2010-ന് ശേഷം ജനിച്ച ആൽഫ ജനറേഷൻ കൗമാരപ്രായത്തിൽ എത്തിയിരിക്കുന്നു. ഓൺലൈൻ ലോകത്തിലേക്ക് പിറന്നുവീണ തലമുറയാണ് ആൽഫ ജനറേഷൻ. വളരെ വേഗത്തിൽ കാര്യങ്ങൾ പഠിച്ചെടുക്കുന്ന ഈ തലമുറക്ക് വേണ്ടത് ഈ കാലത്തിനനുയോജ്യമായ മാർഗനിർദേശങ്ങളാണ്. നിലവിലെ നമ്മുടെ വിദ്യാഭ്യാസ സിസ്റ്റത്തിന് പോലും മൂന്നു നൂറ്റാണ്ടിന്റെ പഴക്കമുണ്ട്. അവയിൽ മിക്കതും കാലത്തോടൊപ്പമോ കുട്ടികളോടൊപ്പമോ സഞ്ചരിക്കുന്നില്ല. പുതിയ കാലത്ത് കുറഞ്ഞ കാലംകൊണ്ട് കുട്ടികൾക്ക് പഠിച്ചെടുക്കാൻ കഴിയുന്ന കാര്യങ്ങളാണ് ഒട്ടും കാര്യക്ഷമമല്ലാത്ത പഠന രീതികളിലൂടെ വർഷങ്ങൾ ചെലവഴിച്ച് പഠിപ്പിക്കുന്നത്. ഇന്ന് വിദ്യാലയങ്ങളിൽനിന്ന് നേടുന്നതിനെക്കാൾ അറിവ് കുട്ടികൾ നേടുന്നത് അവരുടെ വിരൽത്തുമ്പിലുള്ള ടെക്നോളജിയിലൂടെയാണ്. വീട്ടുകാരെക്കാൾ കുട്ടികളിപ്പോൾ കൂട്ടുകൂടുന്നത് ഡിജിറ്റൽ ഡിവൈസുകളുമായാണ്. ഇത്തരമൊരു സാമൂഹിക സാഹചര്യത്തിൽ പുതിയ സാങ്കേതിക വിദ്യക്കൊപ്പം വളരുന്ന കുട്ടികൾക്കുണ്ടാവേണ്ട ഡിജിറ്റൽ ഹാബിറ്റ്സിനെ കുറിച്ച് സംസാരിക്കുകയാണ് മെഹദ് മഖ്ബൂൽ എഴുതിയ 'ആൽഫ ഹാബിറ്റ്സ്' എന്ന പുസ്തകം.

മൊബൈലും ഇന്റർനെറ്റും മറ്റു ഡിജിറ്റൽ ഡിവൈസുകളും കുട്ടികൾക്ക് വിലക്കുന്ന കാലം കഴിഞ്ഞു. പണ്ട് മുതിർന്നവർ കുട്ടികൾക്ക് വിലക്കിയ ഡിജിറ്റൽ ലോകം ഇന്നവരുടെ വിദ്യാലയ പഠനത്തിന്റെ തന്നെ ഭാഗമായിരിക്കുന്നു. അനന്തമായ ഡിജിറ്റൽ സാധ്യതകളുടെ കാലത്തെ എങ്ങനെ കൃത്യമായി ഉപയോഗപ്പെടുത്തണമെന്ന് പഠിപ്പിക്കുകയാണ് ഇനി വേണ്ടത്. അവിടെയാണ് ഡിജിറ്റൽ ഹാബിറ്റ്സ് പ്രസക്തമാകുന്നത്. വിവരങ്ങളുടെ ആധിക്യത്തിന്റെ കാലത്ത് ഇത്രയേറെ വിവരങ്ങൾ നമുക്ക് വേണ്ടതില്ല. ആവശ്യമുള്ള വിവരങ്ങളെ ഫിൽട്ടർ ചെയ്യുന്ന പണിയാണ് ഇൻഫർമേഷൻ ഡയറ്റ്. ചില സമയങ്ങളിൽ ഓൺലൈൻ ലോകത്തേക്ക് കടക്കില്ല എന്ന് തീരുമാനിക്കുകയും, റിയൽ ലൈഫിൽ മുഴുകുകയും ചെയ്യുന്നതാണ് ഡിജിറ്റൽ ഫാസ്റ്റിംഗ്. നമ്മൾ ഓൺലൈൻ ലൈഫിന് അടിമപ്പെടാതിരിക്കാനുള്ള പലതരം വഴികൾ പുസ്തകം പറഞ്ഞുവെക്കുന്നുണ്ട്. ഓൺലൈനിൽ എപ്പോൾ, എന്ത് നോക്കണം, എന്ത് വായിക്കണം എന്ന് തീരുമാനിക്കേണ്ടത് നമ്മളാണ്. ഡിജിറ്റൽ ഡിവൈസിൽ കാണുന്നതെല്ലാം പ്രൊഡക്റ്റീവായ കാര്യങ്ങളാവുമ്പോൾ അതിന്റെ ഗുണവും കാണുന്നവർക്കുണ്ടാവും. മൊബൈൽ തുറക്കുന്നതിനുമുമ്പേ എന്തെല്ലാം വായിക്കണം, എന്തെല്ലാം കാണണം, എത്ര സമയം വിനിയോഗിക്കണം എന്ന് കൃത്യമായി ധാരണയുണ്ടാവണം. ഇങ്ങനെ, എങ്ങനെ ഈ ഡിജിറ്റൽ കാലത്തെ പ്രൊഡക്ടീവായി ഉപയോഗിക്കാം എന്നാണ് പുസ്തകം ചർച്ച ചെയ്യുന്ന മറ്റൊരു വിഷയം. കുട്ടികൾക്ക് വിജ്ഞാനവളർച്ചക്ക് ഗുണപ്രദമായ ചില ആപ്പുകളും ഓൺലൈൻ പ്ലാറ്റ്ഫോമുകളും ഈ പുസ്തകം പരിചയപ്പെടുത്തുന്നുണ്ട്.

ഡിസ്ട്രാക്്ഷൻ ആണ് പുതിയ തലമുറ നേരിടുന്ന മുഖ്യ ഡിജിറ്റൽ പ്രശ്നങ്ങളിലൊന്ന്. ഒരു കാര്യത്തിലും ഫോക്കസ് ചെയ്യാൻ ചില കുട്ടികൾക്ക് കഴിയുന്നില്ല. പഠനത്തിനിടയിൽ മടുപ്പ് തോന്നുമ്പോൾ മൊബൈൽ കൈയിലെടുക്കുന്നു. 10 മിനിറ്റിനു ശേഷം മൊബൈൽ ഓഫാക്കി പഠനം തുടരാം എന്ന് കരുതിയാണ് റീൽസും ഷോട്സും കാണാനിരിക്കുക. പക്ഷേ, കണ്ടുതുടങ്ങിയാൽ പിന്നീട് മണിക്കൂറുകളോളം അവിടെത്തന്നെയായിരിക്കും. ക്ഷീണം കാരണം പിന്നീട് പഠനത്തിലേക്ക് തിരിച്ചുവരാനും പറ്റില്ല. ഒരു ദിവസമിങ്ങനെ ധാരാളം മണിക്കൂറുകൾ സ്ക്രീൻ ടൈമായി പലരും നഷ്ടപ്പെടുത്തുന്നു. ഇത്തരക്കാർക്ക് ശ്രദ്ധ ഫോക്കസ് ചെയ്യാനുള്ള ഫോമോഡോറോ ടെക്നിക്കും 1 -3 -5 റൂൾസും പുസ്തകം പരിചയപ്പെടുത്തുന്നു.
കുട്ടികളോട് സംവദിക്കുന്ന രീതിയിലാണ് പുസ്തകത്തിന്റെ ഭാഷയും ഉള്ളടക്കവും. ഓരോ അധ്യായവും രണ്ടോ മൂന്നോ പേജുകൾ മാത്രം. കഥകളോ ചരിത്ര സംഭവങ്ങളോ പ്രശസ്തമായ പുസ്തകങ്ങളുടെ ഉള്ളടക്കമോ പറഞ്ഞുകൊണ്ടായിരിക്കും ഓരോ അധ്യായവും ആരംഭിക്കുക. ഓരോ കുട്ടിയും ജീവിതത്തിൽ ശീലമാക്കേണ്ടതോ ഒഴിവാക്കേണ്ടതോ ആയ നാലഞ്ചു കാര്യങ്ങൾ ഓരോ അധ്യായത്തിന്റെയും ഒടുവിൽ പ്രത്യേകമായി ചേർത്തിട്ടുണ്ട്. l

