിവത്കരിക്കലാണ് വഴി എന്ന് ഖാന്‍ കണ്ടെത്തുന്നത്. 2019-ല്‍ ആരോഗ്യ സര്‍വകലാശാലാ വി.സിയായി ഡോ. മോഹനന്‍ കുന്നുമ്മല്‍ എന്ന സംഘ് നോമിനിയെ നിയമിച്ചുകൊണ്ടാണ് ആരിഫ് ഖാന്‍ കേരളത്തിന്റെ ഉന്നത വിദ്യാഭ്യാസ മണ്‍തലത്തില്‍ കാളപൂട്ടല്‍ തുടങ്ങിവെച്ചത്. മൂന്നു വര്‍ഷത്തിന് ശേഷം 2022-ല്‍ കേരള വി.സിയുടെ അധികച്ചുമതല കൂടി മോഹനന് നല്‍കി. എഴുപതുകളിലെ ‘ത്യാഗ സമര സുരഭിലമായ’ ചരിത്രം ചവറ്റുകൊട്ടയില്‍ തള്ളുകയും ഉദാരവത്കരണാനന്തര കാലത്തെ ജീർണതകൾ പേറി ഉദാര ലൈംഗികതയുടെയും നവ ലിബറലിസത്തിന്റെയും പ്രചാരണം ഏറ്റെടുത്ത് സര്‍ഗ ശൂന്യമായിത്തീരുകയും ചെയ്ത എസ്.എഫ്.ഐക്ക് ഓര്‍ക്കാപുറത്ത് കിട്ടിയ പ്രതിയോഗിയാണ്, യഥാർഥത്തില്‍ അവര്‍ തന്നെ ‘പാന്‍ പരാഗ് സംഘി’ എന്ന് വിളിക്കുന്ന ആരിഫ് മുഹമ്മദ്‌ ഖാന്‍. എസ്.എഫ്.ഐയുടെ കണ്‍വെട്ടത്ത് വെച്ച് തന്നെയാണ് ഒന്നും രണ്ടും പിണറായി സര്‍ക്കാര്‍ കാലത്ത് കേരള പോലീസില്‍ ആര്‍.എസ്.എസിന്റെ സ്ലീപ്പര്‍ സെല്ലുകള്‍ പ്രവര്‍ത്തിക്കുകയും സഖാക്കള്‍ പോലും ഇരകളാക്കപ്പെടുകയും ചെയ്തത്. എന്തൊരു ഒച്ചയായിരുന്നു എസ്.എഫ്.ഐയുടെ അന്നത്തെ മൗനത്തിന്! എസ്.എഫ്.ഐ നോക്കിനിൽക്കെയാണ് പിണറായിപ്പോലീസിന്റെ ബെഹ്റക്കാലത്ത് ഇപ്പോള്‍ തമിഴ്നാട്ടിലെ ഡി.എം.കെ മന്ത്രിസഭയെ വട്ടം കറക്കുന്ന ആര്‍.എന്‍ രവി എന്ന സംഘി ഗവര്‍ണറെ മുഖ്യാതിഥിയായി ക്ഷണിച്ച് കേരള പോലീസ് ‘ഇന്നൊവേഷന്‍’ നടത്തിയത്. അധികാരമില്ലാതിരിക്കെ തന്നെ പോലീസിനെകൊണ്ട് തങ്ങള്‍ക്കു വേണ്ടി പണിയെടുപ്പിക്കാന്‍ ആര്‍.എസ്.എസിന് കഴിഞ്ഞത് നിസ്സഹായരായി നോക്കിനിൽക്കേണ്ടി വന്ന എസ്.എഫ്.ഐ, ഒടുവില്‍ കാമ്പസുകളിലും പിടിത്തം വിടുമെന്ന ഘട്ടമെത്തിയപ്പോഴാണ് പടക്കളത്തിലിറങ്ങിയത്. എഴുപതുകളിലെ കാമ്പസുകളെ ത്രസിപ്പിച്ച എസ്.എഫ്.ഐ എന്ന ഇടത് വിദ്യാര്‍ഥി സംഘടന പരീക്ഷാ തട്ടിപ്പ്, വ്യാജബിരുദം, ലഹരി മാഫിയ തുടങ്ങിയ ഇടപാടുകളില്‍ പെട്ട് സമരവീര്യം ചോര്‍ന്നു മൃതപ്പെട്ട നിലയിലായിരുന്നു. ഈയൊരു ഗ്യാപിലാണ് സംഘ് പരിവാര്‍ ആശയധാരയിലുള്ളവരെ സർവകലാശാലാ സെനറ്റുകളിലേക്ക് തിരുകിക്കയറ്റുകയും ചാന്‍സലര്‍ പദവി ഉപയോഗിച്ചു സംഘ് സഹയാത്രികരെ വി.സിമാരാക്കുകയും ചെയ്തത്. അതിനിര്‍ണായകമാണ് പൊതു തെരഞ്ഞെടുപ്പിന് മുമ്പ് ഇനിയുള്ള ഏതാനും മാസങ്ങള്‍. പൊതുമുതല്‍ കൊണ്ട് തന്നെ അക്കാദമിക തലത്തിലും ഭരണ നിര്‍വഹണ മേഖലയിലും നിഗൂഢമായി നടത്തിക്കൊണ്ടിരിക്കുന്ന കാവിവത്കരണത്തിനെതിരെ ജാഗരൂകത വേണ്ടത് കേരളത്തിന്റെ സൗഹൃദ പൈതൃകം നിലനില്‍ക്കണം എന്നാഗ്രഹിക്കുന്ന പൊതു സമൂഹത്തിനാണ്. അഡ്ജസ്റ്റ്മെന്റ് പൊളിറ്റിക്സിന്റെ അടിത്തറയില്‍ അധികാരമുറപ്പിക്കാന്‍ ശ്രമിക്കുന്നവരില്‍നിന്ന് വലുതായൊന്നും പ്രതീക്ഷിക്കേണ്ടതില്ല. l

‘സ്ത്രീധനത്തിനെതിരെ, സ്ത്രീപീഡനത്തിനെതിരെ; സ്ത്രീപക്ഷ നവകേരളം’ എന്ന ബൃഹത് പദ്ധതി സര്‍ക്കാര്‍ തലത്തില്‍ തന്നെ ഏർപ്പെടുത്തിയ സംസ്ഥാനമാണ് കേരളം. അറുപത് വര്‍ഷങ്ങള്‍ക്ക് മുമ്പ് തന്നെ കേന്ദ്ര സര്‍ക്കാറും സ്ത്രീധന നിരോധന നിയമവും (Dowry Prohibition Act) പാസ്സാക്കിയിട്ടുണ്ട്. വിവാഹത്തിന് വധുവിന്റെ വീട്ടുകാരില്‍നിന്ന് പണമോ സ്വത്തോ വാങ്ങുന്നത് 1961-ലെ സ്ത്രീധന നിരോധന നിയമമനുസരിച്ച് കുറ്റകരമാണ്. 2004-ല്‍ സംസ്ഥാന സര്‍ക്കാര്‍ സ്ത്രീധന നിരോധന ചട്ടവും നടപ്പാക്കുകയും 14 ജില്ലകളിലും സ്ത്രീധന നിരോധന ഓഫീസര്‍മാരെ നിയമിക്കുകയും ചെയ്തു. സ്ത്രീധനമടക്കമുള്ള, വിവാഹവുമായി ബന്ധപ്പെട്ട സകല അത്യാചാരങ്ങള്‍ക്കുമെതിരെയുള്ള ഉദ്ബോധനങ്ങളും സദാചാര പ്രഘോഷണങ്ങളും വേറെയും നടക്കുന്നുണ്ട്. എന്നിട്ടും ‘സാക്ഷര പ്രബുദ്ധ- സ്ത്രീ ശാക്തീകൃത’ കേരളത്തില്‍ കഴിഞ്ഞ ഏഴ് വര്‍ഷത്തിനിടെ നടന്ന സ്ത്രീമരണങ്ങള്‍ 4089 എണ്ണമാണ്. അവയില്‍ 92 എണ്ണം സ്ത്രീധനവുമായും 3997 മരണങ്ങള്‍ ഗാര്‍ഹിക പീഡനവുമായും ബന്ധപ്പെട്ടവയാണ്.

