ആഗസ്റ്റ് 18-ന് ശാന്തപുരം അൽ ജാമിഅയിൽ നടന്ന ക്വസ്റ്റ് '24 സയൻസ് കാഡേഴ്സ് മീറ്റ് (Quest'24 Science Cadres Meet) വേറിട്ട ഒത്തുചേരലായിരുന്നു. പ്രസ്ഥാനപരിസരത്തുള്ള ശാസ്ത്രവിദ്യാർഥികളുടെയും ഗവേഷകരുടെയും പ്രഫഷനലുകളുടെയും അപൂർവസംഗമം. കേരളത്തിലും പുറത്തും സയൻസ് പഠിക്കുകയും വിവിധ ശാസ്ത്രമേഖലകളിൽ പ്രവർത്തിക്കുകയും ചെയ്യുന്ന മൂന്നൂറോളം പ്രവർത്തകർ തിരക്കുകളിൽ നിന്ന് ഒരു ദിവസം അവധിയെടുത്ത് രാവിലെ മുതൽ വൈകുന്നേരം വരെ ഒരുമിച്ചിരുന്നു. പ്രതിനിധികളിൽ പകുതിയോളം സ്ത്രീകളും വിദ്യാർഥിനികളുമായിരുന്നു.

സെന്റർ ഫോർ സ്റ്റഡി ആന്റ് റിസർച്ച് കേരളയുടെ (CSR Kerala) യുടെ കീഴിൽ പ്രവർത്തിക്കുന്ന ക്വസ്റ്റ് സയൻസ് ഫോറം, എസ്.ഐ.ഒ, ജി.ഐ.ഒ സംയുക്തമായാണ് സംഗമം സംഘടിപ്പിച്ചത്. ശാസ്ത്രമേഖലയിലെ പ്രസ്ഥാനാഭിമുഖ്യമുള്ള കേഡറുകളെ ഒരുമിച്ചു കൂട്ടുക, അവർക്ക് ഇസ്‌ലാമികവും പ്രാസ്ഥാനികവുമായ ദിശാബോധം നൽകുക, പരസ്പരം അറിയാനും അനുഭവങ്ങൾ പങ്കുവെക്കാനും സൗഹൃദം പുതുക്കാനും പുതിയ സൗഹൃദങ്ങൾ സ്ഥാപിക്കാനും അവസരമൊരുക്കുക, ശാസ്ത്രവും സാങ്കേതികവിദ്യയും ഉയർത്തുന്ന സാധ്യതകളെയും വെല്ലുവിളികളെയും ഇസ്‌ലാമിന്റെ ജ്ഞാനശാസ്ത്ര കാഴ്ചപ്പാടിലൂടെ മനസ്സിലാക്കാൻ ശ്രമിക്കുക ഇതൊക്കെയായിരുന്നു സംഗമത്തിന്റെ ലക്ഷ്യങ്ങൾ. ഉള്ളടക്കം കൊണ്ടും സംഘാടക മികവ് കൊണ്ടും വേറിട്ടു നിന്ന ഒന്ന്. ശാസ്ത്രമേഖലയിൽ അപൂർവ നേട്ടങ്ങൾ കൈവരിച്ച പലരുടെയും സാന്നിധ്യം പരിപാടിയുടെ മാറ്റു കൂട്ടി.
ജമാഅത്തെ ഇസ്ലാമി കേരള അമീർ പി. മുജീബുർറഹ്മാൻ ഉദ്ഘാടനപ്രസംഗം ആരംഭിച്ചത് ഇങ്ങനെ: "ഞാൻ ഇവിടെ വന്നില്ലായിരുന്നെങ്കിൽ പ്രസ്ഥാനത്തിന്റെ ഇത്രയും വലിയ ഒരു റിസോഴ്സിനെക്കുറിച്ച് അജ്ഞനായിപ്പോയേനെ."
പടിഞ്ഞാറിന്റെ ജ്ഞാനാധികാരവും രാഷ്ട്രീയാധികാരവുമാണ് ഇന്നത്തെ ശാസ്ത്രത്തെ നിയന്ത്രിക്കുന്നത് എന്നതിനാൽ, യൂറോകേന്ദ്രിത ശാസ്ത്രബോധങ്ങളെ തിരുത്തിയെഴുതണമെന്ന് അദ്ദേഹം ആഹ്വാനം ചെയ്തു. ശാസ്ത്രം നിരപേക്ഷമായ ഒരു ജ്ഞാനശാഖയല്ല. ശാസ്ത്രം മതവിരുദ്ധമാണെന്ന ആശയം പടിഞ്ഞാറിന്റെ ആശയ പരിസരത്ത് ഉടലെടുത്തതാണ്. ശാസ്ത്രചിന്തയും ശാസ്ത്രജ്ഞാനവും ദൈവബോധത്തെ നിരാകരിക്കുകയല്ല, മറിച്ച് പരസ്പര പൂരകമായി വർത്തിക്കുകയാണ് - അദ്ദേഹം വ്യക്തമാക്കി.

സി.എസ്.ആർ ദേശീയ ഡയറക്ടർ ഡോ. മുഹമ്മദ് രിസ് വാൻ മുഖ്യ പ്രഭാഷണം നിർവഹിച്ചു. ശാസ്ത്രവും ശാസ്ത്രവാദവും തമ്മിലുള്ള വ്യത്യാസം, ജ്ഞാനശാസ്ത്രത്തെക്കുറിച്ച ഇസ്ലാമിക-സെക്യുലർ വീക്ഷണങ്ങൾ, അറിവിന്റെ ഉറവിടങ്ങൾ തുടങ്ങിയ ഗഹനമായ വിഷയങ്ങൾ അദ്ദേഹം ചർച്ച ചെയ്തു. ഉദ്ഘാടന സെഷനിൽ സി.എസ്. ആർ കേരള ഡയറക്ടർ ടി.കെ.എം ഇഖ്ബാൽ അധ്യക്ഷത വഹിച്ചു. സമ്മേളനത്തിന്റെ ഭാഗമായി ഒരുക്കിയ എക്സിബിഷൻ പ്രത്യേകം ശ്രദ്ധിക്കപ്പെട്ടു. ശാസ്ത്രരംഗത്ത് ഗവേഷണം നടത്തുന്ന പ്രസ്ഥാന പ്രവർത്തകരുടെ ശ്രദ്ധേയമായ ഗവേഷണങ്ങളും കണ്ടെത്തലുകളും 60 ചാർട്ടുകളാക്കി പ്രദർശിപ്പിച്ചുകൊണ്ടാണ്, ശാസ്ത്രമേഖലയിൽ ഇനിയും വേണ്ടവിധം തിരിച്ചറിയപ്പെട്ടിട്ടില്ലാത്ത പ്രസ്ഥാനത്തിന്റെ വിഭവശേഷിയെ സംഘാടകർ അടയാളപ്പെടുത്തിയത്.

പ്രതിനിധികളെ അവരുടെ പഠന-ഗവേഷണ മേഖലകളെ അടിസ്ഥാനമാക്കി ഏഴ് കാറ്റഗറികളിലായി തിരിച്ചുള്ള ഗ്രൂപ്പ് ഡിസ്കഷൻ ആയിരുന്നു സമ്മേളനത്തിലെ രണ്ടാമത്തെ സെഷൻ. സയൻസ് വിദ്യാർഥികളും അധ്യാപകരും ഗവേഷകരും അഭിമുഖീകരിക്കുന്ന പ്രശ്നങ്ങളെക്കുറിച്ചും ഭാവിയിലെ സാധ്യതകളെക്കുറിച്ചും അവർ ചർച്ച ചെയ്തു. വിവിധ ഗ്രൂപ്പുകളെ പ്രതിനിധാനം ചെയ്ത് ഡോ. മുഹമ്മദ് അലിഫ് (മെഡിക്കൽ സയൻസ്), ഫാഇസ എം.എ (എഞ്ചിനീയറിങ്), ഇൻഫാസ് റഹീം പി. (ലൈഫ് സയൻസ്), അർഷദ് ടി. (കെമിസ്ട്രി), ആതിഫ് സയ്യാഫ് (ഭൗമശാസ്ത്രം), ആയിഷ നഫാ, അൻസാഫ് കെ. അമീൻ (മാത്തമാറ്റിക്സ്), അംന റയ്യാൻ കെ.വി., ജാബിർ വി.എം (ഫിസിക്സ്) എന്നിവർ സംസാരിച്ചു. ഡോ. നൗജാസ് ചർച്ച നിയന്ത്രിച്ചു. ജർമനിയിൽ നടന്ന നൊബേൽ ജേതാക്കളുടെ 73-ാം സമ്മേളനത്തിൽ പ്രത്യേക ക്ഷണിതാവായി പങ്കെടുത്ത ഡോ. അമൽ അബ്ദുർറഹ്മാൻ തന്റെ വൈജ്ഞാനിക യാത്രയുടെ അനുഭവങ്ങൾ പങ്കുവെച്ചു. സംഗമത്തിന്റെ മുന്നോടിയായി നടന്ന 'തിസിസ് അറ്റ് ഫൈവ്’ എന്ന ഓൺലൈൻ മത്സരത്തിൽ ഇരുപതോളം പേർ പങ്കെടുത്തു. അഞ്ച് മിനുട്ടിനുള്ളിൽ ഗവേഷണ പ്രബന്ധങ്ങൾ സംഗ്രഹിച്ച് അവതരിപ്പിക്കുന്നതായിരുന്നു മത്സരം. ചെന്നൈ ലയോളയിലെ വിദ്യാർഥി വർദ റഷീദയും പൂനെ എൻ. സി. എല്ലിലെ വിദ്യാർഥി അജ്മൽ പാണ്ടികശാലയും ഒന്നും രണ്ടും സ്ഥാനങ്ങൾ നേടി.

ശാസ്ത്രത്തിന്റെ രാഷ്ട്രീയത്തെക്കുറിച്ച് ബാസിൽ സലീമിന്റെയും ഡോ. സാദിഖ് പി.കെയുടെയും ശ്രദ്ധേയമായ രണ്ട് അവതരണങ്ങളായിരുന്നു ഉച്ചക്ക് ശേഷമുള്ള ആദ്യ സെഷനിൽ. പടിഞ്ഞാറിന്റെ അധീശ താൽപര്യങ്ങളും കോർപറേറ്റ് താൽപര്യങ്ങളും എങ്ങനെയാണ് ശാസ്ത്രഗവേഷണങ്ങളെ സ്വാധീനിക്കുന്നതെന്ന് ബാസിൽ വിവരിച്ചു. ശാസ്ത്രം വംശീയതയുടെ ടൂളായി മാറുന്നതിന്റെ നിരവധി ഉദാഹരണങ്ങൾ സാദിഖ് ചൂണ്ടിക്കാട്ടി. ജി.ഐ. ഒ സെക്രട്ടറി ലുലു മർജാൻ സെഷൻ നിയന്ത്രിച്ചു.
'മീറ്റ് ദ ലീഡേഴ്സ്' സെഷനിൽ ജമാഅത്തെ ഇസ്ലാമി സംസ്ഥാന സെക്രട്ടറി ടി. മുഹമ്മദ് വേളം, എസ്.ഐ.ഒ സംസ്ഥാന പ്രസിഡന്റ് മുഹമ്മദ് സഈദ്, ജി.ഐ.ഒ സംസ്ഥാന പ്രസിഡന്റ് അഡ്വ. തമന്ന സുൽത്താന, സോളിഡാരിറ്റി സംസ്ഥാന പ്രസിഡന്റ് സി.ടി സുഹൈബ് എന്നിവർ ശാസ്ത്രമേഖലയുമായി ബന്ധപ്പെട്ട പ്രസ്ഥാനത്തിന്റെയും പോഷക ഘടകങ്ങളുടെയും നിലപാടുകളും ചുവടുവയ്പുകളും വിശദീകരിച്ചു. എസ്. ഐ. ഒ സെക്രട്ടറി മിസ്അബ് ശിബ് ലി ചർച്ച നിയന്ത്രിച്ചു.