ഇന്ന് പൊതു സമൂഹത്തെ ആമൂലാഗ്രം ഗ്രസിച്ച ഒന്നാണ് ഇസ് ലാമോഫോബിയ. അത് ജീവിതത്തിന്റെ സർവ മണ്ഡലങ്ങളിലും ഭീതിയുടെ കരിനിഴൽ വീഴ്ത്തിയിട്ടുണ്ട്. ഏത് പ്രശ്നത്തെയും ഇസ്ലാമോഫോബിയയിൽ ചാലിച്ചെടുക്കാനാണ് ഈയൊരു മിത്തിനെ മിനുക്കിയെടുത്തവർ തുനിയുന്നത്. അത് പ്രശ്നങ്ങളെ കൂടുതൽ വഷളാക്കുകയും ഒരു സമുദായത്തെ മൊത്തം പ്രതിക്കൂട്ടിൽ നിർത്തുകയും ചെയ്യുന്നു. നിക്ഷിപ്ത താൽപര്യക്കാർ ഇത്തരം വ്യാജനിർമിതികൾക്കായി അനവരതം യത്നിക്കുന്നത് നമുക്ക് തൃണവത്ഗണിക്കാനുമാവില്ല. ഈയൊരു മിത്തിന്റെ പ്രാരംഭം മുതൽ ഇതഃപര്യന്തം അതിനു മേൽവിലാസം നൽകിയ പ്രശ്നങ്ങളെ ഇഴകീറി അന്വേഷിക്കുന്നു, ബുക്പ്ലസ് പ്രസിദ്ധീകരിച്ച സുദേഷ് എം. രഘു, സലീം ദേളി എന്നിവർ എഡിറ്റ് ചെയ്ത 'ഇസ്ലാമോഫോബിയ: പഠനങ്ങൾ സംവാദങ്ങൾ' എന്ന പുസ്തകം.

ഇസ്ലാമോഫോബിയ ഇന്ന് നമ്മുടെ സാമൂഹിക രാഷ്ട്രീയതലത്തിൽ വലിയ അലയൊലികൾ സൃഷ്ടിച്ചുകൊണ്ടിരിക്കുകയാണ്. ഈ വംശീയ ഗൂഢപദ്ധതിയെ ഉന്മൂലനം ചെയ്യാതെ ഇനിയുള്ള കാലം സ്വൈരവിഹാര ജീവിതം സാധ്യമാവില്ല എന്ന അഭിപ്രായമാണ് പലർക്കുമുള്ളത്. ഇതിനെ വേരോടെ പിഴുതെറിയാനുള്ള അധികബാധ്യത വൈയക്തിക തലത്തിൽ നമ്മിൽ വന്നുചേരുന്നുണ്ട്. ദേശീയ-അന്തർദേശീയ തലങ്ങളിൽ ഇസ്ലാമോഫോബിയ എങ്ങനെ പ്രവർത്തിക്കുന്നുവെന്ന് പുസ്തകം വരച്ചുകാട്ടുന്നുണ്ട്. ഇതിലെ ഓരോ പഠനവും തയാറാക്കിയിരിക്കുന്നത് വിഷയത്തിന്റെ അതത് തലങ്ങളിൽ നിപുണരായ അക്കാദമിക്കുകളാണ്. ഈ ഹിഡൻ പദ്ധതി ഏതെല്ലാം വിധേന പ്രവർത്തിക്കുന്നുവെന്ന് പുസ്തകം തുറന്നുകാട്ടുന്നു. കേട്ടു തഴമ്പിച്ച ഒരു പദപ്രയോഗം എന്നതിനപ്പുറം അതിന്റെ ദൂരവ്യാപക പ്രത്യാഘാതങ്ങളുടെ ഉള്ളറകളിലേക്ക് പുസ്തകം കടന്നുചെല്ലുമ്പോൾ വരുംകാലത്തെ ഈ ഫോബിയയിൽനിന്ന് പ്രതിരോധമൊരുക്കി സംരക്ഷിക്കാമെന്ന ചിന്ത വായനക്കാർക്കുണ്ടാകും.

ഇസ്ലാമോഫോബിയ എന്ന ആശയത്തെ വിശദീകരിക്കുമ്പോൾ തന്നെ ഫാഷിസത്തെയും സയണിസത്തെയും ബ്രാഹ്മണിസത്തെയും സാമ്രാജത്വത്തെയും പ്രതി സ്പഷ്ടമായൊരു ധാരണ നമുക്ക് ലഭിക്കുന്നുണ്ട്. കാരണം ഇവയുടെയൊക്കെ നിർമിതി കൂടിയാണ് ഇസ്ലാമോഫോബിയ. ന്യൂനപക്ഷ പ്രശ്നങ്ങളെ കൂടി അനാവരണം ചെയ്യുമ്പോൾ ഒരു സമുദായത്തിന്റെ പിന്നാക്കാവസ്ഥയുടെ കാരണങ്ങളും ചുരുളഴിയുന്നു. നമ്മുടെ നാട്ടിൽ ഇസ്ലാമോഫോബിയ പടർത്താൻ നോമ്പ് നോറ്റിരിക്കുന്നവരുണ്ട്. അവർ എയ്തുവിടുന്ന ഒളിയമ്പുകൾ പതിക്കുന്ന മർമങ്ങളെയും പുസ്തകം കാണിച്ചുതരുന്നു. ഇന്ത്യയിൽ അതിശീഘ്ര വളർച്ച നേടിയ ഫാഷിസം ഇസ് ലാമോഫോബിയയുമായി എത്രത്തോളം ഒട്ടിനിൽക്കുന്നുവെന്ന് രാഷ്ട്രീയ നിരീക്ഷകനായ സി.കെ അബ്ദുൽ അസീസ് നിരീക്ഷിക്കുന്നുണ്ട്. ഇസ്ലാമെന്ന സ്വത്വത്തിന് കീഴിൽ നിലകൊള്ളുന്നവരെല്ലാം ഭീതി വിതക്കുന്ന അംബാസഡർമാരാണെന്ന ധാരണയിലേക്ക് സാമൂഹികാന്തരീക്ഷം ആപതിച്ചിട്ടുണ്ടെന്ന് വേണം പറയാൻ.

ആഗോള, ദേശീയ പൊതു മണ്ഡലത്തിൽ പതിറ്റാണ്ടുകളായി ഭീതി ജനിപ്പിച്ചുകൊണ്ടിരിക്കുന്ന ഇസ്ലാമോഫോബിയയെ കൃത്യമായി മനസ്സിലാക്കാൻ സുദേഷ് എം. രഘു, ഇർഫാൻ അഹ്മദ്, വി.എ മുഹമ്മദ് അശ്റഫ്, ഡോ. ടി.എസ് ശ്യാംകുമാർ, ഫാ. വൈ.ടി വിനയരാജ്, അഹ് ല മാട്ര, യു.എം മുഖ്താർ, ഹിലാൽ അഹമദ്, മുഹ്സിൻ കാടാച്ചിറ, കെ.കെ നൗഫൽ, പി.ജെ ജെയിംസ്, കെ.പി ഹാരിസ്, പി.കെ അബ്ദുർറഹ്മാൻ, പി.എ പ്രേം ബാബു, സ്വാതി മണലോടിപ്പറമ്പിൽ, ബിന്ദു ലക്ഷ്മി പി., ഉമ്മുൽ ഫായിസ, കെ.ടി മനോജ്, ഷബീർ പാലോട്, ബാബുരാജ് ഭഗവതി, കെ. അഷ്റഫ് തുടങ്ങിയവരുടെ വിശകലനങ്ങളും നിരീക്ഷണങ്ങളും സഹായിക്കും. l

മുസ്ലിം ലോകത്ത് ഏറ്റവുമധികം കാലം നിലനിന്ന ഭരണകൂടമാണ് ഉസ്മാനി സൽത്തനത്ത് എന്നും ഉസ്മാനി / ഓട്ടോമൻ സാമ്രാജ്യം എന്നും അറിയപ്പെടുന്ന ഉസ്മാനി 'ഖിലാഫത്ത്'. ആറ് നൂറ്റാണ്ടിലധികമായിരുന്നു അവരുടെ ഭരണകാലം. ഏഷ്യ, ആഫ്രിക്ക, യൂറോപ്പ് എന്നീ മൂന്ന് ഭൂഖണ്ഡങ്ങളിലായി അവരുടെ ഭരണം വ്യാപിച്ചിരുന്നു. വിവിധ മതങ്ങൾക്കും മതവിശ്വാസികൾക്കും എങ്ങനെ ഒരു സാമ്രാജ്യത്തിൽ തുല്യ അവകാശങ്ങളോടെ ജീവിക്കാം എന്നതിന്റെ ഉത്തമ മാതൃകയായിരുന്നു ഉസ്മാനി ഖിലാഫത്ത്. എല്ലാ നിലക്കും വളരെയേറെ പഠനം അർഹിക്കുന്ന ഒന്നാണ് ഉസ്മാനി ഖിലാഫത്തിന്റെ ചരിത്രം; വിശേഷിച്ചും ചരിത്ര വിദ്യാർഥികൾക്ക്. പണ്ഡിതന്മാർ എന്നു പറയപ്പെടുന്നവർ പോലും ഇസ്ലാമിക ചരിത്രത്തിലെ പല ഘട്ടങ്ങളെക്കുറിച്ചും അജ്ഞരാണെന്നതാണ് യാഥാർഥ്യം. ആറ് നൂറ്റാണ്ടിലധികം മുസ്ലിംലോകം ഭരിച്ച ഉസ്മാനികളുടെ ചരിത്രം പലർക്കും അറിയില്ല.

