ഉദുഹിയ്യത്ത് (ഈദുല്‍ അദ്ഹായോടനുബന്ധിച്ച് നടത്തുന്ന ബലികർമം) ഖുര്‍ആനിലും സുന്നത്തിലും സ്ഥിരപ്പെട്ട ആരാധനാകർമമാണ്‌.
إِنَّا أَعْطَيْنَاكَ الْكَوْثَرَ . فَصَلِّ لِرَبِّكَ وَانْحَرْ . إِنَّ شَانِئَكَ هُوَ الْأَبْتَرُ
"(നബിയേ) താങ്കൾക്കു നാം കൗസര്‍ (ധാരാളം അനുഗ്രഹങ്ങള്‍) പ്രദാനം ചെയ്തിരിക്കുന്നു. ആകയാല്‍, താങ്കളുടെ നാഥനു വേണ്ടി നമസ്‌കരിക്കുകയും ബലിയര്‍പ്പിക്കുകയും ചെയ്യുക. താങ്കളുടെ ശത്രുവാരോ അവനാണ് കുറ്റിയറ്റവന്‍" (അൽ കൗസർ).
ബലിയുടെ പ്രാധാന്യം വ്യക്തമാക്കുന്ന ഒരു നബിവചനം ഇങ്ങനെ:
مَنْ كَانَ لَهُ سَعَةٌ وَلَمْ يُضَحِّ فَلَا يَقْرَبَنَّ مُصَلاَّنا
(ബലിയറുക്കാന്‍ കഴിവുണ്ടായിട്ടും ബലിയറുക്കാത്തവന്‍ നമ്മുടെ നമസ്കാരസ്ഥലത്തിന് അടുത്തു പോലും വരാവതല്ല).
ഈ ആയത്തിന്റെയും ഹദീസിന്റെയും അടിസ്ഥാനത്തില്‍ ബലി നിര്‍ബന്ധമാണ്‌ എന്നാണ് ഇമാം അബൂ ഹനീഫയുടെ മദ്ഹബ്. ഇത് 'സുന്നഃ മുഅക്കദ' (പ്രബലമായ സുന്നത്ത്) എന്നാണ് ബാക്കിയുള്ള മദ്ഹബുകള്‍. എന്തെങ്കിലും തടസ്സം ഇല്ലെങ്കിലല്ലാതെ ബലി ഒഴിവാക്കാന്‍ പാടില്ല എന്നാണ് പൊതു അഭിപ്രായം.
ബലി ഉദ്ദേശിക്കുന്നയാള്‍ മൃഗത്തെ (ആടുമാടുകള്‍, ഒട്ടകം) സ്വന്തമായി അറുക്കുന്നതും അതില്‍നിന്ന് ഭക്ഷിക്കലും സുന്നത്താണ്. ബലിമാംസം മൂന്ന് ഭാഗമാക്കി ഒരു ഭാഗം പാവങ്ങള്‍ക്ക് ദാനം ചെയ്യുകയും ഒരു ഭാഗം ഹദിയ്യ (പാവങ്ങളല്ലാത്തവര്‍ക്കും സമ്മാനിക്കല്‍) ചെയ്യുകയും ബാക്കി ഒരു ഭാഗം സ്വന്തം ആവശ്യത്തിന് എടുക്കുകയും ചെയ്യുക എന്നതാണ് നബി തിരുമേനി പഠിപ്പിച്ച രീതി.

ബലിയുടെ പൈസ മറ്റു സേവനമേഖലകളില്‍ ഉപയോഗിക്കാമോ എന്ന ചോദ്യം ഉയരാറുണ്ട്. രണ്ടും രണ്ടായി കാണണം എന്നാണ് ഉത്തരം. പ്രതിസന്ധികള്‍ ഉണ്ടാവുമ്പോള്‍ കൈമെയ് മറന്ന് പ്രവര്‍ത്തിക്കുക എന്നതാണ് ഇസ്‌ലാം ആവശ്യപ്പെടുന്നത്. അത്തരം അനിവാര്യ ഘട്ടങ്ങളില്‍ തനിക്ക് മിച്ചമുള്ളതൊക്കെ അല്ലാഹുവിന്റെ മാര്‍ഗത്തില്‍ ചെലവാക്കാന്‍ വിശ്വാസി കല്‍പിക്കപ്പെട്ടിരിക്കുന്നു. ഒരാളുടെ സ്വന്തം എന്ന് പറയുന്നത് മറ്റുള്ളവരുടെ അവകാശം കഴിഞ്ഞ് ബാക്കിയാകുന്നത് മാത്രമാണ്. സകാത്ത്, ഉദുഹിയ്യത്ത് എന്നിങ്ങനെ ഇസ്‌ലാം കല്‍പിച്ച കാര്യങ്ങള്‍ നിർവഹിച്ച ശേഷം ബാക്കിയാവുന്നതാണ് ഒരാളുടെ സ്വന്തം. അതില്‍നിന്നാണ് അവന്‍ ചെലവാക്കേണ്ടത്. ആരാധനകള്‍ നബി തിരുമേനി കാണിച്ച രീതിയില്‍ വേണം നിർവഹിക്കാന്‍. അതില്‍ മാറ്റങ്ങള്‍ വരുത്താന്‍ അനുവാദമില്ല.
ഉദുഹിയ്യത്ത് ഫിത്വ്്ര്‍ സകാത്ത് പോലെയല്ല. ഫിത്വ്്ര്‍ സകാത്തിന്റെ ഉദ്ദേശ്യം ‘നോമ്പില്‍ വന്ന വീഴ്ചകള്‍ക്ക് പരിഹാരം, പാവങ്ങള്‍ക്ക് ഭക്ഷണം’ എന്നാണ് നബി (സ) വിശദീകരിച്ചിരിക്കുന്നത്. ഉദുഹിയ്യത്ത് ആവട്ടെ, അല്ലാഹുവിന്റെ അനുഗ്രഹങ്ങള്‍ക്ക് നന്ദി പ്രകടിപ്പിക്കാന്‍ വേണ്ടിയാണ് നിശ്ചയിക്കപ്പെട്ടിരിക്കുന്നത്. രണ്ടും ഒരുപോലെയല്ല. ഫിത്വ്്ര്‍ സകാത്ത് പാവങ്ങള്‍ക്ക് പ്രയോജനപ്പെടുന്ന രീതിയില്‍ പണമായോ ഭക്ഷണമായോ നല്‍കാം. എന്നാല്‍, ഉദുഹിയ്യത്ത് നബി കാണിച്ച മാതൃകയില്‍ തന്നെ നിർവഹിക്കപ്പെടണം. രണ്ടിന്റെയും വിതരണ രീതിയും വ്യത്യസ്തമാണ്.
പുത്തൻ വാദങ്ങള്‍ ചിലയാളുകള്‍ സ്വയം മെനഞ്ഞുണ്ടാക്കുന്നതാണ്. അത്തരം ആളുകളെ സംബന്ധിച്ചേടത്തോളം അവരുടെ ഖുര്‍ആനും സുന്നത്തുമെല്ലാം അവരുടെ മനസ്സുതന്നെയാണ്. l