അൽ ജാമിഅ ഡെപ്യൂട്ടി ഡയറക്ടർ ഡോ. നഹാസ് മാള സമാപനപ്രഭാഷണം നിർവഹിച്ചു. അറിവും ദൈവിക മാർഗദർശനവും കണ്ണിചേരുമ്പോഴാണ് മനുഷ്യന് ദുഃഖവും ഭയവും അതിജീവിക്കാൻ കഴിയുക എന്ന് അദ്ദേഹം ഓർമിപ്പിച്ചു. പ്രോഗ്രാം കൺവീൻ ഡോ. അസ്വീൽ ഇ.എൻ സ്വാഗതവും അഹ്്ലാം സുബൈർ നന്ദിയും പറഞ്ഞു. ലുലു മുജീബുർറഹ്മാൻ, അംന റഹ്മാൻ കെ.വി എന്നിവർ ആങ്കർമാരായിരുന്നു. l

വയനാട് ദുരന്തഭൂമിയിലെ നൂറുകണക്കിനാളുകൾക്ക് ആശ്രയമായി പീപ്പ്ൾസ് ഫൗണ്ടേഷൻ ദുരിതാശ്വാസ സെൽ. മുണ്ടക്കൈ-ചൂരൽമലയിൽ ഉരുൾപൊട്ടലുണ്ടായ ജൂലൈ 30-ന് അടിയന്തര സ്വഭാവത്തിൽ ആരംഭിച്ച ദുരിതാശ്വാസ സെല്ലിൽ ദിവസവും നിരവധി പേരാണ് എത്തിക്കൊണ്ടിരുന്നത്. മേപ്പാടി പോലീസ് സ്റ്റേഷന് സമീപം പ്രവർത്തിച്ചിരുന്ന സെൽ ദുരിതാശ്വാസ ക്യാമ്പുകളിലും ബന്ധു വീടുകളിലും എത്തിയവർക്ക് അവശ്യ സാധനങ്ങളടങ്ങിയ എമർജൻസി കിറ്റുകളാണ് ആദ്യമെത്തിച്ചത്. സംസ്ഥാന തലത്തിൽ കോഴിക്കോട് കേന്ദ്രീകരിച്ചും, എല്ലാ ജില്ലാ കേന്ദ്രങ്ങളിലും വിഭവ സമാഹരണ സെന്ററുകളും ആരംഭിച്ചിരുന്നു. ദുരന്ത ഭൂമിയിൽനിന്ന് ക്യാമ്പുകളിലേക്ക് മാറ്റിയ ആളുകൾക്ക് ആവശ്യമായ വസ്ത്രങ്ങൾ പീസ് വില്ലേജ് ഡ്രസ്സ് ബാങ്കിൽനിന്നാണ് എടുത്തത്. മൃതദേഹങ്ങൾ മോർച്ചറിയിലെത്താൻ തുടങ്ങിയത് മുതൽ വനിതാ വളന്റിയർമാർ ഉൾപ്പെടെയുള്ളവർ ഹോസ്പിറ്റലിലും മോർച്ചറിയിലും കർമനിരതരായിരുന്നു. മൃതദേഹങ്ങൾ സൂക്ഷിക്കുന്നതിനായി 30-ഓളം മൊബൈൽ ഫ്രീസറുകൾ പീപ്പ്ൾസ് ഫൗണ്ടേഷൻ സംഘടിപ്പിച്ചു നൽകിയിരുന്നു.

കൈക്കുഞ്ഞുങ്ങൾക്കായി ക്ലാസ്മുറികളിൽ തൊട്ടിലുകളും വളന്റിയർമാർ സജ്ജീകരിച്ചു. കുടിവെള്ളം ശേഖരിക്കാൻ ക്യാമ്പിലെ ഓരോ കുടുംബത്തിനും ഫ്ളാസ്കുകൾ നൽകി. രോഗങ്ങളാൽ പ്രയാസപ്പെടുന്നവരെ കണ്ടെത്തി അവരെ ക്യാമ്പുകളിൽനിന്ന് മാറ്റിപ്പാർപ്പിച്ചു. ദുരിത ബാധിതർ, സന്നദ്ധ പ്രവർത്തകർ, പോലീസ്, മറ്റു ഉദ്യോഗസ്ഥർ ഉൾപ്പെടെ പതിനായിരത്തിലധികം പേർക്ക് സെന്ററിലെ ഭക്ഷണ കൗണ്ടർ ആശ്വാസമായി. എത്തിക്കൽ മെഡിക്കൽ ഫോറവുമായി ചേർന്ന് ക്യാമ്പുകളിൽ സ്പെഷ്യലിസ്റ്റ് ഡോക്ടർമാരുടെ സേവനം ലഭ്യമാക്കി. മേപ്പാടി ടൗണിൽ താൽക്കാലിക മെഡിക്കൽ സെന്റർ തുറന്നു. നേത്ര പരിശോധന നടത്തി 65 പേർക്ക് കണ്ണടകൾ നൽകി. മാനസിക പ്രയാസം നേരിടുന്നവർക്ക് ഹോം കെയർ കൗൺസലിംഗ് നൽകി.

ഒരു മാസത്തേക്കുള്ള ഭക്ഷണ സാധനങ്ങൾ അടങ്ങിയ 1800 ഫുഡ് കിറ്റുകളാണ് നേരിട്ട് ദുരിതം ബാധിച്ചവർക്കും സമീപ മേഖലയിൽ തൊഴിൽ നഷ്ടമായ കുടുംബങ്ങൾക്കുമായി നൽകിയത്. ക്യാമ്പുകളിൽനിന്ന് വാടക വീടുകളിലേക്ക് മാറിയ നിരവധി കുടുംബങ്ങൾക്ക് വസ്ത്രങ്ങൾ, കട്ടിൽ, ബെഡ്, മേശ, അലമാര, കസേര, അടുപ്പ്, പാത്രങ്ങൾ, അടുക്കള സാമഗ്രികൾ എന്നിവ ആവശ്യാനുസരണം ലഭ്യമാക്കി. 220 വിദ്യാർഥികളുടെ പഠന സ്വപ്നങ്ങൾക്ക് നിറം പകർന്ന് സ്കൂൾ കിറ്റുകൾ വിതരണം ചെയ്തു. തയ്യൽ മെഷീൻ, കാർപ്പെന്ററി ഉപകരണങ്ങൾ, വാക്കറുകൾ എന്നിവ നൽകി. 25 കുടുംബങ്ങൾക്ക് പീപ്പ്ൾസ് ഫൗണ്ടേഷൻ താൽക്കാലിക താമസമൊരുക്കി. നഷ്ടപ്പെട്ട രേഖകൾ വീണ്ടെടുക്കുന്നതിനും സർക്കാർ ആനുകൂല്യങ്ങൾ ലഭ്യമാക്കുന്നതിനും മറ്റു ആവശ്യങ്ങൾക്കും വേണ്ടി മേപ്പാടി സെൽ കേന്ദ്രീകരിച്ച് ഹെൽപ്പ് ഡെസ്കും പ്രവർത്തിച്ചു.

കേരളം, തമിഴ്നാട്, കർണാടക സംസ്ഥാനങ്ങളിലെ വിദ്യാഭ്യാസ സ്ഥാപനങ്ങളും ക്ലബ്ബുകളും വ്യാപാര സ്ഥാപനങ്ങളും തൊഴിലാളി കൂട്ടായ്മകളുമൊക്കെയാണ് ദുരിതാശ്വാസ സെല്ലിലേക്ക് വിഭവങ്ങൾ എത്തിച്ചത്. കുരുന്നുകൾ അവരുടെ ചെറിയ സമ്പാദ്യവും എത്തിക്കുന്നുണ്ടായിരുന്നു.

പീപ്പ്ൾസ് ഫൗണ്ടേഷൻ ഒരു പഠന റിപ്പോർട്ട് തയാറാക്കിയിട്ടുണ്ട്. പുനരധിവാസ പ്രവർത്തനങ്ങൾ നടത്തുന്ന എൻ.ജി.ഒകൾക്കും മറ്റും അത് പ്രയോജനപ്പെടും. ഏഴ് കിലോമീറ്റർ ജനവാസ മേഖലയിലെ തകർന്ന വീടുകൾ, പാടികൾ, താമസിച്ചിരുന്ന കുടുംബങ്ങൾ, വ്യാപാര സ്ഥാപനങ്ങൾ, സ്കൂളുകൾ, മറ്റ് പൊതു സ്ഥാപനങ്ങൾ, റോഡുകൾ, പാലങ്ങൾ, മുണ്ടക്കൈ-ചൂരൽമല മേഖലയിലെ ദുർബല പ്രദേശങ്ങളിലെ വീടുകൾ തുടങ്ങി വിശദ വിവരങ്ങൾ അടയാളപ്പെടുത്തി ജിയോ മാപ്പിംഗിലൂടെ പൊതുജനങ്ങൾക്ക് ലഭ്യമാക്കും.

10 കോടി രൂപയുടെ ആദ്യഘട്ട പുനരധിവാസ പ്രവർത്തനങ്ങൾക്കാണ് ഫൗണ്ടേഷൻ രൂപം നൽകുന്നത്. ഇതിന് മുന്നോടിയായി സമൂഹത്തിന്റെ വിവിധ മേഖലയിൽ നിന്നുള്ളവരെ ഉൾപ്പെടുത്തി സമഗ്രവും സുസ്ഥിരവുമായ പുനരധിവാസത്തെക്കുറിച്ച ഏകദിന ശിൽപശാല കഴിഞ്ഞ ദിവസം സംഘടിപ്പിക്കുകയുണ്ടായി. പുനരധിവാസ പ്രവർത്തനങ്ങൾക്ക് നേതൃത്വം നൽകുന്നതിനും ഏകോപിപ്പിക്കുന്നതിനും മേപ്പാടി കാപ്പൻ കൊല്ലിയിൽ പുതിയ ഓഫീസ് തുറന്നിട്ടുണ്ട്. പുനരധിവാസ പ്രവർത്തനങ്ങൾക്ക് ഉടൻ തുടക്കം കുറിക്കും.

കൊടിക്കുന്നിൽ സുരേഷ് എം.പി, ടി. സിദ്ദീഖ് എം. എൽ.എ, ഐ.സി ബാലകൃഷ്ണൻ എം.എൽ.എ, തമിഴ്നാട് പാപനാശം എം.എൽ.എ ഡോ. ജവാഹിറുല്ല, ജില്ലാ പഞ്ചായത്ത് പ്രസിഡന്റ് സംശാദ് മരക്കാർ, ജമാഅത്തെ ഇസ്ലാമി അഖിലേന്ത്യാ സെക്രട്ടറി ജനറൽ ടി. ആരിഫലി, അഖിലേന്ത്യാ സെക്രട്ടറി റഹ്മത്തുന്നീസ ടീച്ചർ, കേരള അമീർ പി. മുജീബുർറഹ്മാൻ, ജില്ലാ പഞ്ചായത്ത് വൈസ് പ്രസിഡന്റ് ബിന്ദു, വികസന സ്റ്റാന്റിംഗ് കമ്മിറ്റി ചെയർമാൻ ജുനൈദ് കൈപ്പാണി, വെൽഫെയർ പാർട്ടി സംസ്ഥാന പ്രസിഡന്റ് റസാഖ് പാലേരി, എം.എസ്.എസ് സംസ്ഥാന പ്രസിഡന്റ് പി. ഉണ്ണീൻ, ജംഇയ്യത്തുൽ ഉലമാ സംസ്ഥാന ജനറൽ സെക്രട്ടറി വി.എച്ച് അലിയാർ ഖാസിമി, അസി. മോട്ടോർ വെഹിക്കിൾ ഇൻസ്പെക്ടർ രാജീവ് കുമാർ, യൂത്ത് ലീഗ് സംസ്ഥാന സെക്രട്ടറി അഡ്വ. ഫാത്തിമ തഹ്‌ലിയ, സോളിഡാരിറ്റി സംസ്ഥാന പ്രസിഡന്റ് സി.ടി സുഹൈബ്, എസ്.ഐ.ഒ സംസ്ഥാന പ്രസിഡന്റ് ടി.കെ സഈദ്, വ്യാപാരി വ്യവസായി ഏകോപന സമിതി സംസ്ഥാന സെക്രട്ടറി ജോജി, ജില്ലാ നേതാക്കൾ, ഫ്രറ്റേണിറ്റി മൂവ്മെന്റ് സംസ്ഥാന പ്രസിഡന്റ് കെ.എം ഷെഫ്രിൻ, ആൾ ഇന്ത്യാ മുസ്ലിം പേഴ്സണൽ ലോ ബോർഡ് മെമ്പർ അബ്ദുശ്ശുക്കൂർ ഖാസിമി, സാമൂഹിക പ്രവർത്തകൻ അഷ്റഫ് താമരശ്ശേരി തുടങ്ങിയ പ്രമുഖർ ദുരിതാശ്വാസ സെൽ സന്ദർശിച്ചു.

ജമാഅത്തെ ഇസ്‌ലാമി വയനാട് ജില്ലാ പ്രസിഡന്റ് ടി.പി യൂനുസ്, പീപ്പ്ൾസ് ഫൗണ്ടേഷൻ ജില്ലാ കോഡിനേറ്റർ സി.കെ സമീർ എന്നിവരാണ് സെല്ലിന്റെ പ്രവർത്തനങ്ങൾ ഏകോപിപ്പിച്ചത്. പി.എച്ച് ഫൈസൽ, ടി.പി നൗഷാദ്, നിദാൽ സിറാജ്, ജമീല മേപ്പാടി, സലീം, നിഷ, റസിയ, റംസീന, നസ്ലി, പി.എച്ച് ലത്തീഫ്, വസീം അലി, ഷഫീഖ് കമ്പളക്കാട്, ഷൈജൽ, ഫിദ, തഹ്ലിയ തുടങ്ങിയവരാണ് ദൈനംദിന പ്രവർത്തനങ്ങൾക്ക് നേതൃത്വം നൽകിയത്. l

കണ്ണൂർ: അബൂദബി ഇസ് ലാമിക് കൾച്ചറൽ സെന്റർ (ഐ.സി.സി) പ്രവർത്തകർ കണ്ണൂർ ജില്ലയിലെ മാട്ടൂലിൽ ഒത്തുചേർന്നത് അനുഭൂതിദായകമായ നിമിഷങ്ങൾ സമ്മാനിച്ചു. ഐ.സി.സി എന്ന കൂടാരത്തിൽ രൂപപ്പെട്ട, ആദർശത്തിന്റെ പട്ടുനൂൽ കൊണ്ട് ബന്ധിതമായ സാഹോദര്യത്തെ പ്രവാസത്തിന്റെ വിരാമത്തിനു ശേഷവും നിലനിർത്താൻ ഒരു വ്യാഴവട്ട കാലം മുമ്പ് നിലവിൽ വന്ന ഐ.സി.സി അബൂദബി ഓർമക്കൂട്ടത്തിന്റെ മൂന്നാമത് കുടുംബ സംഗമമാണ് നടന്നത്.

