''എന്റെ ഭര്ത്താവ് മക്കളുടെ മുന്നില് വെച്ച് എന്നെ അപമാനിക്കുന്നു, നിന്ദിച്ചു സംസാരിക്കുന്നു, അവഹേളിക്കുന്നു. എന്നോട് ആദരപൂര്വം സംസാരിക്കണമെന്നും കുട്ടികളുടെ മുന്നില് വെച്ച് എന്നെ കൊച്ചാക്കി സംസാരിക്കരുതെന്നും പലവട്ടം അദ്ദേഹത്തെ ഉണര്ത്തിയെങ്കിലും, എന്റെ അഭ്യര്ഥനക്ക് അദ്ദേഹം ചെവികൊടുക്കുന്നേയില്ല. പത്തു കൊല്ലമായി ഞങ്ങള് വിവാഹിതരായിട്ട്. മൂന്ന് മക്കളുണ്ട്. എന്നെ ഈ വിധം നിന്ദിക്കുന്നത് കണ്ട് മക്കള്ക്കും പിതാവിനോട് വെറുപ്പാണ്. ഈ പ്രതിസന്ധിയില്നിന്ന് കരേറാന് എന്തുണ്ട് പരിഹാരം?''
ഹതഭാഗ്യയായ ആ സ്ത്രീ തന്റെ ഭര്ത്താവില്നിന്ന് നേരിടുന്ന അനുഭവങ്ങള് എന്നോട് വിവരിച്ചു.
ഞാന്: ''നിങ്ങള് നേരിടുന്ന പ്രശ്നങ്ങള് പോലെയുള്ള പ്രശ്നങ്ങള് അഭിമുഖീകരിക്കുന്ന സ്ത്രീകളുടെ കാര്യത്തില്, വിജയിച്ച ചില നിര്ദേശങ്ങള് നിങ്ങള്ക്കും നല്കാം. ഒടുവില്, നിങ്ങളുടെ ഭര്ത്താവ് ഈ വിധം പെരുമാറാനുള്ള കാരണമെന്തായിരിക്കുമെന്നും ഞാന് പറഞ്ഞു തരാം.''
ഞാന്: ''ഭര്ത്താവ് രോഷാകുലനാവുകയും മക്കളുടെ മുന്നില് നിങ്ങളെ ഇകഴ്ത്തി സംസാരിക്കുകയും നിന്ദിക്കുകയും ചെയ്യുമ്പോള് വളരെ മയത്തിലും സൗമ്യമായും ശാന്തമായും വേണം നിങ്ങള് അദ്ദേഹത്തോട് ഇടപെടുന്നത്. നിങ്ങളുടെ ഈ പെരുമാറ്റ രീതിയും സംസാര ശൈലിയും ശാന്തനാകാന് അയാളെ പ്രേരിപ്പിച്ചേക്കും.''
''രണ്ടാമത് നിങ്ങള് ചെയ്യേണ്ടത്, അയാളെ ശാന്തമായി മനസ്സിലാക്കി കൊടുക്കുക. നിങ്ങളുടെ ഈ രീതി എനിക്ക് അങ്ങേയറ്റം പ്രയാസവും മനഃക്ലേശവും ഉണ്ടാക്കുന്നുണ്ട്. കുട്ടികളുടെ ഭാവിയെ ഇത് പ്രതികൂലമായി ബാധിക്കും. ഈ സംസാരത്തിലൂടെ അയാളുടെ പെരുമാറ്റത്തില് മാറ്റമുണ്ടായേക്കാം.
മൂന്നാമതായി നിങ്ങള്ക്ക് അവലംബിക്കാവുന്ന മാര്ഗം, അയാളുടെ കോപത്തിനും ഭീഷണിക്കും അവഹേളനത്തിനും നിങ്ങളുടെ സമീപനങ്ങളും പെരുമാറ്റവും കാരണമാകുമെന്നുണ്ടോ എന്ന് സ്വയം പരിശോധിക്കുകയാണ്. അത്തരം കാരണങ്ങളുണ്ടെങ്കില് അവ ഇല്ലാതാക്കാന് നിങ്ങള് ശ്രമിക്കണം. ഒരുവേള അയാളുടെ ഈ സമീപനത്തില് അല്പം ശമനം വന്നേക്കാം.