സൃഷ്ടികര്‍ത്താവിന്റെ നിയമസംഹിതകള്‍ ജനകോടികളിലേക്ക് എത്തിച്ചുകൊടുക്കാനായി ദൈവം തമ്പുരാന്‍ ഭൂമിയിലേക്ക് നിയോഗിച്ചിരുന്ന വിശുദ്ധ വ്യക്തികളാണ് പ്രവാചകന്മാര്‍. അവരിലെ അവസാനത്തെ പ്രവാചകനും കാരുണ്യത്തിന്റെ കേദാരവുമായിരുന്നു മുഹമ്മദ് നബി. എല്ലാം തികഞ്ഞ മനുഷ്യനായിരുന്നു അദ്ദേഹം. തന്റെ അനുയായികള്‍ നിരവധി രോഗങ്ങളാല്‍ ബുദ്ധിമുട്ടുന്നത് കണ്ടപ്പോൾ, ആ മനുഷ്യ സ്‌നേഹി രോഗങ്ങള്‍ മാറ്റാനും ആരോഗ്യം നിലനിര്‍ത്താനും ഏറെ ഉപകരിക്കുന്നതും ചെലവു കുറഞ്ഞതുമായ ഒട്ടേറെ നിര്‍ദേശങ്ങൾ അനുയായികള്‍ക്ക് നല്‍കുകയുണ്ടായി. പ്രവാചകന്റെ ഉപദേശങ്ങള്‍ ജീവിതത്തിൽ പ്രാവർത്തികമാക്കി അവർ രോഗമുക്തി നേടുകയും ചെയ്തിരുന്നു.
പലവിധ രോഗങ്ങളുടെയും പിടിയിലമർന്നിരിക്കുന്നു വര്‍ത്തമാന കാലം. ഒരു പൈസ ചെലവില്ലാത്തതും ഏറെ ഉപകരിക്കുന്നതുമാണ് അന്ത്യപ്രവാചകന്റെ ആരോഗ്യ ചികിത്സാവിധികള്‍ എന്ന് നാം മനസ്സിലാക്കണം. രോഗങ്ങള്‍ കൂടുതലും ഉണ്ടാകുന്നത് ഭക്ഷണത്തിലൂടെയാണ്. കൊഴുപ്പ് കൂടിയതും കൃത്രിമത്വം നിറഞ്ഞതുമായ ഭക്ഷണസാധനങ്ങള്‍ കഴിച്ചാല്‍ അത് കുടലുകളില്‍ കെട്ടിക്കിടക്കും. അവ ദഹിപ്പിക്കാൻ കുടല്‍ നന്നേ പാടുപെടും. ചിലപ്പോള്‍ ദഹിപ്പിക്കാന്‍ കുടലിന് കഴിയാതെ വരും. ദഹനം പൂര്‍ത്തിയാവുന്നതോടെ ഭക്ഷണത്തിലെ വിഷാംശങ്ങള്‍ രക്തത്തില്‍ കലരുകയും അയാൾ രോഗിയായി മാറുകയും ചെയ്യുന്നു. രക്തക്കുഴലുകളിലൂടെ ഒഴുകുന്ന രക്തം അതിന്റെ പാര്‍ശ്വഭിത്തികളില്‍ ചെലുത്തുന്ന സമ്മര്‍ദം മൂലം രക്തസമ്മര്‍ദം ഉണ്ടാകുന്നു. വഴിവിട്ടുള്ള ഭക്ഷണ ക്രമമാണ് അതിന് കാരണം.

കൊഴുപ്പിലൂടെ ഉണ്ടാകുന്ന രോഗങ്ങള്‍ മാറ്റാന്‍ മരുന്നുകള്‍കൊണ്ട് പലപ്പോഴും കഴിയാതെ വരുന്നു. ഇത് പരിഹരിക്കാനായി, കൊഴുപ്പ് നിറഞ്ഞ ആഹാരസാധനങ്ങള്‍ പരമാവധി കുറക്കുകയോ ഒഴിവാക്കുകയോ ചെയ്താല്‍ രോഗങ്ങള്‍ ഒരു പരിധിവരെ മാറ്റാനാകുമെന്ന് പ്രവാചകൻ കണ്ടിരുന്നു. അത് വൈദ്യശാസ്ത്രവും ഇന്ന് ശരിവെച്ചിട്ടുണ്ട്. രക്തത്തിലെ ഉയര്‍ന്ന നിലയിലുള്ള കൊളസ്‌ട്രോള്‍ കുറക്കാനും വിളര്‍ച്ച തടയാനും ആസ്തമക്ക് ശമനം ഉണ്ടാക്കാനും വന്‍കുടലില്‍ ഉണ്ടാകുന്ന വ്രണങ്ങള്‍ കരിക്കാനും ഏറെ ഉപകരിക്കുന്നതാണ് വെളുത്തുള്ളി. ഏറെ ഔഷധ ഗുണങ്ങളുള്ള തേന്‍ പോലുള്ളവ ഭക്ഷണത്തില്‍ കൂടുതല്‍ ഉള്‍പ്പെടുത്തണമെന്നും തിരുമേനി പറഞ്ഞിട്ടുണ്ട്. ആന്തരികാവയവങ്ങളെ ശുദ്ധീകരിക്കുമെന്നതിനാൽ ശുദ്ധജലം ധാരാളമായി കുടിക്കാന്‍ അദ്ദേഹം അനുയായികളെ ഉണർത്തിയിരുന്നു. വെള്ളം കുടിക്കുമ്പോള്‍ ഇരുന്നു വേണം കുടിക്കാനെന്നും, അല്‍പാല്‍പമായും സാവധാനത്തോടു കൂടിയും മാത്രമേ വെള്ളം കുടിക്കാവൂ എന്നും ഈശ്വരസ്മരണ വെള്ളം കുടിക്കുമ്പോള്‍ വേണമെന്നും പറഞ്ഞിരുന്നു. അപ്പോള്‍ ശരീരത്തിനുള്ളില്‍ മടങ്ങിക്കിടക്കുന്ന കുഴുലകളിലൂടെ സാവധാനം വെള്ളം ഒഴുകിയെത്തും.

ഇരുന്നുകൊണ്ട് അല്‍പം വെള്ളം കുടിക്കുകയാണ് നബിയുടെ പതിവ്. ആ വെള്ളം ഇറങ്ങിയതിനുശേഷവും ശ്വാസോഛ്വാസം ചെയ്തതിനുശേഷവും മാത്രമേ ബാക്കി വെള്ളം കുടിച്ചിരുന്നുള്ളൂ. വിശക്കുമ്പോള്‍ വെള്ളം കുടിക്കണമെന്നും അപ്പോള്‍ കൊഴുപ്പ് ശരീരത്തില്‍നിന്ന് അലിഞ്ഞുപോകുമെന്നും അതിലൂടെ ശരീരത്തിന്റെ അമിത ഭാരം കുറഞ്ഞ് മനസ്സ് ശാന്തമാകുമെന്നും ശരീരത്തിന് തിളക്കം ഉണ്ടാകുമെന്നും യുവത്വം നിലനില്‍ക്കുമെന്നും മാനവികതയുടെ മാര്‍ഗദര്‍ശകനായ തിരുമേനി മനസ്സിലാക്കിയിരുന്നു. വെള്ളം കുടിച്ചുകൊണ്ടിരുന്നാൽ ത്വക്കില്‍ ജലാംശം ഉണ്ടാകും. ത്വക്ക് ചുളിയില്ല, ത്വക്കിന് വരള്‍ച്ച ഉണ്ടാകില്ല.

ശരീരം തണുപ്പിക്കാനും വിഷാദ രോഗങ്ങള്‍, മലബന്ധം, പ്രമേഹം എന്നിവ മാറ്റാനും ജലത്തിന്റെ ഉപയോഗം മൂലം കഴിയും.
ദിവസവും അഞ്ച് നേരം മൂന്ന് പ്രാവശ്യം വീതം ചില പ്രധാന ശരീരാവയവങ്ങള്‍ കഴുകുന്നത് ആരോഗ്യത്തിനും ഈശ്വരന്റെ തൃപ്തി സമ്പാദിക്കാനും കണ്ണിന് കൂടുതല്‍ കാഴ്ച ഉണ്ടാകാനും ഉപകരിക്കുമെന്നും സര്‍വ ലോകത്തിനും അനുഗ്രഹമായ നബി മനസ്സിലാക്കിയിരുന്നു. പൊടിപടലങ്ങള്‍ മൂക്കിനുള്ളില്‍ കയറിയാല്‍ അത് കടന്നുപോകുന്നത് ശ്വാസനാളിയിലേക്കാണ്. ഇത് ഭാവിയില്‍ ശ്വാസകോശ സംബന്ധമായ അസുഖങ്ങള്‍ക്ക് കാരണമാകും. അവയവങ്ങൾ വൃത്തിയാക്കുന്നതോടൊപ്പം ദിവസവും 5 നേരം മൂക്കിന്റെ ഉള്‍ഭാഗം കൂടി വൃത്തിയാക്കുന്നതും മൂക്കിനുള്ളില്‍ വെള്ളം കയറ്റിച്ചീറ്റുന്നതും ശ്വാസകോശ സംബന്ധമായ പല അസുഖങ്ങളും വരാതെ നോക്കാൻ ഉപകരിക്കും.