അറബിയിൽ അവരുടെ ആധികാരികമായ നിരവധി ചരിത്ര ഗ്രന്ഥങ്ങൾ വിരചിതമായിട്ടുണ്ട്. അതിലേറ്റവും മുഖ്യമായതാണ് മുഹമ്മദ് ഫരീദ് ബകിന്റെ താരീഖുദ്ദൗലത്തിൽ അലിയ്യത്തിൽ ഉസ്മാനിയ്യഃ. ആധികാരികമായ അനവധി അവലംബ കൃതികളെ ആധാരമാക്കി മലയാളത്തിൽ വന്ന ഉസ്മാനി സാമ്രാജ്യത്തിന്റെ ചരിത്ര പഠനമാണ് ഐ.പി.എച്ച് പ്രസിദ്ധീകരിച്ച 'ഉസ്മാനി ഖിലാഫത്ത്: ചരിത്രം സംസ്കാരം' എന്ന കൃതി. ഗ്രന്ഥകാരന്മാരും എഴുത്തുകാരുമായ അഞ്ച് പേരാണ് ഈ ചരിത്ര പഠനത്തിൽ പങ്കാളികളായത്. ഇസ്ലാമിക വിജ്ഞാനകോശം എക്സിക്യൂട്ടീവ് എഡിറ്റർ ഡോ. എ.എ ഹലീമിന്റെ എഡിറ്റിംഗിൽ അതൊരു ഒന്നാന്തരം ചരിത്രകൃതിയായിരിക്കുന്നു. ആമുഖം കൂടാതെ ദീർഘമായ 32 അധ്യായങ്ങൾ ഉൾക്കൊള്ളുന്നതാണ് ഈ കൃതി. അനുബന്ധമായി ഉസ്മാനി സാമ്രാജ്യ സ്ഥാപകൻ ഉസ്മാൻ ഒന്നാമൻ മുതൽ അവസാന ഭരണാധികാരി അബ്ദുൽ മജീദ് രണ്ടാമൻ വരേയുള്ള 37 സുൽത്താൻമാരുടെ സംക്ഷിപ്ത ജീവചരിത്രവും 104 പേജുകളിലായി ക്രമപ്രകാരം ഇതിൽ ഉൾക്കൊള്ളിച്ചിരിക്കുന്നു. ഇസ്ലാമിക ചരിത്ര വിദ്യാർഥികൾക്കും അധ്യാപകർക്കും ആധികാരിക അവലംബമായ ചരിത്ര കൃതിയാണിത്.

ഉസ്മാനി ഖിലാഫത്ത് ഭൂമുഖത്തുനിന്ന് നിഷ്കാസിതമായി നൂറു വർഷം തികയുന്ന ഈ വേളയിൽ ഐ.പി.എച്ച് പുറത്തിറക്കുന്ന ഈ ഗ്രന്ഥം അവരുടെ ചരിത്രം, സംസ്കാരം, സംഭാവനകൾ എന്നിവ അറിയാനുള്ള മികച്ച റഫറൻസാണ്. ചരിത്ര രചനയുടെ ക്ലിഷ്ടതകൾ ബാധിക്കാത്ത സുഗമമായ പാരായണം സാധ്യമാക്കുന്ന ഒഴുക്കുള്ള രചനാശൈലി. മനോഹരമായ കെട്ടും മട്ടും. l

ഇൻതിഫാദയുടെയും ഹമാസിന്റെയും നേതാക്കളിൽ ജീവിച്ചിരിക്കുന്നവരിൽ പ്രമുഖനാണ് യഹ്്യാ സിൻവാർ. ത്വൂഫാനുൽ അഖ്സ്വായുടെ സൂത്രധാരൻ. തന്റെ അരുമ ദേശത്തിന്റെ വിമോചന സ്വപ്നങ്ങളുമേന്തി കാൽ നൂറ്റാണ്ടോളം ഒരു വ്യാജ രാഷ്ട്രത്തിന്റെ ഇരുമ്പറയിൽ ജീവിതം നേദിച്ച ഒരാൾ. ഇപ്പോഴും അതേ ദൗത്യത്തിനായി ശത്രുവിന്റെ കഴുകക്കണ്ണുകൾ വെട്ടിച്ച് ഫലസ്ത്വീനിലെ പൊരുതുന്ന മനുഷ്യരുടെ ഇടയിൽ തന്നെ തുടരുന്ന ധീരൻ. തന്റെ പ്രിയ ദേശത്തേക്ക് അധിനിവേശിച്ച് സർവതും കവർന്നെടുത്ത കൊള്ള സംഘം സിൻവാറിന്റെ ദേഹത്തിന് വിലയിട്ടത് നാല് ലക്ഷം ഡോളർ. സഹോദരൻ മുഹമ്മദ് സിൻവാറിന് മൂന്ന് ലക്ഷം ഡോളറും. ഫലസ്ത്വീൻ വിമോചനത്തിന്റെ ആചാര്യ വാക്യമാണദ്ദേഹം. തന്റെ ദീർഘമാർന്ന തടവറക്കാലമത്രയും പോരാട്ടത്തിന്റെ ഉത്സവമാക്കിയ ആളാണ് സിൻവാർ. കൊടും പീഡനം നരകം തീർത്ത ആ അഭിശപ്ത കാലം പക്ഷേ, സിൻവാർ മുതലിറക്കിയത് ഫലസ്ത്വീൻ വിമോചന പോരാട്ട കാലം രേഖീയമാക്കുന്നതിൽ വ്യാപൃതനാവാനാണ്. അതും സർഗാത്മക രചനയായ നോവൽ സ്വരൂപത്തിൽ - അതാണ് മുൾച്ചെടിയും കരയാമ്പൂവും (അശ്ശൗകു വൽ ഖറൻഫുൽ).