ഒ. അബ്ദുൽ ഖാദർ സാഹിബും കെ.എം ഇബ്റാഹീം മൗലവിയും അബ്ദുർറഹ്്മാൻ സാഹിബും (മാമ) ടി.കെ ഇബ്റാഹീം സാഹിബും (ടൊറോണ്ടോ) ആർ.കെ ഖാലിദ് സാഹിബുമൊക്കെയായിരുന്നു ഐ.സി.സിക്ക് വിത്തുപാകിയ ആദ്യകാല സാരഥികൾ.
വി.എം സുഹ്റ (കൊച്ചി), സഈദ (പള്ളുരുത്തി), അസ്മാബി (കണ്ണൂർ) തുടങ്ങിയ വനിതാ പ്രതിഭകളെയും വിസ്മരിക്കാവതല്ല. ആദരണീയനായ ഉസ്താദ് വി. എ യൂനുസ് ഉമരിയുടെ പ്രൗഢ ഗംഭീരമായ ഖുർആൻ ക്ലാസുകൾ, അബ്ദുസ്സലാം മൗലവിയുടെ (തിരുവനന്തപുരം) സൗമ്യ ഭാഷണങ്ങൾ, പി.എം.എയുടെ സർഗശേഷിയും ഐ.എമ്മിന്റെ സംഘാടക മികവുമൊക്കെ ഐ.സി.സിയെ വൈജ്ഞാനികവും സാമൂഹികവുമായ അനുഭവമാക്കി.

മാട്ടൂലിൽ ജൂലൈ 14-നാണ് 'ഐ.സി.സി ഓർമക്കൂട്ടം കുടുംബ സംഗമം 2024' അരങ്ങേറിയത്. പ്രായത്തിന്റെ അവശത മറന്ന് വന്നെത്തിയ യൂനുസ് മൗലവി തന്നെയായിരുന്നു സദസ്സിന്റെ മുഖ്യ ആകർഷണം. ഉദ്ഘാടന പ്രസംഗത്തിൽ ചരിത്രത്തിന്റെ അതിരുകൾ താണ്ടി അദ്ദേഹം പോയ കാലം ഓർത്തെടുത്തു. ദീനീ ദൗത്യത്തിന്റെ കാലിക പ്രസക്തിക്കും മൗലവി സാഹിബ് അടിവരയിട്ടു.
ഉദ്ഘാടന സെഷനിൽ മുസ്തഫ ഇബ്റാഹീം ഖിറാഅത്ത് നടത്തി. അഡ്വ. കെ.പി അബ്ദുശ്ശുക്കൂർ (വൈസ് ചെയർമാൻ ഓർമക്കൂട്ടം) സ്വാഗതം പറഞ്ഞു. വി.എം മുഹമ്മദ് ശരീഫ് (ചെയർമാൻ ഓർമക്കൂട്ടം) അധ്യക്ഷത വഹിച്ചു.

പി.കെ മുഹമ്മദ് സാജിദ് നദ്്വി (ജമാഅത്തെ ഇസ് ലാമി ജില്ലാ പ്രസിഡന്റ് ), പി.എം അബ്ദുർറഹ്മാൻ (മാടായി ഏരിയാ പ്രസിഡന്റ് ), എൻ.കെ ഇസ്മാഈൽ (ഐ.സി.സി അബൂദബി പ്രസിഡന്റ് ), അബ്ദുല്ല ഹബീബ് (പ്രവാസി സെൽ ഡയറക്ടർ), എ.കെ റുഫൈദ (മാടായി ഏരിയാ കൺവീനർ) ആശംസകൾ നേർന്നു. ഹബീബുർറഹ്മാൻ, അബ്ദുറഹ്മാൻ വടക്കാങ്ങര എന്നിവർ മൺമറഞ്ഞ പ്രവർത്തകരെ അനുസ്മരിച്ചു. ടി.കെ അലി പൈങ്ങോട്ടായി രചിച്ച കവിത അഹ്മദ് ഫദൽ അവതരിപ്പിച്ചു. മിൻഹ സുബൈർ, ഉനൈസ് മാട്ടൂൽ ഗാനം ആലപിച്ചു.

ഓർമക്കൂട്ടത്തിന്റെ റിപ്പോർട്ട് ജനറൽ സെക്രട്ടറി ഫൈസൽ ഇബ്റാഹീം അവതരിപ്പിച്ചു. മാസാന്ത പെൻഷൻ, ചികിത്സാ സഹായം, റമദാൻ ഗിഫ്‌റ്റ്, സ്വയം തൊഴിൽ, മക്കളുടെ വിദ്യാഭ്യാസം തുടങ്ങി വിവിധ മേഖലകളിൽ ഓർമക്കൂട്ടം അംഗങ്ങൾക്ക് നൽകിവരുന്ന സേവനങ്ങൾ റിപ്പോർട്ട് സൂചിപ്പിച്ചു.
മുൻ പ്രസിഡന്റുമാരുടെ അവസരത്തിൽ സി. മുഹമ്മദലി, എം.കെ അബ്ദുല്ല, ഡോ. വി.എം മുനീർ, എ. മുഹമ്മദ് കുഞ്ഞി, ആഇശ ഹബീബ്, ഫാത്തിമ അഹ്മദ്, മറിയം ജമീല സംസാരിച്ചു.

സമാപന സെഷനിൽ അബ്ദു ശിവപുരം, സി.എം.സി അബ്ദുർറഹ്മാൻ, ആർ.കെ ഖാലിദ്, സാലിഹ് തങ്ങൾ, പി.വി അബ്ദുർറഹ്മാൻ, ടി. അബ്ദുർറഹ്മാൻ, ഐ. മുഹമ്മദലി, നാസർ കാരക്കാട്, ജമാൽ കടന്നപ്പള്ളി, വി.കെ ആയിഷ, രഹ്ന, സാജിദ ബഷീർ പോയ കാല അനുഭവങ്ങൾ പങ്കുവെച്ചു.

അബ്ദുർറഹ്മാൻ പൊറ്റമ്മലിന്റെ ഹൃദയംഗമമായ ഉദ്ബോധനത്തോടും ഇ.പി അബൂബർ ഉസ്താദിന്റെ ഭക്തിനിർഭരമായ പ്രാർഥനയോടും കൂടി ഏകദിന സഹവാസത്തിന് തിരശ്ശീല വീണു. മംഗലാപുരം മുതൽ തിരുവനന്തപുരം വരെയുള്ള വിവിധ ഭാഗങ്ങളിൽ നിന്നെത്തിയ അഞ്ഞൂറിലധികം വരുന്ന ഐ.സി.സി കുടുംബാംഗങ്ങൾക്ക് ആതിഥ്യമരുളിയവരെയും മിനാർ വളണ്ടിയേഴ്സിനെയും പ്രാർഥനാ പൂർവം ഓർക്കട്ടെ. l

'യുവശാക്തീകരണത്തിലൂടെ സുസ്ഥിര വികസനം' എന്ന ആശയത്തെ ആസ്പദമാക്കി പീപ്പ്ൾസ് ഫൗണ്ടേഷൻ നടത്തുന്ന കാമ്പയിന് തുടക്കമായി. കാമ്പയിനിന്റെ സംസ്ഥാന തല ഉദ്ഘാടനം സോളിഡാരിറ്റി യൂത്ത് മൂവ്മെന്റ് സംസ്ഥാന പ്രസിഡന്റ് സി.ടി സുഹൈബ് മലപ്പുറത്ത് നിർവഹിച്ചു. ഉത്തരവാദിത്വമുള്ള യുവത, നേതൃപാടവം, ഉന്നത വിദ്യാഭ്യാസം, പ്രീമിയർ വിദ്യാഭ്യാസ സ്ഥാപനങ്ങൾ, സർക്കാർ മേഖലകളിലെ തൊഴിൽ അവസരങ്ങൾ, സംരംഭകത്വം, നിർമിത ബുദ്ധി എന്നീ വിഷയങ്ങളാണ് കാമ്പയിനിൽ ചർച്ച ചെയ്യുന്നത്.

മഹത്തായ ലക്ഷ്യം മുന്നിൽ കണ്ട് അറിവും കഠിനാധ്വാനവും സ്ഥിരോത്സാഹവും കൊണ്ട് തങ്ങളുടെ സ്വപ്നങ്ങൾ സാക്ഷാൽക്കരിക്കാൻ യുവതയെ പ്രേരിപ്പിക്കുകയാണ് കാമ്പയിന്റെ ലക്ഷ്യം. നേതൃ ഗുണങ്ങൾ യുവാക്കളിൽ വളർത്തിയെടുക്കുക എന്നതും കാമ്പയിൻ ലക്ഷ്യമിടുന്നു. തങ്ങൾ ഇടപെടുന്ന മുഴുവന്‍ മേഖലകളിലും മികവ് ഒരു ശീലമാക്കാൻ യുവാക്കൾ ശ്രദ്ധിക്കേണ്ടതുണ്ട്.

വികസനവും നേതൃത്വവും തമ്മിൽ വലിയ ബന്ധമുണ്ട്. തങ്ങളുടെ മേഖലകളിൽ വളരെ വേഗത്തില്‍ മുന്നേറാന്‍ ഉണ്ടായിരിക്കേണ്ട ഏറ്റവും പ്രധാനപ്പെട്ട കഴിവാണ് നേതൃ ശേഷി. സ്ഥാപനങ്ങളുടെ നിലനില്‍പ്പിനും വ്യക്തികളുടെ വളര്‍ച്ചയ്ക്കും ആവശ്യമായ ഏറ്റവും പ്രധാനപ്പെട്ട കാര്യമാണിത്.

ഉന്നത വിദ്യാഭ്യാസമാണ് ഈ കാമ്പയിനിൽ ഫോക്കസ് ചെയ്യുന്ന ഒരു പ്രധാന വിഷയം. ഉന്നത വിദ്യാഭ്യാസത്തിന്റെ അപാര സാധ്യതകൾ വിദ്യാർഥികളെ പരിചയപ്പെടുത്തുകയും ഉയർന്ന റാങ്കുകളുള്ള വിദ്യാലയങ്ങളിൽ പഠിക്കാൻ അവർക്ക് അവസരം ഒരുക്കുകയും വേണം. പാർലമെന്റിന്റെ വിവിധ നിയമങ്ങൾക്ക് കീഴിൽ (2023 ജൂലൈ വരെ) ഇന്ത്യയിൽ ദേശീയ പ്രാധാന്യമുള്ള 167 സ്ഥാപനങ്ങൾ ഉണ്ട് (ഐ.എൻ.ഐ). 23 IIT-കൾ, 20 AIIMS-കൾ, 21 IIM-കൾ, 31 NIT-കൾ, 25 IIIT-കൾ, 7 IISER-കൾ, 7 NIPER-കൾ, 5 NID-കൾ, 3 SPA-കൾ, 2 NIFTEM-കൾ, 7 കേന്ദ്ര സർവകലാശാലകൾ, 4 മെഡിക്കൽ സ്ഥാപനങ്ങളും മറ്റു 12 പ്രത്യേക സ്ഥാപനങ്ങളും. പ്ലസ്ടുവിന് ശേഷം എഴുതാവുന്ന 37 -ൽ അധികം പ്രവേശന പരീക്ഷകൾ ഉണ്ട്. ഓരോരുത്തരുടെയും അഭിരുചിക്കനുസരിച്ച് ചേരാവുന്ന വ്യത്യസ്തങ്ങളായ കോഴ്സുകൾ. ഉയർന്ന റാങ്കുകളുള്ള ഇത്തരം സ്ഥാപനങ്ങളിൽ പഠിക്കാൻ അവസരം ലഭിക്കുമ്പോൾ ഉയർന്ന ജോലികൾ കരസ്ഥമാക്കാനും അവർക്ക് കഴിയും. സിവിൽ സർവീസ് പരീക്ഷാ ഫലങ്ങൾ പരിശോധിക്കുമ്പോൾ വിജയികളിൽ നല്ലൊരു ശതമാനം ഉയർന്ന റാങ്കുകളുള്ള സ്ഥാപനങ്ങളിൽ പഠിച്ചവരാണ് എന്നു കാണാം. ഈ സ്ഥാപനങ്ങളെ പരിചയപ്പെടുത്തുന്നതോടൊപ്പം ഇവ തങ്ങൾക്കു കൂടി പ്രാപ്യമായ സ്ഥാപനങ്ങളാണെന്ന് വിദ്യാർഥികളെയും രക്ഷിതാക്കളെയും ബോധ്യപ്പെടുത്തുക എന്നത് ഈ കാമ്പയിനിന്റെ ലക്ഷ്യമാണ്.