മനുഷ്യ ശരീരത്തിലെ ഒരു മര്‍മ സ്ഥാനമാണ് മുഖം. അതു കൂടക്കൂടെ വെള്ളംകൊണ്ട് കഴുകണം. കഴുകുന്നതോടെ മുഖം നല്ലതുപോലെ തണുക്കും, പലവിധ അസുഖങ്ങള്‍ക്കും കുറവുവരും. ബോധക്ഷയം വരുമ്പോള്‍ വെള്ളം തളിക്കുന്നതും അതുകൊണ്ടാണ്. രണ്ടു കാലുകളും ദിവസവും 5 നേരം വൃത്തിയാക്കി കഴുകാന്‍ തിരുമേനി പറഞ്ഞിട്ടുണ്ടല്ലോ. വൃത്തികെട്ട സ്ഥലങ്ങളില്‍ കൂടി നമുക്ക് സഞ്ചരിക്കേണ്ടിവരും. ഇതുമൂലം കാലിലും വിരലുകള്‍ക്കിടയിലും നഖത്തിന് താഴെയും നിരവധി രോഗാണുക്കള്‍ പറ്റിപ്പിടിച്ചിരിക്കാനിടയുണ്ട്.

ആഹാരം കുറേശ്ശെ കുറേശ്ശെയായേ കഴിക്കാവൂ എന്നും ചവച്ചരച്ച് വേണം കഴിക്കേണ്ടതെന്നും ഇടവേളകളില്‍ ഒന്നും കഴിക്കാതിരിക്കാന്‍ ശ്രദ്ധിക്കണമെന്നും പറഞ്ഞിട്ടുണ്ട്. ഭക്ഷണം കഴിക്കുമ്പോള്‍ ഇരുന്നു വേണം കഴിക്കേണ്ടതെന്നും നടന്നും നിന്നും ഭക്ഷണം കഴിക്കരുതെന്നും നിർദേശിച്ചിട്ടുണ്ട്. വയർ നിറച്ച് ആഹാരം കഴിക്കരുതെന്നാണ് മറ്റൊരു നിർദേശം. വയറിനെ മൂന്നായി തിരിച്ച് അതില്‍ ഒരു ഭാഗം ഭക്ഷണത്തിനും ഒരു ഭാഗം വെള്ളത്തിനും ഒരു ഭാഗം ശ്വാസോഛ്വാസത്തിനുമായി നീക്കിവെക്കണം. അത് ദഹനത്തിന് നല്ലതാണ്.

പ്രപഞ്ചത്തിന്റെ പരമ രഹസ്യം ശാസ്ത്രീയമായി അന്വേഷിച്ചിരുന്നവരാണ് ഋഷിമാര്‍. ഒരു നേരം ഭക്ഷണം കഴിക്കുന്നവരെ മഹാ യോഗി എന്നും രണ്ട് നേരം ഭക്ഷണം കഴിക്കുന്നവരെ മഹാ ഭോഗി എന്നും മൂന്ന് നേരം ഭക്ഷണം കഴിക്കുന്നവരെ മഹാ ദ്രോഹി എന്നും അവര്‍ വിളിച്ചിരുന്നു.

കുറച്ച് ഭക്ഷിക്കുക, കൂടുതല്‍ ജീവിക്കുക - അതായിരുന്നു നബിയുടെ സമീപനം. മാനവരാശിക്ക് ഏറെ ഉപകരിക്കുന്നതും ഏതൊരാളുടെയും ആരോഗ്യം നിലനിര്‍ത്താനായി ഉപകരിക്കുന്നതുമായ നിരവധി ഉപദേശങ്ങളും നിര്‍ദേശങ്ങളും അദ്ദേഹത്തിന്റെ അധ്യാപനങ്ങളിൽ കണ്ടെത്താനാവും. l

എപ്പോഴെങ്കിലും മുസ്ലിമായതിൽ സമാധാനം തോന്നിയിട്ടുണ്ടോ? അതായത്, ദൈവവിശ്വാസിയായത് കാരണം അനുഭവപ്പെടുന്ന സമാധാനം? വളരെ ലഘുവായി പറഞ്ഞാൽ, പലപ്പോഴും ഓട്ടോയിലൊക്കെ ഒറ്റക്ക് സഞ്ചരിക്കുമ്പോൾ ഞാനീ സമാധാനം അനുഭവിച്ചിട്ടുണ്ട്. നമ്മുടെ സാമൂഹികാന്തരീക്ഷവും അവസ്ഥയും എത്രത്തോളം മോശമാണെന്ന് ദിനംപ്രതി നാം സാക്ഷികളാവുന്ന സംഭവവികാസങ്ങളിൽനിന്ന് വ്യക്തമാണ്. ഇത്തരമൊരു സാഹചര്യത്തിൽ, പ്രത്യേകിച്ച് സ്ത്രീയുമാണെങ്കിൽ കാര്യമായ ജാഗ്രത അനിവാര്യമാണ്. കായികബലം കൊണ്ടും മാനസിക ബലം കൊണ്ടും നമ്മൾ എത്രതന്നെ കരുത്തരാണെങ്കിലും (ഇത് രണ്ടും പ്രധാന ഘടകങ്ങൾ തന്നെയാണ്) എല്ലാ രക്ഷാകവചങ്ങളും പിളർന്നുപോവുന്ന സാഹചര്യം നാം നേരിടാറുണ്ട്. കാര്യം ഇങ്ങനെയൊക്കെയായിരിക്കെ അത്തരം അവസ്ഥകളിൽ ഞാനെന്റെ റബ്ബിന്റെ നിരീക്ഷണത്തിൽ ആണല്ലോ എന്ന ഏറ്റവും വലിയ സമാധാനം എനിക്കുണ്ടാവാറുണ്ട്. അല്ലാഹുവിന്റെ നിരീക്ഷണത്തെ സംബന്ധിച്ച് നമ്മൾ ഒരുപാട് കേൾക്കാറുള്ളതാണ്. തെറ്റുകളിൽനിന്ന് അകന്നുനിൽക്കാൻ, തെറ്റുകളിലേക്ക് നയിക്കുന്നവയിൽനിന്ന് സൂക്ഷ്മത പുലർത്താനൊക്കെ പ്രേരകമാവുന്നത് അല്ലാഹുവിന്റെ നിരീക്ഷണം എനിക്കു മേലുണ്ട് എന്ന ഓർമയാണ്. ഈ നിരീക്ഷണം തന്നെ കുളിരണിയുന്ന സമാധാനമാകുന്ന മറ്റൊരവസ്ഥയാണ് ഞാൻ പറഞ്ഞുവെച്ചത്.
"അറിയുക: നിശ്ചയമായും അല്ലാഹു എല്ലാം അറിയുന്നവനാണ്."
സർവ സംഗതികളും അറിയുന്ന നാഥന്റെ നിരീക്ഷണത്തിലാണെന്ന ഓർമ എല്ലാവിധ ആശങ്കകളിൽ നിന്നും ആകുലതകളിൽനിന്നും നമ്മെ മോചിപ്പിക്കും. ഇത്തരം സന്ദർഭങ്ങളിൽ ദൈവവിശ്വാസമില്ലാത്ത ആൾക്ക് എന്ത് സമാധാനമാണ് ഉണ്ടാവുക എന്ന് ഞാൻ അത്ഭുതപ്പെടാറുണ്ട്. ദൈവവിശ്വാസം നിറഞ്ഞ ഹൃദയത്തിന് മാത്രം ലഭിക്കുന്ന സമാധാനവും അനുഭൂതിയും നഷ്ടപ്പെട്ടവരെ കുറിച്ച് സഹതാപം തോന്നാറുണ്ട്.