ഏത് വിഭാഗത്തില്‍ പെട്ടവരായാലും നവ മലയാളിയുടെ അടിസ്ഥാന ദുരാഗ്രഹങ്ങള്‍ക്ക് ഒരേ നിറമാണ്. “ഒരു രക്തഹാരം അങ്ങോട്ടും ഒന്നിങ്ങോട്ടും” എന്നൊക്കെയുള്ള കിടിലന്‍ ഡയലോഗ് അടിക്കുന്നവര്‍ പോലും ഈ അടിസ്ഥാന ദൗര്‍ബല്യങ്ങളില്‍നിന്ന് മുക്തരല്ല. 100 പവനും ഒരേക്കര്‍ ഭൂമിയും ലക്ഷം രൂപയുടെ കാറും കിട്ടിയിട്ടും ആര്‍ത്തി തീരാഞ്ഞിട്ടാണ് സി.പി. ഐ കൈതക്കോട് ബ്രാഞ്ച് സെക്രട്ടറി സഖാവ് ത്രിവിക്രമന്റെ മകള്‍ വിസ്മയ ഭര്‍ത്താവായ പോലീസോഫീസറുടെ പീഡനത്തെ തുടര്‍ന്ന് കഴിഞ്ഞ വര്‍ഷം ജീവനൊടുക്കിയത്. ബഹുജന അടിത്തറയുള്ള മത സാമുദായിക നേതാക്കള്‍ സ്ത്രീധനത്തെ ഒരൊഴുക്കന്‍ മട്ടില്‍ എതിര്‍ക്കുന്നതൊഴിച്ചാല്‍ അതിനെതിരെ ശക്തമായ നിലപാട് എടുക്കുകയോ അത്തരം വിവാഹങ്ങള്‍ ബഹിഷ്കരിക്കുകയോ ചെയ്യാറില്ല. മുസ്‌ലിം സമുദായത്തിലെ സര്‍ഗാത്മക ന്യൂനപക്ഷത്തെ ഒഴിച്ചുനിര്‍ത്തിയാല്‍ സ്ത്രീധന വിഷയത്തില്‍ ‘ആലിമീങ്ങ’ളുടെ നിലപാട് ‘ലാ ഇലാ ഹാഉലായി, വലാ ഇലാ ഹാഉലായി’ ടൈപ്പ് അഴകൊഴമ്പനാണ് എന്ന് പറയേണ്ടിവരും. ‘നജസിന്റെ അജ് നാസും’ ‘ജനാബത്തിന്റെ അഹ്കാമും’ നിർധാരണം ചെയ്യാന്‍ കാണിക്കുന്ന ശുഷ്കാന്തി അവര്‍ സ്ത്രീധനീയത്തില്‍ കാണിക്കാറില്ല.
ക്രൈസ്തവരിലാണെങ്കില്‍ വമ്പന്‍ സ്ത്രീധനത്തുക സ്വപ്നം കണ്ടാണ് വൈദികർക്ക് വിവാഹം കഴിക്കാൻ അനുവാദമുള്ള സഭകളിലെ ചില അച്ചന്മാർ ളോഹ ഇടുന്നത് എന്നു പോലും ഇടവകകളില്‍ ശ്രുതിയുണ്ട്. അഥവാ കൊട്ടിഗ്്ഘോഷിക്കുന്ന ആദര്‍ശങ്ങളോട് ഒരു തരത്തിലും നീതി പാലിക്കാത്തവരാണ് കേരളത്തിലെ മത-രാഷ്ട്രീയ നേതൃത്വങ്ങള്‍. വിവരവും വിദ്യാഭ്യാസവുമില്ലാത്ത പാവങ്ങള്‍ എന്ന് കാറ്റഗറൈസ് ചെയ്യപ്പെട്ടവരില്‍നിന്നല്ല, പഠിപ്പും പത്രാസുമുള്ള വരേണ്യ വര്‍ഗത്തില്‍നിന്നാണ് ഇമ്മാതിരി പണാര്‍ത്തിപ്പണ്ടാരങ്ങള്‍ ഉണ്ടാകുന്നത് എന്നറിയുമ്പോഴാണ് നാമിതു വരെ ആര്‍ജിച്ചത് സാക്ഷരതയല്ല, രാക്ഷസതയാണ് എന്ന് ബോധ്യപ്പെടുന്നത്. സ്ത്രീ ശാക്തീകരണത്തിന് അംഗന്‍ വാടിയിലെ ‘അങ്കണപ്പൂമഴ’ മുതല്‍ അട്ടപ്പാടിയിലെ ആദിവാസി ഊരുകളിലെ ‘പെണ്‍ട്രിക കൂട്ട’ വരെയുള്ള സംവിധാനങ്ങള്‍ നമുക്കുണ്ട്. ശാക്തീകരണത്തിലൂടെ വിദ്യാഭ്യാസ-തൊഴില്‍ സ്വാതന്ത്ര്യത്തോടൊപ്പം സാമ്പത്തിക സുസ്ഥിതി കൂടി ആര്‍ജിച്ച് ഭൗതികമായി പുരുഷനോടൊപ്പമോ അതിനപ്പുറമോ എത്താന്‍ സ്ത്രീകള്‍ക്ക് സാധ്യമായിട്ടുണ്ട് എന്ന വലിയ ശരിയോടൊപ്പം തിക്തമായ സത്യമാണ് പുരുഷന്റെ ശഖാഇഖ് (കൂടപ്പിറപ്പുകള്‍) എന്ന് പ്രവാചകന്‍ വിശേഷിപ്പിച്ച; സ്നേഹിക്കപ്പെടുകയും ആദരിക്കപ്പെടുകയും ചെയ്യപ്പെടേണ്ട സ്ത്രീകള്‍ ആണധികാര വ്യവസ്ഥിതിക്ക് കീഴില്‍ കടുത്ത പീഡനങ്ങള്‍ സഹിക്കേണ്ടിവരുന്നു എന്നത്. ആര്‍ത്തിയും ആസക്തിയും അരങ്ങു വാഴുന്ന ഉപഭോഗ സംസ്കാരത്തില്‍ ഉപയുക്തമായ ‘വസ്തു’ക്കള്‍ക്ക്‌ മാത്രമേ വിലയുണ്ടാവുകയുള്ളൂ; അത് വസ്തുവായാലും മനുഷ്യനായാലും. വിവാഹം കമ്പോളമാവുകയും അവിടെ സ്ത്രീ ‘ചരക്കാ’വുകയും ചെയ്യുക എന്നത് ഉപഭോഗ സംസ്കൃതിയുടെ സ്വാഭാവിക രീതിയാണ്.
‘പെണ്ണായാല്‍ എല്ലാം സഹിക്കണം’ എന്ന ആണധികാര വ്യവസ്ഥയുടെ ഉപോല്പന്നമാണ് സ്ത്രീധന പീഡനങ്ങളും തജ്ജന്യമായ ആത്മഹത്യകളും. യുദ്ധമായാലും വിവാഹമായാലും ‘സര്‍വം സഹ’യാവണം പെണ്ണ് എന്നത് ഈ വ്യവസ്ഥയിലെ അലിഖിത നിയമങ്ങളാണ്. ആറു രാജ്യങ്ങളിലൂടെ സഞ്ചരിച്ചു ആറു സ്ത്രീകളുടെ കഥ പറയുന്ന ‘ചരിത്രം അദൃശ്യമാക്കിയ മുറിവുകള്‍’ എന്ന പുസ്തകത്തില്‍ സുധാ മേനോന്‍ ഒരു പാകിസ്താനി പെണ്‍കുട്ടിയുടെ വാക്കുകള്‍ രേഖപ്പെടുത്തുന്നത് ഇങ്ങനെയാണ്: “എന്തിനാണ് നമ്മള്‍ക്ക് അതിര്‍ത്തികള്‍? പട്ടിണിയും തീരാ രോഗവും പെണ്‍കുട്ടികളെ സ്വാതന്ത്ര്യം നല്‍കാതെ തളച്ചിടലും ഒക്കെ രണ്ടിടത്തും ഇല്ലേ? പിന്നെ ആര്‍ക്ക് വേണ്ടിയാണീ യുദ്ധങ്ങള്‍?”

വിഷഗ്രസ്തമായ ഉപഭോഗ സംസ്കാരത്തില്‍ ഉഗ്ര വിഷമുള്ള മൂര്‍ഖന്‍ പാമ്പായും, കാക്കിയിട്ട പോലീസായും മെഡിക്കല്‍ ഗൗണിട്ട അപ്പോത്തക്കിരിയായുമൊക്കെയാണ് സ്ത്രീധനപ്പിശാശുക്കള്‍ അവതരിച്ചുകൊണ്ടിരിക്കുന്നത്. 2020-ല്‍ ഉത്ര എന്ന യുവ വധുവിനെ തനിക്ക് സ്ത്രീധനമായി കിട്ടിയ കാറില്‍ മൂര്‍ഖന്‍ പാമ്പിനെ കൊണ്ടുവന്നു കടിപ്പിച്ചു കൊന്നുകളഞ്ഞ ഭര്‍ത്താവ് സൂരജ് ‘ബിരുദധാരി’യാണെങ്കില്‍ മൂന്ന് വര്‍ഷങ്ങള്‍ക്കിപ്പുറം 150 പവന്‍ സ്വര്‍ണവും 15 ഏക്കര്‍ ഭൂമിയും ബി.എം ഡബ്ല്യു കാറും സ്ത്രീധനമായി ചോദിച്ചുകൊണ്ട് പ്രണയിച്ച പെണ്ണിനെ ആത്മഹത്യയിലേക്ക് തള്ളിവിട്ട റുവൈസ് ‘അതുക്കും മേലെ’യുള്ള ഒരു ഡോക്ടറാണ്; മെഡിക്കല്‍ പി.ജി വിദ്യാര്‍ഥി അസോസിയേഷന്‍ പ്രസിഡന്റാണ്. തിരുവനന്തപുരം മെഡിക്കല്‍ കോളേജിലെ പി.ജി വിദ്യാര്‍ഥികളായിരുന്നു ഡോ. ഷഹനയും ഡോ. റുവൈസും. ഉത്ര, വിസ്മയ, അര്‍ച്ചന തുടങ്ങി ഇപ്പോള്‍ ഷഹന, മുര്‍സീന, ഷെബിന തുടങ്ങി കയറിലും കായലിലും ജീവിതം അവസാനിപ്പിക്കുന്ന പെണ്‍കുട്ടികള്‍ ജാതി മത പ്രാദേശിക ഭേദമന്യേ സാര്‍വത്രികമായിരിക്കുന്നു.

‘പ്രണയവും കാരുണ്യവും’ ആധാരങ്ങള്‍ (ഖുര്‍ആന്‍ 30:21) ആകേണ്ടുന്ന വിവാഹങ്ങള്‍ വില്പനയും വിലപേശലുമുള്ള ഇടപാടുകളായി മാറിയത് ഈ ഉപഭോഗ സംസ്കാരത്തിന്റെ ഫലമായാണ്. പ്രത്യക്ഷമായോ പരോക്ഷമായോ ‘സ്ത്രീധനം’ പ്രധാന വിഷയമാവാത്ത വിവാഹങ്ങള്‍ വിരളമായിരിക്കുന്നു. ‘പോക്കറ്റ് മണി’ യായും ‘അവര്‍ക്ക് ഇഷ്ടമുള്ള ആഭരണങ്ങളാ’ യും അല്പം മയപ്പെട്ടാണ് ‘പുരോഗമന വേദി’കളില്‍ സ്ത്രീധനം പ്രത്യക്ഷപ്പെടുന്നത് എന്നു മാത്രം! ദമ്പതികള്‍ കാഴ്ചവസ്തുക്കളാവുകയും വിവാഹ വേദികള്‍ ‘തറവാടിത്ത’ത്തിന്റെയും സമ്പന്നതയുടെയും കാഴ്്ചപ്പെട്ടകങ്ങളാവുകയും ചെയ്യുമ്പോള്‍ സ്വാഭാവികമായും പണം തന്നെയാണ് ഒരേസമയം അവിടെ വില്ലനും നായകനുമാവുന്നത്. ജീവിതം ‘അടിപൊളി’യാക്കാനുള്ള നെട്ടോട്ടത്തില്‍ യുവ തലമുറ വിവാഹത്തെ കാണുന്നതും ഈയൊരു കാഴ്ചപ്പാടിലാണ്. സോഷ്യൽ മീഡിയയും സിനിമയും രൂപപ്പെടുത്തിയെടുത്ത സൗന്ദര്യ സങ്കൽപ്പങ്ങളുടെ കണ്ണാടിയിലൂടെയാണ് അവര്‍ ദാമ്പത്യത്തെ കാണുന്നത്. പിതാക്കള്‍ അവര്‍ക്ക് ഭയാശങ്കകളോടെ അനുസരിക്കപ്പെടേണ്ട നിശ്ശബ്ദ ‘ബിംബ’ങ്ങളാവുമ്പോള്‍ മാതാക്കള്‍ അവര്‍ക്കു വേണ്ടി പണിയെടുക്കുകയും പിതാവിനെ അനുസരിക്കുകയും ചെയ്യുന്ന സ്ത്രീയാണ്. ഒരു സ്ത്രീ എന്ന നിലയില്‍ അവര്‍ തന്നെ ആ കുടുംബത്തില്‍ എത്തിപ്പെടുന്നത് സ്ത്രീധനവുമായിട്ടാണ്. അതുകൊണ്ടുതന്നെ ‘ഏറ്റവും മെച്ചപ്പെട്ട’ കുടുംബത്തില്‍നിന്നുള്ള ഒരു പെണ്ണ് ആവണം തന്റെ മരുമകള്‍ എന്ന് ‘കുലീന’യായ ആ അമ്മായിയമ്മയും മോഹിക്കുന്നു. പ്രണയിച്ച പെണ്ണിനോട് “കനപ്പെട്ട സ്ത്രീധനമില്ലാതെ എന്റെ പപ്പ ഈ വിവാഹത്തിനു സമ്മതിക്കുകയില്ല” എന്ന് പറയുന്ന ‘അഭ്യസ്തവിദ്യനായ ചെറുപ്പക്കാരന്‍’ ഈ ഉപഭോഗ സംസ്കാരത്താല്‍ ഷണ്ഡീകരിക്കപ്പെട്ട യുവ വൃദ്ധനാണ്. അങ്ങനെ സ്ത്രീധനം വളരെ സാധാരണമായ ഒരു നടപടി എന്ന നിലപാടിലെത്തുകയാണ്, പ്രത്യേകിച്ച് ഒരു നിലപാടുമില്ലാത്ത ഈ ചെറുപ്പക്കാര്‍. ‘സ്ത്രീയുടെ കൂടെ വരേണ്ട ഒന്നാണ് ധനം’ എന്ന് അവര്‍ മനസ്സിലാക്കുന്നു. പെണ്‍കുട്ടിയെ ‘പറഞ്ഞു വിടുക’ എന്നതാണ് ഭാഷയിലെ തന്നെ പ്രയോഗം. ആണ്‍കുട്ടികളെ കെട്ടിക്കുന്ന രക്ഷിതാക്കള്‍ പെണ്‍കുട്ടിയെ പറഞ്ഞു വിടുകയാണ് ചെയ്യുന്നത്. കിടപ്പാടം വിറ്റും കടം വാങ്ങിയും പെണ്‍മക്കള്‍ക്ക് പൊന്നും പണവും ഭൂമിയും നല്‍കിയാണ് ഇങ്ങനെ ‘പറഞ്ഞു വിടുന്നത്’. ഈ പെണ്‍കുട്ടികള്‍ ഭര്‍തൃവീട്ടില്‍ പീഡനമേല്‍ക്കുന്നതായി പരാതി പറഞ്ഞാലും സ്വന്തം വീട്ടില്‍ ഒരു ഇടമുണ്ടെന്നും തിരിച്ചു വരാമെന്നും പറയാന്‍ രക്ഷിതാക്കള്‍ക്ക് കഴിയാത്തതും അവരങ്ങനെ ട്യൂണ്‍ ചെയ്യപ്പെട്ടതുകൊണ്ടാണ്. പെണ്‍കുട്ടിയുടെ മാനസിക പ്രശ്‌നമാണെന്ന് ഭര്‍തൃവീട്ടുകാര്‍ ആരോപിക്കുമ്പോള്‍ അവള്‍ക്ക് ചികിത്സ നല്‍കാനാണ് രക്ഷിതാക്കള്‍ ശ്രമിക്കുന്നത്. പെണ്ണിനും സ്വന്തമായൊരിടമുണ്ടെന്നും അവള്‍ക്കും സ്വന്തം കാലില്‍ നില്‍ക്കാന്‍ കഴിയുമെന്നും ആത്മവിശ്വാസം നല്‍കാന്‍ രക്ഷിതാക്കള്‍ക്ക് കഴിഞ്ഞാല്‍ മാത്രമേ സ്ത്രീ ശാക്തീകരണം പൂര്‍ണമാവുകയുള്ളൂ. l