സർക്കാർ ജോലി എന്നത് യുവാക്കൾക്കിടയിൽ ഏറ്റവും കൂടുതൽ താല്പര്യമുണ്ടാവേണ്ട ഒരു തൊഴിൽ ഓപ്ഷനാണ്. രാജ്യത്തെയും ജനങ്ങളെയും സേവിക്കാൻ അവസരം ലഭിക്കുന്നതോടൊപ്പം ജോലി സ്ഥിരത ലഭിക്കുകയും ചെയ്യുന്നു. സേവന കാലത്തും വിരമിച്ച ശേഷവും ആരോഗ്യകരവും ആശങ്കകളില്ലാത്തതുമായ ജീവിതം നയിക്കാൻ ഈ ജോലികൾ സഹായിക്കുന്നു. മത്സര പരീക്ഷകളിലൂടെയും പരിശീലനത്തിലൂടെയും കരിയർ നേടാൻ ആർക്കും സാധിക്കും. ലാസ്റ്റ് ഗ്രേഡ് മുതൽ സിവിൽ സർവീസ് വരെയുള്ള തസ്തികകളിൽ ഉദ്ദേശ്യപൂർവം ശ്രമിച്ചാൽ ശരാശരി കഴിവുള്ള ആർക്കും പ്രവേശനം ലഭിക്കും എന്നതാണ് വസ്തുത. എന്നാൽ, സിവിൽ സർവീസിൽ ജനസംഖ്യാനുപാതികമായി നോക്കുമ്പോൾ ഉണ്ടാവേണ്ട പ്രാതിനിധ്യത്തിന്റെ അഞ്ചിൽ ഒന്ന് മാത്രമാണ് മുസ്ലിംകൾക്കുള്ളത്. അതിനു താഴെയുള്ള സർവീസിലും വലിയ വ്യത്യാസം ഒന്നുമില്ല. ഇത്തരം തൊഴിലുകൾക്കായി അപേക്ഷ നൽകുകയോ അതിനായി കാര്യമായി പരിശീലിക്കുകയോ ചെയ്യുന്നില്ല എന്നതാണ് പ്രശ്നം. വിപുലമായ ബോധൽക്കരണത്തിലൂടെയും പരിശീലന പരിപാടികളിലൂടെയും ഇത് മറികടക്കണം.
സംരംഭകത്വമാണ് ഈ കാമ്പയിനിൽ പീപ്പ്ൾസ് ഫൗണ്ടേഷൻ ഉൾപ്പെടുത്തിയിട്ടുള്ള മറ്റൊരു വിഷയം. ഒരു സമൂഹത്തിന്റെ സാമ്പത്തിക ഭദ്രത സംരംഭകത്വവുമായി ബന്ധപ്പെട്ടു കിടക്കുന്നു. നല്ല സംരംഭങ്ങൾ വരുമ്പോൾ തൊഴിൽ അവസരങ്ങൾ കൂടുന്നു. ഉൽപാദനം വർധിക്കുന്നു, സാമ്പത്തിക വളർച്ചയുണ്ടാവുന്നു.
നിർമിത ബുദ്ധിയാണ് മറ്റൊരു മേഖല. കാലത്തിനനുസരിച്ച വളർച്ച നമുക്ക് ലഭിക്കുന്നത് ആധുനിക സാങ്കേതിക വിദ്യകൾ ഉപയോഗിക്കുമ്പോഴാണ്. സാങ്കേതിക രംഗത്തെ വളർച്ചക്കൊപ്പം സഞ്ചരിക്കാൻ കഴിയണം.

വ്യക്തമായ ദിശാബോധം നൽകി ആസൂത്രിതമായ പ്രവർത്തനങ്ങൾ നടത്തുമ്പോൾ അതിനനുസൃതമായ നേട്ടങ്ങൾ ഉണ്ടാവും. ആ അർഥത്തിലുള്ള ബോധവൽക്കരണ പരിപാടിയാണ് 'യുവശാക്തീകരണത്തിലൂടെ സുസ്ഥിര വികസനം' എന്ന കാമ്പയിൻ. സംസ്ഥാനത്ത് 15,000 വിദ്യാർഥികളെയും യുവാക്കളെയും ലക്ഷ്യമിട്ടാണ് ഇത് ആസൂത്രണം ചെയ്തിരിക്കുന്നത്. മഹല്ല് സംവിധാനങ്ങൾ, പ്രാദേശിക സന്നദ്ധ സംഘടനകൾ, യുവജന സംഘടനകൾ എന്നിവയുടെ സഹകരണത്തോടെയാണ് പരിപാടികൾ നടത്തുക. താൽപര്യമുള്ള അത്തരം സംവിധാനങ്ങൾക്ക് തങ്ങൾ ഉദ്ദേശിക്കുന്ന സ്ഥലത്ത് പരിപാടി നടത്താൻ പീപ്പ്ൾസ് ഫൗണ്ടേഷൻ സൗകര്യം ചെയ്തുകൊടുക്കും. പ്രാദേശിക സംഘാടനവും അതിനുള്ള ചെലവുകളും അവർ കണ്ടെത്തണം. ഫാക്കൽറ്റി സൗകര്യങ്ങൾ പീപ്പ്ൾസ് ഫൗണ്ടേഷൻ നല്കും.
മലപ്പുറം മലബാർ ഹൗസിൽ നടന്ന സംസ്ഥാന തല ലോഞ്ചിങ് ചടങ്ങിൽ പീപ്പ്ൾസ് ഫൗണ്ടേഷൻ വൈസ് ചെയർമാൻ എം. അബ്ദുൽ മജീദ് അധ്യക്ഷത വഹിച്ചു. കൂട്ടിലങ്ങാടി ടൗൺ മഹല്ല് കമ്മിറ്റിയുടെ സഹകരണത്തോടെയാണ് പരിപാടി നടത്തിയത്. മഹല്ല് കമ്മിറ്റി പ്രസിഡന്റ് സി. മുസ്തഫ ഹുസൈൻ സ്വാഗതവും, പീപ്പ്ൾസ് ഫൗണ്ടേഷൻ പ്രോജക്ട് ഡയറക്ടർ റമീം നന്ദിയും പറഞ്ഞു. ജലാൽ അഹമ്മദ് (മൈന്റ് പവർ ട്രെയിനർ), കെ.പി ലുഖ്മാൻ, പി.കെ അനീസ് (അസി. പ്രഫസർ, ലോ കോളേജ്, കോഴിക്കോട്), ഷബീൻ വി. ഉസ്മാൻ എന്നിവർ ക്ലാസ്സുകൾ നയിച്ചു. പിപ്പ്ൾസ് ഫൗണ്ടേഷൻ മലപ്പുറം ജില്ലാ കോർഡിനേറ്റർ അബ്ദുർറഹീം സമാപന പ്രസംഗം നടത്തി.
പരിപാടികൾ നടത്താൻ താല്പര്യമുള്ള മഹല്ല് കമ്മിറ്റികൾ, മറ്റു ഏജൻസികൾ പ്രോജക്ട് ഡയറക്ടർ റമീമുമായി 9746140520 നമ്പറിൽ ബന്ധപ്പെടണം. l

പഠനത്തിനായി കാനഡയിലെത്തിയ വിദ്യാർഥികൾ ഒത്തുചേർന്നു. വെളിച്ചം സ്റ്റുഡന്റ്സ് ഫോറം (വി.എസ്.എഫ്) ആണ് സംഗമം സംഘടിപ്പിച്ചത്. പരസ്പരം താങ്ങാവുന്നതിനൊപ്പം, മൂല്യവത്തായ ജീവിത രീതികൾ പിന്തുടരുന്നതിനും, ധാർമികവും സമാധാന പൂർണവുമായ ജീവിതം നയിക്കുന്നതിനും വിദ്യാർഥികളെ പ്രേരിപ്പിക്കുക എന്ന ലക്ഷ്യത്തോടെയാണ് അമേരിക്കയിലും കാനഡയിലുമുള്ള വെളിച്ചം നോർത്ത് അമേരിക്ക കൂട്ടായ്മ ഈ സ്റ്റുഡന്റ്സ് ഫോറം രൂപവത്കരിച്ചിരിക്കുന്നത്. വിവിധ കോഴ്സുകളിൽ പഠിച്ചുകൊണ്ടിരിക്കുന്ന 29 വിദ്യാർഥികളാണ് കാനഡയിലെ ആദ്യ സംഗമം കൂടിയായ ഈ പരിപാടിയിൽ ഒത്തുകൂടിയത്. നോർത്ത് അമേരിക്കയിലെ വിദ്യാർഥി സമൂഹത്തിനിടയിൽ ചലനാത്മകവും, ക്രിയാത്മകവുമായ സാന്നിധ്യമാവുകയാണ് വെളിച്ചം സ്റ്റുഡന്റ്സ് ഫോറം.

സ്വാലിഹയുടെ ഖുർആൻ പാരായണത്തോടെ പരിപാടികൾ ആരംഭിച്ചു. എം.സി അബ്ദുൽ ഹഖ് പരിപാടി നിയന്ത്രിച്ചു. വി.എസ്.എഫ് പ്രസിഡന്റ് അമാൻ ഉദ്ഘാടനം നിർവഹിച്ചു. VSF പബ്ലിക് റിലേഷൻസ് സെക്രട്ടറി അബ്ദുല്ല മുഹമ്മദ് ഫോറത്തിന്റെ ലക്ഷ്യങ്ങളും വിവിധ പരിപാടികളും വിശദീകരിച്ചു. പരസ്പരം താങ്ങായി നിൽക്കുക എന്നത്, വീടും നാടും വിട്ട് ഏറെ വിദൂരത്ത് ജീവിക്കേണ്ടിവരുന്നവർ നിർവഹിക്കേണ്ട അതിപ്രധാന ദൗത്യമാണെന്ന് അദ്ദേഹം പറഞ്ഞു.

'പാശ്ചാത്യ ലോകത്തെ ആക്ടിവിസം' എന്ന വിഷയത്തിൽ നബീൽ ക്ലാസ്സ് നയിച്ചു. ചരിത്രത്തിന്റെ താളുകളിൽനിന്ന് പാഠങ്ങൾ ഉൾക്കൊണ്ടുകൊണ്ട് കാലഘട്ടത്തിന്റെ ആവശ്യങ്ങളോട് ക്രിയാത്മകമായി പ്രതികരിക്കുന്ന യുവത്വം ഈ കാലത്തിന്റെ ഏറ്റവും വലിയ തേട്ടമാണെന്ന് അദ്ദേഹം പറഞ്ഞു. തുടർന്ന് മൈൻഡ് യുവർ മൈന്റ് എന്ന വിഷയത്തിൽ സുഹൈൽ ക്ലാസ്സ് നയിച്ചു. ആരോഗ്യമുള്ള ശരീരത്തിലേ ആരോഗ്യമുള്ള മനസ്സുണ്ടാകൂ. ഒറ്റയാകുന്നതിനെക്കാൾ ഒന്നിച്ചു നിൽക്കുന്നത് മനസ്സിന് ആരോഗ്യവും സംതൃപ്തിയും നൽകുമെന്ന് അദ്ദേഹം കൂട്ടിച്ചേർത്തു.
'കാനഡയിലെ ജോലിസാധ്യതകളും വളർച്ചയും' എന്ന വിഷയത്തിൽ ഷിയാസ് നയിച്ച ക്ലാസ്സായിരുന്നു അടുത്തത്. വിദ്യാർഥികൾക്ക് ഏറെ ഉപകാരപ്രദമായ ക്ലാസ്സിൽ എഞ്ചിനീയറിംഗ്, മെഡിസിൻ തുടങ്ങിയ മേഖലകളിൽ കാനഡയിലെ സാധ്യതകൾ അദ്ദേഹം പങ്കുവെച്ചു. വിവിധ ഭാഗങ്ങളിൽനിന്നെത്തിയവരുടെ പരസ്പരം പരിചയപ്പെടലുകളും ചോദ്യോത്തരങ്ങളും രസകരമായ കളികളും ഒത്തുകൂടലിനെ ജീവസ്സുറ്റതാക്കി. അബ്ദുല്ല ഹാരിസും മുഹമ്മദ് ഹാഷിറും പരിപാടിയുടെ സംഘാടനത്തിൽ വലിയ പങ്കുവഹിച്ചു. വെളിച്ചം നോർത്ത് അമേരിക്ക പ്രസിഡന്റ് നിയാസ് സാഹിബിന്റെ ഉദ്ബോധനത്തോടെ പരിപാടി സമാപിച്ചു. Contact number: +1 (786) 708-7555
l

കോഴിക്കോട് ബീച്ച് മറൈന്‍ ഗ്രൗണ്ടില്‍ കഴിഞ്ഞ ഫെബ്രുവരി 14-ന് ജമാഅത്തെ ഇസ് ലാമി കേരള ഘടകം സംഘടിപ്പിച്ച സാഹോദര്യ സമ്മേളനം വൻ ജനപങ്കാളിത്തം കൊണ്ട് ശ്രദ്ധേയമായി. ഗ്യാന്‍വാപി മസ്ജിദ് ഇമാം അബ്ദുല്‍ ബാത്വിന്‍ നുഅ്മാനി മുഖ്യാഥിതിയായിരുന്നു. ജമാഅത്തെ ഇസ്ലാമി ഹിന്ദ് അഖിലേന്ത്യാ അമീര്‍ സയ്യിദ് സആദത്തുല്ലാ ഹുസൈനി സമ്മേളനം ഉദ്ഘാടനം ചെയ്തു.