വിശ്വാസം പല രീതിയിലാണ് നമുക്ക് താങ്ങാവുക. അല്ലാഹു സമ്മാനമായി തന്ന മകനെ അവൻ തന്നെ തിരിച്ചുചോദിച്ചാൽ സന്തോഷത്തോടെ കൊടുത്തയക്കേണ്ടേ എന്ന് തന്റെ പ്രിയതമനെ സാന്ത്വനിപ്പിച്ച ഉമ്മു സുലൈമുമാരുടെ മാതൃകകൾ ഇന്ന് ഫലസ്ത്വീനിൽ നമുക്ക് കാണാം. ജീവനുതുല്യം സ്നേഹിക്കുന്ന പൊന്നോമനയെ യാത്രയയക്കുമ്പോൾ 'അൽഹംദു ലില്ലാഹ്' എന്നു പറയാൻ അവർക്ക് കരുത്തേകുന്നത്, സ്വന്തം ജീവനെക്കാൾ ഏറെ സ്നേഹിക്കുന്ന നാഥനിലേക്കാണ് തങ്ങൾ ആ കുഞ്ഞുങ്ങളെ അയച്ചിരിക്കുന്നത് എന്ന സമാധാനമാണ്. മനസ്സിന്റെ ദുർബലമായ പ്രതലങ്ങളിൽ വഴുതിവീഴുന്ന വിശ്വാസമാവുമ്പോഴും, പ്രതിസന്ധികൾക്കു മുന്നിൽ ചഞ്ചലമാവുന്ന വിശ്വാസമാവുമ്പോഴുമാണ് ഐഹിക വിഷമങ്ങൾ നമ്മെ പ്രയാസപ്പെടുത്തുന്നത്. വിശ്വാസത്തെ ബാധിക്കുന്ന ഈ ദൗർബല്യത്തെ മാറ്റിയെടുത്ത് സുദൃഢമായ വിശ്വാസം വാർത്തെടുത്താൽ മതി വാനോളം വരുന്ന ക്ലേശങ്ങളെല്ലാം വാനലോക സ്രഷ്ടാവിന്റെ സ്മരണകൊണ്ട് മാത്രം ഇല്ലാതാകാൻ.
സാമാന്യ ബുദ്ധിക്ക് ഉൾക്കൊള്ളാൻ കഴിയാത്ത ധൈര്യവും ദൃഢതയും ഈ സ്മരണകൊണ്ട് നമുക്കാർജിക്കാം. തന്റെ മൂന്ന് മക്കളുടേയും രക്തസാക്ഷിത്വം അത്യാഹ്ലാദത്തോടെ ആഘോഷിച്ച ഫലസ്ത്വീനിലെ രക്തസാക്ഷികളുടെ മാതാവ് എന്നറിയപ്പെടുന്ന ഉമ്മു നിദാലുമായുള്ള ഒരഭിമുഖത്തിൽ, ആ ധീര വനിതയുടെ ഉജ്ജ്വലമായ വാക്കുകൾ ഉൾക്കൊള്ളാൻ കഴിയാതെയുള്ള അവതാരകയുടെ പ്രതികരണങ്ങൾ തെളിയിക്കുന്നതും ഇതുതന്നെയാണ്.
"റബ്ബിന്റെ ദൃഷ്ടിയിൽ പെടാതെയോ, സുവ്യക്തമായ പട്ടികയിൽ രേഖപ്പെടുത്താതെയോ ആകാശത്തോ ഭൂമിയിലോ ഒരു അണുതുല്യമായ വസ്തുവുമില്ല. അതിലും ചെറുതോ വലുതോ ആയ വസ്തുവുമില്ല."
എല്ലാം നിയന്ത്രിക്കുന്ന നാഥനെയോർത്താൽ, അവന്റെ അറിവിൽനിന്ന് മറയുന്നതായൊന്നുമില്ല എന്ന സത്യമോർത്താൽ, ലോകത്തെ ഏതു വലിയ നഷ്ടവും നമുക്ക് ക്ഷമയോടെ സഹിക്കാം. യഅ്ഖൂബ് നബി(അ)യുടേതു പോലുള്ള സുന്ദരമായ ക്ഷമയോടെ. l

'അൽ അഖ്ലുസ്സലീം ഫിൽ ജിസ്മിസ്സലീം' (ആരോഗ്യമുള്ള ശരീരത്തിൽ ആരോഗ്യമുള്ള ചിന്ത) എന്ന അറബി പഴമൊഴി ഏറെ പ്രസിദ്ധമാണ്. വൈജ്ഞാനിക ശാക്തീകരണം പോലെ ആരോഗ്യ ശാക്തീകരണവും നിര്‍ബന്ധമാക്കേണ്ട ഒരു കാലത്താണ് നാം ജീവിക്കുന്നത്. കമ്പ്യൂട്ടര്‍ ഗെയിമുകളിൽ സമയം കളഞ്ഞും, ബര്‍ഗറും സാന്റ്‌വിച്ചും കഴിച്ച് ടി.വി കാഴ്ചകള്‍ക്ക് മുന്നില്‍ ചടഞ്ഞിരുന്നും പൊണ്ണത്തടിയരായി മാറിയ ധാരാളം കുട്ടികളെ നാം ദിനേന കാണുന്നു. വീടിനുള്ളില്‍ ഗെയിം റൂമുകള്‍ വരെ സജ്ജീകരിച്ച് ഊണും ഉറക്കവുമെല്ലാം അതിനുള്ളിലാക്കിയ വീഡിയോ ഗെയിം അഡിക്റ്റുകളായ കുട്ടികളും ഇന്ന് കുറവല്ല. ലോകാരോഗ്യ സംഘടനയുടെ കണക്കനുസരിച്ച് ഇന്ന് ലോകത്താകമാനം 39 മില്യൻ കുട്ടികള്‍ അമിത വണ്ണം കൊണ്ട് പ്രയാസപ്പെടുന്നുണ്ട്. 2025 ആകുമ്പോഴേക്കും ഇത് 167 മില്യനിലേക്ക് എത്തുമെന്നും ലോകാരോഗ്യ സംഘടന മുന്നറിയിപ്പ് നൽകുന്നു. ഈ സാഹചര്യത്തിലാണ് ഇന്റഗ്രേറ്റഡ് എജുക്കേഷന്‍ കൗണ്‍സില്‍ ഇന്ത്യ(IECI)യില്‍ അഫിലിയേറ്റ് ചെയ്ത മദ്റസാ വിദ്യാർഥികള്‍ക്കായി കേരള മദ്റസാ എജുക്കേഷന്‍ ബോര്‍ഡ് (KMEB) സംഘടിപ്പിക്കുന്ന 'അറ്റ്‌ലെറ്റിസ്മോ കായിക മത്സരങ്ങള്‍' ശ്രദ്ധേയമാകുന്നത്. മദ്റസ, സബ്‌ ജില്ല, സോണല്‍, സ്റ്റേറ്റ് തലങ്ങളിലായി സംഘടിപ്പിക്കുന്ന കായിക മത്സരങ്ങളും ഫുട്‌ബോള്‍, ബാഡ്‌മിന്റണ്‍ മത്സരങ്ങളുമാണ് അതിന്റെ ഭാഗമായി നടക്കുന്നത്.

ഒരുപക്ഷേ, രാജ്യത്ത് ആദ്യമായിട്ടാവാം ഒരു മദ്റസാ ബോര്‍ഡിന്റെ കീഴില്‍ സംസ്ഥാന തലം വരെ നീണ്ടുനില്‍ക്കുന്ന കായിക മത്സരങ്ങള്‍ സംഘടിപ്പിക്കപ്പെടുന്നത്. വിദ്യാഭ്യാസ മേഖലയിലെ കരിക്കുലര്‍, കോ കരിക്കുലര്‍ വിഭജനം ഇല്ലാതാവുകയും പഠന പ്രവര്‍ത്തനങ്ങളുടെ മുഖ്യ ധാരയില്‍ തന്നെ ആര്‍ട്സ് & സ്പോര്‍ട്സ് ആക്റ്റിവിറ്റികള്‍ സ്ഥാനം പിടിക്കുകയും ചെയ്ത ഇക്കാലത്ത് മദ്റസാ പഠന രീതികളിലും തദനുസൃതമായ മാറ്റങ്ങള്‍ ഉണ്ടാവണമെന്ന് ഇതിന് നേതൃത്വം നൽകുന്ന കെ.എം.ഇ.ബി ഉദ്ദേശിക്കുന്നു.