2001 സെപ്റ്റംബര്‍ 11-ലെ ഭീകരാക്രമണത്തിന് ശേഷമാണ് ക്രൈസ്തവ സയണിസവും അതിന്റെ ഭാരതീയ പകർപ്പായ സംഘ് പരിവാറും ചേർന്ന്, ലോകത്ത് എവിടെ ഭീകരാക്രമണം നടന്നാലും പ്രതിസ്ഥാനത്ത് ഇസ് ലാമിനെ പ്രതിഷ്ഠിച്ച് 'ചത്തത് കീചകനെങ്കില്‍ കൊന്നത് ഭീമന്‍ തന്നെ' എന്ന ചൊല്ലിനെ ആഗോളവത്കരിക്കുകയും 'എല്ലാ മുസ് ലിംകളും തീവ്രവാദികളല്ല; എല്ലാ തീവ്രവാദികളും മുസ് ലിംകളാണ്' എന്ന ലോകോക്തി നിർമിച്ചെടുക്കുകയും ചെയ്തത്. അതുകൊണ്ടാണ്, യു.എസ് അന്വേഷണ ഏജൻസിയായ എഫ്.ബി.ഐ പ്രസിദ്ധീകരിച്ച 1980 മുതലുള്ള 35 വർഷത്തെ തീവ്രവാദി ആക്രമണങ്ങളുടെ കണക്ക് പ്രകാരം 94 ശതമാനം ഭീകരാക്രമണങ്ങളും നടത്തിയത് മുസ് ലിംകള്‍ അല്ലാതിരുന്നിട്ടും ലോകത്തിന്റെ പൊതുബോധത്തില്‍ ഈ തീവ്രവാദ യുക്തി തന്നെ നിലനിൽക്കുന്നത്. പിടിക്കപ്പെടുന്ന ഭീകരവാദികള്‍ അറബി നാമധാരികളാണെങ്കില്‍ അവരെ ഇസ് ലാമുമായും മറിച്ചാണെങ്കില്‍ മനോരോഗവുമായും ബന്ധിപ്പിക്കുന്ന 'ടെക്‌നിക്ക്' ആഗോള തലത്തില്‍ തന്നെ രൂപപ്പെട്ടു. അതുകൊണ്ടാണ് ഹമാസ് - ഇസ്രായേല്‍ സംഘർഷം തുടങ്ങി മൂന്നാഴ്ച പിന്നിട്ടപ്പോള്‍ കേരളത്തില്‍ നടന്ന ഒരു ഭീകരാക്രമണം ഞൊടിയിടയില്‍ 'ഇസ് ലാമീകരിക്ക'പ്പെടുകയും, പ്രതി ക്രൈസ്തവ സയണിസ്റ്റ് ആശയങ്ങളുള്ള ആളാണെന്നു തിരിച്ചറിഞ്ഞപ്പോള്‍ അയാളുടെ ആശയാടിത്തറ മാന്താന്‍ ആരും മുതിരാതിരുന്നതും, അര ഡസന്‍ നിരപരാധികള്‍ കൊല്ലപ്പെട്ടിട്ടും കളമശ്ശേരി ഭീകരാക്രമണത്തിനു മൂവാറ്റുപുഴ 'കൈവെട്ടി'ന്റെ 'റീച്ച്' കിട്ടാതിരുന്നതും.

'ഹിന്ദുത്വ' എന്ന ഹിന്ദു ദേശീയതയെ പ്രതിനിധാനം ചെയ്യുന്ന ആര്‍.എസ്.എസും ജൂത വംശീയ ദേശീയത ഉയർത്തിപ്പിടിക്കുന്ന സയണിസവും തമ്മില്‍ പൊതുവായ ചില സാമ്യങ്ങളുണ്ട്. നിർമതരായിരിക്കെ തന്നെ വംശീയ ദേശീയത സ്ഥാപിക്കാന്‍ മതത്തെ ദുരുപയോഗം ചെയ്തവരാണ് രണ്ടിന്റെയും സ്ഥാപകര്‍ എന്നതു പോലെ തന്നെ ഇസ് ലാം വിരോധമാണ് രണ്ടിന്റെയും മുഖ്യ ചോദകം. ഹിന്ദു രാഷ്ട്രമെന്ന ആശയത്തിന്റെ വക്താവായ വി.ഡി സവർക്കറെ പോലെ യഹൂദരുടെ വാഗ്ദത്ത ഭൂമി യാഥാർഥ്യമാക്കാൻ സയണിസം സ്ഥാപിച്ച തിയോഡോര്‍ ഹെർസലും ദൈവവിശ്വാസികള്‍ ആയിരുന്നില്ല. ഒരു രാജ്യത്തെ ചില പൗരന്മാര്‍ എങ്ങനെ ജീവിക്കണം എന്നും മറ്റു ചിലര്‍ എങ്ങനെ മരിക്കണമെന്നും തീരുമാനിക്കുന്ന 'നെക്രോപൊളിറ്റിക്‌സ്' ആണ് രണ്ടിന്റെയും രാഷ്ട്രീയ നയം. 'ബ്രാഹ്മണിക വംശ വിശുദ്ധി' അവകാശപ്പെടുന്ന ഹിന്ദുത്വയെ പോലെ 'തെരഞ്ഞെടുക്കപ്പെട്ട ജനത'യെന്ന വംശ വിശുദ്ധിയുടെ അഹംഭാരം പേറുന്നവരാണ് സയണിസ്റ്റുകള്‍. സഹസ്രാബ്ദങ്ങളായുള്ള 'കൈയിലിരിപ്പ്' കാരണം ലോകത്തിന്റെ വിവിധ ഭാഗങ്ങളില്‍ ചിന്നിച്ചിതറി ദുർബലരായ യഹൂദർക്ക് 'വാഗ്ദത്ത ഭൂമി' സ്വന്തമാക്കാന്‍ ശക്തമായ ഒരു രണ്ടാം കക്ഷിയുടെ സഹായം ആവശ്യമായിരുന്നു. അങ്ങനെയാണ് യഹൂദരെ വംശഹത്യ നടത്തിയ ക്രിസ്ത്യാനികളെ തന്നെ ഉപയോഗപ്പെടുത്തി മുള്ളിനെ മുള്ള് കൊണ്ടെടുക്കുന്ന വിദ്യ സയണിസം വികസിപ്പിച്ചെടുത്തത്.

പതിനാറാം നൂറ്റാണ്ടില്‍ റോമന്‍ കത്തോലിക്ക സഭയില്‍നിന്ന് മത നവീകരണത്തിന്റെ പേരില്‍ വേർപ്പെടുകയും സത്യ വെളിപാടിന്റെ ഏകമാത്ര സ്രോതസ്സായി ബൈബിളിനെ അംഗീകരിക്കുകയും ചെയ്യുന്ന പ്രൊട്ടസ്റ്റന്റ് സഭയെ തന്നെ ഹൈജാക്ക് ചെയ്തുകൊണ്ടാണ് 'കർത്താവിനെ കുരിശിലേറ്റിയ'വര്‍ തന്നെ കുരിശ് വഹിച്ച് ക്രൈസ്തവതയെ കബളിപ്പിച്ചത്. അങ്ങനെയാണ് ക്രൈസ്തവ സയണിസം എന്ന പ്രത്യയശാസ്ത്രം പിറവിയെടുക്കുന്നത്. യേശുവിന്റെ കുരിശു മരണം, ഉയിർത്തെഴുന്നേൽപ്, രണ്ടാം വരവ് (പറൂസിയ) തുടങ്ങിയവയ്ക്ക് കാരണഭൂതങ്ങളായ യഹൂദികള്‍ ഇവാഞ്ചലിക്കല്‍ ദൈവശാസ്ത്രത്തിന്റെ വക്താക്കളായ 'ക്രൈസ്തവ സയണിസ'ത്തിന്റെ കണ്ണില്‍ പാപികളല്ല. 'രണ്ടാം തിരുവരവില്‍ ജെറൂസലേം കേന്ദ്രീകരിച്ചായിരിക്കും യേശു ഒരു സഹസ്രാബ്ദം ലോകം ഭരിക്കുക' എന്ന് വിശ്വസിക്കുന്ന ഇവാഞ്ചലിസ്റ്റുകൾക്ക് ജൂതര്‍ മാത്രം വസിക്കുന്ന ഒരു വംശീയ രാഷ്ട്രം വിശ്വാസപരമായ അനിവാര്യതയായിത്തീരുന്നു. യഹൂദികള്‍ കാലാന്ത്യം വരെ 'ദൈവത്തിന്റെ തെരഞ്ഞെടുക്കപ്പെട്ട ജനത'യായി തുടരുമെന്നതാണ് ക്രൈസ്തവ സയണിസത്തിന്റെ അടിസ്ഥാന പ്രമേയങ്ങളിലൊന്ന്. ക്രിസ്തുവിന്റെ തിരുവരവിനു മുമ്പ് സോളമന്റെ ദേവാലയം പുനര്‍ നിർമിക്കപ്പെടേണ്ടതുണ്ട്. മസ്ജിദുല്‍ അഖ്‌സ്വാ തകർക്കപ്പെടാതെ അത് സാധ്യവുമല്ല. ക്രൈസ്തവ സയണിസ്റ്റുകൾക്ക് മേൽക്കൈ ഉള്ള അമേരിക്കയും പടിഞ്ഞാറന്‍ നാടുകളും ഇപ്പോള്‍ നടക്കുന്ന ഇസ്രായേല്‍ - ഹമാസ് ഏറ്റുമുട്ടലില്‍ നിരുപാധികം ഇസ്രായേല്‍ പക്ഷത്ത് നിൽക്കുന്നതിന്റെ കാരണം സാമ്പത്തികമോ രാഷ്ട്രീയമോ അല്ല, തീർത്തും വിശ്വാസപരമാണ് എന്നർഥം.