നാലാമത് പരീക്ഷിക്കാനുള്ളത്, അയാള് രോഷാകുലനാകുമ്പോള് ആ ഇടത്തുനിന്ന് മാറി മറ്റൊരിടത്ത് നിങ്ങള് പോയി ഇരിക്കുക എന്നതാണ്. കണ്ണില് നിന്നകന്നാല് ചിലപ്പോള് അയാള് ശാന്തനായേക്കാം. പക്ഷേ, ഒരു കാര്യം ഓര്ക്കണം. ചില പുരുഷന്മാര് നേരെ തിരിച്ചായിരിക്കും. നിങ്ങള് അവരുടെ കണ്വെട്ടത്തുനിന്ന് മാറിനിന്നാല് അവരുടെ കോപതാപങ്ങള് കൂടും.
അഞ്ചാമത്, ഈ രീതികളൊന്നും ഫലിക്കുന്നില്ലെങ്കില് ബാഹ്യമായ ഇടപെടല് പ്രയോജനപ്പെട്ടേക്കും. അയാളുടെ ഉമ്മ, സഹോദരങ്ങള്, കൗണ്സലിംഗ് വിദഗ്ധന് തുടങ്ങി ആരെയെങ്കിലും അയാളുടെ പെരുമാറ്റത്തിലെ അപകടം ബോധ്യപ്പെടുത്തിയാല് അയാള് മാറി ചിന്തിച്ചേക്കും. നിങ്ങളോട് മാന്യമായി പെരുമാറാന് ശ്രമിച്ചെന്നും വരാം.
ആറാമത്, നിങ്ങള് ആത്മവിശ്വാസം കൈവിടാതെ നോക്കുകയാണ്. നിങ്ങളുടെ വ്യക്തിത്വം ബലഹീനമാവാന് അയാളുടെ പെരുമാറ്റം ഹേതുവാകാതെ നോക്കേണ്ടത് നിങ്ങളുടെ കര്ത്തവ്യമാണ്. പ്രശ്നം അയാളുടേതാണെന്ന് നിങ്ങള് തിരിച്ചറിയണം. അതിനാലാണ് പറയുന്നത്, നിങ്ങള് നിങ്ങളുടെ മനോനില തെറ്റാതെ നോക്കണമെന്ന്.
ഏഴാമത്, കുറച്ചു കൂടിയ രീതിയാണ്. നിയമത്തിന്റെ വഴി തേടുക. അതിന്റെ ദോഷവും ഭവിഷ്യത്തും നിങ്ങള് സഹിക്കേണ്ടി വരും. നിങ്ങളുടെ ദാമ്പത്യ ജീവിതത്തിന്റെ ഭാവിയെക്കുറിച്ചും ചിന്തവേണം. ഭര്ത്താവിന്റെ ദോഷവശങ്ങളാണ് ഗുണത്തെക്കാള് കൂടുതലെങ്കില് അയാളുടെ ഉപദ്രവം കൂടിക്കൊണ്ടേയിരിക്കും. നിങ്ങളെ മക്കളുടെ മുന്നിലിട്ട് അവഹേളിച്ച് ഒന്നുമല്ലാതാക്കുന്ന രീതി തുടര്ന്നുകൊണ്ടേയിരിക്കും അയാള്.
ഈ ഏഴ് രീതികള് നിങ്ങളുടെ പ്രശ്നം പരിഹരിച്ചേക്കാം. ഭര്ത്താവ് മതബോധമുള്ള വ്യക്തിയാണെങ്കില് ചില ഖുര്ആൻ സൂക്തങ്ങളോ നബിവചനങ്ങളോ അയാളുടെ ശ്രദ്ധയില് കൊണ്ടുവന്നാല് ഫലപ്പെട്ടേക്കാം. ''പരസ്പരം അവഹേളിക്കരുത്; ദുഷ്പേരുകള് വിളിക്കുകയുമരുത്, വിശ്വാസം കൈക്കൊണ്ട ശേഷം ദുഷ്പേരുകള് വിളിക്കുകയെന്നത് അത്യന്തം മോശമായ കാര്യമാകുന്നു. ഈ ദുശ്ശീലത്തില്നിന്ന് പിന്മാറാത്തവര് ധിക്കാരികള് തന്നെയാകുന്നു'' (അല് ഹുജുറാത്ത് 11). ഈ സൂക്തം അയാള് കേള്ക്കെ ഉദ്ധരിക്കാം. മനുഷ്യന്റെ അന്തസ്സിടിക്കുന്ന പദപ്രയോഗങ്ങള് ഇസ് ലാം നിരോധിച്ചിരിക്കുന്നു.