സ്പോര്‍ട്സ് വഴി കിട്ടുന്ന ടീം ബില്‍ഡിംഗും, ഗ്രൂപ്പ് ഡൈനാമിക്സും ജീവിതത്തിൽ എന്നേക്കും വേണ്ട സ്കില്ലുകള്‍ അഭ്യസിക്കുന്ന മദ്റസാ പഠനത്തിന്റെ പ്രധാന പഠന ഫലങ്ങള്‍ (learning outcomes) ആവേണ്ടതുണ്ട്. കലാ മത്സരങ്ങളില്‍ ഒരു കാലത്തും പങ്കെടുക്കാന്‍ കഴിയാത്ത, എന്നാല്‍ കായിക അഭിരുചിയുള്ള കുട്ടികളുടെ ചോദനകളെ കൂടി പരിഗണിക്കേണ്ടതുണ്ട് എന്ന ചിന്തയില്‍ നിന്നുകൂടിയാണ് 'അറ്റ്‌ലെറ്റിസ്മോ' എന്ന ആശയം പിറവി കൊള്ളുന്നത്. നമ്മുടെ വിദ്യാർഥികളെ സംബന്ധിച്ചേടത്തോളം, പാഠ്യ-പാഠ്യേതര രംഗത്ത് അവര്‍ അഭിമുഖീകരിക്കുന്ന എല്ലാവിധ സമ്മർദങ്ങളെയും അകറ്റിനിര്‍ത്തി അങ്ങേയറ്റത്തെ ആത്മവിശ്വാസത്തോടെ ജീവിതത്തെ സമീപിക്കാനുള്ള ഒരു വഴി കൂടിയാണ് ഇത്തരം കായികോത്സവങ്ങള്‍. ആരോഗ്യമെന്നാല്‍ അത് സിക്സ് പാക്കും, പെരുപ്പിച്ച മസിലുമാണെന്ന മിഥ്യാ ധാരണ ഇന്ന് നല്ലൊരു വിഭാഗം വിദ്യാർഥികളിലും യുവജനങ്ങളിലും വേരുറച്ചിട്ടുണ്ട്. അതിനു വേണ്ടി കൃത്രിമ പ്രോട്ടീനുകൾ ഉപയോഗിക്കുന്നതും, ഒട്ടും ആശാസ്യമല്ലാത്ത ഭക്ഷണ ശീലങ്ങൾ സ്വീകരിക്കുന്നതും വളര്‍ന്നുവരുന്ന തലമുറയെ രോഗാതുരമാക്കുന്നുണ്ട്. ശരിയായ കായിക സംസ്കാരത്തിലേക്ക് അവരെ വഴി നടത്തുക എന്നതാണ് അതിനുള്ള പരിഹാരം. അതിലേക്കുള്ള ചെറിയ ചുവടുവെപ്പാണ് അറ്റ്‌ലെറ്റിസ്മോ കായികോത്സവം. ഇസ്‌ലാം മുന്നോട്ടു വെക്കുന്ന കായിക സംസ്കാരം സമൂഹത്തിന് മുമ്പില്‍ സമര്‍പ്പിക്കുക എന്നതും ഇത്തരം പദ്ധതികളുടെ ലക്ഷ്യമാണ്.

വിശ്വാസവും വിജ്ഞാനവും പോലെത്തന്നെ ആരോഗ്യമുള്ള ശരീരം ഏതൊരു മനുഷ്യന്റേയും ആഗ്രഹം പോലെത്തന്നെ അവകാശവും കൂടിയാവണം. അതിനാവശ്യമായ പ്രവര്‍ത്തനങ്ങള്‍ കാര്യക്ഷമമായി നടക്കേണ്ടത്, ശരീരത്തിന്റെ ആകാരവും പേശികളും മറ്റ് അനുബന്ധ അവയവങ്ങളും പെട്ടെന്ന് വളരുകയും പാകപ്പെടുകയും ചെയ്യുന്ന ശൈശവത്തിലാണ്. അതുകൊണ്ട് തന്നെ കളിയും ചലനാത്മകതയും ജന്മവാസനയായുള്ള കുട്ടികളെ ചില്ലിലടച്ച് തളര്‍ത്താതെ മണ്ണിലിറക്കി വളര്‍ത്താന്‍ നമുക്കാവണം. അവരില്‍ അന്തര്‍‌ലീനമായ ചോദനകളെ ക്രിയാത്മകമായി ഉപയോഗപ്പെടുത്തുക വഴി, പുതിയ ലോകത്തെ ആരോഗ്യമുള്ള തലമുറക്കായി മുന്നില്‍ നില്‍ക്കേണ്ടവര്‍ അവരുടെ രക്ഷിതാക്കളും അധ്യാപകരും തന്നെയാണ്. ആ അർഥത്തില്‍ അറ്റ്‌ലെറ്റിസ്മോ നിര്‍‌വഹിക്കുന്നത് കാലഘട്ടം ആവശ്യപ്പെടുന്ന ദൗത്യം തന്നെയാണെന്നതില്‍ സംശയമേതുമില്ല. l
(കേരള മദ്റസാ എജുക്കേഷന്‍ ബോര്‍ഡ് ഡയറക്ടറാണ് ലേഖകൻ)
[email protected]

“നാഗരികതയിലും സാമൂഹിക ഘടനയിലും സ്ത്രീയെ അവളുടെ നൈസർഗികമായ സ്വത്വം പരിഗണിച്ചും യഥാർഥ പ്രകൃതം ഉൾക്കൊണ്ടും അവൾക്ക് അന്തസ്സും അഭിമാനബോധവും ആദരവും പദവിയും ലഭ്യമാക്കിയത് ഇസ് ലാം മാത്രമാണെന്ന് നിസ്സംശയം പറയാം. യാഥാർഥ്യ ബോധത്തോടെ സ്ത്രീത്വത്തിന്റെ പദവി ഉയർത്തുകയും അവളെ മുഖ്യധാരയോടൊപ്പം പരിഗണിക്കുകയും ചേർത്തുനിർത്തുകയും ചെയ്യാൻ ഇസ് ലാമിന് മാത്രമേ കഴിയൂ എന്ന സത്യം കാലം തെളിയിച്ചുകൊണ്ടിരിക്കുകയുമാണ്."
-സയ്യിദ് അബുൽ അഅ്ലാ മൗദൂദി

ഇസ് ലാമിക ചരിത്രത്തിലുടനീളം മനുഷ്യജീവിതത്തിന്റെ വിവിധ തുറകളില്‍ പ്രാഗത്ഭ്യം തെളിയിച്ച സ്ത്രീജീവിതങ്ങള്‍ അടയാളപ്പെട്ടിട്ടുണ്ട്. പ്രവാചകന്റെ ആദ്യ പത്നി ഖദീജ ബിന്‍ത് ഖുവൈലിദ് മുതൽ ഇങ്ങോട്ട് വിജ്ഞാനം, കല, സാഹിത്യം, കച്ചവടം, രാഷ്ട്രീയം തുടങ്ങിയ മേഖലകളില്‍ തിളങ്ങിനിന്ന എണ്ണമറ്റ മഹതികളെ നമുക്ക് ചരിത്രത്തില്‍നിന്ന് കണ്ടെടുക്കാം. ആത്മാഭിമാനമുള്ള വസ്ത്രധാരണവും അന്തസ്സാര്‍ന്ന പെരുമാറ്റവും സ്രഷ്ടാവിനോടുള്ള അങ്ങേയറ്റത്തെ കൂറും വിധേയത്വവുമാണ് മുസ് ലിം സ്ത്രീയുടെ മുഖമുദ്ര.
എന്നാല്‍, ചാനല്‍ ചര്‍ച്ചകള്‍ മുതല്‍ വൈറ്റ് ഹൗസ് വരെ മുസ് ലിം പെണ്ണിന്റെ വ്യവഹാര മണ്ഡലങ്ങളായി മാറിയിട്ടും മതനിയമങ്ങൾ, പുരുഷാധിപത്യം, പർദ, ഹിജാബ് തുടങ്ങിയ സംജ്ഞകളിൽ പെട്ട് പൊറുതിമുട്ടുന്നവളായാണ് ആധുനികത അവളെ ചിത്രീകരിക്കുന്നത്. ഇതിൽനിന്ന് ഒട്ടും വ്യത്യസ്തമല്ല കലാലയങ്ങളിലെ മുസ് ലിം വിദ്യാർഥിനിയെ കുറിച്ച് നിലനിൽക്കുന്ന പൊതുധാരണകളും. ദൃശ്യ മാധ്യമങ്ങളും സമൂഹ മാധ്യമങ്ങളും ഈ പൊതുബോധത്തെ രൂപപ്പെടുത്തുന്നതില്‍ വലിയ പങ്കുവഹിക്കുന്നു.