ആഗോള തലത്തില്‍ സയണിസവും, അമേരിക്കന്‍ പ്രസിഡന്റുമാരടക്കമുള്ള ലോകക്രമത്തിന്റെ നയരൂപ കർത്താക്കള്‍ അംഗങ്ങളായ ഇവാഞ്ചലിസം എന്ന ക്രൈസ്തവ സയണിസവും ചേർന്ന് രൂപപ്പെടുത്തിയ കുറുമുന്നണിയുടെ മലയാള പരിസരം രൂപപ്പെട്ടതും 9/11-ന് ശേഷമായിരുന്നു. കൃത്യമായി പറഞ്ഞാല്‍, 'ക്രിസ്ത്യന്‍ അസോസിയേഷന്‍ ആന്റ് അലയൻസ് ഫോര്‍ സോഷ്യല്‍ ആക്്ഷൻ' അഥവാ 'കാസ' എന്ന കേരളീയ ക്രൈസ്തവ സയണിസം പിറവിയെടുക്കുന്നത് അമേരിക്കയുടെയും ഇസ്രായേലിന്റെയും എക്കാലത്തെയും പ്രഖ്യാപിത ശത്രുവായിരുന്ന സദ്ദാം ഹുസൈന്റെ വധത്തോട് മതേതര കേരളം ഒറ്റക്കെട്ടായി പ്രതിഷേധം രേഖപ്പെടുത്തിയപ്പോഴായിരുന്നു. സദ്ദാമിനെ ഇറാഖിലെ അമേരിക്കന്‍ പാവ ഗവൺമെന്റ് തൂക്കിലേറ്റിയതില്‍ പ്രതിഷേധിച്ച് ബി.ജെ.പി ഒഴികെ സി.പി.എം, കോൺഗ്രസ്, മുസ് ലിം ലീഗ് അടക്കം മുഴുവന്‍ സംഘടനകളും 2006 ഡിസംബര്‍ 30-ന് കേരളത്തില്‍ ഹർത്താല്‍ പ്രഖ്യാപിച്ചിരുന്നു. ഈ ഹർത്താല്‍ 2007 ജനുവരി 1-ന് നടക്കാനിരുന്ന കൊച്ചിന്‍ കാർണിവല്‍ എന്ന പുതുവത്സരാഘോഷങ്ങളുടെ നിറം കെടുത്തി എന്ന് ആരോപിച്ചാണ് 'കാസ' പിറവിയെടുക്കുന്നത്. ക്രിസ്തുമത വിശ്വാസവുമായോ കേരളത്തിന്റെ പൈതൃകവുമായോ എന്തെങ്കിലും ബന്ധമുള്ള ഒന്നല്ല കൊളോണിയല്‍ കാലഘട്ടത്തില്‍ പോർച്ചുഗീസുകാര്‍ തുടങ്ങിവെച്ച കൊച്ചിന്‍ കാർണിവല്‍. ഈ കാർണിവലിന്റെ നിറം കെടാന്‍ കാരണഭൂതങ്ങളായ മുസ് ലിംകളെ പാഠം പഠിപ്പിക്കാനാണ് കെവിന്‍ പീറ്റര്‍ എന്ന 'സത്യക്രിസ്ത്യാനി' 'കാർണിവല്‍ പൈതൃക സംരക്ഷണ സമിതി' രൂപവത്കരിക്കുന്നത്. ഈ സമിതിയാണ് കാസയുടെ പ്രാഗ് രൂപം. ആര്‍.എസ്.എസ് പോലെ 'ജിഹാദി'കളെ നേരിടാന്‍ ഒരു കേഡര്‍ സംഘടന ക്രിസ്ത്യാനികൾക്കും വേണമെന്ന ചിന്തയില്‍ മേൽചൊന്ന സംരക്ഷണ സമിതി 2008 നവംബറില്‍ കാസയായി രൂപാന്തരപ്പെടുകയായിരുന്നു. പിറവിയുടെ പതിനഞ്ചാണ്ട് പൂർത്തിയാക്കുമ്പോള്‍ കേരളത്തില്‍ ഇസ് ലാമോഫോബിയ വളർത്തുന്നതില്‍ സംഘ് പരിവാറിനെക്കാള്‍ ഒരു ചാണകത്തൂക്കം മുന്നില്‍ നിൽക്കുന്ന സംഘമായി മാറിയിരിക്കുന്നു കാസ. ലൗ ജിഹാദ്, നാർക്കോട്ടിക് ജിഹാദ്, ലാൻഡ് ജിഹാദ്, മെഡിക്കല്‍ ജിഹാദ് തുടങ്ങിയ ടെർമിനോളജികളുടെ പ്രചാരണത്തിന് ചുക്കാന്‍ പിടിച്ച കാസ കഴിഞ്ഞ വർഷം തിരുവനന്തപുരത്ത് ചേർന്ന ഹിന്ദു മഹാസഭാ സമ്മേളനത്തില്‍ പങ്കെടുത്തുകൊണ്ടാണ് ക്രിസംഘിസത്തിന്റെ കാവിക്കളസം വെളിപ്പെടുത്തിയത്. ന്യൂനപക്ഷ മോർച്ച നേതാവും നമോ ടി.വി ഉടമയുമായ രഞ്ജിത്ത് എബ്രഹാം തോമസിനെ പോലുള്ള പ്രത്യക്ഷ ക്രിസംഘികള്‍ മാത്രമല്ല, കല്ലറങ്ങാട്ടു അച്ചനെ പോലുള്ള പാതിരിമാരും 'കാസക്കൂട വിഷം' വമിക്കുന്ന അപകടകരമായ അവസ്ഥയാണ് കേരളത്തില്‍ നിലനില്ക്കുന്നത്. ഒക്ടോബര്‍ ഏഴിന് ഹമാസ് നടത്തിയ പ്രത്യാക്രമണത്തില്‍ പ്രതിഷേധിച്ച് ഏറ്റവുമാദ്യം കോഴിക്കോട് ഇസ്രായേല്‍ ഐക്യദാർഢ്യ റാലി നടത്തിയതും കാസർകോട് 'ഹമാസ് അനുകൂലി'കളുടെ കടകള്‍ ബഹിഷ്‌കരിക്കാന്‍ ആഹ്വാനം ചെയ്ത് പ്രസ്താവന ഇറക്കിയതും 'കാസ' യായിരുന്നു. സഭാപരവും രാഷ്ട്രീയവുമായ വിയോജിപ്പുകൾക്കതീതമായി കേരളത്തിലെ ക്രൈസ്തവരെ ഏകോപിപ്പിക്കാന്‍ 'യഹോവ സാക്ഷികള്‍' ഒഴികെ സീറോ മലബാര്‍ സഭ, ഓർത്തഡോക്‌സ് സഭ, ലത്തീന്‍ കത്തോലിക്ക സഭ, യാക്കോബായ സഭ തുടങ്ങിയ 17-ഓളം സഭകളെ ചേർത്തുനിർത്താന്‍ രൂപവത്കരിക്കപ്പെട്ട ഒരു വിശുദ്ധ സഖ്യം എന്നാണ് 'കാസ' സ്വയം പരിചയപ്പെടുത്തുന്നത്. 'എന്റെ രാജ്യം എന്റെ വിശ്വാസം' എന്നതാണ് കാസയുടെ മുദ്രാവാക്യം.

ദേശീയതയില്‍ ഊന്നിയുള്ള വിശ്വാസ സംരക്ഷണമാണ് ലക്ഷ്യം. സഭാ വിവേചനമില്ലാതെ കർത്താവായ യേശു ക്രിസ്തുവിനെ രക്ഷകനും നായകനുമായി അംഗീകരിക്കുകയും രാജ്യത്തെ സ്‌നേഹിക്കുകയും ചെയ്യുന്ന ഏതൊരു ക്രിസ്ത്യാനിക്കും കാസയില്‍ അംഗമാവാമെന്നാണ് സ്ഥാപക പ്രസിഡന്റ് കെവിന്‍ പീറ്റര്‍ പറയുന്നത്. വേൾഡ് ക്രിസ്ത്യന്‍ കൗൺസില്‍ പ്രസിഡന്റും നാഷണലിസ്റ്റ് കേരള കോൺഗ്രസ് നേതാവുമായ കെന്നഡി കരിമ്പിൻകാല, അടിമുടി ആര്‍.എസ്.എസ്സുകാരനും ചെറുപ്പത്തില്‍ മലയാള മനോരമ ഏജന്റും കോട്ടയം സി.എം.എസ് കോളേജിലെ ചരിത്രവിഭാഗം പ്രഫസറും ഇപ്പോള്‍ എന്‍.സി.എന്‍.ആര്‍.ടി പാഠ്യപദ്ധതി പരിഷ്‌കരണ സമിതി അധ്യക്ഷന്‍ സി.ഐ ഐസക് എന്ന വിശ്വാസിയായ ക്രിസ്ത്യാനി വരെയുള്ളവര്‍ 'കേരളത്തിലെ' ക്രൈസ്തവ സയണിസത്തിന്റെ മെഗാഫോണുകളാണ്. 'കാസ' ഉദ്‌ഘോഷിക്കുന്ന 'ദേശീയതയില്‍ ഊന്നിയുള്ള വിശ്വാസം' തന്നെയാണ് കളമശ്ശേരിയില്‍ ഭീകരാക്രമണം നടത്താന്‍ ഡൊമിനിക് മാർട്ടിനെ പ്രലോഭിപ്പിച്ചത്. ''യഹോവ പ്രസ്ഥാനം രാജ്യത്തിന് എതിരായതു കൊണ്ടാണ് ഇങ്ങനെയൊരു തീരുമാനം എടുക്കേണ്ടി വന്നത്'' - ഡൊമിനിക് മാർട്ടിന്‍ (ഇന്ത്യാ ടുഡെ- 30-10-23). ബൈബിള്‍ വചനങ്ങളുടെ സാമ്രാജ്യത്വപരമായ ദുർവ്യാഖ്യാനങ്ങളിലൂടെയാണ് സയണിസം ക്രൈസ്തവതയെ ഹൈജാക്ക് ചെയ്തു ക്രൈസ്തവ സയണിസത്തിന് അടിത്തറ പാകിയതെങ്കില്‍ കുടില ദേശീയതയും ഇസ് ലാം വിരോധവും അധികമളവില്‍ ക്രൈസ്തവ സിരകളില്‍ കുത്തിവെച്ചുകൊണ്ടാണ് 'കാസ' എന്ന കേരളീയ ക്രൈസ്തവ സയണിസം സംഘ് പരിവാര്‍ നിർമിച്ചെടുത്തത്. l