മനുഷ്യ വിരോധികളായ പടിഞ്ഞാറൻ സയണിസ്റ്റുകൾ ചവുട്ടിക്കുഴച്ച അസ്കലാൻ നഗരപ്രാന്തത്തിൽനിന്ന് ഗസ്സാചീന്തിലേക്ക് അഭയം തേടിപ്പോയ ഫലസ്ത്വീൻ കുടുംബത്തിലാണ് സിൻവാർ ജനിച്ചത്. ഇന്ന് ഇസ്രയേൽ നരാധമന്മാർ കത്തിച്ചുകളഞ്ഞ ഖാൻ യൂനുസിലെ അഭയാർഥി ക്യാമ്പിൽ 1962-ലാണ് സിൻവാർ പിറക്കുന്നത്. അക്കാലത്ത് താൻ കേട്ട രാക്കഥകളിലും താരാട്ട് പാട്ടിന്റെ നാദതാളത്തിലും അധിനിവേശ രൗദ്രതയുടെ ഭീതിയും വിഭ്രാന്തിയുമുണ്ട്. കണ്ടുകൊണ്ടിരിക്കെ സ്വന്തം വീട്ടിലും അയൽവീടുകളിലും കൊള്ളക്കെത്തിയവർ കൈയിട്ടുവാരുന്നത്‌ നേരിൽ അറിഞ്ഞതാണ്. തന്റെ പിതാവ് സ്വന്തം തൊടിയിൽ നട്ടു വളർത്തിയ ഒലീവും നാരകവും അധിനിവേശക്കാർ വിളവെടുക്കുന്നത് കണ്ടു നിന്ന കുടുംബമാണിത്. പട്ടാള ബൂട്ടുകളിലും ബയനറ്റുകളിലും ഞെരിയുന്ന വൃദ്ധ പിതാക്കൾ. അപമാനിക്കപ്പെടുന്ന സ്ത്രീത്വം. പാതാള ഭീതികൾ തോൽക്കുന്ന തടവറകളിലേക്ക് പൂട്ടി എറിയപ്പെടുന്ന കൗമാരങ്ങൾ. ഇതൊക്കെയും അനുഭവത്തിൽ ഏറ്റെടുത്തതാണ് സിൻവാർ. താൻ കണ്ട കാഴ്ചകളും അനുഭവിച്ച ജീവിതവും പ്രവർത്തിച്ച കർമരാശികളുമാണ് സിൻവാർ ഈ പുസ്തകത്തിൽ തുറന്നെഴുതിയത്. 400-ലേറെ താളുകളിലേക്ക് വിടരുന്ന പുസ്തകം അതുകൊണ്ടുതന്നെ ഫലസ്ത്വീനിലെ മനുഷ്യരുടെ ജീവിതമാണ്.
ഹിബ്രോൺ, സൂരിഫ്, ഗസ്സ, പടിഞ്ഞാറൻ കര, ഫലൂദ, നബുലുസ്, ബീർസൈത്ത്, അൽ അറൂബ്, റാമല്ല, ഐദ തുടങ്ങിയ ഫലസ്ത്വീൻ നഗരങ്ങളിലെയും വിദൂര ഗ്രാമങ്ങളിലെയും നിഷ്കളങ്ക മനുഷ്യർ തലമുറകളായി ഏറ്റുവാങ്ങേണ്ടി വന്ന പീഡാനുഭവങ്ങളാണ് ഈ പുസ്തകത്തിൽ ഉടലെടുത്തു നിൽക്കുന്നത്. യൂറോപ്പ് സൃഷ്ടിച്ച ഭീകര യുദ്ധങ്ങൾ, കരാറുകൾ, അതിലെ കൊടും ചതി, കുരിശുയുദ്ധത്തിന്റെ പുനരാവർത്തനം, അപ്പോഴും ഫലസ്ത്വീനികൾ അനുഭവിച്ച വേദന, 'അയൽക്കാരുടെ' ഘന മൗനവും നിശ്ശബ്ദതയും. അകത്തുള്ള ഒറ്റുകാരും വഞ്ചകരും. ഇതെല്ലാം ഈ പുസ്തകത്തിൽ വാങ്മയങ്ങളായെത്തുന്നു. വായിച്ചു പോകുമ്പോൾ നാം പലേടത്തും സ്തംഭിച്ച് നിന്നു പോകും- ഈ മനുഷ്യർ എന്നിട്ടും ഇവിടെ ജീവിച്ചിരിക്കുന്നുവല്ലോ. ഇതിനിടയിലും ദേശത്തെ യുവാക്കൾ ഏറ്റെടുക്കുന്ന സമർപ്പണവും സഹനസമരങ്ങളും പ്രക്ഷോഭങ്ങളും. പങ്കുവെക്കുന്ന പ്രതീക്ഷയുടെ മാരിവില്ലുകൾ- ഇതും നോവലിൽ ഒരു ഫ്ലാഷ് ബാക്ക് പോലെ കടന്നുവരുന്നു.

ചോർന്നൊലിക്കുന്ന ഒറ്റമുറി ചായ്്പ്. അതാണ് കുടിയിറക്കപ്പെട്ട സിൻവാറിന്റെ കുടുംബത്തിന് കിട്ടിയ ഐക്യരാഷ്ട്രസമിതിയുടെ പാർപ്പിടം. അതിനകത്തേക്ക് പെയ്തിറങ്ങുന്ന മഴനാരുകളെ പൊട്ടിയ തകരത്താമ്പാളം കൊണ്ട് തടയാൻ കുതറുന്ന ഉമ്മ. ആ കണ്ണുകളിലെ വിലാപ ദൈന്യങ്ങൾ. എങ്ങനെ കഴിഞ്ഞ വീടും വീട്ടമ്മയുമാണവർ. അരക്ഷിതമായ ആ ഗല്ലിയിൽ കിട്ടിയ ഒറ്റമുറി വീടിന് കതക് പിടിപ്പിച്ചത്‌ ആഘോഷമായി ആ വീട്ടുകാർ അനുഭവിച്ചത്- ഇതൊക്കെയും സിൻവാർ നോവലിൽ പറഞ്ഞു പോകുന്നത് വായിച്ചാൽ നാം അറിയാതെ വിതുമ്പിപ്പോവും. നോവലിന്റെ കേന്ദ്ര സ്ഥാനത്ത് വരുന്നത് സിന്‍വാറിന്റെ സ്വന്തം കുടുംബം തന്നെയാണ്. മഹ്്മൂദ്, ഹസൻ, മുഹമ്മദ്, ഇബ്റാഹീം, അഹമ്മദ്, ഊന്നു വടിയുടെ ശേഷിയിൽ പ്രാഞ്ചി പ്രാഞ്ചി നടക്കുന്ന വലിയുപ്പ. അഹമ്മദിന്റെ ഉമ്മ. ഫലസ്ത്വീൻ ജനതയുടെ നോവും ദുരിതങ്ങളും ഒരു ചേമ്പിൻ താളിലെ സൂര്യബിംബം പോലെ ഈ കുടുംബത്തിൽ വിസ്തരിച്ചു കാണാം. ഈ കുടുംബം തന്നെയാണ് ഓരോ ഫലസ്ത്വീനിയും ഫലസ്ത്വീൻ ദേശവും. കുടിയിറക്കപ്പെട്ടവർ, തടവറയിൽ ബന്ധിക്കപ്പെട്ടവർ, കാണാതായവർ, വെടിയേറ്റവർ, പോരാളികൾ, അവരുടെയൊക്കെ വിഹ്വലതകൾ. ഇതൊക്കെയും സിൻവാറിന്റെ കുടുംബത്തിലുണ്ട്, ഫലസ്ത്വീനിലെവിടെയുമുണ്ട്. ആ രീതിയിലാണ് എഴുത്തുകാരൻ ആഖ്യാനം ചിട്ടപ്പെടുത്തിയിട്ടുള്ളത്.

ചെറുത്തുനിൽപ്പിനുള്ള സംഘാടനം, അതിന്റെ സഹനവും വേദനയും. ക്രൂരത മുറ്റിയ തടവും മരണവും. അതിനിടയിലും ഇഴഞ്ഞു നീങ്ങുന്ന സാധാരണ ജീവിതം, ജനി-മൃതികളും വിവാഹങ്ങളും ആഘോഷ ഹർഷങ്ങളും. ഇതൊക്കെയും നിഴലും വെളിച്ചവുമായി നോവലിൽ മാറിമറിയുന്നു. നോവലിൽ പറയുന്നതത്രയും ഒരു ജനതയുടെ ദുഃഖസാന്ദ്രമായ ജീവിതം തന്നെയാണ്. തീർച്ചയായും ഇതു പോലൊരാഖ്യാനം നോവൽ രചനയിലേ സാധ്യമാവൂ.

സയണിസ്റ്റ് തടവറയിൽ നിന്നാണ് ഇദ്ദേഹം നോവലെഴുതുന്നത്. ഏത് നേരവും പട്ടാള ദുഷ്ടതകളും കാമറ കണ്ണുകളും കാവൽ നിൽക്കുന്ന പെരും തടവറയിൽ കഴിഞ്ഞ സിൻവാർ എങ്ങനെയാണ് ഈ രചന പൂർത്തിയാക്കിയതും കൈയെഴുത്ത് പ്രതിയത്രയും സമർഥമായി പുറത്തെത്തിച്ചതും എന്നത് ഒരു വിസ്മയമാണ്. ചിലപ്പോഴെങ്കിലും നോവൽ പകരുന്നത് അനുഭൂതി രഹിതമായ കേവലാനുഭവങ്ങൾ മാത്രമാണെന്ന് വായനക്കാർക്ക് ന്യായമായും തോന്നാം. അനുഭവങ്ങളെ ഉദാത്തമായ ലാവണ്യാനുഭൂതിയിലേക്ക് വിടർത്താൻ എഴുത്തുകാരന് ആവുന്നില്ലെന്ന് പരാതിയും പറയാം. സിൻവാർ ഒരു പോരാളിയാണ്. സർഗാത്മക എഴുത്തുകാരനല്ല. പിന്നെ സ്വന്തം മണ്ണിൽനിന്ന് നിർദയം കുടിയിറക്കപ്പെട്ട നിസ്സഹായരായ മനുഷ്യർക്ക് അത്രയൊക്കെയുള്ള ആനന്ദലോകങ്ങളേ സാധ്യമാവൂ.