അതേസമയം, മുസ് ലിം വിദ്യാർഥിനിയുടെ രാഷ്ട്രീയ ബോധവും വൈജ്ഞാനിക ശേഷിയും നേതൃപാടവവും രാജ്യം തിരിച്ചറിഞ്ഞ നാളുകൾക്കാണ് നമ്മൾ സാക്ഷ്യം വഹിച്ചുകൊണ്ടിരിക്കുന്നത്. ഇസ് ലാമോഫോബിയയും സവർണ ഹിന്ദുത്വ ഫാഷിസവും ലിബറൽ ആശയങ്ങളും പൊതുബോധത്തെയും ഭരണകൂട അജണ്ടകളെയും നിർണയിക്കുന്ന കാലത്ത് രാജ്യത്തെ വിവിധ കാമ്പസുകളിൽ തന്റെ ജീവിത ദർശനത്തിന്റെ ധീരവക്താവാണ് മുസ് ലിം വിദ്യാർഥിനി.
കാമ്പസുകളെ പിടിച്ചുകുലുക്കുന്ന പുരോഗമനാശയങ്ങളോടും ഇസ് ലാമോഫോബിക് ആകുലതകളോടും കാലഘട്ടത്തെ പ്രതിനിധാനം ചെയ്ത് ഇസ് ലാമികമായി പ്രതികരിക്കാൻ ഇന്ന് നമ്മുടെ കാമ്പസുകളിലെ വിദ്യാർഥിനിക്ക് സാധിക്കുന്നുണ്ട്. ഇന്ത്യയിലെ മുസ് ലിം സ്ത്രീയുടെ രാഷ്ട്രീയ ഇടപെടലുകൾക്ക് ധീരമായ മാതൃകകൾ തുറന്നിടുന്ന മുസ് ലിം വിദ്യാർഥിനി വിവിധ കാമ്പസുകളിൽ ഇന്ന് നിറസാന്നിധ്യമാണ്. പൗരത്വ ഭേദഗതി ബില്ലിനെതിരെയുള്ള സമരങ്ങളുടെ മുഖചിത്രമായി മാറിയ മുസ് ലിം വിദ്യാർഥിനികളും കര്‍ണാടകയിലെ ഹിജാബ് വിലക്കിനെതിരെ സധൈര്യം രംഗത്തു വന്ന പെൺകുട്ടികളും ഇതിന്റെ ഉദാഹരണങ്ങളാണ്.

ഫെമിനിസം, ജെൻഡര്‍ ന്യൂട്രാലിറ്റി, ലിബറലിസം പോലെ പ്രത്യക്ഷത്തില്‍ സ്ത്രീസ്വാതന്ത്ര്യത്തെ ഉയര്‍ത്തിപ്പിടിക്കുന്ന, എന്നാല്‍ യഥാർഥ സ്ത്രീസ്വത്വത്തിനു വിരുദ്ധവുമായ ആശയധാരകളാണ് ഇന്ന് ഏറ്റവും പുതിയ തലമുറയെ നയിച്ചുകൊണ്ടിരിക്കുന്നത്. ഈ സാഹചര്യത്തിലും പർദയും ഹിജാബുമണിഞ്ഞ സ്ത്രീകളെല്ലാം അടിച്ചമർത്തപ്പെട്ടവരാണ് എന്ന ഇടതു ലിബറൽ വാദങ്ങളെ, അതേ ഹിജാബ് അണിഞ്ഞുകൊണ്ടുതന്നെ നീതികേടിനെതിരെ ശബ്ദിച്ചും സാമൂഹിക സമരങ്ങളെ നയിച്ചും അവർ റദ്ദു ചെയ്യുന്നു. പ്രകടമായി തന്നെ ഇസ് ലാമിനോട് വലിയ തോതിൽ വെറുപ്പ് ഉദ്പാദിപ്പിക്കപ്പെടുന്ന അന്തരീക്ഷത്തിൽ തങ്ങളുടെ ജീവിത ദർശനത്തെ ആത്മാഭിമാനത്തോടെ ഉയർത്തിപ്പിടിക്കുകയും അതോടൊപ്പം അക്കാദമിക-സാമൂഹിക-രാഷ്ട്രീയ മുന്നേറ്റങ്ങളെ സാധ്യമാക്കുകയും ചെയ്ത വർത്തമാനങ്ങളാണ് അവർക്ക് പറയാനുള്ളത്.

ഈ രാഷ്ട്രീയ സാഹചര്യത്തിൽ, കേരളത്തിലെ മുസ് ലിം വിദ്യാർഥിനികൾ അഭിമുഖീകരിക്കുന്ന പ്രശ്നങ്ങളും അവയെ പ്രതിരോധിക്കാനുള്ള രീതിശാസ്ത്രവും ചർച്ച ചെയ്യപ്പെടേണ്ടതുണ്ട്. അവരെ അക്കാദമികമായി ശാക്തീകരിക്കുന്നതിനും, ഈ സങ്കീർണതകളോട് മുസ് ലിം സ്ത്രീയുടെ നിലപാട് എന്തായിരിക്കണമെന്ന് വ്യക്തമാക്കുന്നതിനും, മുസ് ലിം സ്വത്വത്തെ കുറിച്ചും വിശ്വാസത്തെ കുറിച്ചും വിദ്യാർഥിനികൾക്ക് കൃത്യമായ മാർഗനിർദേശങ്ങൾ നൽകുന്നതിനും സമഗ്രമായ പദ്ധതി ആവശ്യമാണ്.

ഈ ലക്ഷ്യത്തോടെ Uphold Iman, Uplift Izzah എന്ന മുദ്രാവാക്യമുയർത്തി 2023 ഡിസംബർ 25, 26 തീയതികളിലായി, സംസ്ഥാനത്തിനകത്തും പുറത്തുമുള്ള കാമ്പസുകളിലെ മുസ് ലിം വിദ്യാർഥിനികൾക്കായി മൗണ്ട് സീന (പത്തിരിപ്പാല, പാലക്കാട്) കാമ്പസിൽ ജി.ഐ.ഒ കേരള Discurso Muslimah എന്ന പേരിൽ സംസ്ഥാനതല കാമ്പസ് കോൺഫറൻസ് സംഘടിപ്പിക്കുകയാണ്.