ജമാഅത്തെ ഇസ്ലാമി സംസ്ഥാന ജനറൽ സെക്രട്ടറി ടി.കെ ഫാറൂഖ് അധ്യക്ഷത വഹിച്ചു. ജമാഅത്തെ ഇസ്ലാമി കേരള അമീർ പി. മുജീബുർറഹ്മാന്‍, പെഴ്സണൽ ലോ ബോർഡ് എക്സിക്യൂട്ടീവ് അംഗം ഹാഫിള് അബ്ദുശ്ശുക്കൂര്‍ ഖാസിമി, ടെലഗ്രാഫ് ദിനപത്രം മുൻ എഡിറ്റർ ആര്‍. രാജഗോപാല്‍, ജംഇയ്യത്തുൽ ഉലമായെ ഹിന്ദ്‌ സംസ്ഥാന ജനറൽ സെക്രട്ടറി വി. എച്ച് അലിയാര്‍ ഖാസിമി, സാഹിത്യകാരൻ പി. സുരേന്ദ്രന്‍, മാധ്യമ പ്രവർത്തകൻ എന്‍.പി. ചെക്കുട്ടി, എഴുത്തുകാരൻ കെ.കെ ബാബുരാജ്, ജമാഅത്തെ ഇസ്ലാമി സംസ്ഥാന അസി. അമീർ വി.ടി അബ്ദുല്ലക്കോയ തങ്ങള്‍, മറുവാക്ക് എഡിറ്റർ അംബിക, മാധ്യമപ്രവർത്തകൻ ബാബുരാജ് ഭഗവതി, വനിതാ വിഭാഗം പ്രസിഡന്റ് പി.ടി.പി സാജിദ സംസാരിച്ചു. എം.കെ മുഹമ്മദലി, ടി. മുഹമ്മദ് വേളം എന്നിവർ പ്രമേയങ്ങൾ അവതരിപ്പിച്ചു. ജമാഅത്തെ ഇസ്ലാമി സംസ്ഥാന സെക്രട്ടറി ശിഹാബ് പൂക്കോട്ടൂർ സ്വാഗതവും ജില്ലാ പ്രസിഡന്റ് ഫൈസൽ പൈങ്ങോട്ടായി നന്ദിയും പറഞ്ഞു.
പ്രകടനത്തിന് എം.ഐ അബ്ദുൽ അസീസ്, ടി.കെ ഫാറുഖ്, ശിഹാബ് പൂക്കോട്ടൂർ, അബ്ദുസ്സലാം വാണിയമ്പലം, വി.ടി അബ്ദുല്ലക്കോയ തങ്ങൾ, എം.കെ മുഹമ്മദലി, ടി. മുഹമ്മദ്‌ വേളം, സി.ടി സുഹൈബ്, അബ്ദുൽ ഹക്കീം നദ്‌വി, ടി. ശാക്കിർ, ആർ. യൂസുഫ്, എച്ച്. ശഹീർ മൗലവി, പി.ടി.പി സാജിദ, ടി.കെ മുഹമ്മദ് സഈദ്, അഡ്വ. തമന്ന സുൽത്താന എന്നിവർ നേതൃത്വം നൽകി. സരോവരം ബയോ പാർക്കിന് സമീപത്തു നിന്നാരംഭിച്ച് ബീച്ചിൽ സമാപിച്ച പ്രകടനത്തിൽ പതിനായിരങ്ങൾ അണിനിരന്നു.

പള്ളികൾ കൈയേറുന്ന തീക്കളി തകർക്കുക മുസ്‌ലിം സമുദായത്തെ മാത്രമല്ല, രാജ്യത്തെ തന്നെയാണെന്ന് സാഹോദര്യ സമ്മേളനം ഉദ്ഘാടനം ചെയ്തുകൊണ്ട് ജമാഅത്തെ ഇസ്‌ലാമി ഹിന്ദ്‌ അഖിലേന്ത്യാ അമീർ സയ്യിദ് സആദത്തുല്ലാ ഹുസൈനി പറഞ്ഞു. രാജ്യത്തെ ഹിന്ദുത്വത്തിന്റെ മുഖ്യമന്ത്രിമാർ തമ്മിൽ വെറുപ്പ് വമിപ്പിക്കുന്നതിൽ മത്സരിക്കുകയാണ്. നിയമവും കോടതിയും ഒക്കെ അവകാശങ്ങൾ നിഷേധിക്കുകയാണ്. രാജ്യത്ത് കൈയേറി എന്ന് സർക്കാർ തന്നെ പറയുന്ന പതിനായിരക്കണക്കിന് ഹെക്ടർ ഭൂമിയുണ്ട്. പക്ഷേ, നൂറ്റാണ്ടുകൾക്കു മുമ്പേ നിർമിച്ച പള്ളി കൈയേറ്റമെന്നാരോപിച്ച് രാത്രിയുടെ മറവിൽ പൊളിച്ചുനീക്കുന്ന അതിക്രമം അരങ്ങേറുകയാണ്. ഈ രാജ്യത്തിന്റെ ഏറ്റവും വലിയ സമ്പത്ത് യുവത്വമാണ്. അതിനെ ഉപയോഗപ്പെടുത്തി രാജ്യത്തെ പുരോഗതിയിലേക്ക് നയിക്കുകയാണ് വേണ്ടിയിരുന്നത്. പകരം എല്ലാം വംശീയതയിൽ തട്ടിത്തകരുകയാണ്. പക്ഷേ, ഒരിക്കലും കീഴടങ്ങില്ലെന്ന പ്രഖ്യാപനമാണ് ഈ റാലി. ഭയമോ ദുഃഖമോ നിരാശയോ പടർത്താൻ ഒരു ശക്തിക്കും ആവില്ലെന്നും അമീർ പറഞ്ഞു.

ഗ്യാൻവാപി മസ്ജിദിനെ കുറിച്ച് സംഘ് പരിവാർ പ്രചരിപ്പിക്കുന്നതെല്ലാം വ്യാജമാണെന്ന് മുഖ്യാതിഥിയായി പങ്കെടുത്ത ഗ്യാൻവാപി മസ്ജിദ് ഇമാം അബ്ദുൽ ബാത്വിൻ നുഅ്മാനി ചൂണ്ടിക്കാട്ടി. ബനാറസിനെ കുറിച്ച് എഴുതപ്പെട്ട ചരിത്രത്തിലെവിടെയും പള്ളി നിലനിന്ന സ്ഥലത്ത് ക്ഷേത്രം ഉള്ളതായി പരാമർശമില്ല. മുഗൾ കാലഘട്ടത്തിൽ നിർമിച്ചതാണെന്നാണ് ചരിത്രം രേഖപ്പെടുത്തുന്നത്. പള്ളിയുടെ നിലവറയിൽ തൊട്ടടുത്ത ക്ഷേത്രത്തിന്റെ സാധന സാമഗ്രികൾ സൂക്ഷിക്കാൻ അനുവദിച്ചതാണ് പൂജ നടന്നിരുന്നു എന്ന നിലയിൽ പ്രചരിപ്പിക്കുന്നത്. പള്ളിയിലേക്ക് തിരിഞ്ഞുനിൽക്കുന്ന നന്ദി രൂപം ബ്രിട്ടീഷ് കുതന്ത്രത്തിന്റെ ഭാഗമായിരുന്നു. വുദൂ ഖാനയിലെ ഫൗണ്ടയ്്നിൽ ശിവലിംഗമില്ലെന്ന് തെളിയിക്കാൻ ഞങ്ങൾ സന്നദ്ധമായിരുന്നെങ്കിലും കോടതി അത് അനുവദിച്ചില്ല. ആരാധാനാലയ നിയമം മിഥ്യാധാരണയാണെന്ന് തെളിയിക്കുന്നതാണ് കോടതിയുടെ നടപടികളെന്നും അദ്ദേഹം പറഞ്ഞു. l

കഴിഞ്ഞ ഏഴര പതിറ്റാണ്ടായി ലോക മലയാളി സമൂഹത്തിന് ഉന്നത ഇസ്ലാമിക വിദ്യാഭ്യാസം നൽകിവരുന്ന 'യൂനിവേഴ്സിറ്റി'യാണ് ഇസ്ലാമിക് പബ്ലിഷിംഗ് ഹൗസ് എന്ന് പറയുന്നത് അതിശയോക്തിയല്ല. കോളേജുകളിലും മറ്റു കലാലയങ്ങളിലും പോയി പഠിക്കാൻ ഭാഗ്യമില്ലാത്ത ധാരാളം പേർ ഐ.പി.എച്ച് ഗ്രന്ഥങ്ങൾ വായിച്ച് ഇസ്ലാമിക പാണ്ഡിത്യം നേടിയിട്ടുണ്ട്. ടി.കെ അബ്ദുല്ല സാഹിബ് അങ്ങനെയുള്ള ഒരു പ്രസ്ഥാന പ്രവർത്തകയെ, തന്റെ സ്വതസിദ്ധമായ ഭാഷയിൽ 'ഐ.പി.എച്ചിൽ നിന്ന് പി.എച്ച്.ഡി നേടിയ മഹതി' എന്ന് വിശേഷിപ്പിച്ചത് ഓർക്കുന്നു. പ്രമുഖ ഇസ് ലാമിക ചിന്തകൻ മർഹൂം ടി. മുഹമ്മദ് സാഹിബിന്റെ മകളും എന്റെ സഹധർമിണിയുമായ റഹ്്മത്താണ് ഈ വനിത.

ഇങ്ങനെ ഇസ്ലാമിന്റെ സാമ്പത്തിക, സാമൂഹിക, രാഷ്ട്രീയ, കർമശാസ്ത്ര വശങ്ങൾ വിവരിക്കുന്ന ഐ.പി.എച്ച് സാഹിത്യങ്ങൾ മലയാളികളെ പലവിധത്തിൽ ആകർഷിക്കുകയും സ്വാധീനിക്കുകയും ചെയ്യുന്നുണ്ട്. അതിന്റെ ബഹിർസ്ഫുരണമായിരുന്നു ഏതാനും ദിവസങ്ങൾക്ക് മുമ്പ് മലപ്പുറം ടൗൺ ഹാൾ അങ്കണത്തിൽ നടന്ന ഐ.പി.എച്ച് വിജ്ഞാനോത്സവത്തിലേക്കുള്ള പുസ്തക പ്രേമികളുടെ അനിതരസാധാരണമായ കുത്തൊഴുക്ക്. ബ്രിട്ടീഷ് സാമ്രാജ്യത്വ ശക്തികൾക്കെതിരെ പോരാടി വീരമൃത്യു വരിച്ച വാരിയംകുന്നത്ത് കുഞ്ഞഹമ്മദ് ഹാജിയുടെ സ്മരണകൾ ജ്വലിച്ചുനിൽക്കുന്ന മലപ്പുറം ടൗൺ ഹാളിലായിരുന്നു നാലു ദിവസം നീണ്ട പുസ്തകോത്സവം.

മലപ്പുറം ടൗൺ ഹാൾ ഇതുവരെ കണ്ടിട്ടില്ലാത്ത വിജ്ഞാന വിരുന്നാണ് ഐ.പി.എച്ച് ഒരുക്കിയത്. ഉദ്ഘാടന ദിവസമായ ഫെബ്രുവരി 8 മുതൽ പുസ്തക സ്നേഹികളുടെ നിലക്കാത്ത പ്രവാഹമായിരുന്നു. വായന മരിച്ചിട്ടില്ലെന്നും മലപ്പുറത്തുകാർ വായനാ പ്രിയരാണെന്നും വിളിച്ചോതുന്നതായിരുന്നു ആ രംഗങ്ങൾ.

പതിനായിരത്തിലധികം പുസ്തകങ്ങൾ പ്രദർശിപ്പിച്ച് മലപ്പുറത്തിന്റെ സാംസ്കാരിക നവോത്ഥാന ചരിത്രത്തിൽ ഒരു പുതിയ അധ്യായം രചിക്കുകയായിരുന്നു ഐ.പി. എച്ച്. കേരളത്തിനകത്തും പുറത്തുമുള്ള നാല്പതോളം പ്രസാധനാലയങ്ങളുടെ പുസ്തകങ്ങളുമായാണ് പുസ്തക മേള അരങ്ങേറിയത്. സ്ഥലം എം.എൽ.എ പി. ഉബൈദുള്ള മേള ഉദ്ഘാടനം ചെയ്തു. മലയാളികളുടെ വായനാ സംസ്കാരം വളർത്തുന്നതിൽ ഐ.പി.എച്ച് വഹിച്ചുകൊണ്ടിരിക്കുന്ന പങ്കിനെ അദ്ദേഹം ശ്ലാഘിച്ചു. ശരിയായ വിജ്ഞാനം കരസ്ഥമാക്കാൻ സോഷ്യൽ മീഡിയയെയല്ല, നല്ല പുസ്തകങ്ങളെയാണ് ആശ്രയിക്കേണ്ടതെന്നും അദ്ദേഹം ഉണർത്തി. ഇസ് ലാമിനെയും മുസ് ലിംകളെയും സംബന്ധിച്ച് നുണകൾ പ്രചരിപ്പിച്ച് ഭീതിപരത്തുന്ന കാലത്ത് ഐ.പി.എച്ച് നിർവഹിക്കുന്ന ദൗത്യം മഹത്തരമാണെന്ന് മേളയിൽ മുഖ്യപ്രഭാഷണം നടത്തിയ ജ.ഇ കേരള അമീർ പി. മുജീബുർറഹ് മാൻ പറഞ്ഞു.