“കഴിഞ്ഞ ഒക്ടോബര്‍ ഏഴിന് ഭീകരവാദികള്‍ ഇസ്രായേലില്‍ ആക്രമണം നടത്തി 1400 പേരെ കൊന്നു. 200 പേരെ ബന്ദികളാക്കി. അതിന്റെ മറുപടിയായി ഇസ്രായേല്‍ 6000 പേരെ കൊന്നു. മനുഷ്യാവകാശത്തിന്റെ ഏറ്റവും മോശമായ ദുരന്തമാണ് അവിടെ നടക്കുന്നത്.” (ഹമാസ് ഭീകരവാദികള്‍ നടത്തിയ ആക്രമണത്തില്‍ ഇസ്രായേലിന്റെ പ്രത്യാക്രമണം അതിരു കടന്നത് - ശശി തരൂര്‍- ഇന്ത്യന്‍ എക്സ്പ്രസ് – 26-10-2023). മുസ്‌ലിം ലീഗധ്യക്ഷന്‍ പാണക്കാട് സയ്യിദ് സാദിഖലി ശിഹാബ് തങ്ങളുടെ ‘ഫാതിഹ’യോടും, ഖുദ്സിന്റെ വിമോചനത്തിനും പിറന്ന മണ്ണിനു മേലുള്ള ജന്മാവകാശത്തിനു വേണ്ടി പോരാടുന്ന ഹമാസിന്റെ വിജയത്തിനു വേണ്ടിയുള്ള പ്രാർഥനയോടും കൂടി കഴിഞ്ഞ വാരം കോഴിക്കോട് കടപ്പുറത്ത് നടന്ന മുസ്‌ലിം ലീഗിന്റെ ‘ഫലസ്ത്വീന്‍ ഐക്യദാര്‍ഢ്യ റാലി’യിലെ മുഖ്യ പ്രഭാഷകന്‍ ഡോ. ശശി തരൂരാണ്‌, ‘എത്ര വലിയ അണ്ടര്‍ സെക്രട്ടറി ജനറല്‍ ആയാലും ഓരോ മനുഷ്യന്റെയും ഉള്ളില്‍ ഒരു ‘ശശി’ ഉണ്ട് എന്ന ‘ന്യൂ ജെന്‍’ ചൊല്ലിനെ അന്വർഥമാക്കിക്കൊണ്ടു ലീഗിന് പണി കൊടുത്തത്. ‘പൊരുതുന്ന പാലസ്തീന്‍’ രചിച്ച സുജനപാല്‍ എന്ന കോണ്‍ഗ്രസ്സുകാരന്റെ നാടായ കോഴിക്കോട്ടു വെച്ചാണ് ഫലസ്ത്വീന്‍ പോരാളികളെ ശശി തരൂര്‍ ഭീകരവത്കരിച്ചത്. അധിനിവേശത്തിനെതിരായ സ്വാതന്ത്ര്യ സമരമാണ് ഫലസ്ത്വീനികള്‍ നടത്തുന്നത് എന്ന് അബ്ദുസ്സമദ് സമദാനിയും ‘പ്രതിരോധം ഭീകരവാദമല്ലെ’ന്നു ഡോ. എം.കെ മുനീറും അതേ വേദിയില്‍നിന്ന് തരൂരിനെ തിരുത്തി. സംഭവം വിവാദമായപ്പോള്‍ തന്റെ പ്രസംഗത്തിലെ ഒരൊറ്റ വാക്ക് എടുത്ത് വിമര്‍ശിക്കരുതെന്നും താനെപ്പോഴും ഫലസ്ത്വീനികള്‍ക്ക് ഒപ്പമാണെന്നും തുടര്‍ വിശദീകരണം നടത്തിയ തരൂര്‍ ഹമാസില്‍ ചാര്‍ത്തിയ ഭീകര മുദ്ര മായാതിരിക്കാന്‍ വാക്കുകളില്‍ അപ്പോഴും ‘കരുതല്‍’ കാണിച്ചു.

മൃദു ഹിന്ദുത്വവും സയണിസ്റ്റ് സഹാനുഭൂതിയും സമാസമം സിരകളില്‍ ഒഴുകുന്ന ഒരാള്‍ക്ക് ‘ഹമാസി’ന്റെ തിരിച്ചടിയില്‍ അരോചകത്വവും ഇസ്രായേല്‍ കൂട്ടക്കൊലയില്‍ ‘അസാധാരണ തൽപരത്വ’വും തോന്നും എന്നതിന് ചരിത്രം സാക്ഷി; 14 വര്‍ഷം മുമ്പുള്ള ഇസ്രായേലി പത്രം ഹാരറ്റ്സ് സാക്ഷി. ‘ഭീകര’ വിഷയത്തില്‍ ഇന്ത്യക്ക് മറ്റൊരു ഇസ്രായേല്‍ ആവാന്‍ കഴിയാത്തതില്‍ ഇസ്രായേലിനോട് അസൂയ പൂണ്ട ദേഹമാണ് ഈ മുന്‍ യു.എന്‍ നയതന്ത്രജ്ഞന്‍. “ഇസ്രായേലി വിമാനങ്ങളും ടാങ്കുകളും ഗസ്സയില്‍ നാശം വിതയ്ക്കുമ്പോള്‍ ഇന്ത്യയുടെ നേതാക്കളും യുദ്ധ ചിന്തകരും അസാധാരണ താൽപര്യത്തോടും അൽപം സഹാനുഭൂതിയോടെയുമാണ് അതിനെ നോക്കിക്കാണുന്നത്. ഹമാസ് നിയന്ത്രിത പ്രദേശത്തുനിന്ന് ഭീകരര്‍ നടത്തുന്ന ആക്രമണം അവസാനിപ്പിക്കാന്‍ ഇസ്രായേല്‍ നിശ്ചയദാര്‍ഢ്യം പ്രകടിപ്പിച്ചു. മുംബൈ ഭീകരാക്രമണത്തിന്റെ ഭീതിയില്‍ വേദന പേറുന്ന ഇന്ത്യയിലെ ധാരാളം ആളുകള്‍ എന്തുകൊണ്ട് ഇന്ത്യയ്ക്കിത് ചെയ്തുകൂടാ എന്ന് ചോദിച്ചുകൊണ്ടിരിക്കുന്നു.” (India’s Israel Envy – Shashi Tharoor – Haaretz 23-1-2009). സി.പി.എമ്മിലെ എം. സ്വരാജ് പറഞ്ഞതു പോലെ, “വാക്കുകള്‍ക്ക് അർഥമുണ്ടെന്ന് അറിയാത്ത ആളല്ല ശശി തരൂര്‍. ഒക്ടോബര്‍ ഏഴാം തീയതിയല്ല ചരിത്രം ആരംഭിച്ചതെന്നും അദ്ദേഹത്തിന് അറിയാതിരിക്കില്ല. എന്നിട്ടും ഇസ്രായേല്‍ ലക്ഷണമൊത്ത ഭീകര രാഷ്ട്രമാണെന്ന് പറയാന്‍ കോണ്‍ഗ്രസ്‌ നേതാവിന് കഴിയുന്നില്ല” (എം. സ്വരാജ് – ഫേസ് ബുക്ക് പോസ്റ്റ്‌).

ഫലസ്ത്വീന്‍ വിമോചനപ്പോരാട്ടം സമം ഭീകരത എന്നത് കൃത്യമായും ഇസ്്ലാമോഫോബിക് സമവാക്യമാണ്, സംഘ് പരിവാര്‍ നരേറ്റീവാണ്. ഇടതുപക്ഷം നേരത്തെ തന്നെ കാപട്യമില്ലാത്ത നിലപാടാണ് ഫലസ്ത്വീന്‍ വിഷയത്തില്‍ കൃത്യമായും സ്വീകരിച്ചുവന്നത്. ‘ഇംഗ്ലണ്ട് ഇംഗ്ലീഷുകാര്‍ക്കും ഫ്രാന്‍സ് ഫ്രഞ്ചുകാര്‍ക്കും ഉള്ള അതേ അർഥത്തില്‍ ഫലസ്ത്വീന്‍ അറബികളുടെതാണ്’ എന്ന ഗാന്ധിജിയുടെ നിലപാടാണ് ഒടുവിലത്തെ വര്‍ക്കിംഗ് കമ്മറ്റിയിലടക്കം സംഘടനാ തലത്തില്‍ കോണ്‍ഗ്രസും ആവര്‍ത്തിച്ചത്. എന്നാലും ചില കോണ്‍ഗ്രസ്സുകാരെങ്കിലും ഇത്തരം വിഷയങ്ങളില്‍ ചിലപ്പോഴെങ്കിലും വെറും ‘കോങ്കര്‍സ്’ ആയിപ്പോകുമ്പോള്‍ സ്ഥലജല വിഭ്രമത്തില്‍ പെട്ടുപോകുന്നത് അന്ധഭക്തരായ അണികളാണ്. രണ്ടു പതിറ്റാണ്ട് മുമ്പ് കുഞ്ഞാലിക്കുട്ടി വ്യവസായ മന്ത്രിയും എം.കെ മുനീര്‍ പൊതുമരാമത്ത് മന്ത്രിയുമായ എ.കെ ആന്റണി മന്ത്രിസഭയില്‍ കോണ്‍ഗ്രസ്സിന്റെ ടൂറിസം മന്ത്രി കെ.വി തോമസ്‌ ‘സയണിസ്റ്റ് ബുള്‍ഡോസര്‍’ ഏരിയല്‍ ഷാരോണിനെ മുഖ്യമന്ത്രി പോലുമറിയാതെ ദില്ലിയില്‍ കുതിച്ചെത്തി ഉപഹാരം നല്‍കി ആദരിച്ചത് കേരളം മറന്നിട്ടില്ല. അടല്‍ ബിഹാരി വാജ്പേയ് ആയിരുന്നു അന്ന് പ്രധാനമന്ത്രി. ഷാരോണും വാജ്പേയിയും ചരിത്രത്തിന്റെ വിസ്മൃതിയില്‍ മറഞ്ഞു. ‘കൈ’ വിട്ടു വഴിയാധാരമായ കെ.വി തോമസ്‌ ‘ഇടതോരം’ ചേര്‍ന്നു ഇടതു കേരളത്തിന്റെ വക്താവായി ഇന്ദ്രപ്രസ്ഥനസ്ഥനുമായി.

പ്രതിപക്ഷ നേതാവ് വി.ഡി സതീശനെയും മുതിര്‍ന്ന നേതാക്കളായ രമേശ്‌ ചെന്നിത്തല, കെ. സുധാകരന്‍, കോഴിക്കോട്ടുകാരന്‍ തന്നെയായ കെ. മുരളീധരന്‍ എന്നിവരെയും ഒഴിവാക്കി ‘ദില്ലി നായരെ’ കടപ്പുറത്തെത്തിച്ചതിന്റെ രാഷ്ട്രീയ ലാക്ക് എന്തു തന്നെയായാലും ‘രാജ്യാന്തര തലത്തില്‍ ലീഗിന്റെ റാലിക്ക് ശ്രദ്ധ ലഭിക്കാന്‍’ (പി.കെ കുഞ്ഞാലിക്കുട്ടി – മാതൃഭൂമി 27-10-23) വേണ്ടിയാണ് അത് ചെയ്തത് എന്നാണ് ലീഗിന്റെ തന്നെ ഔദ്യോഗിക ഭാഷ്യം. ആ അർഥത്തില്‍ വന്‍ വിജയം തന്നെയായിരുന്നു മുസ്‌ലിം ലീഗിന്റെ റാലി. കോണ്‍ഗ്രസ് ദേശീയ രാഷ്ട്രീയത്തിന്റെ ഫ്രെയിമില്‍ ഒതുങ്ങാത്ത അന്താരാഷ്ട്രീയക്കാരനാണ് താനെന്നു പലപ്പോഴും വാചാ കര്‍മണാ തെളിയിച്ചയാളാണ് ഡോ. ശശി തരൂര്‍. ഫലസ്ത്വീനോടൊപ്പം തന്നെ ഇസ്രായേലിനാല്‍ ബന്ദിയാക്കപ്പെട്ട ഐക്യരാഷ്ട്ര സഭയില്‍ വാര്‍ത്താ വിനിമയവും പബ്ലിക് ഇന്‍ഫര്‍മേഷനും കൈകാര്യം ചെയ്ത ഒരന്താരാഷ്ട്രീയ വ്യക്തിത്വത്തില്‍നിന്ന് ഹമാസിനെ പരാമര്‍ശിക്കുമ്പോള്‍ ‘ഭീകരത’ എന്ന പദം അറിയാതെ വന്നുപോകുന്നത് കേവലമൊരു നാക്കുപിഴയല്ല. 'ഹമാസ് ആക്രമണം ശൂന്യതയില്‍ നിന്നുണ്ടായതല്ല' എന്ന യു.എന്‍ സെക്രട്ടറി ജനറല്‍ ഗുട്ടറസിന്റെ ഉശിര്, പഴയ അണ്ടര്‍ സെക്രട്ടറിക്കും ഉണ്ടാവണമെന്ന് വാശി പിടിക്കേണ്ടതുമില്ല. ‘അന്താരാഷ്‌ട്ര മീഡിയാ കവറേജ്’ മാത്രം ആഗ്രഹിച്ചു അത്തരമൊരാളെ ഇത്തരം വിഷയങ്ങളില്‍ മുഖ്യ പ്രസംഗം നടത്താന്‍ ഏൽപിച്ചവരാണ് ശരിക്കും ഇവിടെ ‘ശശി’യായത്.