നമുക്ക് തൊട്ടപ്പുറത്ത് കഴിയുന്ന ഈ മനുഷ്യരുടെ ജീവിതം വേണ്ട വിധം മലയാളി സമൂഹം മനസ്സിലാക്കിയിട്ടില്ല. ആ പരിമിതി ഈ പുസ്തകം പരിഹരിക്കും. എഴുത്തുകാരനായ എസ്.എം സൈനുദ്ദീന്റെ പരിഭാഷയിൽ ഇറങ്ങിയ പുസ്തകം പ്രസിദ്ധീകരിച്ചത് കേരളത്തിലെ മുൻനിര പ്രസാധകരായ ഐ.പി.എച്ച് ബുക്സ് കോഴിക്കോട് ആണ്. l

മലയാളത്തിൽ എഴുപത്തിയഞ്ചിൽപരം ഖുർആൻ പരിഭാഷകളും വ്യാഖ്യാനങ്ങളുമുണ്ട്; സ്വതന്ത്ര കൃതികളായും ഇതര ഭാഷകളിലുള്ളവയുടെ വിവർത്തനങ്ങളായും. ഈ ഗണത്തിലേക്ക് പുതുതായി ചേരുന്ന പുസ്തകമാണ് ഹുസൈൻ കടന്നമണ്ണയുടെ 'ഖുർആൻ ഉൾസാരം.'

അറബി ഭാഷയിൽ, വിശിഷ്യാ ഖുർആന്റെ സവിശേഷ ഭാഷാശൈലിയിൽ പഠനതാൽപര്യവും ഗവേഷണ ത്വരയുമുള്ള പണ്ഡിതനാണ് ഗ്രന്ഥകാരൻ. ഖുർആന്റെ മുപ്പതാം ഭാഗത്തിന്റെ പരിഭാഷയും വ്യാഖ്യാനവുമാണ് തെളിമയുള്ള നല്ല മലയാളത്തിൽ തയാറാക്കിയ ഖുർആൻ ഉൾസാരം. ആദ്യം ആയത്തുകളുടെ പരിഭാഷ. പിന്നീട് പദങ്ങളുടെ അർഥം. വീണ്ടും ഓരോ പദത്തിന്റെയും വിശാല അർഥധ്വനികളിലേക്ക് പടർന്നുകയറുന്ന വിശദീകരണക്കുറിപ്പുകൾ. ഈ പരിഭാഷയുടെ ഏറ്റവും ശ്രദ്ധേയമായ സവിശേഷതയും ഈ ഭാഷാവിശദീകരണം തന്നെ.
സാധാരണക്കാർക്കു മാത്രമല്ല, പണ്ഡിതന്മാർക്കും ഏറെ പ്രയോജനകരമാണ് ഈ വിശദീകരണം. പിന്നീട് ആ ആയത്തുകളുടെ മൊത്തത്തിലുള്ള ലളിതമായ വ്യാഖ്യാനവും കൊടുത്തിരിക്കുന്നു. ഗ്രന്ഥത്തിന്റെ ഒടുക്കം 'അനുബന്ധ'മായി പ്രാഥമിക അറബിഭാഷാ വ്യാകരണവും കൊടുത്തിട്ടുണ്ട്. ഇത് സെക്കന്ററി തലത്തിലും കോളേജ് തലത്തിലും ഖുർആൻ സ്റ്റഡി സെന്ററുകളിലുമുള്ള വിദ്യാർഥികൾക്ക് ഏറെ പ്രയോജനകരമാണ്. ആഗോള പണ്ഡിത സഭാംഗം കൂടിയാണ് ഗ്രന്ഥകാരനായ ഹുസൈൻ കടന്നമണ്ണ. ഗ്രന്ഥത്തിന്റെ കെട്ടും മട്ടും മനോഹരമായിരിക്കുന്നു. ഐ.പി.എച്ച് ആണ് പ്രസാധകർ. l

എൻ.എം ഹുസൈൻ രചിച്ച 'ഹിറ്റ്ലർ എന്തുകൊണ്ട്‌ ആത്മഹത്യ ചെയ്തു? ' എന്ന ഗവേഷണ ഗ്രന്ഥത്തിൽ, ആധുനിക ജർമനിയുടെ ചരിത്രത്തിലെ ഏറ്റവും ഹ്രസ്വവും വിചിത്രവും എന്നാൽ ഭയാനകവുമായ ഹിറ്റ്ലറുടെ അധികാര വാഴ്ചയ്ക്കും അതിന്റെ അസാമാന്യ വേഗത്തിലുള്ള തകർച്ചയ്ക്കും സാക്ഷിയായ പതിനൊന്നു വർഷങ്ങളാണ് വിശകലനം ചെയ്യപ്പെടുന്നത്. 1933 ജനുവരി 30-നാണ് അഡോൾഫ് ഹിറ്റ്ലർ ജർമനിയുടെ ചാൻസലറായി അധികാരമേൽക്കുന്നത്. നാസി പാർട്ടി ആയിരം വർഷം ജർമനി ഭരിക്കുമെന്നായിരുന്നു അധികാരാരോഹണ വേളയിലെ ഹിറ്റ്ലറുടെ പ്രഖ്യാപനം; എന്നാൽ സംഭവിച്ചതോ? അധികാരത്തിലേറി ഒരു ദശാബ്ദം മാത്രം പിന്നിടുന്ന വേളയിൽ 1945 ഏപ്രിൽ 30-ന് ഹിറ്റ്ലർക്കും ഭാര്യ ഈവ ബ്രൗണിനും ആത്മഹത്യയിൽ അഭയം പ്രാപിക്കേണ്ടി വന്നു. നാസീ ഭരണകൂടത്തിലെ രണ്ടാം സ്ഥാനക്കാരനായി കരുതപ്പെട്ടിരുന്ന ഡോ. ജോസഫ് ഗീബൽസും തൊട്ടടുത്ത ദിവസം കുടുംബ സമേതം ആത്മഹത്യ ചെയ്തു. ഹിറ്റ്ലർ ഭരണകൂടത്തിലെ ആഭ്യന്തര മന്ത്രിയും നാസി ഭീകരതകളുടെ രാജശിൽപിയുമായി അറിയപ്പെട്ടിരുന്ന ഹൈനറിച്ച് ഹിംളറും ആത്മഹത്യയുടെ മാർഗം തന്നെയാണ് തെരഞ്ഞെടുത്തത്. നേതാക്കളുടെ വഴിയിൽ ആത്മഹത്യയിൽ അഭയം പ്രാപിച്ച നാസികളുടെ എണ്ണം ചെറുതല്ല; 1945-ൽ ബെർലിൻ നഗരത്തിൽ മാത്രം സ്വയം മരണത്തെ പുൽകിയവരുടെ എണ്ണം ഏഴായിരം വരുമത്രേ!
അത്യന്തം വിചിത്രമെന്ന് തോന്നിയേക്കാവുന്ന ചരിത്രത്തിലെ ഈ പ്രഹേളിക എങ്ങനെയാണ് വിശദീകരിക്കാനാവുക? ആധുനിക അധികാര സ്വരൂപങ്ങളുടെ ചരിത്രത്തിൽ ഒരു കൊള്ളിയാൻ കണക്കേ ഉദ്ഭവിക്കുകയും ദുരന്ത പര്യവസായിയായി തിരോഭവിക്കുകയും ചെയ്ത ഒന്നായിരുന്നുവല്ലോ നാസി പ്രസ്ഥാനം. അതിന്റെ പ്രയാണ പഥങ്ങളിലൂടെയുള്ള സൂക്ഷ്മമായ പര്യവേക്ഷണമാണ് എൻ.എം ഹുസൈന്റെ ഈ പുസ്തകം.

സവിശേഷമായ സാമൂഹിക സാഹചര്യങ്ങളോട് വ്യക്തികളും സമൂഹങ്ങളും പ്രതികരിക്കുന്നതിന്റെ രീതിശാസ്ത്രം പഠന വിധേയമാക്കാൻ കൂടി ഗ്രന്ഥകാരൻ മുതിർന്നിട്ടുണ്ട്. സമകാലിക സാമൂഹിക സാഹചര്യങ്ങളെ വസ്തുനിഷ്ഠമായി വിലയിരുത്താനും ഭാവി പദ്ധതികൾ ആസൂത്രണം ചെയ്യാനും സാമൂഹ്യ ശാസ്ത്ര പഠിതാക്കൾക്കെന്നപോലെ, രാഷ്ട്രീയ - സാമൂഹിക പ്രസ്ഥാനങ്ങൾക്കും ഇത്തരം പഠനങ്ങൾ ഏറെ ഗുണം ചെയ്യും. നാസി വംശവെറിയുടെ പകർന്നാട്ടങ്ങൾക്ക് അരങ്ങ് തേടുന്ന വർത്തമാന കാല സാഹചര്യം, തീർച്ചയായും ഇത്തരം പഠനങ്ങൾ ആവശ്യപ്പെടുന്നതു തന്നെ.