മുഖ്യധാരാ മാധ്യമങ്ങൾ നിർമിച്ചെടുത്ത മുസ് ലിം വിരുദ്ധ ആഖ്യാനങ്ങളെ ചെറുത്ത് ബദൽ പ്ലാറ്റ്ഫോമുകളിലൂടെ സത്യങ്ങൾ പൊതുസമൂഹത്തിലേക്ക് എത്തിക്കാൻ പ്രാപ്തരായ വിദ്യാർഥിനികളെ വാർത്തെടുക്കുക, സർഗാത്മകമായ മാർഗങ്ങളിലൂടെ വിശ്വാസവും (ഈമാൻ) അന്തസ്സും (ഇസ്സത്ത്) മുറുകെപ്പിടിച്ച് അനീതിയെ എതിർക്കുന്നവരാകാൻ വിദ്യാർഥിനികളെ പ്രോത്സാഹിപ്പിക്കുക എന്നിവയാണ് കോൺഫറൻസിന്റെ പ്രധാന ലക്ഷ്യങ്ങൾ. പഠനം, ആശയവിനിമയം, സംവാദം തുടങ്ങിയവ സുഗമമാക്കുന്നതിന് സാങ്കേതിക വിദ്യകളെ പ്രയോജനപ്പെടുത്താൻ അവരെ പ്രാപ്തരാക്കാനും ഈ കോൺഫറൻസ് ലക്ഷ്യമിടുന്നു. ഇസ് ലാമോഫോബിക് അജണ്ടകളെ ഈമാനോടും ഇസ്സത്തോടും കൂടി എതിർത്തുനിൽക്കുന്നതെങ്ങനെ എന്നതുമായി ബന്ധപ്പെട്ട ആലോചനകളും രണ്ട് ദിവസങ്ങളിലായി നടക്കുന്ന ഇസ് ലാമിക് കാമ്പസ് കോൺഫറൻസിലെ പ്രധാന ചർച്ചാ വിഷയമായിരിക്കും.
ജീവിതത്തിന്റെ എല്ലാ മേഖലകളിലും വിദ്യാർഥിനികളുടെ വളർച്ചയും ശാക്തീകരണവും പ്രോത്സാഹിപ്പിക്കുന്ന കാൽവെപ്പാണ് Discurso Muslimah. 7 സ്റ്റേജുകളിലായി എണ്‍പതിലധികം വിദഗ്ധരെ പങ്കെടുപ്പിച്ച് 23 സെഷനുകളിലായിട്ടാണ് പരിപാടിയുടെ സംഘാടനം. ആത്മീയ-വൈജ്ഞാനിക സെഷനുകള്‍, എക്സ്പേര്‍ട്ട് ടോക്ക്, മീറ്റ് ദ് സ്കോളര്‍, പാനല്‍ ഡിസ്കഷന്‍, കരിയര്‍ മീറ്റ്, ഐക്യദാര്‍ഢ്യ സദസ്സ്, ഡോക്യുമെന്ററി പ്രദര്‍ശനം, സംഗീത വിരുന്ന്, പുസ്തക മേള എന്നിവ Discurso Muslimah യില്‍ അരങ്ങേറും. l

വിവര വിസ്ഫോടനത്തിന്റെ അനന്ത സാധ്യതകളിലേക്ക് മീഡിയാ വൺ മലർവാടി ടീൻ ഇന്ത്യ ലിറ്റിൽ സ്കോളർ മിഴി തുറക്കുന്നു. ലിറ്റിൽ സ്കോളർ ആഗോള മലയാളികളുടെ അറിവുത്സവമാണ്. കേരളത്തിലെ 200-ൽ പരം സെന്ററുകൾക്ക് പുറമെ ചെന്നൈ, ബാംഗ്ലൂർ, ദൽഹി തുടങ്ങിയ ഇന്ത്യൻ നഗരങ്ങളിലും ആന്തമാൻ ദ്വീപിലും, ഗൾഫ് രാജ്യങ്ങളിലും യൂറോപ്പ്, കാനഡ തുടങ്ങിയ മറ്റു ദേശങ്ങളിലും ഇതിൽ പങ്കെടുക്കുന്നവർ ധാരാളമുണ്ട്.

ലിറ്റിൽ സ്കോളർ മുന്നോട്ട് വെക്കുന്ന ഒരു മൂല്യ പരിസരമുണ്ട്. വിവരം അഥവാ വിജ്ഞാനം ഉല്പാദിപ്പിക്കുന്നവരായി വിദ്യാർഥികൾ മാറണം. വിവേകത്തിലൂന്നിയ വിജ്ഞാനമാണ് മനുഷ്യ സമൂഹത്തെ ഉന്നതിയിലേക്ക് നയിക്കുക. മാറുന്ന സമൂഹത്തിലേ പുതിയ വിവരവും വിജ്ഞാനവും ഉൽപ്പന്നങ്ങളും ഉണ്ടാകൂ. കേവലം അറിവ് പരിശോധന എന്നതിനപ്പുറം കുട്ടികളിൽ സഹവർത്തിത്വം, കാരുണ്യം, മൂല്യബോധം, ധാർമികത തുടങ്ങിയ മൂല്യങ്ങൾ നട്ടുവളർത്താനുതകുന്നതാണ് ലിറ്റിൽ സ്കോളറിലെ ചോദ്യങ്ങൾ. കുട്ടികളിലെ മിടുക്ക് തിരിച്ചറിഞ്ഞ് അവരെ പ്രോത്സാഹിപ്പിക്കുന്നു. അവർക്ക് ആഗോള തലത്തിൽ അവസരങ്ങളും എക്സ്പോഷറും നൽകുന്നു. പരമ്പരാഗത അറിവിനപ്പുറം തിരിച്ചറിവിന്റെ മൂന്നാം കണ്ണ് തുറപ്പിക്കുന്നു. സർവോപരി അവനിലെ/അവളിലെ മാനുഷിക നന്മയോട് സംവദിക്കുന്നു. ഇതെല്ലാം ഊട്ടിയുറപ്പിക്കുന്ന വിധം വൈവിധ്യമാർന്നതാണ് ചോദ്യ ഘടന.

സബ്ജൂനിയർ, ജൂനിയർ, സീനിയർ എന്നിങ്ങനെ മൂന്ന് കാറ്റഗറികളിലായാണ് മത്സരം നടത്തുന്നത്. ജി.സി.സി രാജ്യങ്ങൾ ഉൾപ്പെടെയുള്ളവ മാറ്റുരക്കുന്ന മത്സരത്തിൽ ഒരു ലക്ഷത്തിലധികം കുട്ടികൾ പങ്കെടുക്കുമെന്ന് പ്രതീക്ഷിക്കുന്നു.
മത്സരങ്ങൾ മൂന്ന് റൗണ്ടുകളിലാണ് നടക്കുക. പ്രാഥമിക റൗണ്ട് വാല്വേഷൻ ആയിരിക്കും. പ്രാഥമിക റൗണ്ടിൽ മുന്നിലെത്തിയവരുടെ ജില്ലാ തല മത്സരം നടക്കും. സംസ്ഥാന തലം സബ് ജൂനിയർ, ജൂനിയർ, സീനിയർ വിഭാഗങ്ങളിൽ നടക്കും. സബ്ജൂനിയർ, ജൂനിയർ വിഭാഗങ്ങൾക്ക് ഓൺലൈൻ മത്സരവും സീനിയറിന് ഓഫ് ലൈൻ മത്സരവുമായിരിക്കും. 12 പേർ അടങ്ങുന്ന 6 ജില്ലാ ടീമുകൾ ഗ്രാന്റ് ഫിനാലെയിൽ മാറ്റുരക്കും…

കമ്പ്യൂട്ടറുകൾ, ലാപ് ടോപ്പ്, സ്വർണം, സ്പോർട്സ് സൈക്കിൾ, സ്മാർട്ട് വാച്ചുകൾ, കിൻഡിൽ ലൈബ്രറി, പൊതു വിജ്ഞാന പുസ്തകങ്ങൾ, ഡിന്നർ സെറ്റ്, മെഡലുകൾ തുടങ്ങി സബ് ജില്ലാ തലത്തിലും ജില്ലാ തലത്തിലും സംസ്ഥാന തലത്തിലുമായി വിലപിടിപ്പുള്ള സമ്മാനങ്ങളാണ് വിജയികളെ കാത്തിരിക്കുന്നത്. ഓരോ കാറ്റഗറിയിലെയും ആറാം സ്ഥാനം വരെ ജേതാക്കൾക്ക് സമ്മാനമുണ്ട്. ഏരിയാ, ജില്ലാ തലങ്ങളിലെല്ലാം സമ്മാനങ്ങളുണ്ട്. കൂടാതെ ഫൈനലിസ്റ്റുകൾക്ക് മീഡിയാ വൺ പ്രക്ഷേപണം ചെയ്യുന്ന ഷോയിലൂടെ വലിയ എക്സ് പോഷർ ലഭിക്കുന്നു. ഏറ്റവും കൂടുതൽ മെഡലുകൾ നേടിയ സ്‌കൂളിന് ഒരു റോബോട്ട് ടീച്ചറെത്തന്നെ സമ്മാനമായി ലഭിക്കും. സമകാലിക പൊതു വിജ്ഞാനം, കല, മലയാള സാഹിത്യവും സംസ്കാരവും, ഗണിതം, മാനസിക ശേഷി, പരിസ്ഥിതി, സാമൂഹ്യ ശാസ്ത്രം, രാഷ്ട്രീയം തുടങ്ങിയ മേഖലകളിൽനിന്നാണ് ചോദ്യങ്ങൾ ഉണ്ടാവുക.