പുറം തോടില്‍ മതേതരമായിരിക്കുമ്പോഴും ഇസ്‌ലാമാണ് എക്കാലത്തും ലീഗിന്റെ ഉള്ളടക്കം. രാഷ്ട്രീയ നേതൃത്വം തന്നെയാണ് ലീഗണികളുടെ ആത്മീയ നേതൃത്വവും. ‘ജനാധിപത്യ സമൂഹത്തില്‍ മുസ്‌ലിം ന്യൂനപക്ഷം സ്വത്വാധിഷ്ഠിതമായി സംഘടിക്കേണ്ടതുണ്ട്’ എന്ന ആശയാടിത്തറയില്‍ രൂപവത്കൃതമായ മുസ്‌ലിം ലീഗ് നയങ്ങളിലും നിലപാടുകളിലും മുറുകെ പിടിക്കുന്ന ആശയം ഇസ്‌ലാമികത തന്നെയാണ് എന്ന് മുഹമ്മദ്‌ ഇസ്മാഈല്‍ സാഹിബ് മുതല്‍ ലീഗിന് ഇപ്പോള്‍ സാരഥ്യം വഹിക്കുന്ന പാണക്കാട് തങ്ങള്‍ കുടുംബം വരെ പലവുരു പല രൂപത്തില്‍ വെളിപ്പെടുത്തിയതാണ്. കെ.എം മൗലവിയും ബാഫഖി തങ്ങളും ഉള്‍ക്കൊള്ളുന്ന ‘കേരളീയ ഇസ്‌ലാമി’ലെ രണ്ടു പ്രബല ധാരകളുടെ രാഷ്ട്രീയ ഉരുക്കുമൂശ (Political Melting Pot) കൂടിയാണ് മുസ്‌ലിം ലീഗ്. അതുകൊണ്ട് തന്നെ മറ്റു മുസ്‌ലിം സംഘടനകളെ പോലെ ലീഗിനെ സംബന്ധിച്ചേടത്തോളവും രാഷ്ട്രീയ വിഷയം എന്നതുപോലെ തന്നെ ഖുദുസുമായി ബന്ധപ്പെട്ട ആത്മീയ വിഷയം കൂടിയാകുന്നു ഫലസ്ത്വീന്‍. ഫലസ്ത്വീന്‍ വിഷയത്തില്‍ തങ്ങള്‍ വിളിച്ചപ്പോള്‍ അണികള്‍ കടലായി വന്നതും അതുകൊണ്ടു തന്നെ. ലീഗില്‍ വര്‍ഗീയതയും സാമുദായിക വാദവും ആരോപിക്കാന്‍ രാഷ്ട്രീയ എതിരാളികള്‍ പലപ്പോഴും ഉദ്ധരിക്കുന്നതും നേതാക്കളുടെ ആത്മീയ പ്രചോദിതങ്ങളായ പ്രസ്താവനകളാണ് താനും. ഫലസ്ത്വീന്‍ റാലി നടക്കുന്നതിന് ഏതാനും ദിവസങ്ങള്‍ക്ക് മുമ്പ് നടന്ന ഒരു പ്രാദേശിക മുസ്‌ലിം ലീഗ് പരിപാടിയില്‍ ലീഗ് അധ്യക്ഷൻ പാണക്കാട് സാദിഖലി ശിഹാബ് തങ്ങള്‍ നടത്തിയ പ്രസ്താവന ഇതില്‍ ഏറ്റവും ഒടുവിലത്തേതാണ്. “പ്രതിസന്ധികള്‍ വന്നുകൊണ്ടിരിക്കും. അതില്‍ പതറി നമ്മള്‍ പിന്നോട്ട് പോകാന്‍ പാടില്ല. പതറാതെ പാര്‍ട്ടിയില്‍ ഉറച്ചുനില്‍ക്കണം. നമ്മുടെ നേതാക്കള്‍ ഏല്‍പിച്ച ഈ ഹരിത പതാകയുടെ തണല്‍ നമുക്ക് എന്നുമുണ്ടാകും. ‘അര്‍ശി’ന്റെ തണലിലേക്ക് വരെ അത് മുസ്‌ലിം സമുദായത്തെ നയിക്കുമെന്ന് ഉറച്ചു വിശ്വസിച്ചുകൊണ്ട് മുന്നോട്ട് പോവുക” (ലീഗിന്റെ ഹരിത പതാക പരലോക വിജയത്തിന് സഹായകരമാകുമെന്ന് സാദിഖലി തങ്ങള്‍ - മാതൃഭൂമി – 11-10-23). l

വൈരുധ്യാത്മക ഭൗതികവാദത്തില്‍ മാര്‍ക്‌സ് മുന്നോട്ടു വെക്കുന്ന സാമൂഹിക വികാസ നിയമങ്ങളില്‍ പെട്ട ഒരു നിയമമാണ് ‘നിഷേധത്തിന്റെ നിഷേധം’ (Negation of Negation). ആഭ്യന്തരമായ വൈരുധ്യങ്ങള്‍ ഉള്ളതുകൊണ്ട് ഓരോ വസ്തുവിലും അതിനെ നിഷേധിക്കുന്ന ശക്തിയും അടങ്ങിയിരിക്കുന്നു എന്നതാണ് ഈ നിയമം. അതായത്, മുട്ടയെ നിഷേധിച്ചു കൊണ്ടാണ് കോഴിക്കുഞ്ഞ് പുറത്തു വരുന്നത്. വിത്തിന്റെ നിഷേധമാണ് ചെടി. വളര്‍ച്ചയുടെ മറ്റൊരു ഘട്ടത്തില്‍ ചെടി തന്നെ നിഷേധിക്കപ്പെടുകയും വിത്ത് വീണ്ടുമുണ്ടാവുകയും ചെയ്യുന്നു. അഥവാ നിഷേധം നിഷേധിക്കപ്പെടുന്നു. അക്കിത്തം പാടിയതു പോലെ ‘തീസിസ്സിനോടേല്പിതാന്റി/ ത്തിസീസ്സെന്നൊരു സാധനം’. കേരള നിയമസഭാ സ്പീക്കര്‍ എ.എന്‍ ശംസീര്‍ പൊട്ടിച്ച ‘മിത്ത്’ വിവാദത്തില്‍ “ഗണപതി മിത്ത് ആണെന്ന് താന്‍ പറഞ്ഞിട്ടില്ല; അല്ലാഹു മിത്തല്ല എന്നും പറഞ്ഞിട്ടില്ല” എന്ന സി.പി.എം സെക്രട്ടറി എം.വി ഗോവിന്ദന്റെ പരാമര്‍ശം ഓര്‍മിപ്പിക്കുന്നത് ഈ മാര്‍ക്സിയന്‍ പരിപ്രേക്ഷ്യമാണ്. തുടക്കത്തില്‍, 'ഗണപതി എന്നത് മിത്ത് അല്ലാതെ പിന്നെ ശാസ്ത്രമാണോ' (മാതൃഭൂമി 2-8-2023) എന്ന് ചോദിച്ചു ശംസീറിന്റെ പിന്നിലുറച്ചു നിന്ന പാര്‍ട്ടി സെക്രട്ടറി ഒടുവില്‍ വിവരം ലഭിക്കുമ്പോള്‍ ‘മിത്തിലൊരു തിരുത്തല്‍’ (മീഡിയാ വണ്‍ 4-8-23) എന്ന ‘ഗോവിന്ദാത്മക ഭൗതികവാദ’ത്തില്‍ തലകുത്തി വീണിരിക്കുന്നു.

2023 ജൂലൈ 21-ന് എറണാകുളത്തെ കുന്നത്തുനാട് മണ്ഡലത്തിൽ നടപ്പാക്കുന്ന ‘വിദ്യാജ്യോതി പദ്ധതി’യുടെ ഉദ്ഘാടന പ്രസംഗത്തില്‍ ഹിന്ദു ദൈവങ്ങളിലൊന്നായ ‘ഗണപതി’യെ കുറിച്ചു കേരള നിയമസഭാ സ്പീക്കർ എ.എൻ ശംസീർ നടത്തിയ ഒരു പരാമര്‍ശമാണ് സി.പി.എമ്മിനെ പുതിയൊരു ‘പ്രത്യയശാസ്ത്ര പ്രതിസന്ധി’യിലകപ്പെടുത്തിയത്. സംഘ് പരിവാറിന് ഇപ്പോഴും പിടികിട്ടാവള്ളിയായി നില്‍ക്കുന്ന കേരളത്തില്‍ നിയമസഭാ സ്പീക്കർ നടത്തിയ ‘ഗണപതി നിന്ദ’യെ ‘സുവര്‍ണാവസരം 2.0' ആയി ആഘോഷിക്കാന്‍ തന്നെയാണ് ബി.ജെ.പി തീരുമാനിച്ചിട്ടുള്ളത്‌.

ശബരിമല സ്ത്രീപ്രവേശ വിഷയത്തില്‍ പതിനെട്ടടവും ഇരുമുടിക്കെട്ടും പുറത്തെടുത്തിട്ടും ‘സുവര്‍ണാവസരം 1.0’ ചീറ്റിപ്പോവുകയും കോണ്‍ഗ്രസ് നേട്ടം കൊയ്യുകയും ചെയ്ത സാഹചര്യത്തില്‍ ‘രണ്ടാം സുവര്‍ണ’ത്തില്‍ കരുതലോടെയാണ് ബി.ജെ.പി കരുക്കള്‍ നീക്കുന്നത്. എന്‍.എസ്. എസിന്റെ മുടിചുടാമന്നനായര്‍ ‘ശരി-ദൂര–സമ-ദൂര’ കവച കുണ്ഡലങ്ങള്‍ അഴിച്ചുവെച്ചു ഗോദയില്‍ ഇറങ്ങിയപ്പോള്‍ ബി.ജെ.പിയും ജഴ്സിയണിഞ്ഞു കൂടെയിറങ്ങി. മൗനത്തിന്റെ ഒരിടവേളയ്ക്ക് ശേഷം കരുതലോടെ കോണ്‍ഗ്രസും ഖദറണിഞ്ഞു.