വായനക്കാരിൽ കൗതുകമുണർത്താൻ പോന്ന ഒട്ടനവധി വിവരങ്ങളും, അപൂർവമായ അനേകം ചിത്രങ്ങളും ഈ രചന ഉൾക്കൊള്ളുന്നുണ്ട്. ഫാഷിസത്തിന്റെ കാൽപ്പെരുമാറ്റത്തിൽ വേപഥു കൊള്ളുന്ന ഏതൊരു ജനസമൂഹത്തിനും ശുഭ പ്രതീക്ഷ പകരാൻ പോന്ന നിരവധി ഉൾക്കാഴ്ചകളും ഗ്രന്ഥം പ്രദാനം ചെയ്യുന്നു. മുക്കാൽ നൂറ്റാണ്ടു മുമ്പ് കഥാവശേഷനായ ഒരു വ്യക്തിയുടെ മരണ കാരണം ചികയുന്നതിനപ്പുറം ഈ രചന കാലിക പ്രസക്തമായിത്തീരുന്നതും അതുകൊണ്ടാണ്.
പൂർണമായും ആധികാരിക സ്രോതസ്സുകളെയാണ് ഗ്രന്ഥകർത്താവ് തന്റെ രചനയ്ക്കായി ആധാരമാക്കിയിട്ടുള്ളത്. ഇംഗ്ലീഷിനു പുറമേ ജർമൻ, ഫ്രഞ്ച് ഭാഷകളിലുള്ള രേഖകളും പ്രയോജനപ്പെടുത്തിയിരിക്കുന്നു. ഹിറ്റ്ലറുടെ ഏക രചനയായ മെയിൻ കാംഫിന്റെ ആദ്യ പതിപ്പും, ഹിറ്റ്ലറുടെ പ്രസംഗങ്ങളുടെ സമ്പൂർണ സമാഹാരവും മുതൽ, അംഗരക്ഷകന്റെയും സ്വകാര്യ ഡോക്ടറുടെയും വിവരണങ്ങൾ വരെ ഇതിൽ ഉൾപ്പെടുന്നു. ബ്രിട്ടീഷ്, അമേരിക്കൻ, റഷ്യൻ സൈനിക രേഖകൾ, സമകാലികരുടെ അനുസ്മരണങ്ങൾ, ചരിത്ര കൃതികൾ, യുദ്ധ വാർത്തകൾ റിപ്പോർട്ട് ചെയ്ത അക്കാലത്തെ പത്രങ്ങൾ, രഹസ്യാന്വേഷണ ഏജൻസികളുടെ ഡീ ക്ലാസിഫൈ ചെയ്യപ്പെട്ട ഫയലുകൾ, സൈനിക ചരിത്ര രേഖകൾ, ന്യൂറംബെർഗ് വിചാരണാ കോടതി നടപടിക്രമങ്ങൾ എന്നിങ്ങനെ ഗ്രന്ഥകാരൻ കടന്നുപോയ രേഖകളുടെ വൈപുല്യം ആരിലും അന്ധാളിപ്പ് ഉളവാക്കും.

കൊടുങ്ങല്ലൂരിലെ ഇ-പബ്ലികയാണ് പുസ്തകത്തിന്റെ പ്രസാധകർ. ഓൺലൈൻ പ്ലാറ്റ്ഫോം ആയ ആമസോണിലും പുസ്തകം ലഭ്യമാണ്. സരളമായ ആഖ്യാന രീതിയും മികച്ച അച്ചടിയും രചനയ്ക്ക് കൂടുതൽ പാരായണക്ഷമത നൽകുന്നുണ്ട്. കാലികപ്രസക്തിയും ചരിത്ര പ്രാധാന്യവും ഒരുപോലെ മേളിക്കുന്ന ഈ ഗ്രന്ഥത്തിന്റെ പ്രസാധനം മികച്ച വിപണന സാധ്യത ഉറപ്പുവരുത്താൻ കഴിയുന്ന പ്രഫഷണൽ പ്രസാധകരിലൂടെയായിരുന്നുവെങ്കിൽ കൂടുതൽ പ്രയോജനപ്രദമായേനെ! l

ഇന്ത്യ കണ്ട മഹാപണ്ഡിതന്മാരിൽ അഗ്രഗണ്യനായിരുന്നു ശംസുൽ ഉലമാ ശിബ് ലി നുഅ്മാനി (റ). ശംസുൽ ഉലമാ എന്ന വിശേഷണത്തിന് അക്ഷരാർഥത്തിൽ അർഹനായ പണ്ഡിതൻ. ചരിത്രത്തിലും തത്ത്വശാസ്ത്രത്തിലും ഇത്രമാത്രം അഗാധ പാണ്ഡ്യത്യമുള്ള ഒരു പണ്ഡിതൻ ഇന്ത്യയിലുണ്ടായിരുന്നോ എന്നു സംശയം. നബിചരിത്രത്തിൽ ഇന്നും ഒരു ക്ലാസിക് കൃതിയായി നിലകൊള്ളുന്നു അദ്ദേഹവും ശിഷ്യൻ സയ്യിദ് സുലൈമാൻ നദ് വിയും കൂടി എഴുതിയ ആറു വാള്യങ്ങളുള്ള സീറത്തുന്നബി. അതിനു തുടർച്ചയെന്നോണം അല്ലാമാ ശിബ് ലി എഴുതിയ ജീവചരിത്ര കൃതിയാണ് അൽഫാറൂഖ്.

രണ്ടാം ഖലീഫ ഉമറുബ്നുൽ ഖത്വാബി(റ)നെപ്പറ്റി എഴുതപ്പെട്ട കൃതികളിൽ ചരിത്രപരമായ ആധികാരികതകൊണ്ടും കൃത്യതകൊണ്ടും ഒന്നാം സ്ഥാനത്തു നിൽക്കുന്ന കൃതി. അതിന്റെ ഇംഗ്ലീഷ്, അറബി വിവർത്തനങ്ങളും പ്രസിദ്ധീകരിക്കപ്പെട്ടിട്ടുണ്ട്. ഉമറി(റ)ന്റെ ജീവിതത്തെയും ഭരണത്തെയും ഭരണപരിഷ്കാരങ്ങളെയും സമഗ്രമായി പരിചയപ്പെടുത്തുകയാണ്. ഇസ്ലാം ഒരു ലോകശക്തിയായി വികസിക്കുന്നതിൽ ഖാദിസിയ്യ അടക്കമുള്ള യുദ്ധങ്ങൾ വഹിച്ച പങ്കും വിശകലനം ചെയ്യുന്നു. ആ അർഥത്തിൽ കേവലം ജീവചരിത്ര കൃതിയല്ല അൽഫാറൂഖ്.

ബഹുഭാഷാ പണ്ഡിതനായിരുന്ന മർഹൂം ഖാരി ഇബ്റാഹീം കുട്ടി മൗലവിയാണ് വിവർത്തകൻ. സാധാരണക്കാർക്ക് മനസ്സിലാവുന്ന ലളിത ഭാഷയിലാണ് വിവർത്തനം. ഈ ഗ്രന്ഥത്തിന്റെ രണ്ടു വിവർത്തനങ്ങൾ അര നൂറ്റാണ്ടുമുമ്പേ മലയാളത്തിൽ ഇറങ്ങിയിരുന്നു. അതൊന്നും ഇപ്പോൾ ലഭ്യമല്ല. ഇസ്ലാമിക ചരിത്രം പഠിക്കുന്ന വിദ്യാർഥികൾക്കും അധ്യാപകർക്കും എഴുത്തുകാർക്കും നല്ലൊരു അവലംബമാണീ കൃതി. l

എന്താണ് മനുഷ്യ ജീവിതം? അതിന്റെ ലക്ഷ്യവും ഉദ്ദേശ്യവും എന്താവാം? ക്ഷണഭംഗുരമായ ഭൂവാസം തീർത്ത് ധിഷണാശാലികളായ ഈ മനുഷ്യവംശം സമ്പൂർണമായും മണ്ണിൽ അലിഞ്ഞു മറയുകയാണോ? അതല്ല, ജനനത്തോടെ സമാരംഭിതമാവുകയും ഭൂവാസം കഴിഞ്ഞ് രക്ഷാ-ശിക്ഷകളോടെ അനന്തതയിലേക്ക് നീൾച്ചയാവുകയും ചെയ്യുന്ന സോദ്ദേശ്യ പ്രക്രിയയാണോ മാനവ ജീവിതം? ആസ്തികതയും നാസ്തികതയും പിളർന്നുമാറുന്ന മണ്ഡലമാണിത്. പക്ഷേ, ഒന്നു തീർച്ചയുണ്ട്; മാനവ ചരിത്രത്തിൽ സ്ഥിരസ്ഥായിയായി നിലനിന്നതും ഇന്നും അങ്ങനെ പുലരുന്നതും ആസ്തികത തന്നെയാണ്. നാസ്തികത അപൂർവ ന്യൂനപക്ഷത്തിന്റെ അവ്യക്ത സാന്നിധ്യം മാത്രമാണ്.