''രണ്ടു പേര് പരസ്പരം ശകാരിച്ചുവെന്നിരിക്കട്ടെ, തുടങ്ങിവെച്ചവന്നാണ് കൂടുതല് കുറ്റം'' എന്ന നബി വചനവും ഉണര്ത്താവുന്നതാണ്.
അസഭ്യവര്ഷവും ശകാരങ്ങളുമൊക്കെ തുടങ്ങിവെച്ചവനിലേക്കാണ് തിരിച്ച് ചെല്ലുക. രണ്ടാമന് പ്രതികരിക്കുന്നില്ലെങ്കില്, തീര്ച്ചയായും എല്ലാ പാപഭാരവും അയാള് പേറേണ്ടിവരും.
ഈ രീതികളൊന്നും വിജയിക്കുന്നില്ലെങ്കില് എട്ടാമത്തെ ഒരു രീതിയുണ്ട്. താല്ക്കാലികമായ ഒരു വേറിട്ട് നില്ക്കല്. ചില പുരുഷന്മാരുടെ ദുഃസ്വഭാവം മാറ്റാന് ഇത് പ്രയോജനപ്പെട്ടതായാണ് മനസ്സിലായത്.
''നിങ്ങളുടെ ഭര്ത്താവ്, ഈ വിധം നിങ്ങളെ അവഹേളിക്കുന്നതും നിന്ദിക്കുന്നതും നിങ്ങള്ക്ക് മാത്രമല്ല ദോഷം ചെയ്യുക. അത് നിങ്ങളുടെ മക്കളുടെ ഭാവിയെ ബാധിക്കും. മക്കള് അസ്വസ്ഥരാകും, മനഃശാന്തി നഷ്ടപ്പെടും. വീട്ടിലെ ജീവിതം ദുഷ്കരമാകും. പഠനത്തില് പിന്നിലാകും. അവരെ അംഗീകരിക്കുന്നില്ലെന്ന് കാണുമ്പോള് അത് വൈകാരിക പ്രശ്നങ്ങള്ക്കും കാരണമാകും. അവരില് അന്യതാ ബോധമുണ്ടാകും. നല്ല സാമൂഹിക ബന്ധങ്ങള് ഭാവിയില് ഉണ്ടാക്കിയെടുക്കുന്നതില് അവര് പരാജയപ്പെടും.''
എല്ലാം കേട്ടുകഴിഞ്ഞപ്പോള് അവര്: ''നിങ്ങള് പറഞ്ഞതൊക്കെ ശരിയാണ്. ഇത് മക്കളില് ഞാന് കണ്ടുതുടങ്ങിയിട്ടുണ്ട്. എന്തിനാണ് എന്റെ ഭര്ത്താവ് എന്നോട് ഇങ്ങനെ പെരുമാറുന്നതെന്ന് എനിക്കറിഞ്ഞു കൂടാ.''
ഞാന് പറഞ്ഞു: ''പല കാരണങ്ങളുണ്ടാകും. ചിലപ്പോള് ആശയ വിനിമയ കഴിവില്ലാത്തവനാവാം അയാള്. ഒരു കാര്യം സംസാരിച്ചു ബോധ്യപ്പെടുത്താനുള്ള ശേഷിയോ നൈപുണിയോ ഇല്ലാത്തവര് ശകാരത്തിന്റെയും അട്ടഹാസത്തിന്റെയും ആക്രോ ശത്തിന്റെയും വഴിയാണ് തേടുക. അല്ലെങ്കില് അയാള് കുട്ടിയായിരുന്ന കാലത്ത് മാതാപിതാക്കൾ ഈ രീതിയില് സംസാരിച്ചതായിരിക്കും കണ്ടിരിക്കുക. അല്ലെങ്കില് നിങ്ങളെ അടക്കിഭരിച്ച് തന്റെ മേധാവിത്വം സ്ഥാപിക്കാനാവും അയാള് ഇങ്ങനെ പെരുമാറുന്നത്. ചിലര്, 'പൗരുഷ'മെന്നാല് ഇതൊക്കെയാണെന്ന് ധരിച്ചുവശായിട്ടുണ്ടാവും. ഈ എട്ട് രീതികളില് ഏതെങ്കിലും നിങ്ങളുടെ പ്രശ്ന പരിഹാരത്തിന് ഉതകുമെന്നാണ് ഞാന് വിശ്വസിക്കുന്നത്.'' l
വിവ: പി.കെ.ജെ