നായര്‍ സര്‍വീസ് സൊസൈറ്റി ഈ ‘ഹിന്ദു മത നിന്ദ’യ്ക്കെതിരെ നാമജപ ഘോഷയാത്ര പ്രഖ്യാപിക്കുകയും നടപ്പാക്കുകയും ചെയ്തു. തിരുവനന്തപുരം പാളയം ഗണപതി ക്ഷേത്രം മുതല്‍ പഴവങ്ങാടി ഗണപതി ക്ഷേത്രം വരെയായിരുന്നു ഘോഷയാത്ര. ‘നല്ല’ നായന്മാരും കാര്യക്കാരും ഗണപതിഹോമം നടത്തി, തേങ്ങ ഉടച്ചു നാമജപം കേമമാക്കി. കൂട്ടത്തിലൊരു ‘പ്രതിലോമ’ നായര്‍ സ്പീക്കര്‍ ശംസീറിനു വേണ്ടിയും ശത്രുസംഹാര പൂജ നടത്തി രംഗം സരസമാക്കി. കൊല്ലം ഇടമുളയ്ക്കൽ പഞ്ചായത്തിലെ കരയോഗം പ്രസിഡന്റ് അഞ്ചൽ ജോബാണ് ശംസീറിന്റെ ആയുരാരോഗ്യത്തിനും ദീര്‍ഘായുസ്സിനും വേണ്ടി പൂജ നടത്തിയത്. എന്‍.എസ്.എസ് ഘോഷയാത്രയ്ക്കെതിരെ പോലീസ് കേസെടുത്തു.

കക്ഷിഭേദമന്യേ ഇമ്മട്ടില്‍ എല്ലാവരും കച്ചമുറുക്കി ഇറങ്ങിയപ്പോള്‍ ഗണപതി മിത്തോ മിഥ്യയോ സത്യമോ എന്ന ചോദ്യത്തിന്, 'കുട്ടന്‍ നമ്പൂതിരി മുറ്റത്ത് മൂത്രമൊഴിച്ചത് ശരിയായില്ല എന്നെഴുതിയാല്‍ സുലൈമാനാജി ഉമ്മറത്ത് തുപ്പിയതെന്തിനാ’ (റഫീഖ് അഹമ്മദിന്റെ കവിത) എന്ന മട്ടിലായി ആകമൊത്തം ‘ജനകീയ’ പ്രതികരണങ്ങള്‍.

സ്പീക്കറുടെ പ്രസംഗത്തിന്റെ മെറിറ്റിലേക്ക് കടക്കാതെ കുറ്റിക്കാട്ടിനു ചുറ്റും അടിച്ചു ഒച്ചയുണ്ടാക്കി അവസരം തങ്ങള്‍ക്കനുകൂലമാക്കാന്‍ തന്നെയായിരുന്നു ഓരോ കക്ഷിയുടെയും ശ്രമം. മിത്തുകള്‍ യാഥാർഥ്യങ്ങള്‍ ആവുകയും ആ യാഥാർഥ്യങ്ങളുടെ രഥങ്ങളിലേറി വംശഹത്യകള്‍ നടക്കുകയും ചെയ്യുന്ന വര്‍ത്തമാന ഭാരതീയ കാലാവസ്ഥയില്‍ വിദ്യാര്‍ഥികള്‍ ശാസ്ത്രാവബോധം (scientific temper) നേടി ശക്തരാകണം എന്നതായിരുന്നു സ്പീക്കറുടെ പ്രസംഗത്തിന്റെ ഹൈലൈറ്റ്. ശംസീറിന്റെ പ്രസംഗത്തിന്റെ പ്രസക്ത ഭാഗം ഇങ്ങനെയായിരുന്നു: “നമ്മുടെ വിദ്യാഭ്യാസ മേഖലയിൽ ശാസ്ത്രത്തെ പ്രോത്സാഹിപ്പിക്കണം. ഇന്നത്തെ എല്ലാ പ്രശ്നങ്ങൾക്കും പരിഹാരം ശാസ്ത്രത്തെ പ്രോത്സാഹിപ്പിക്കൽ മാത്രമാണ്. ഇപ്പോൾ എന്തൊക്കെയാ പഠിപ്പിക്കാൻ ശ്രമിക്കുന്നത്? വിമാനം കണ്ടുപിടിച്ചത് ആരാണ്? എന്റെ കാലത്ത് വിമാനം കണ്ടുപിടിച്ചത് ആരെന്ന ചോദ്യത്തിന് ഉത്തരം റൈറ്റ് സഹോദരങ്ങള്‍ എന്നതായിരുന്നു. ഇപ്പോൾ അവരല്ല. അത് തെറ്റാണ്. ലോകത്തെ ആദ്യത്തെ വിമാനം പുഷ്പക വിമാനമാണ്. ആരുടേതാണ് ആദ്യത്തെ പ്ലാസ്റ്റിക് സർജറി നടത്തിയത് എന്ന ചോദ്യത്തിന് മനുഷ്യന്റെ ശരീരവും ആനയുടെ മുഖവുമുള്ള ഗണപതിയുടേതാണെന്നാണ് ഉത്തരം. ഇങ്ങനെ ശാസ്ത്രത്തിന്റെ സ്ഥാനത്ത് മിത്തുകളെ പ്രോത്സാഹിപ്പിക്കുന്നു. ഇവിടെ ശാസ്ത്രത്തെ പ്രോത്സാഹിപ്പിക്കാൻ സാധിക്കണം” (മാധ്യമം 1-8-2023).

ശംസീറിന്റെ പ്രസംഗത്തിനെതിരെ ആദ്യം രംഗത്ത് വന്നത് യുവമോർച്ച സംസ്ഥാന സെക്രട്ടറി കെ. ഗണേശ് ആയിരുന്നു. “ഹിന്ദുമത വിശ്വാസങ്ങളെ എല്ലാ കാലത്തും ഇത്തരത്തിൽ ധിക്കരിക്കരുത്. ജോസഫ് മാഷിന്റെ കൈ പോയ പോലെ ശംസീറിന്റെ കൈ പോകില്ലെന്ന് നിങ്ങൾക്ക് ഉറപ്പുണ്ടാകും. പക്ഷേ, എല്ലാ കാലത്തും ഹിന്ദു സമൂഹം അങ്ങനെത്തന്നെ നിന്നുകൊള്ളണമെന്ന് ശംസീർ ഒരിക്കലും കരുതരുതെന്നാണ് പറയാനുള്ളത്” എന്നായിരുന്നു യുവമോര്‍ച്ച നേതാവിന്റെ ഭീഷണി. സ്പീക്കര്‍ക്കെതിരെ കൊലവിളി നടത്തിയ യുവമോര്‍ച്ചയെ ‘മോര്‍ച്ചറി’യിലേക്ക് അയക്കുമെന്ന് പി. ജയരാജന്‍ തിരിച്ചടിച്ചതോടെ എരിഞ്ഞുനിന്ന കനല്‍ ആളിക്കത്താന്‍ തുടങ്ങി.

‘സയന്‍സിനെ മിത്തുകള്‍കൊണ്ട് റീപ്ലെയ്‌സ് ചെയ്യുക’ എന്ന അപകടകരമായ അവസ്ഥ ചൂണ്ടിക്കാണിക്കുകയാണ് യഥാർഥത്തില്‍ സ്പീക്കര്‍ ശംസീര്‍ ചെയ്തത്. ആ അപകടാവസ്ഥയുടെ കാരണഭൂതമാവട്ടെ പ്രധാനമന്ത്രി നരേന്ദ്ര മോദിയുമാണ്‌. 2015 ജനുവരിയില്‍ മുംബൈയില്‍ ചേര്‍ന്ന 102-ാമത് ഇന്ത്യന്‍ സയന്‍സ് കോണ്‍ഗ്രസിലാണ് ‘ഗണപതിയുടെ തലവെട്ടി ആനത്തല വെച്ചതാണ് ലോകത്തിലെ ആദ്യത്തെ പ്ലാസ്റ്റിക് സര്‍ജറി’ എന്ന് ശാസ്ത്രജ്ഞന്മാരെ മുന്നിലിരുത്തി പ്രധാനമന്ത്രി പ്രസംഗിച്ചത്. അതിനും ഒരു വര്‍ഷം മുമ്പ് 2014-ൽ, മുംബൈയിലെ റിലയൻസ് ഹോസ്പിറ്റൽ ഉദ്ഘാടന ചടങ്ങിലും മോദി സമാനമായ പ്രസ്താവന നടത്തി. വിമാനം കണ്ടുപിടിച്ചത് ഭരദ്വാജ മഹര്‍ഷിയാണെന്നും, ഗര്‍ഭാശയത്തിനു പുറത്ത് നടന്ന കര്‍ണന്റെ പിറവി പുരാതന ഭാരതത്തിലെ ജനിതക ശാസ്ത്രത്തിന്റെ തെളിവാണെന്നുമൊക്കെ സയന്‍സ് കോണ്‍ഗ്രസില്‍ വേറെയും പരാമര്‍ശങ്ങളുണ്ടായി.

അന്നു തന്നെ ഇത്തരം ജൽപനങ്ങളെ നിശിതമായി പരിഹസിച്ച ഒരാള്‍ കോണ്‍ഗ്രസ് നേതാവ് ശശി തരൂരും മറ്റൊരാള്‍ സംഘ് പരിവാര്‍ സൈദ്ധാന്തികൻ ആര്‍. ഹരിയുമായിരുന്നു. കപട ശാസ്ത്രം (pseudo-science) എന്നാണ് ആര്‍. ഹരി ഈ പരാമര്‍ശങ്ങളെ വിശേഷിപ്പിച്ചത്. ആര്‍. ഹരി പറഞ്ഞ അതേ കാര്യം തന്നെയാണ് ഇത്തിരി കടുപ്പം കുറച്ചു ശംസീറും പറഞ്ഞത്. അപ്പോഴൊന്നും ആരും ആര്‍ക്കെതിരെയും ദണ്ഡ് ചുഴറ്റിയില്ല. ആരും മാപ്പ് പറയേണ്ടിയും വന്നില്ല. ശംസീര്‍ ഗണപതിയെ അപമാനിച്ചു എന്ന വാചകത്തില്‍ ‘ഗണപതി’യ്ക്ക് അല്ല, ‘ശംസീര്‍’ എന്ന വാക്കിനാണ് കട്ടിയും അടിവരയുമുള്ളത്. “ഇതു പോലെ ഇസ്‌ലാമിലെ ‘അന്ധവിശ്വാസങ്ങളെ’ കുറിച്ചു ശംസീര്‍ ചോദിക്കുമോ” എന്ന ജി. സുകുമാരന്‍ നായരുടെ ചോദ്യത്തില്‍ തന്നെ ഇതുണ്ട്. അതായത്, ‘ഗണപതി’ ഒരു അന്ധവിശ്വാസമാണ് എന്ന് സമ്മതിക്കുമ്പോഴും അത് പറയുന്നത് ‘ഒരു നാട്ടില്‍ അഞ്ചു പള്ളികള്‍ ഉണ്ടെങ്കില്‍ ആ അഞ്ചു പള്ളികളില്‍നിന്നും എന്തിനാണ്‌‌ ബാങ്ക് വിളിക്കുന്നത്’ (എ.എന്‍ ശംസീര്‍ - ഡ്യൂള്‍ ന്യൂസ്, 12-8-2016) എന്ന് ചോദിച്ച ആള്‍ ആയാല്‍ പോലും അയാളുടെ പേര് ശംസീര്‍ എന്നാണെങ്കില്‍ വെറുതെ വിടില്ല എന്ന് തന്നെ. “ഗണപതി മിത്ത് ആണോ മിഥ്യ ആണോ എന്നൊക്കെ ചോദിച്ച് എന്റെ മതത്തില്‍ കേറിക്കൊത്താന്‍ നിങ്ങള്‍ ആരാണ് ഹേ” എന്ന മേജര്‍ രവിയുടെ ചോദ്യത്തിന്റെ ധ്വനിയും മറ്റൊന്നല്ല. ഇസ് ലാമോഫോബിക് നൂല് കൊണ്ട് പണ്ട് സി.പി.എം നെയ്തുണ്ടാക്കിയ ഹസന്‍- അമീർ-കുഞ്ഞാലിക്കുട്ടി തിസീസിന്റെ ആന്റി തിസീസാണ് ഇപ്പോൾ രൂപപ്പെട്ട ശംസീർ-റിയാസ്-ജലീല്‍ സിന്തസീസ്! ഇവിടെ ശംസീര്‍ അല്ല, ‘ഏതോ ഒരു പ്ലാസ്റ്റിക് സര്‍ജന്‍ വെച്ചുപിടിപ്പിച്ചതാണ് ഗണപതിയുടെ തല’ എന്ന് പ്രസംഗിച്ച നരേന്ദ്ര മോദിയാണ് വാസ്തവത്തില്‍ ഗണപതിയെ അപമാനിച്ചത്. ദൈവികമെന്ന് വിശ്വസിക്കപ്പെട്ടു വരുന്ന ഒരു മിത്തിനെ ഭൗതിക പ്രതിഭാസമായി ചിത്രീകരിക്കുന്നതാണ് യഥാർഥത്തില്‍ ദൈവ നിന്ദ. മോദി ഗണപതി നാസിക സര്‍ജറി പരാമര്‍ശം നടത്തിയ അതേ വര്‍ഷമാണ്‌ ‘മാതൃഭൂമി’ ദിനപത്രത്തില്‍ ‘രാമായണം ജീവിത സാരാമൃതം’ എന്ന കോളം ചെയ്തതിന്റെ പേരില്‍ സാഹിത്യനിരൂപകനും കാലിക്കറ്റ് സർവകലാശാലാ മലയാളം പഠനവകുപ്പ് മേധാവിയുമായിരുന്ന എം.എം ബഷീർ ഹിന്ദുത്വ വാദികളാല്‍ ആക്രമിക്കപ്പെട്ടത്. അന്നും പേര് തന്നെയായിരുന്നു പ്രശ്നം. ഭീഷണി രൂക്ഷമായപ്പോള്‍ അദ്ദേഹത്തിന് കോളം പാതിവഴിയിൽ നിര്‍ത്തേണ്ടിവന്നു.