ടൗൺ ഹാളിനകത്ത് സമാന്തരമായി കലാ-വൈജ്ഞാനിക-സാംസ്കാരിക പരിപാടികളും അരങ്ങേറി. 'ഖിലാഫത്താനന്തര മുസ്ലിം ലോകം: നൂറു വർഷങ്ങൾ' എന്ന വിഷയത്തെ അധികരിച്ചുള്ള ചർച്ചയിൽ പങ്കെടുക്കാൻ ധാരാളം പേർ എത്തി. മുതിർന്ന മാധ്യമ പ്രവർത്തകനും ഗ്രന്ഥകാരനുമായ ഒ. അബ്ദുർറഹ്്മാൻ ചർച്ചക്ക് നേതൃത്വം നൽകി. ഇസ്ലാമിക ഗാനങ്ങളും യു.കെ അബൂ സഹ്‌ലയുടെ രചനാ ലോകവും, മുസ്ലിം സ്ത്രീ പൊതുഭാവനയും വൈവിധ്യങ്ങളും, സുന്നത്തിനോടുള്ള സമീപനവും ഹദീസ് നിഷേധ പ്രവണതകളും, മലപ്പുറം: ആഖ്യാനങ്ങളുടെ ഭിന്നമുഖങ്ങൾ എന്നീ വിഷയങ്ങളും ധാരാളം പേരെ ആകർഷിച്ചു.

മിക്ക വിഷയങ്ങളും പുതുതായി പ്രകാശനം ചെയ്യപ്പെട്ട പുസ്തകങ്ങളുടെ ഉള്ളടക്കവുമായി ബന്ധപ്പെട്ടതായിരുന്നു. ഉസ്മാനി ഖിലാഫത്ത് ചരിത്രം സംസ്കാരം, യു.കെ അബൂ സഹ് ലയുടെ ജീവിത യാത്ര, പ്രവാചകൻ പ്രവാചകത്വം ഹദീസ് നിഷേധം എന്നീ പുസ്തകങ്ങൾ പ്രകാശനം ചെയ്യപ്പെട്ട ശേഷമാണ് ബന്ധപ്പെട്ട ചർച്ചകൾ നടന്നത്.
കെ.ഇ.എന്നിന്റെ ഇന്ത്യയുടെ വർത്തമാനം പറഞ്ഞുകൊണ്ടുള്ള ശാന്തഗംഭീരമായ പ്രഭാഷണവും അൽ ജാമിഅ വിദ്യാർഥികൾ അവതരിപ്പിച്ച നാടകവും, കോൽക്കളിയും ദഫ് മുട്ടും, യു.കെ ഗാനങ്ങളുടെ അവതരണവും, കലാസന്ധ്യയും ജില്ലയുടെ വിവിധ കോണുകളിലുള്ള ജനങ്ങളെ പുസ്തക മേളയിലേക്ക് ആകർഷിച്ചു.
ഐ.പി.എച്ചും ജമാഅത്തെ ഇസ്ലാമി മലപ്പുറം ജില്ലാ സമിതിയും ചേർന്നു നടത്തിയ മുന്നേറ്റമായിരുന്നു മേളയെ വൻ വിജയമാക്കിയത്. മേള തുടങ്ങുന്നതിന് ഏതാനും ദിവസങ്ങൾക്ക് മുമ്പ് ഐ.പി.എച്ച് അസിസ്റ്റന്റ് ഡയറക്ടർ കെ.ടി ഹുസൈന്റെ നേതൃത്വത്തിൽ സമീപ പ്രദേശങ്ങളിലുള്ള വിദ്യാഭ്യാസ സ്ഥാപനങ്ങൾ സന്ദർശിച്ചിരുന്നു. ധാരാളം വിദ്യാർഥികളും അധ്യാപകരും മേള കാണാനെത്തി.
ഐ.പി.എച്ച് ഡയറക്ടർ ഡോ. കൂട്ടിൽ മുഹമ്മദലിയുടെ അഭിപ്രായത്തിൽ, പുസ്തക മേള പ്രതീക്ഷിച്ചതിലും വലിയ വിജയമായിരുന്നു. കേവലം നാലു ദിവസംകൊണ്ട് ഇരുപത്തേഴ് ലക്ഷം രൂപയുടെ പുസ്തകങ്ങൾ
വില്പനയായെന്നത് ഒരു വലിയ നേട്ടമാണ്. വായനയിലും മലപ്പുറം തന്നെ മുന്നിൽ എന്ന് തെളിയിക്കുന്നതായിരുന്നു പുസ്തകപ്പന്തലിലേക്ക് ഒഴുകിയെത്തിയ ജനക്കൂട്ടം.
സമൂഹത്തിന്റെ എല്ലാ തുറകളിലും പെട്ടവർ പ്രദർശനം കാണാനെത്തി. അവരിൽ കുട്ടികളും സ്ത്രീകളും യുവാക്കളും അധ്യാപകരും ഗവണ്മെന്റ് ജീവനക്കാരുമെല്ലാം ഉണ്ടായിരുന്നു. പുസ്തകങ്ങൾ മറിച്ചു നോക്കിയും വായിച്ചും ചോദിച്ച് മനസ്സിലാക്കിയും അവർ തെരഞ്ഞെടുത്തു. പലരും വലിയ സഞ്ചികളിൽ ധാരാളം പുസ്തകങ്ങൾ വാങ്ങി തിരിച്ചുപോകുന്ന കാഴ്ച ചേതോഹരമായിരുന്നു.
വായനയുടെ വീണ്ടെടുപ്പായി ഇതിനെ കാണാം.

ജമാത്തെ ഇസ് ലാമി ജില്ലാ പ്രസിഡന്റ് ഡോ. നഹാസ് മാള, സെക്രട്ടറി അബൂബക്കർ വളപുരം, ഐ.പി.എച്ച് കോർഡിനേറ്റർ അബ്ബാസ് വി. കൂട്ടിൽ, പുസ്തക മേള ജനറൽ കൺവീനർ ഹബീബ് ജഹാൻ എന്നിവരുടെ നേതൃത്വത്തിൽ ചിട്ടയോടും ആസൂത്രണത്തോടും കൂടി നടന്ന പ്രവർത്തനങ്ങളാണ് മേളയെ വൻ വിജയമാക്കിയത്. l

ഐ.പി.എച്ചിന്റെ പ്രയാണത്തിലെ ഒരു പ്രധാന ചുവട് വെപ്പായിരുന്നു 2024 ജനുവരി 11,12,13,14 തീയതികളിൽ എറണാകുളത്ത് നടന്ന പുസ്തക മേളയും സാംസ്കാരിക സദസ്സും. കോഴിക്കോടിനെ പ്പോലെ പുസ്തകമേളയുടെ അനുഭവം അധികമില്ലാത്ത എറണാകുളത്ത് പുസ്തക മേള നടത്താൻ തീരുമാനിച്ചപ്പോൾ ആശങ്കയായിരുന്നു കൂടുതൽ. പക്ഷേ, എല്ലാ ആശങ്കകളും അപ്രസക്തമാക്കുന്നതായിരുന്നു എറണാകുളം ടൗൺഹാളിലും പരിസരത്തുമായി നാല് നാൾ നീണ്ടുനിന്ന പുസ്തകോത്സവം. സംഘാടന മികവ്കൊ ണ്ടും ജനപങ്കാളിത്തംകൊണ്ടും മേള ശ്രദ്ധിക്കപ്പെട്ടു.

ഐ.പി.എച്ച് അതിന്റെ പുസ്തക മേളകളിൽ ഇതു വരെയും ഒരുക്കിയിട്ടില്ലാത്തത്ര വൻ ഗ്രന്ഥശേഖരം ഈ മേളയിൽ ഉണ്ടായിരുന്നു. ആയിരത്തോളം ഐ.പി.എച്ച് പുസ്തകങ്ങൾക്ക് പുറമെ കേരളത്തിലും പുറത്തുമുള്ള എല്ലാ പ്രമുഖ പ്രസാധകരുടെയും മലയാളം, ഇംഗ്ലീഷ്, അറബി പുസ്തകങ്ങൾ മേളയിൽ ഒരുക്കിയിരുന്നു. ആവശ്യക്കാർ തേടുന്ന പുസ്തകം ലഭിക്കാത്ത അനുഭവം മേളയിൽ ഉണ്ടായില്ലെന്ന് സന്ദർശകർ എഴുതിയ കുറിപ്പിൽനിന്ന് മനസ്സിലാകുന്നു.

മേളയുടെ എല്ലാ ദിവസവും നല്ല തിരക്ക് അനുഭവപ്പെട്ടു. ഇംഗ്ലീഷിലും മലയാളത്തിലുമുള്ള കുട്ടികളുടെ പുസ്തകങ്ങൾക്ക് വൻ ഡിമാന്റായിരുന്നു. സ്ത്രീകളും കുടുംബവുമായി ബന്ധപ്പെട്ട പുസ്തകങ്ങളും വൻതോതിൽ വിറ്റഴിക്കപ്പെട്ടു. ഇസ് ലാമിക സാഹിത്യങ്ങൾക്കു പുറമെ ജനറൽ പുസ്തകങ്ങളുടെ വൻ ശേഖരവും മേളയിലുണ്ടായിരുന്നു. എല്ലാതരം ബുക്കുകൾക്കും ആവശ്യക്കാർ ധാരാളമുണ്ടായി. സമൂഹത്തിലെ എല്ലാ തലത്തിലുള്ളവരും സന്ദർശകരുടെ കൂട്ടത്തിലുണ്ടായിരുന്നു. സ്ത്രീകളുടെ പങ്കാളിത്തവും അതിശയിപ്പിക്കുന്നതായിരുന്നു. പുസ്തകം വാങ്ങുന്നവരുടെ കൂട്ടത്തിലും സ്ത്രീകൾ ഒരു ചുവട് മുന്നിലാണെന്ന് പറയാം.
എറണാകുളം എം.എൽ.എ ജി. വിനോദാണ് മേള ഉദ്ഘാടനം ചെയ്തത്. നാടും ലോകവും നേരിടുന്ന വെല്ലുവിളികൾ നേരിടാൻ പുസ്തകങ്ങളുടെ പ്രചാരണം അനിവാര്യമായ ഘട്ടത്തിൽ പുസ്തക മേളകൾ നിർവഹിക്കുന്ന ദൗത്യം മഹത്തരമാണെന്ന് അദ്ദേഹം പറഞ്ഞു.

ഐ.പി.എച്ച് ഡയറക്ടർ ഡോ. കൂട്ടിൽ മുഹമ്മദലി അധ്യക്ഷനായിരുന്നു. അക്ഷരങ്ങളുടെ വ്യാപാരമല്ല, മറിച്ച് അക്ഷരങ്ങളുടെ വ്യവഹാരമാണ് ഐ.പി.എച്ച് നടത്തുന്നതെന്ന് മുഖ്യ പ്രഭാഷണം നിർവഹിച്ച ജമാഅത്തെ ഇസ് ലാമി കേരള അസിസ്റ്റന്റ് അമീർ വി.ടി അബ്ദുല്ലക്കോയ തങ്ങൾ പറഞ്ഞു. ഡോ. ജമാൽ മുഹമ്മദ്, അഡ്വ. ഇബ്റാഹീം ഖാൻ, മമ്മുട്ടി അഞ്ച്കുന്ന്, ജമാൽ അസ് ഹരി, കെ.കെ സലീം പ്രസംഗിച്ചു.
രണ്ടാം ദിവസം നടന്ന 'മധ്യ കേരളത്തിലെ മുസ് ലിം മുന്നേറ്റങ്ങൾ' എന്ന സെമിനാറിലൂടെ പുതിയ ഒരു ചർച്ചക്കും പഠനത്തിനും തുടക്കമിടുകയായിരുന്നു ഐ.പി.എച്ച്. എന്തുകൊണ്ടെന്നാൽ കേരള മുസ് ലിം നവോത്ഥാനത്തെ കുറിച്ചും മുന്നേറ്റത്തെ കുറിച്ചുമുള്ള എഴുത്തുകളും പഠനങ്ങളും പൊതുവേ മലബാർ കേന്ദ്രീകൃതമാണ്. അതിനുള്ള തിരുത്തായിരുന്നു ഈ സെമിനാർ. അലിയാർ ഖാസിമി സെമിനാർ ഉദ്ഘാടനം ചെയ്തു. ഡോ. സൈഫുദ്ദീൻ കുഞ്ഞ് വിഷയം അവതരിപ്പിച്ചു. ജമാൽ പാനായിക്കുളം അധ്യക്ഷനായിരുന്നു. സലാഹുദ്ദീൻ മദനി, അബൂബക്കർ ഫാറൂഖി, സോളിഡാരിറ്റി സംസ്ഥാന സെക്രട്ടറി തൻസീൽ, കെ.എ ഫിറോസ്, എ. അനസ് ചർച്ചയിൽ പങ്കെടുത്തു.