ആസ്തികത ജീവിതത്തിന് നൽകുന്നത് പ്രതീക്ഷയും ധീരതയുമാണ്. പ്രസാദാത്മകതയും ശുഭാന്ത്യ വിചാര ബോധ്യങ്ങളുമാണ്. ജീവിതത്തിന് വഴിയും വെളിച്ചവുമാണ്. ഈ മാർഗവും തെളിയുന്ന വെട്ടവുമാണ് ജി.കെ എടത്തനാട്ടുകരയുടെ ഏറ്റവും പുതിയ പുസ്തകം 'വഴിയും വെളിച്ചവും'.

താൻ കണ്ട വഴിയും വെട്ടവും സഹജീവികൾക്ക് സമ്മാനിക്കുകയും അതിലൂടെ മറ്റുള്ളവർ കൂടി മോക്ഷിതരാവുകയും ചെയ്യുക എന്ന ഉദാത്തമായ സത്യബോധ്യവും മാനവികതയുമാണ് ഈ രചനക്ക് പിന്നിൽ. സൃഷ്ടിപ്പ് സത്യമാണെങ്കിൽ അതിലും വലിയ സത്യമാണ് സ്രഷ്ടാവ്. സ്രഷ്ടാവില്ലാതെ സൃഷ്ടിയില്ല, കാരണമില്ലാതെ കാര്യവും. അവൻ തന്ന ജീവിതം ഒട്ടും തന്നെ ഹ്രസ്വതയാർന്നൊരു ഫലിതമോ നേരംപോക്കോ അല്ല. അത് ജനനത്തോടെ സമാരംഭിതമാവുകയും മരണശേഷവും അന്ത്യമാവാതെ നിരന്തരത തേടുകയും ചെയ്യാൻ നിയതിയിൽ പ്രവർത്തിക്കുന്ന ഒരു പ്രക്രിയയാണ്. സ്രഷ്ടാവിന്റെ സോദ്ദേശ്യപൂർണമായ ഒരു സത്യപ്രവൃത്തി. ഇത് ആദ്യമേ നാം തിരിച്ചറിയണം. ഏക ദൈവ വിശ്വാസം മനുഷ്യജീവിതത്തെ എങ്ങനെയൊക്കെയാണ് ഉണർത്തി സഫലമാക്കുന്നതെന്നും പുരസ്കരിച്ച് മോക്ഷിതനാക്കുന്നതെന്നുമാണ് ലളിതമായ നിരവധി നിത്യജീവിത സാക്ഷ്യങ്ങളിലൂടെ ജി.കെ പുസ്തകത്തിൽ പറയുന്നത്.
വളരെ ലളിതവും തീർത്തും ജീവിതഗന്ധിയുമായ ഉദാഹരണങ്ങളിലൂടെയാണ് ജി.കെ വലിയ വലിയ പ്രപഞ്ചസത്യങ്ങൾ അവതരിപ്പിക്കുന്നത്. ഇതത്രയും വ്യക്തിപരമായി ഇദ്ദേഹത്തിന്റെ ജീവിതാനുഭവങ്ങളാണ്. നമുക്ക് വിശ്വാസബോധങ്ങൾ ഉറപ്പിച്ചെടുക്കാൻ പോന്ന നിരവധി ആഖ്യാനങ്ങൾ അദ്ദേഹം സാമാന്യമായി പറഞ്ഞുപോകുന്നു. 'ചെറിയ കുടുംബം എന്തുകൊണ്ട് സന്തുഷ്ടമാകുന്നില്ല' എന്ന പ്രബന്ധം ഇതിൽ നല്ലൊരു പഠനമാണ്. ഞാൻ മാത്രം സന്തുഷ്ടനാവുക എന്ന ആർത്തിയും സ്വാർഥതയും തന്നെയാണ് ഈ സന്തുഷ്ടസാധ്യതയെ സത്യത്തിൽ അട്ടിമറിക്കുന്നത്. 'വിധി ബോധ്യം എന്തിനാണ്?' 'മനുഷ്യജന്മം', 'ജീവിതത്തിന്റെ ലക്ഷ്യം', 'അറിവും തിരിച്ചറിവും' എന്നീ തലവാക്യങ്ങളിലൊക്കെയും ഗഹനാശയങ്ങൾ തന്നെയാണ് ലളിത മനോഹരമായി അദ്ദേഹം ഉറപ്പിച്ചടുക്കുന്നത്. അത്യന്തം ലളിതമാണ് പുസ്തകത്തിന്റെ ഭാഷ. ചെറുതെങ്കിലും സുഭഗതയാർന്ന ഈ രചന സൗജന്യ വിതരണത്തിനായി പ്രസാധനം ചെയ്തിരിക്കുന്നത് ബി.എസ്.എം ട്രസ്റ്റ് ഏലാങ്കോടാണ്.
കോപ്പികൾക്ക് ബന്ധപ്പെടുക: 0490 2311334, 9072091543. l

ആധുനിക കാലത്ത് രചിക്കപ്പെട്ട സയ്യിദ് മൗദൂദിയുടെ 'തഫ്ഹീമുൽ ഖുർആൻ', സയ്യിദ് ഖുത്വ്്ബിന്റെ 'ഫീ ളിലാലിൽ ഖുർആൻ', റശീദ് രിദായുടെ 'തഫ്സീറുൽ മനാർ', മുപ്പത് വാള്യങ്ങളിലുള്ള ഇബ്നു ആശൂറിന്റെ 'തഫ്സീറുത്തഹ് രീർ വത്തൻവീർ', ഇരുപത്തിയഞ്ചു വാള്യങ്ങളിലുള്ള 'തഫ്സീർ ശഅ്റാവി' എന്നീ വിഖ്യാത തഫ്സീറുകളുടെ കൂട്ടത്തിൽ എടുത്തുപറയാവുന്ന തഫ്സീറാണ് ഉർദുവിൽ രചിക്കപ്പെട്ട 'തദബ്ബുറെ ഖുർആൻ' അഥവാ ഖുർആൻ പരിചിന്തനം. ഗ്രന്ഥകർത്താവ് മഹാ പണ്ഡിതനും ചിന്തകനും ഗ്രന്ഥകാരനുമായിരുന്ന മൗലാനാ അമീൻ അഹ്സൻ ഇസ്ലാഹി. ഇന്ത്യയിലെ അറിയപ്പെട്ട ഖുർആൻ പണ്ഡിതനും 'നിളാമുൽ ഖുർആന്റെ' ശക്തനായ വക്താവുമായിരുന്ന ഹമീദുദ്ദീൻ ഫറാഹിയുടെ ശിഷ്യനുമായിരുന്നു അമീൻ അഹ്സൻ ഇസ് ലാഹി. അറബിയിലേക്ക് വിവർത്തനം ചെയ്യപ്പെട്ടിരുന്നെങ്കിൽ അറബ് പണ്ഡിതന്മാർക്കിടയിൽ ഖുർആനിക ചിന്തയിൽ ഒരു വിപ്ലവംതന്നെ സൃഷ്ടിക്കുമായിരുന്നു ഒമ്പത് വാള്യത്തിലുള്ള ഈ തഫ്സീർ. അതിന്റെ മൂന്ന് ഭാഗങ്ങൾ വരെ ഇംഗ്ലീഷിലേക്ക് വിവർത്തനം ചെയ്യപ്പെട്ടിട്ടുണ്ട്.