മഹാഭാരതത്തെയും രാമായണത്തെയുമൊക്കെ ‘കഥ’ (story) എന്നാണ് സാധാരണഗതിയില്‍ വിശേഷിപ്പിക്കാറുള്ളത്. ‘ഇതിഹാസങ്ങള്‍’ എന്നും ‘മിത്തുകള്‍’ എന്നും വിളിക്കപ്പെടാറുണ്ട്. സമൂഹത്തിന്റെ അംഗീകാരമുള്ള സ്വപ്‌നങ്ങളാണ് മിത്തുകള്‍. ഇതിഹാസം, ഐതിഹ്യം, പുരാവൃത്തം എന്നൊക്കെയാണ് മിത്ത് എന്ന ഇംഗ്ലീഷ് പദത്തിന്റെ അർഥം. ‘സത്യസന്ധമായ ചരിത്രം’ എന്നല്ല ‘ഭരത രാജവംശത്തിന്റെ മഹത്തായ ഇതിഹാസം’ എന്നാണ് മഹാഭാരതത്തെ കുറിച്ചു എന്‍സൈക്ലോപീഡിയ ബ്രിട്ടാണിക്ക വിശേഷിപ്പിക്കുന്നത്. രാമായണത്തിലെയും മഹാഭാരതത്തിലെയും കഥകളും കഥാപാത്രങ്ങളും പലതിലും പലതരത്തിലാണ് അവതരിപ്പിക്കപ്പെട്ടിട്ടുള്ളത്. എല്ലാം പരസ്പര വിരുദ്ധങ്ങളുമാണ്. അവയൊന്നും മിത്തുകളല്ല, യാഥാർഥ്യങ്ങളാണ് എന്ന് വാദത്തിനു വേണ്ടി സമ്മതിച്ചാല്‍ തന്നെ ‘യഥാർഥത്തിലുള്ള യാഥാർഥ്യം’ ഏത് എന്നതില്‍ പ്രശ്നമുണ്ടാവും. ഗണപതിയുടെ കാര്യം തന്നെ എടുക്കുക. ശിവനും പാര്‍വതിയും ഗജരൂപങ്ങള്‍ (കൊമ്പനാനയും പിടിയാനയും) പൂണ്ട് രതിയില്‍ ഏര്‍പ്പെട്ടതുകൊണ്ടാണ് ആനമുഖമുള്ള പുത്രന്‍ ജനിച്ചത് എന്നാണ് രാമായണത്തിന്റെ ഒരു വേര്‍ഷനില്‍ പറയുന്നത്.

മറ്റൊരു നിവേദനം ഇങ്ങനെയാണ്: ‘ആദിപരാശക്തിയായ’ പാര്‍വതി തന്റെ കുളിമുറിക്ക് ഒരു കാവല്‍ക്കാരനെ ആവശ്യം വന്നപ്പോള്‍ ചന്ദനപ്പൊടികൊണ്ട് ഒരു പ്രതിമയുണ്ടാക്കി അതിനു ജീവൻ കൊടുത്തു. അതാണ്‌ ഗണപതി. പാര്‍വതി കുളിച്ചുകൊണ്ടിരിക്കെ കുളിമുറിയിലേക്ക് കടക്കാന്‍ ശ്രമിച്ച ശിവനെ അത് തന്റെ പിതാവാണ് എന്നറിയാതെ ഗണപതി തടഞ്ഞു. ക്ഷിപ്രകോപിയായ ശിവന്‍ ഗണപതിയുടെ ശിരസ്സെടുത്തു. കോപം ശമിച്ചപ്പോള്‍ ശിവന്‍ ഗണപതിക്ക് വലിയ ഒരാനത്തല പകരം വെച്ചുകൊടുത്തു. ശനിയുടെ ദൃഷ്ടിപാതംകൊണ്ട് തല തകര്‍ന്നു പോയ ഗണപതിക്ക് മുന്തിയ ആനത്തല വെച്ചുപിടിപ്പിച്ചു എന്ന മറ്റൊരു കഥയുമുണ്ട്. ശിവനും പാർവതിക്കും കാവൽ നിന്ന ഗണപതി ശിവനെ കാണാൻ‌വന്ന പരശുരാമനെ തടഞ്ഞുനിർത്തിയെന്നും ഇതിൽ ക്രുദ്ധനായ പരശുരാമൻ തന്റെ മഴുവെടുത്ത് ഗണപതിയുടെ ഒരു കൊമ്പ് അരിഞ്ഞുകളഞ്ഞുവെന്നും വേറെ ഒരു കഥയില്‍ പറയുന്നു. ഗണപതിയുടെ ഒരു കൊമ്പ് ഒടിഞ്ഞത് അങ്ങനെയാണത്രേ! ഗണപതിയുടെ കൊമ്പ് മുറിഞ്ഞതിന്റെ പിന്നില്‍ വേറെയും ഒരു കഥയുണ്ട്: വേദവ്യാസന്‍ പറഞ്ഞുകൊടുത്ത് ഗണപതിയാണത്രേ മഹാഭാരത കഥ എഴുതിയത്. എഴുതിക്കൊണ്ടിരിക്കെ എഴുത്താണി ഒടിഞ്ഞപ്പോള്‍ ഗണപതി തന്നെ സ്വന്തം കൊമ്പ് മുറിച്ചെടുത്ത് എഴുത്ത് പൂര്‍ത്തിയാക്കി എന്നാണ് അക്കഥ. ഗണപതിയുടെ ആകാരത്തെ കുറിച്ചു തന്നെ വ്യത്യസ്ത സങ്കൽപങ്ങളുണ്ട്. വിനായകി, സൂര്‍പ്പ, ഗണേശാനി തുടങ്ങിയ സ്ത്രൈണ ഭാവങ്ങള്‍ പോലും ഗണേശനുണ്ട്. എന്നാല്‍, ഇമ്മാതിരി ദൈവികതയൊന്നും ഗണേശ ശിരസ്സിനില്ല എന്നും, പൗരാണിക ഭാരതത്തിലെ ഒരു പ്ലാസ്റ്റിക് സര്‍ജന്‍ വെച്ചുപിടിപ്പിച്ചതാണെന്നുമാണ് പറയുന്നത്.

തെരഞ്ഞെടുപ്പ് രാഷ്ട്രീയ ലാഭങ്ങള്‍ക്ക് വേണ്ടി ‘സുവര്‍ണാവസരങ്ങള്‍’ തേടി നടക്കുന്ന സംഘ് പരിവാറിന്റെ കബളതന്ത്രങ്ങള്‍ ജനാധിപത്യ ശക്തികള്‍ തിരിച്ചറിയുകയും സംയമനത്തോടെ പ്രതിരോധിക്കുകയും ചെയ്തില്ലെങ്കില്‍ 'അത്ര തെക്ക് അല്ല കേരളം' എന്ന് തിരിച്ചറിയാന്‍ അധികം ബുദ്ധിയൊന്നും ആവശ്യമില്ല. വൈകാരികതയ്ക്ക് തീപിടിപ്പിക്കുന്ന ഏതു ശ്രമവും തല്ലിക്കെടുത്തിയേ മതിയാവൂ. സി.പി.എമ്മും കോണ്‍ഗ്രസുമടങ്ങുന്ന ജനാധിപത്യ കക്ഷികള്‍ വോട്ടുബാങ്കില്‍ മാത്രം കണ്ണുനട്ട് സംഘ് പരിവാര്‍ ഒരുക്കുന്ന കെണിയില്‍ പെട്ട് എരിതീയില്‍ എണ്ണയൊഴിക്കുകയും അതില്‍ തന്നെ കടുക് വറുക്കുകയും ചെയ്യുകയാണെങ്കില്‍ കാലാകാലങ്ങളായി നാം കാത്തു സൂക്ഷിച്ച കേരളത്തിന്റെ മതേതര ഫാബ്രിക്കാണ് ചാരമാവാന്‍ പോകുന്നത്. “നമുക്ക് വിശ്വാസത്തെ വിശ്വാസമായും ശാസ്ത്രത്തെ ശാസ്ത്രമായും കാണാം. അതിലുപരി ശാസ്ത്രവും മതവും മതമില്ലാത്തവരുമെല്ലാം മനുഷ്യന് വേണ്ടിയാണ് സംസാരിക്കുന്നതെങ്കില്‍ ഈ വിവാദം എത്ര പെട്ടെന്ന് അവസാനിപ്പിക്കുന്നുവോ അത്രയും നല്ലത്. ഇനിയും കേരളത്തില്‍ ഇസ്‌ലാമോഫോബിയ പടര്‍ത്തിവിട്ട് രാഷ്ട്രീയ ലാഭം ലക്ഷ്യമാക്കുന്ന എല്ലാവരും മനസ്സിലാക്കുക, ഇത് നിങ്ങളെ തന്നെ തിരിഞ്ഞു കുത്തും. ഇതിന്റെ ഗുണഭോക്താക്കളാകട്ടെ അന്തിമമായി സംഘ് പരിവാര്‍ മാത്രവുമായിരിക്കും” (പി. മുജീബുര്‍റഹ്്മാന്‍ - അമീര്‍ ജമാഅത്തെ ഇസ്‌ലാമി, കേരള). l