മൂന്നാം ദിവസം 'സ്ത്രീ: ശരീരം, വസ്ത്രം മതം, സംസ്കാരം' ചർച്ച ഡോ. ജി. ഉഷാകുമാരി ഉദ്ഘാടനം ചെയ്തു. ജമാഅത്ത് വനിതാ വിഭാഗം അധ്യക്ഷ പി.ടി.പി സാജിദ അധ്യക്ഷ ഭാഷണം നടത്തി. വെൽഫെയർ പാർട്ടി വൈസ് പ്രസിഡന്റ് പ്രേമ ജി. പിഷാരടി, ജി.ഐ.ഒ സെക്രട്ടറി ലുലു, ജുമാന, വി.കെ റംല, സൗദ ഫൈസൽ പ്രസംഗിച്ചു.
അവസാന ദിവസം 'പശ്ചിമേഷ്യൻ സംഘർഷവും ഇന്ത്യൻ നിലപാടും' എന്ന തലക്കെട്ടിൽ സംവാദം നടന്നു. ഇസ്രയേൽ-ഫലസ്ത്വീൻ സംഘർഷത്തിൽ ഇന്ത്യ ഔദ്യോഗികമായി ഇസ്രയേലിനോടൊപ്പം നിൽക്കുന്നത് ഇന്ത്യ പരരാഗതമായി പുലർത്തിവന്നിരുന്ന സാമ്രാജ്യത്വ വിരുദ്ധ നിലപാടിനെ തുരങ്കംവെക്കുന്നതാണെന്ന് സംവാദത്തിൽ പങ്കെടുത്തവർ അഭിപ്രായപെട്ടു. ഡോ. അരവിന്ദാക്ഷൻ, പി.കെ നിയാസ്, കെ.ടി ഹുസൈൻ, കെ. ബാബുരാജ്, ഡോ. അശ്്റഫ് കടക്കൽ, ഷിബു മീരാൻ, യൂസുഫ് ഉമരി, കെ.എ ഫൈസൽ, അബൂബക്കർ കാക്കനാട് പ്രസംഗിച്ചു.
അന്നുച്ചക്ക് നടന്ന, കുടുംബാംഗങ്ങൾ ഒരുമിച്ച് പങ്കെടുത്ത എഴുത്ത് പരീക്ഷ വളരെയധികം ശ്രദ്ധിക്കപ്പെട്ടു. വൈകുന്നേരം ശരീഫ് കൊച്ചിൻ നയിച്ച ഗാനമേളയും ഗംഭീരമായി.

ഏഴ് പുതിയ പുസ്തകങ്ങൾ മേളയിൽ പ്രകാശനം ചെയ്തു. വായനയും പുസ്തകങ്ങളും മരിക്കുന്നില്ലെന്ന് ബോധ്യപ്പെടുത്തുന്നതായിരുന്നു മേളക്ക് ലഭിച്ച ജനശ്രദ്ധയും അംഗീകാരവും. l

യൂറോപ്പിന്റെ അധിനിവേശ പദ്ധതികൾ സൃഷ്ടിച്ച യൂറോ കേന്ദ്രിത ലോകക്രമത്തിലാണ് നാം ജീവിക്കുന്നത്. ഉന്മൂലനങ്ങളിലൂടെയും വംശീയ അടിച്ചമർത്തലുകളിലൂടെയും നിർമിക്കപ്പെട്ട പ്രസ്തുത അധികാര ഘടനയാണ് ഇന്നോളമുള്ള ആധുനിക ലോകത്തെ നിർവചിക്കുന്നത്. 1492-ൽ Reconquista എന്ന പേരിൽ ഐബീരിയയിൽ നടത്തിയ നരനായാട്ട്, ആയിരക്കണക്കിന് ജനങ്ങളെയാണ് കൊന്നൊടുക്കിയത്. രാഷ്ട്രീയ ആധുനികതയുടെ ആരംഭമായി കണക്കാക്കുന്ന പ്രസ്തുത സംഭവം, മുസ്്ലിം ഭരണകൂടത്തെ വികേന്ദ്രീകരിക്കുന്ന രാഷ്ട്രീയ പദ്ധതിയായിരുന്നു. ഒരുതരത്തിൽ കൊളോണിയലിസത്തിന്റെ ആരംഭമായി ഒട്ടുമിക്ക ചിന്തകരും ഇതിനെ കണക്കാക്കുന്നുണ്ട്. അങ്ങനെ വരുമ്പോൾ, Reconquista എന്ന അധിനിവേശ പദ്ധതി സമകാലിക പ്രതിസന്ധികളെ വിമർശനാത്മകമായി സമീപിക്കാനുള്ള വലിയൊരു സാധ്യത തുറന്നുതരുന്നുണ്ട്. അതിൽ ഊന്നിക്കൊണ്ടാണ് എസ്.ഐ.ഒ കേരളയുടെ ആഭിമുഖ്യത്തിൽ 'Deconquista: Navigating Muslimness, Relocating knowledge, Power and Resistance' എന്ന പേരിലുള്ള ഇന്റർനാഷണൽ അക്കാദമി കോൺഫറൻസ് കോഴിക്കോട് ആസ്പിൻ കോർട്ട് യാഡ് നഗരിയിൽ കഴിഞ്ഞ ഡിസംബർ 22, 23, 24 ദിവസങ്ങളിൽ അരങ്ങേറിയത്.

മുസ്്ലിമത്വം(Muslimness) എന്ന സംവർഗം വിഭാവനം ചെയ്യുന്ന രാഷ്ട്രീയ-സാമൂഹിക-സാംസ്കാരിക സാധ്യതകളെ ഉപയോഗപ്പെടുത്തി ആധുനിക ലോകക്രമത്തിന്റെ അധികാര ഘടനയെ അപകോളനീകരിക്കാൻ ശേഷി സമ്മാനിക്കുന്ന ഇടങ്ങളായിരുന്നു കോൺഫറൻസിന്റെ സെഷനുകൾ. 'മാപ്പിള ഒരു തികഞ്ഞ പൗരനല്ല എന്ന കൊളോണിയൽ നിർവചനത്തിന്റെ പരിണതിയായിരുന്നു ക്ലാസ് മുറികളിൽ അധ്യാപകരുടെ അസ്വാഭാവിക നോട്ടങ്ങൾ.' Nationalism, Hindutwa and the Question of Islam എന്ന സെഷനിൽ തന്റെ ബാല്യകാലത്തെ ഓർത്തെടുത്തുകൊണ്ട് പ്രശസ്ത സാമൂഹിക ചിന്തകൻ എം.ടി അൻസാരി പറഞ്ഞ വാക്കുകളാണിത്. പ്രസ്തുത ദേശരാഷ്ട്ര ചാപ്പ കുത്തലുകളോട് നമ്മൾ വസ്തുനിഷ്ഠമായി പ്രതികരിക്കേണ്ടതുണ്ടെന്ന് ഹൈദരാബാദ് സെൻട്രൽ യൂനിവേഴ്സിറ്റി ഗവേഷക വിദ്യാർഥി താഹിർ ജമാൽ പറഞ്ഞു.
മലബാറിന്റെ കോളനിവത്കൃത ചരിത്രത്തെ പുനരന്വേഷിക്കാനും, ലോകത്തിന്റെ അപകോളനീകരണ ശ്രമങ്ങൾക്ക് പുതിയ സങ്കേതങ്ങൾ വികസിപ്പിക്കാനുമുള്ള മലബാർ സാധ്യതകളെ കണ്ടെത്തുക എന്ന ലക്ഷ്യത്തിൽ ഊന്നിക്കൊണ്ടുള്ള സെഷനായിരുന്നു പ്രമുഖ ചരിത്രകാരൻ പി.പി സെയ്താലി നേതൃത്വം നൽകിയ 'മലബാർ ഒരു അപകോളനീകരണ ഇടം.'

ലോകത്തിലെ പ്രമുഖ ജ്ഞാനോൽപാദന കേന്ദ്രങ്ങളായ ഫ്രാങ്ക്ഫർട്ട് പോലുള്ള സർവകലാശാലകൾ പ്രസിദ്ധീകരിക്കുന്ന വിജ്ഞാനകോശങ്ങളിൽ ഈയടുത്ത കാലം വരെ, 'മുസ്്ലിം', 'ഇസ്്ലാം' പോലുള്ള പദങ്ങൾ ഇല്ലായിരുന്നു. ഈയൊരു സന്ദർഭത്തിലാണ്, 'മുസ്്ലിമത്വം' എന്നൊരു വികാസക്ഷമതയുള്ള സംജ്ഞയെ കേന്ദ്രബിന്ദുവാക്കി 'മുസ്്ലിം വിമർശന പഠനങ്ങൾ' എന്ന വൈജ്ഞാനിക സംരംഭം ശക്തിപ്രാപിക്കുന്നത്. ഈ സംരംഭത്തിന്റെ അനിവാര്യതയെയും സാധ്യതയെയും സംബന്ധിച്ചുള്ള ചർച്ചകളായിരുന്നു പ്രശസ്ത ആഗോള ഇസ്്ലാമിക ചിന്തകരായ ഡോ. അബ്ദുൽ കരീം വകീലും ഡോ. സൽമാൻ സയ്യിദും നേതൃത്വം നൽകിയ 'മുസ്്ലിം വിമർശക പഠനങ്ങൾ' എന്ന വർക്ക്ഷോപ്പ് കൈകാര്യം ചെയ്തത്.
പാരമ്പര്യവും ആധുനികതയും തമ്മിലുള്ള കലുഷിതമായ ബന്ധത്തെ അടിസ്ഥാനമാക്കിയാണ് യു.എസി ലെ വിർജീനിയ ടെക് യൂനിവേഴ്സിറ്റി ഗവേഷക വിദ്യാർഥി ഷാൻ ഷാജഹാൻ സെഷൻ കൈകാര്യം ചെയ്തത്. നിലവിലെ കലുഷിതമായ ഇന്ത്യൻ സാഹചര്യത്തിൽ ഏക ദേശീയ പ്രകടനങ്ങൾ സന്നിവേശിപ്പിക്കപ്പെട്ട ഹിന്ദുത്വ രാഷ്ട്രീയത്തെ തിരിച്ചറിയാൻ സാധിക്കണമെന്ന് ഡോ. വൈ.ടി വിനയരാജ് ഓർമപ്പെടുത്തി. വെറുമൊരു നാഗരികതാ വാദത്തിൽ കേന്ദ്രീകൃതമായ അപകോളനീകരണ പദ്ധതിയാണ് ഹിന്ദുത്വയുടേതെന്ന് എച്ച്. ഷിയാസ് വ്യക്തമാക്കി.
കൊളോണിയൽ വിരുദ്ധ വ്യവഹാരങ്ങൾ എവ്വിധമാണ് ഇന്ത്യൻ സാഹചര്യത്തിൽ വികസിച്ചത് എന്ന് വിശദീകരിക്കുകയായിരുന്നു കെ.കെ ബാബുരാജ്. കൊളോണിയൽ ശക്തികൾ നടത്തുന്ന തുടർച്ചയായ ഹിംസകൾ കൊളോണിയൽ ആധുനികതയുടെ പര്യവസാനത്തെ കുറിച്ച സൂചനകളാണെന്ന് പ്രഫ. ആദിത്യ നിഗം അഭിപ്രായപ്പെട്ടു. ഇസ്ലാമടക്കമുള്ള വ്യത്യസ്ത മത-തത്ത്വ ദാർശനിക ചിന്തകളെ ഉപയോഗപ്പെടുത്തി അപകോളനീകരണ ചിന്തയെ ശക്തിപ്പെടുത്തേണ്ട സമയമാണിതെന്നും അദ്ദേഹം പറഞ്ഞു. ശാസ്ത്ര-സാമ്പത്തിക മേഖലയിൽ നടക്കേണ്ട അപകോളനീകരണത്തെ സംബന്ധിച്ച് സംവദിച്ച സുനന്ദൻ പി.യും ഡോ. ബിക്കും ഗില്ലും കോൺഫറൻസിനെ കൂടുതൽ വൈവിധ്യപൂർണമാക്കി.