ഡിസംബർ 20 വരെയാണ് രജിസ്റ്റർ ചെയ്യാനുളള അവസരം. ജനുവരി 20-നാണ് ഒന്നാം ഘട്ട മത്സരം. അതുവരെ ഒരുങ്ങാനുള്ള സമയമാണ്. മീഡിയാ വൺ ലിറ്റിൽ സ്കോളർ വെബ് സൈറ്റിന് പുറമെ malarvadi.org എന്ന സൈറ്റിലൂടെയും രജിസ്റ്റർ ചെയ്യാം. l

പൊതുജനാഭിപ്രായം രൂപവത്കരിക്കുന്നതിലും ലോകരാഷ്ട്രങ്ങളുടെ നിലപാടുകളെ സ്വാധീനിക്കുന്നതിലും നമ്മുടെ കാലത്തെ മീഡിയ വഹിക്കുന്ന വലിയ പങ്ക് ഇന്നാര്‍ക്കും അജ്ഞാതമല്ല; ചില വിഷയങ്ങളില്‍ പ്രത്യേകിച്ചും. അതിലൊന്നാണ് ഫലസ്ത്വീന്‍. സയണിസ്റ്റ് അധിനിവേശകരുടെ അതേ ഭാഷ കടമെടുക്കുകയാണ് പാശ്ചാത്യ മാധ്യമങ്ങള്‍ ചെയ്യുന്നത്. അതുകൊണ്ടുതന്നെ അധിനിവേശ വിരുദ്ധ ചെറുത്തുനില്‍പ്പ് നടത്തുന്ന ഫലസ്ത്വീനികളെ പാശ്ചാത്യ മീഡിയ 'അതിക്രമികള്‍' എന്നേ വിളിക്കൂ. അധിക്ഷേപ പ്രയോഗങ്ങള്‍ ഇതുപോലെ വേറെയുമുണ്ട്. വായനക്കാരെയും പ്രേക്ഷകരെയും ഇത് സ്വാധീനിക്കും. അങ്ങനെ, ചെറുക്കുന്നവൻ 'ഭീകരനും' അധിനിവേശകന്‍ 'ഇര'യും ആയിത്തീരുന്നു.

ഇതുമായി ബന്ധപ്പെട്ട ചില വശങ്ങള്‍ പരിശോധിക്കാം:
1) ഏത് ഫ്രെയ്മില്‍ വാര്‍ത്ത അവതരിപ്പിക്കുകയും വിശകലനം നടത്തുകയും ചെയ്യുന്നു എന്നത് വളരെ പ്രധാനമാണ്. ഒരു പ്രശ്‌നത്തെ ജനം എങ്ങനെ കാണുന്നു എന്നത് കാര്യമായും ഈ ഫ്രെയ്മിങ്ങിനെ ആശ്രയിച്ചുനില്‍ക്കുന്നു. മിക്ക സന്ദര്‍ഭങ്ങളിലും മീഡിയ ഫലസ്ത്വീന്‍ വിമോചനപ്പോരാളികളെ ഭീകരര്‍ എന്നാണ് വിശേഷിപ്പിക്കുന്നത്. മീഡിയക്ക് അവര്‍ സ്വാതന്ത്ര്യത്തിന് വേണ്ടി പൊരുതുന്നവരല്ല. മീഡിയയുടെ വാര്‍ത്താ അവതരണം ഒരു പക്ഷത്ത് ചേര്‍ന്നുകൊണ്ടായിരിക്കും. ത്വൂഫാനുല്‍ അഖ്‌സ്വ പാശ്ചാത്യ മീഡിയ റിപ്പോര്‍ട്ട് ചെയ്തത് നാം കണ്ടതാണ്. കുട്ടികളെ കൊന്നൊടുക്കുന്നവര്‍, സിവിലിയന്‍മാരെ തട്ടിക്കൊണ്ടു പോകുന്ന ഭീകരര്‍ തുടങ്ങിയ വിശേഷണങ്ങള്‍ ധാരാളമുണ്ടായിരുന്നു ഫലസ്ത്വീനികളെക്കുറിച്ച ആ റിപ്പോര്‍ട്ടിംഗില്‍.

2) പ്രയോഗിക്കുന്ന ഭാഷയും വളരെ പ്രധാനമാണ്. മാധ്യമ റിപ്പോര്‍ട്ടിംഗില്‍ ചിലരെ മനുഷ്യത്വം മുറിച്ചു നീക്കപ്പെട്ടവരായാണ് ചിത്രീകരിക്കുക. തരംപോലെ അവരുടെ മേല്‍ 'തീവ്രവാദികള്‍', 'ആയുധധാരികള്‍' എന്നൊക്കെ മുദ്ര ചാര്‍ത്തും. ഇസ്രായേലികളെക്കുറിച്ചാണെങ്കില്‍ അവര്‍ 'സൈനികര്‍' അല്ലെങ്കില്‍ 'സുരക്ഷാ സേന' ആണ്. സംഘര്‍ഷത്തെക്കുറിച്ച വളരെ തെറ്റായ ചിത്രമാണ് ഇത് ഉൽപാദിപ്പിക്കുക.

3) വിവരണത്തില്‍ ഉടനീളം അസന്തുലിതത്വമായിരിക്കും. ഇസ്രായേലിനകത്ത് സംഭവിച്ചതേ കാണാനും കേള്‍ക്കാനുമുണ്ടാകൂ. ഫലസ്ത്വീനികള്‍ക്ക് എന്ത് സംഭവിച്ചു എന്നത് മീഡിയ അവഗണിക്കും. ഇതു കൊണ്ടാണ് റിപ്പോര്‍ട്ട് അസന്തുലിതമായിത്തീരുന്നത്. അടിസ്ഥാന കാരണങ്ങള്‍ കണ്ടെത്താന്‍ ഇത്തരം റിപ്പോര്‍ട്ടിംഗ് ഉപകരിക്കില്ല.

4) പശ്ചാത്തലം ഒഴിവാക്കുന്നു. ഫലസ്ത്വീന്‍ പ്രശ്‌നത്തിന് ഒരു സാമൂഹിക, രാഷ്ട്രീയ, ചരിത്ര പശ്ചാത്തലമുണ്ട്. അത് പറഞ്ഞാലേ ഫലസ്ത്വീനികളുടെ പോരാട്ടത്തെ മനസ്സിലാക്കാനാവൂ. ആ പശ്ചാത്തലം മാറ്റിനിര്‍ത്തിയാല്‍, ഫലസ്ത്വീനികളെ എളുപ്പത്തില്‍ വിവേകശൂന്യര്‍ എന്ന് മുദ്രകുത്താം.

5) പിശാച്്വല്‍ക്കരിക്കലാണ് മറ്റൊരു രീതി. ഫലസ്ത്വീന്‍ പോരാളികളെ ഒട്ടും മനുഷ്യത്വമില്ലാത്ത പിശാചുക്കളായി ചിത്രീകരിക്കുന്നു. അവതരണത്തിലെ പക്ഷപാതം മാത്രമല്ല ഇവിടെ വിഷയം. ഫലസ്ത്വീനികളോട് പാശ്ചാത്യസമൂഹങ്ങള്‍ക്ക് യാതൊരു അനുഭാവവും തോന്നാതിരിക്കാനും കാരണമതാണ്.

ഇങ്ങനെ എല്ലാ അര്‍ഥത്തിലും മുഖ്യധാരാ മീഡിയ ഫലസ്ത്വീനികളെ പിശാചുവല്‍ക്കരിക്കുന്നുണ്ടെങ്കിലും സോഷ്യല്‍ മീഡിയയിലൂടെ പ്രശ്‌നത്തിന്റെ യഥാര്‍ഥ ചിത്രം പുറത്തെത്തുന്നുണ്ട്. ഈ സമാന്തര മീഡിയ നല്‍കുന്ന വിവരങ്ങളും വിശകലനങ്ങളും വെച്ച് കൂടുതല്‍ സമഗ്രവും സൂക്ഷ്മവുമായ ഒരു നിലപാടിലെത്താന്‍ ഇന്ന് ജനങ്ങള്‍ക്ക് സാധ്യവുമാണ്. l