അതിന്റെ ആദ്യത്തെ രണ്ടു വാള്യങ്ങളും അവസാനത്തെ വാള്യവും മലയാളത്തിലേക്കും വിവർത്തനം ചെയ്യപ്പെട്ടിരിക്കുന്നു. മലയാളത്തിലെ ഖുർആൻ പഠിതാക്കൾക്ക് വലിയൊരു അനുഗ്രഹമാണിത്. വിവർത്തകൻ ഗ്രന്ഥകാരനും പണ്ഡിതനുമായ കെ.ടി അബ്ദുർറഹ് മാൻ നദ് വി. പരിഭാഷ ലളിതമാണ്. മൂലകൃതിയുടെ ആശയം വെച്ചുനോക്കുമ്പോൾ സാധാരണ പഠിതാക്കൾക്കും വായനക്കാർക്കും അതത്ര സുഗ്രാഹ്യവും ലളിതവുമല്ല. പഠനവും ചിന്തയും ആവശ്യപ്പെടുന്ന വ്യാഖ്യാനമാണ് ഇസ് ലാഹി സാഹിബിന്റേത്. ഇപ്പോൾ പ്രസിദ്ധീകരിക്കപ്പെട്ട തദബ്ബുറിന്റെ രണ്ടാം ഭാഗം ആലു ഇംറാൻ, അന്നിസാഅ്, അൽമാഇദ എന്നീ സൂറകൾ ഉൾക്കൊള്ളുന്നതാണ്. അച്ചടിയും പേപ്പറും ബൈൻഡിംഗും നല്ല നിലവാരം പുലർത്തുന്നു. ക്രൗൺ നാലിലൊന്ന് വലുപ്പം.
l

ഇസ്ലാമിനെയും ശരീഅത്തിനെയും താത്ത്വികമായി തകർക്കാൻ അതിന്റെ ശത്രുക്കൾ കണ്ടെത്തിയ മാർഗങ്ങളിൽ ഒന്നാണ് ഇസ്ലാമിന്റെ അന്ത്യപ്രവാചകനായ മുഹമ്മദ് നബി(സ)യുടെ വ്യക്തിത്വത്തെ ഇടിച്ചുതാഴ്ത്തുക എന്നതും, ഹദീസുകളിൽ സംശയം ജനിപ്പിക്കുക എന്നതും, പിന്നീടതിനെ നിഷേധിക്കുക എന്നതും. ഇതിനെ പ്രതിരോധിക്കാനും ഇസ്ലാമിക ശരീഅത്തിന്റെ രണ്ടാം പ്രമാണമായ ഹദീസുകളുടെ പ്രാമാണ്യത്തെ സംരക്ഷിക്കാനും ശക്തമായ കവചം തീർക്കാൻ പണ്ടുമുതലേ മുസ്ലിം പണ്ഡിതന്മാരും ഇമാമീങ്ങളും ശ്രമിച്ചുപോന്നിട്ടുണ്ട്. ഭൗതിക-യുക്തിവാദ പ്രത്യയശാസ്ത്രങ്ങൾ ഏറെ സ്വാധീനം നേടിയ ആധുനിക കാലത്ത് അതിന്റെ അപ്പോസ്തലന്മാരുടെ ശക്തമായ ആക്രമണങ്ങൾക്കു വിധേയമായത് ഇസ്ലാമും അതിന്റെ പ്രവാചകനും അതിന്റെ പ്രമാണങ്ങളായ ഖുർആനും ഹദീസുമാണ്. അവയുടെ പ്രതിരോധാർഥം നിരവധി കൃതികളും വെളിച്ചം കണ്ടിട്ടുണ്ട്. ഹദീസ് നിഷേധ പ്രവണതക്കെതിരെ ശക്തമായ പ്രതിരോധം തീർക്കുകയും, അതിന്റെ വക്താക്കളെ തറപറ്റിക്കുകയും ചെയ്ത ചിന്തകരിലൊരാളായിരുന്നു സയ്യിദ് മൗദൂദി. സുന്നത്തിന്റെ പ്രാമാണികത എന്ന കനപ്പെട്ട കൃതി അദ്ദേഹത്തിന്റെ സംഭാവനയാണ്. ഐ.പി.എച്ച് ഇത് നേരത്തെ പ്രസിദ്ധീകരിച്ചിട്ടുണ്ട്. ഇപ്പോൾ ആ വിഷയകമായി അദ്ദേഹത്തിന്റെ ലേഖന സമാഹാരവും ഐ.പി.എച്ച് പുറത്തിറക്കിയിരിക്കുന്നു. 'പ്രവാചകൻ, പ്രവാചകത്വം, ഹദീസ് നിഷേധം' എന്ന പേരിൽ.

പ്രവാചകൻ, പ്രവാചകത്വം, ഹദീസ് നിഷേധം: വിതണ്ഡാവാദങ്ങൾ, അനുബന്ധം എന്നീ നാലു ഭാഗങ്ങളായി തിരിച്ച ഈ ഗ്രന്ഥത്തിൽ ഇരുപത് അധ്യായങ്ങളാണുള്ളത്. മുഹമ്മദ് നബി ഖുർആന്റെ കണ്ണാടിയിൽ, മുഹമ്മദ് നബിയുടെ പ്രവാചകത്വം, എന്തുകൊണ്ട് ഈ നബി?, ലോകാനുഗ്രഹി, സ്വഭാവമഹിമയുടെ മകുടോദാഹരണം, മോക്ഷത്തിന് ഏകദൈവ വിശ്വാസം മാത്രം മതിയോ?, പ്രവാചകത്വ വിശ്വാസം അനിവാര്യമാണോ?, പ്രവാചകനെ അനുസരിക്കുന്നതിന്റെയും പിന്തുടരുന്നതിന്റെയും വിവക്ഷ, പ്രവാചക കൽപനകൾ: സ്വാതന്ത്ര്യത്തിന്റെ പരിമിതി, പ്രവാചകത്വവും പ്രവാചകന്റെ കൽപനകളും, പ്രവാചക ദൗത്യത്തിലുള്ള വിശ്വാസം, മുഹമ്മദ് നബി പ്രവാചകനെന്ന നിലയിലും മനുഷ്യനെന്ന നിലയിലും, സന്തുലിത സമീപനം, ഹദീസിനെക്കുറിച്ച് ചില ചോദ്യങ്ങൾ, അഹ് ലെ ഹദീസുകാരുടെ സംശയങ്ങൾ, ഖുർആനും തിരുസുന്നത്തും, ഒരു ഹദീസ്: വിമർശനവും മറുപടിയും, ഇസ്ലാമിക സാമൂഹ്യവ്യവസ്ഥയും സ്വതന്ത്ര ഗവേഷണവും, ഹദീസ് പരിശോധന: നിവേദന പരമ്പരയുടെയും മതാവഗാഹത്തിന്റെയും പങ്ക്, സുന്നത്തും ആദത്തും തമ്മിലുള്ള വ്യത്യാസം തുടങ്ങി ഇരുപത് അധ്യായങ്ങൾ.

ഒന്നാം ഭാഗത്തിൽ മുഹമ്മദ് നബി(സ)യുടെ സവിശേഷ വ്യക്തിത്വത്തെ അനന്യമായ ശൈലിയിൽ വിശകലനം ചെയ്യുന്ന ലേഖനങ്ങളാണ്. രണ്ടാം ഭാഗത്തിലെ ലേഖനങ്ങൾ പ്രവാചകത്വത്തിന്റെ പൊരുളിലേക്കും ആന്തരാർഥങ്ങളിലേക്കും വെളിച്ചം വീശുന്നു. മൂന്നാം ഭാഗം ഹദീസ് നിഷേധികളുടെ വിതണ്ഡാവാദങ്ങളെ പ്രമാണബദ്ധമായും യുക്തിഭദ്രമായും പൊളിച്ചടക്കുന്ന ലേഖനങ്ങളാണ്. നാലാം ഭാഗത്ത് ഹദീസ് സംബന്ധമായി ഉന്നയിക്കപ്പെട്ട ചോദ്യങ്ങൾക്കുള്ള മറുപടികളുമാണ്. അദ്ദേഹത്തിന്റെ 'സുന്നത്തിന്റെ പ്രാമാണികത' എന്ന കൃതിയും ഈ ലേഖന സമാഹാരവും വായനക്കാരന് ഹദീസുകളെപ്പറ്റി വ്യക്തമായ ഉൾക്കാഴ്ച നൽകാൻ പര്യാപ്തമാണ്. ഹദീസ് നിഷേധികളുടെ വിതണ്ഡാവാദങ്ങൾക്ക് കൃത്യമായ മറുപടി നൽകുകയും ചെയ്യുന്നു. വി.എ കബീറിന്റെ മനോഹരമായ വിവർത്തനം. l