മലബാറിന്റെ കടൽത്തീരങ്ങളിലേക്ക് കടന്നുവന്ന അധിനിവേശ ശക്തികളോട് ഉയർത്തിയ വിമതത്വത്തിന്റെയും പ്രതിരോധത്തിന്റെയും പണ്ഡിത ശബ്ദങ്ങൾ സമകാലിക രാഷ്ട്രീയ സാമൂഹിക നിർമിതികളെ പുനഃപരിശോധിക്കുന്നതിന് അഭികാമ്യമായ പരിപ്രേക്ഷ്യങ്ങൾ നമുക്ക് പ്രദാനം ചെയ്യുന്നുണ്ട്. DeConquista എന്ന ഈ വൈജ്ഞാനിക പദ്ധതി അത്തരമൊരു ദീർഘ ചരിത്രത്തോട് വിമർശനാത്മകമായി കണ്ണിചേരുകയാണുണ്ടായത്. ആധുനിക ലോകത്ത് രാഷ്ട്രീയ സാമൂഹിക രൂപവത്കരണങ്ങളെല്ലാം യൂറോ കേന്ദ്രിത അധികാര പദ്ധതിയാൽ ക്രമീകരിക്കപ്പെട്ടതിനാൽ, അവയോടുള്ള വിമർശനാത്മക ഇടപെടലുകളിലൂടെ ഇസ്ലാമിക ജ്ഞാന പാരമ്പര്യത്തെ പുനർവിചിന്തനം ചെയ്തുകൊണ്ട്, പുതിയൊരു ലോക ഭാവനയെ കണ്ടെടുക്കുകയാണ് ഈ കോൺഫറൻസ് ചെയ്തത്. അഥവാ, യൂറോ കേന്ദ്രിതമായതിൽനിന്നുള്ള വിടുതലും ഇസ്്ലാമിക ഭാവുകത്വങ്ങളെ പുനരുജ്ജീവിപ്പിക്കലുമായിരുന്നു Deconquista. l

"വിശ്വാസത്തെ മുറുകെപ്പിടിക്കുക, ആത്മാഭിമാനത്തെ ഉയർത്തുക"(UPHOLD IMAN, UPLIFT IZZAH)എന്ന തലക്കെട്ടിൽ, പുതിയ കാലത്തെ പെൺകുട്ടികളുടെ വ്യവഹാരങ്ങളെ പുനരാഖ്യാനിച്ച് അവരുടെ ഭാവനയെ, നൈപുണിയെ, പ്രായത്തെ, ഊർജത്തെ ഒക്കെ ക്രിയാത്മകവും സർഗാത്മകവുമായി അടയാളപ്പെടുത്താനുള്ള ശ്രമമായിരുന്നു ജി. ഐ.ഒ കേരള, പത്തിരിപ്പാല മൗണ്ട് സീന കാസിൽ ഡിസംബർ 25, 26 ദിവസങ്ങളിൽ സംഘടിപ്പിച്ച 'ഡിസ്കേർസോ മുസ്്ലിമ' ദ്വിദിന ക്യാമ്പസ് കോൺഫറൻസ്. 'അൽ അഖ്സ സ്ക്വയർ' എന്ന് നാമകരണം ചെയ്ത നഗരിയിൽ ഒത് വേദികളിൽ ഇരുപത്തിമൂന്നിലധികം സെഷനുകളിലായി എൺപത്തിയാറാളേം പ്രഗൽഭ വ്യക്തിത്വങ്ങൾ പങ്കെടുത്തു.

രാജ്യത്തുടനീളം സഞ്ചരിക്കുകയും വിവിധ ജനവിഭാഗങ്ങളുമായി സംസാരിച്ചുകൊണ്ടിരിക്കുകയും ചെയ്യുന്ന വ്യക്തി എന്ന നിലയിൽ ഇന്ത്യയിലെ ഏറ്റവും വൈബ്രന്റായ, രാജ്യത്തിന്റെ പുനർനിർമാണത്തിൽ നിർണായക പങ്കുവഹിക്കാൻ കഴിയുന്ന സംഘമായി കേരളത്തിലെ മുസ്്ലിം പെൺകുട്ടികൾക്ക് മാറാൻ സാധിച്ചതായി അനുഭവത്തിലൂടെ ബോധ്യമായിട്ടുണ്ടെന്ന് ഇന്ത്യൻ ജമാഅത്തെ ഇസ്്ലാമി ജനറൽ സെക്രട്ടറി ടി. ആരിഫലി ഉദ്ഘാടന സെഷനിൽ സദസ്സിനെ അഭിനന്ദിച്ചു.

കർണാടകയിലെ ഗുൽബർഗ ജില്ലയിൽനിന്നുള്ള എം.എൽ.എ ഖനീസ് ഫാത്തിമ, ഉത്തർ പ്രദേശിലെ രാഷ്ട്രീയ പ്രവർത്തക ഇഖ്റ ഹസൻ, ജമാഅത്തെ ഇസ്്ലാമി ഹിന്ദ്‌ ദേശീയ കമ്മിറ്റി അംഗം ഡോ. താഹ മതീൻ, നാഷണൽ ഫെഡറേഷൻ ഓഫ് പ്രസിഡൻറ് സുമയ്യ റോഷൻ, ജനറൽ സെക്രട്ടറി സമർ അലി, മീഡിയാ വൺ മാനേജിങ് എഡിറ്റർ സി. ദാവൂദ്, സീനിയർ എഡിറ്റർ നിഷാദ് റാവുത്തർ, സി.എ.എ -എൻ.ആർ.സി പ്രക്ഷോഭത്തിന്റെ മുന്നണിപ്പോരാളികളും വിദ്യാർഥി നേതാക്കളുമായ അഫ്രീൻ ഫാത്തിമ, ഷർജീൽ ഉസ്മാനി, റാനിയാ സുലൈഖ, നിദാ പർവീൻ, ഗായകരായ ദാനാ റാസിക്, സമീർ ബിൻസി, ഇമാം മജ്ബൂർ, മജിസ്ട്രേറ്റ് എം. താഹ, ഇസ്്ലാമിക് പബ്ലിഷിംഗ് ഹൗസ് അസിസ്റ്റന്റ് ഡയറക്ടർ കെ.ടി ഹുസൈൻ, മക്്തൂബ് മീഡിയ എഡിറ്റർ അസ്‌ലഹ് വടകര, മക്തൂബ് സി.ഇ.ഒ ഷംസീർ ഇബ്രാഹീം, മാധ്യമപ്രവർത്തക ഗസാല അഹമ്മദ്, ഫ്രറ്റേണിറ്റി മൂവ്മെന്റ് സംസ്ഥാന പ്രസിഡന്റ് കെ.എം ഷെഫ്രിൻ, വിമൻ ജസ്റ്റിസ് മൂവ്മെന്റ് സംസ്ഥാന പ്രസിഡന്റ് വി.എ ഫായിസ, സോളിഡാരിറ്റി യൂത്ത് മൂവ്മെന്റ് സംസ്ഥാന പ്രസിഡന്റ് സി.ടി സുഹൈബ്, സ്റ്റുഡന്റ്സ് ഇസ്്ലാമിക് ഓർഗനൈസേഷൻ സംസ്ഥാന പ്രസിഡന്റ് ടി. കെ മുഹമ്മദ് സഈദ്, ജമാഅത്തെ ഇസ്്ലാമി കേരള സെക്രട്ടറി ശിഹാബ് പൂക്കോട്ടൂർ, സംസ്ഥാന സമിതി അംഗം ടി. മുഹമ്മദ് വേളം, ജമാഅത്തെ ഇസ്്ലാമി വനിതാ വിഭാഗം പ്രസിഡന്റ് പി.ടി.പി സാജിത തുടങ്ങിയവർ സംസാരിച്ചു. ഗസ്സയിലെ പോരാളികൾക്ക് ഐക്യദാർഢ്യം അർപ്പിച്ചുകൊണ്ട്‌ വേദികൾക്ക് ഫലസ്ത്വീനുമായി ബന്ധപ്പെട്ട നാമങ്ങളാണ് നൽകിയത്.

'ഉറച്ച ശബ്ദങ്ങൾ പ്രതിരോധത്തിന്റെ കഥകൾ' എന്ന സെഷനിൽ, അന്യായമായി തുറുങ്കിലടക്കപ്പെടുകയും കടുത്ത നീതിനിഷേധത്തിന്റെ അതിജീവനപ്പോരാളികളായി എഴുന്നേറ്റു നിൽക്കുകയും ചെയ്തവരെയും അവരുടെ കുടുംബങ്ങളെയും വേദിയിൽ അണിനിരത്തി. കോൺഫറൻസിലെ, രണ്ടായിരത്തിലധികമുള്ള പെൺകുട്ടികളുടെ പങ്കാളിത്തം തന്നെ അത്ഭുതപ്പെടുത്തുന്നുവെന്ന് ഷർജീൽ ഉസ്മാനി പറഞ്ഞു. സിദ്ദീഖ് കാപ്പൻ, മുഹമ്മദ് റാബിയത്ത്, റാസിഖ് റഹീം, പി.എസ് അബ്ദുൽ കരീം, റൈഹാന കാപ്പൻ, വി.എച്ച് നജീബ, അഡ്വ. സുബീർ നഹ, അലൻ ഷുഹൈബ് എന്നിവർ നീതിനിഷേധിക്കപ്പെട്ടവരുടെ പ്രതിനിധാന സ്വരങ്ങളായി ഐക്യദാർഢ്യ സെഷനിൽ അണിനിരന്നു.

ജമാഅത്തെ ഇസ് ലാമി കേരള ഹൽഖാ അമീർ പി. മുജീബുർറഹ്മാൻ രണ്ട് ദിവസം നീണ്ടുനിന്ന പ്രോഗ്രാമിന്റെ സമാപന പൊതുസമ്മേളനം ഉദ്ഘാടനം ചെയ്തു. ഇസ് ലാമിക പ്രമാണങ്ങളും ചരിത്രവും ലിംഗ നീതിയെക്കുറിച്ചാണ് പറയുന്നത്. തട്ടമിട്ടവരെയും കറുത്ത വസ്ത്രം ധരിക്കുന്നവരെയും ഭീകരവാദികളായി ചിത്രീകരിക്കുന്നു. എന്നാൽ, അന്താരാഷ്ട്ര സർവകലാശാലകളിൽനിന്നടക്കം ഉന്നത വിദ്യാഭ്യാസം നേടുന്ന, രാജ്യത്തെ പ്രമുഖ കലാലയങ്ങളിൽനിന്ന് പൗരത്വ പ്രക്ഷോഭമടക്കമുള്ള പോരാട്ടങ്ങൾക്ക് നേതൃത്വം നൽകുന്ന മുസ് ലിം പെൺകുട്ടികളെല്ലാം തട്ടമിട്ടു കൊണ്ടുതന്നെയാണ് എല്ലാം സാധിച്ചെടുക്കുന്നത്- അദ്ദേഹം പറഞ്ഞു.ജമാഅത്തെ ഇസ് ലാമി കേന്ദ്ര കൂടിയാലോചനാ സമിതിയംഗം ഡോ. ത്വാഹ മതീൻ വിശിഷ്ടാതിഥിയായി. ജമാഅത്തെ ഇസ്്ലാമി കേരള ശൂറാ അംഗം പി. റുഖ്‌സാന സംസാരിച്ചു. പാലക്കാട് ജില്ലാ പ്രസിഡന്റ് കളത്തിൽ ഫാറൂഖ്, വനിതാ വിഭാഗം ജില്ലാ സെക്രട്ടറി ഫസീല ടീച്ചർ, സോളിഡാരിറ്റി ജില്ലാ പ്രസിഡന്റ് നവാഫ് പത്തിരിപ്പാല, എസ്.ഐ.ഒ ജില്ലാ പ്രസിഡന്റ് അനീസ് തിരുവിഴാംകുന്ന്, ഡിസ്കേർസോ മുസ്്ലിമ ജനറൽ കൺവീനർ ഷിഫാന എടയൂർ, ജി.ഐ.ഒ ജില്ലാ പ്രസിഡന്റ് ഹനാൻ. പി. നസ്റിൻ എന്നിവർ സംസാരിച്ചു.

പത്ര മാധ്യമങ്ങളിലെ സ്ത്രീ സാന്നിധ്യം, ഇന്ത്യൻ രാഷ്ട്രീയത്തിൽ ഹിജാബീ സ്ത്രീകളുടെ പ്രതിരോധം, കാമ്പസ് രാഷ്ട്രീയത്തിലെ മുസ്‌ലിം ഐഡന്റിറ്റി രൂപകൽപ്പനകൾ: വിജയങ്ങളും പരീക്ഷണങ്ങളും, മാറ്റത്തിന്റെ കാതൽ: പ്രതിസന്ധികളും നിലപാടുകളും, മുസ്‌ലിം പുനരാഖ്യാനം, ഇടത് പൊതുബോധവും സമകാലിക സ്ത്രീ രാഷ്ട്രീയവും, ന്യൂനപക്ഷ ലൈംഗികത: ഇസ്്ലാമിക വീക്ഷണം തുടങ്ങി വിവിധ വിഷയങ്ങൾ ചർച്ച ചെയ്യപ്പെട്ടു. മെഡിക്കൽ, എഞ്ചിനീയറിംഗ്, നിയമം, ആർട്‌സ്, സയൻസ്, മാധ്യമ, കൊമേഴ്‌സ് വിദ്യാർഥികൾക്ക് പ്രത്യേക സെഷനുകളുണ്ടായിരുന്നു. പണ്ഡിതന്മാരുമായി സംശയ നിവാരണത്തിനും അവസരമൊരുക്കി.

ജി.ഐ.ഒ സംസ്ഥന പ്രസിഡന്റ് അഡ്വ. തമന്ന സുൽത്താന, ജനറൽ സെക്രട്ടറി സുഹാന അബ്ദുൽ ലത്തീഫ്, വൈസ് പ്രസിഡന്റുമാരായ ആഷിഖ, നഫീസ തനൂജ, സംസ്ഥാന സെക്രട്ടറിമാരായ ലുലു മർജാൻ, ആയിശ ഗഫൂർ, സംസ്ഥാന സമിതി അംഗങ്ങളായ മുബശ്ശിറ, ജൽവ മഹറിൻ, നൗർ ഹമീദ്, ഷംന, സുന്ദുസ്, ഒ.വി ഷെഫ്ന, ഹുസ്ന, അഫ്ര ശിഹാബ്, സഫലീൻ, നിഷാത്ത്, സഫീന പരിപാടിക്ക് നേതൃത്വം നൽകി. l